Mavuzo Ankosa Anamengesa
Mudhidhi okosile Yezu Siyari ya Nabuya, anamafwara abale owakwana 70 arumiliye odhowa olaleya àli wuvi? Ejo entonya wi awene ahimunyanyala Yezu?
Ebaribari wi anamafwara abale 70 kalivo mudhidhi okosile Yezu Siyari ya Nabuya, mbwenyi ejo kintonya wi awene ahimunyanyala obe Yezu kaarumela vina. Yezu afuna akale na arumiwi aye bahi mudhidhi obule.
Kuloga, Yezu wanarumelavi anamafwara abale 12 vina 70. Voroma, Yezu ohasakula alobwana 12 mwa anamafwara aye otene, aba 12 iyene ohakuwela arumiwi. (Lk. 6:12-16) Iyene wali o Galileya mudhidhi watugumanihiliye arumiwi aye kumi na eli vina “oaruma olaleya [muttaka] w’Omwene wa Mulugu, wavuna aredda.” (Lk. 9:1-6) Musogorhomwa, Yezu bali o Judeya ohattoma ena 70 vina oharuma osogorho waye, eli-eli. (Lk. 9:51; 10:1) Kuloga, Yezu wahikana anamafwara mmimburoni dhottiyana-ttiyana mwalaleyiwa miselu dhaye.
Ayuda adhile okala anamafwara a Yezu anfwanyela omuja Paskwa yaka-yaka, txino ankosa ejuwene na amudhawa. (Obud. 12:6-11, 17-20) Mudhidhi mung’onovi ahinakwa Yezu na arumiwi aye ahidhowa o Jeruzalemi. Mbwenyi Yezu katugumanihile anamafwara aye otene a o Judeya, Galileya vina a Pereya wila akose mattanga manddimuwa a Paskwa. Eji enolagiha wi Yezu wafuna akale bahi na arumiwi aye mudhidhene obule. Iyene ohiloga dhahi na arumiwi aye: “Ddihunlela vaddiddi omuja Paskwa oddu na nyuwo, ddihinathi oya mmasosoni.”—Lk. 22:15.
Yezu wahikana mwaha dhapama dha okosa ejuwene. Mohigonela iyene agahikwa ninga “Mwana-Nibila wa Mulugu onthimiha yothega ya elabo.” (Jo. 1:29) Yezu agahikwa o Jeruzalemi, wenewo waperhekeliwa Mulugu mikutto mwari mwa vyaka dhinjene mundduni. Paskwa wanawubutxedha ana Izrayel ejile yakosile Yehova wi àfurule mw’Ejipitu, mbwenyi mukutto wa yobolo ogahipitta Paskwa sabwani ogahifurula nlogo na attu muttegani vina mukwani. (1 Kor. 5:7, 8) Okwa wa Yezu ohawodhiha arumiwi kumi na eli wita mulogo w’Okristu. (Ef. 2:20-22) Yotikiniha jawi, muttette wokoddela Jeruzalemi ohikana “mathuwa kumi na meli” munfwanyeya mazina a arumiwi 12 a Mwana-Nibila. (Ovuh. 21:10-14) Eji enolagiha wi arumiwi ororomeleya agahikana mabasa amakamaka vaddiddi a wakwanihedha efunelo ya Mulugu. Nona enononeleyamo Yezu ofuna okala na awene wi amuje Paskwa womariha vina muttupo okosiliye vasogorho—Siyari ya Nabuya.
Anamafwara a Yezu 70 na ena kaali na iyene vamuttuponi obu wamakamaka, masiki dhawene anamafwara otene ororomeleya agahiwodha opurelamo—Siyari ya Nabuya. Anamafwara otene agadhile okala Akristu ottikitteliwa agahikosa mpaddi wa nipagano na Omwene nilogile Yezu na arumiwi aye omattiyu obule womariha.—Lk. 22:29, 30.