Kalagiha wi Onowatamalela Alobwana Anlabihedhiwa na Yehova vina Yezu Mmulogoni

1. Mivaho gani dhinivahile Yezu?

KAWO okalile velaboni ya vati wakamihedhile ena opitta Yezu. Valiye velaboni ya vati, iyene wahikosa matikiniho menjene wila akamihedhe abale atabuwa. (Lk. 9:​12-17) Iyene ohinivaha nvaho wamakamaka opitta mivaho dhina modhela operheka egumi yaye wi anivune. (Jo. 15:13) Mumaleliye ovenyihiwa mukwani, Yezu ohidhowavi akalaga wotapuwa mada. Iyene wahiloga wi agahimukumbirha Yehova wila anivahe muya wokoddela wi onisunzihe vina onipangarhaze. (Jo. 14:​16, 17) Modhela matugumano Yezu onodhowavi anishagihaga wila niwodhe wakosa anamasunza orugunuwa elabo yotene.—Mt. 28:​18-20.

2. Mivaho dhinlogiwa va Éfeso 4:​7, 8 anaddiwana ani?

² Koona mvaho mwina wa Yezu. Murumiwi Paulo ohileba wi mmalile Yezu odhowa wirimu, “[iyene] oagawela athu mivaho dhaye.” (Kengesa Éfeso 4:​7, 8.) Paulo ohitapulelamo wi Yezu ohivaha mivaho esi wi akamihedhe milogo na mikalelo dhottiyana-ttiyana. (Ef. 1:​22, 23; 4:​11-13) Masaka abano, mivaho esi anaddiwana adhari okamihedha, anddimuwa a mmulogoni vina anameddelela milogo.a Ebaribari wi alobwana aba attu ohiligana vina anovonya. (Tia. 3:2) Mbwenyi Nabuya wehu Yezu Kristu onowalabihedha abali aba wi anikamihedhe.

3. Kavaha yotagiha enoniha mukalelo onawodhihu wakamihedha abale ansogorhela milogo.

³ Yezu ohattoma alobwana aba wi alibihe mulogo. (Ef. 4:12) Mbwenyi muttu-muttu wa iyo onofwanyelela okosa mpaddi waye wi akamihedhe abali aba wi àkwanihedhe muttorho onanina. Wi ninonelemo ejoya ndoweni nitanalele eji: Enji mwa iyo anokamihedha omagiwa wa Nyumba dha Omwene. Ena anokamihedha mabasa mena ninga opiya, wattukula anamalaba obe dhipano. Na mukalelo wakakene, modhela mazu ehu enowodheya okamihedha mabasa ankosa adhari okamihedha, anddimuwa a mmulogoni vina anameddelela milogo. Ninele wona mukalelo onnikamihedha mabasa ankosani vina ninawodhe dhavi watamalela awene na Yezu, onivahile alobwana aba.

ADHARI OKAMIHEDHA ANONIVAHA NIKAMIHEDHO

4. Mabasa gani attidda adhari okamihedha masaka a arumiwi?

⁴ Masaka arumiwi, abali enjene anttomiwa ninga adhari okamihedha. (1 Tim. 3:8) Enkala ninga bawene analoga Paulo va 1 Korinto 12:28 akamihedhile milogo. Dhotedhene dhinowoniha wi adhari okamihedha anttidda mabasa wila anddimuwa a mmulogoni awodhe ofwaseyela walibiha abali vina olaleya. Motagiha, txino adhari okamihedha anlabihedhiwa wi akose koopiya dha makoopiya dha Malebo a Bibilia obe txino awene angula dhipano dhafuneya wila dhikosiwena koopiyadha.

5. Mabasa gani anttidda adhari okamihedha masaka abano?

⁵ Kobuwela mabasa mang’onovi ankosa adhari okamihedha mmulogoni mwawo. (1 Ped. 4:10) Awene txino anottomeliwa weddiha kobiri ya mmulogoni, murudda wa olaleya wa mulogoya obe okumbirha vina wagawela abali mapublikasau, ena onokamihedha mpaddi wa audiyu vidiyu mmatugumanoni, ena anottomiwa ninga a indikadori obe anokamihedha mabasa a ovenyihedha Nyumba ya Omwene. Mabasa aba otene bamakamaka wila mulogoya wedde na mukalelo wofwanyelela. (1 Kor. 14:40) Ottiya ejuwenevi, ena ali adhari okamihedha anokosa dhipaddi dha Mabasa na Yeddelo Yehu ya Okristu vina anokosa diskursu dha vattaddo. Mudhari wokamihedha onodhaga ottomiwa omukamihedha musogorheli wa mabasa a olaleya. Vina masaka mena, mudhari wokamihedha anowobiwaga na anddimuwa a mmulogoni wila awaredhele abali.

6. Ninfwanyelela nni ovaha ttima mabasa ankosa adhari okamihedha?

⁶ Koona elogile ena mwaha wa nikamihedho ninvaha adhari aba mmulogoni. Murogora onkala o Bolívia onkuweliwa Beberly,b ohiloga: “Miyo ddinowodha opurelamo vaddiddi matugumano sabwa ya nikamihedho ninvaha adhari okamihedha. Sabwa ya mabasa ankosani miyo ddinowodha wiba, ovaha dhowakula, ovuruwana madiskursu, osunza na mavidiyu vina mafoto anlagihiwa mudhidhi wa matugumano. Awene anokamihedha obareleya wa Nyumba ya Omwene vina anowakamihedha abale anona matugumano na vidiyu-konferensia. Matugumano agamala awene anovivelela okuputta Nyumba ya Omwene, okamihedha weddiha kobiri ya mmulogoni vina onivaha mapublikasau anfunihu. Nihikana dhilobo dhinji dha watamalela sabwa ya mabasa ankosani!” Leslie, mwadhi wa munddimuwa wa mmulogoni onkala Colômbia ohiloga: “Mamunaga onokamihedhiwa venjene na adhari okamihedha, kohikala awene iyene agahikana mabasa menji okosa. Mwa dhawene, miyo ddinowatamalela sabwa ya oviperheka wila akamihedhe.” Txino weyo onoviwamo na mukalelo wakakene na adhari okamihedha a mmulogoni mwawo.—1 Tim. 3:13.

7. Ninawodhe dhavi olagiha watamalela adhari okamihedha? (Koona vina foto.)

⁷ Masiki akala ninotamalela mabasa ankosa adhari okamihedha, Bibilia ononikokomeza wi ninofwanyelela: Olagiha wi ninowatamalela. (Kol. 3:15) Munddimuwa wa mulogo onkala o Finlândia onkuweliwa Cristóvão onologa mukalelo onlagihiye otamalela waye, “Miyo ddinoleba kartau obe ddinowinviyari miselu dhinna nlebo na Bibilia vina ddinologa nikamihedho niddivahile mudhari wokamihedha obe ddinologa mukalelo onvahimi ttima mabasa ankosiye.” Pascal na Jael, ankala o Nova Caledonia, anowalobelelaga adhari okamihedha. Pascal ohiloga, “Ninomulobelelaga Yehova nimukumbirhaga, nimunlelaga obe nimutamalelaga sabwa ya adhari okamihedha a mulogo wehu.” Mwadhawene Yehova onowiwa vina onowakulaga malobelo aba, nona otene a mmulogoni anopurelamo.—2 Kor. 1:11.

ANDDIMUWA A MMULOGONI ANOLABA NA NTTOKOSO

8. Paulo olebeleni wi anddimuwa a mmulogoni anolaba na nttokoso? (1 Tesalónika 5:​12, 13)

⁸ Nsaka na arumiwi, anddimuwa a mmulogoni anlaba na nttokoso wi akamihedhe mulogo. (Kengesa 1 Tesalónika 5:​12, 13; 1 Tim. 5:17) Awene ansogorhela mulogo—kuloga, ansasanyedha matugumano vina na anddimuwa ena ankosa dhogana. Awene anavaha malago ohipirhiheya abali na arogora—ankosa ejuwene na okwela atamelaga obarela mulogo. (1 Tes. 2:​11, 12; 2 Tim. 4:2) Ottiya ejo, alobwana aba anfwanyela olaba wila asapele amudhawa, olibiha nroromelo nawa vina wunuwiha mandano awa na Yehova.—1 Tim. 3:​2, 4; Tito 1:​6-9.

9. Dhilobo gani dhinkosa anddimuwa a mmulogoni masaka abano?

⁹ Masaka abano anddimuwa a mmulogoni vina ahikana mabasa menjene okosa. Awene anamalaleya. (2 Tim. 4:5) Anddimuwa a mmulogoni anovaha yotagiha yapama modhela ozuzumela mabasa a olaleya, awene vina anosasanyedha mabasa a olaleya a mmuruddani wa mulogo wawa, anonishagiha wi nikale anamasunziha vina anamalaleya apama. Anddimuwa a mmulogoni anolaba ninga anamattonga oligana vina a ttagaraga. Muttu agakosa yottega enddimuwa, anddimuwa a mmulogoni anovilibihedha wi amukamihedhe wiyelela okana mandano na Yehova. Mudhidhi wakakene, awene anokosa muli-mwetemwene wila attiye mulogoya wokoddelene. (1 Kor. 5:​12, 13; Gal. 6:1) Opitta dhotene esi, anddimuwa a mmulogoni anoziwiwa ninga akumbuzi. (1 Ped. 5:​1-3) Awene anosasanya diskursu dhindela mBibiliani, anovilibihedha omuziwa muttu ddi muttu mmulogoni vina wawaredhela. Anddimuwa a mmulogoni ena anokamihedha mabasa a ovenyihedha Nyumba dha Omwene, osasanyedha matugumano a ttattamwa vina a murudda, anokamihedha Mparha Onlaba Mumodhani na Masipitale vina Makuru Anawaredhela Aredda, ottiya ejuwenevi awene anokamihedha mabasa mena. Kavali waganyedha wi anddimuwa a mmulogoni anolaba venjene!

10. Ninfwanyelela nni ovaha ttima mabasa ankosa anddimuwa a mmulogoni?

¹⁰ Yehova ohapikirhela adhari aye akumbuzi agazuzumele, venevo awene kagovilege elo nne kagagurumelege. (Jer. 23:4) Murogora onkuweliwa Johanna, onkala o Finlândia, ohona ebaribari ya mazu aba mudhidhi wali mamayaye muredda vaddiddi. Iyene onologa: “Miyo ddinorutxiwaga wawaddela attu ena mukalelo oniviwamo miyo, mbwenyi munddimuwa wa mmulogoni wahamuziwimi deretu wahiddivuruwana na ovilela, wahilobela na miyo vina wahiddilagiha wi Yehova onoddikwela vaddiddi. Miyo kaddinubuwela mowakwana-mwene mazu alogiliye, mbwenyi ddinowubuwela wi ddahikana murenddele. Vina ddinokuluvela wi Yehova wahimuruma mbali oddule wi addivahe nikamihedho mudhidhi wafunimi.” Anddimuwa a mmulogoni mwawo awukamihedhile dhavi?

11. Ninawodhe dhavi olagiha wi ninowatamalela anddimuwa a mmulogoni? (Koona vina foto.)

¹¹ Yehova onowagalala nigatamalelaga na murima wehu wotene anddimuwa a mmulogoni sabwa ya “mabasa anthiddani.” (1 Tes. 5:​12, 13) Henrietta, onkala vina o Finlândia ohiloga: “Anddimuwa a mmulogoni ali omala-nawale wi akamihedhe, mbwenyi eji kintapulela wi awene ahikana mudhidhi obe guru yinjene vina kanna makattamiho. Dila dhina ddinomwaddamela munddimuwa wa mmulogoni ddimwaddelaga dhahi: ‘Onoziwa elobo? Weyo oli munddimuwa wa mmulogoni wapama. Ddinfuna wi oziwe ejuwene.’” Murogora dhahi onkala o Turquia onkuweliwa Sera ohiloga: “Anddimuwa a mmulogoni anofuna ‘opangarhaziwa’ wi adhowegevi attiddaga mabasa otene ankosani. Enowodheya wapangarhaza modhela oleba kartau notamalela, wawoba wi nije vamodha obe wawoba wi nilabe vamodha mmabasani a olaleya.” Ohikalawo munddimuwa wa mmulogoni agaziweliwe weyo omutamalela sabwa ya mabasa anttiddiye mmulogoni? Onkoddelani otamela marhe a omulagiha otamalela wawo.—1 Kor. 16:18.

ANAMEDDELELA MILOGO ANOLIBIHA MILOGO

12. Yezu wamulabihedha ani wi alibihe milogo masaka a arumiwi? (1 Tesalónika 2:​7, 8)

¹² Mivaho dhina dhivahile Yezu mulogo dhinolaba na mukalelo mwina. Anddimuwa a mmulogoni o Jeruzalemi ahimuttoma Paulo na Barnabé vina ena ninga anameddelela milogo. (Mer. 11:22) Na efunelo gani? Dhahene ninga adhari okamihedha vina anddimuwa a mmulogoni, anameddelela milogo: anolibiha milogo. (Mer. 15:​40, 41) Alobwana aba anottiya ottugareya wawa vina dila dhina anofiyedha wika vangovini egumi yawa wi asunzihe vina apangarhaze abali.—Kengesa 1 Tesalónika 2:​7, 8.

13. Mabasa gani anttidda anameddelela milogo?

¹³ Anameddelela milogo mudhidhi wetene anokosa oleddo. Ena onokosa oleddo makilometuru mazana wi afiye mulogo mwina. Sumana dhotene anameddelela milogo anokosa diskursu dhinjene, anowawaredhela abali, anokosa matugumano na apionero, anddimuwa a mmulogoni vina matugumano a obudduwa mmabasani a olaleya. Awene anosasanyedha madiskursu, anokosa masasanyedho a matugumano a murudda vina a ttattamwa. Vyaka dhotene awene anokala anamasunziha a eskola ya apionero vina anokosa masasanyedho a matugumano a vawoka na apionero a muruddaya, ottiya dhotene eso—awene anofwanyela ozuzumela mabasa mena amakamaka—dila dhina anfwanyelela okosiwa nomaguva.

14. Ninfwanyelela nni ologa wi anameddelela milogo maruriho a milogo?

¹⁴ Ninfwanyelela nni ologa wi anameddelela milogo nvaho wa milogo? Mbali dhahi onkala o Turquia ohiloga sabwa ya weddeleliwa na anameddela milogo: “Dila dhotene dhinaredheliwa iyo ddinokana efunelo ya wakamihedha abali na arogora a mmulogoni mwaga. Ddihaziwa anameddelela milogo enjene; txipo awene kalagihile wi kaana mudhidhi obe kafuna ologa na miyo.” Johanna, ologiwe mundduni, ohilaba vamodha na nameddelela mmodha wa milogo mmabasani olaleya, mbwenyi awene kawodhile ologa nne na muttu mmodha. Iyene ohiloga: “Masiki dhawene miyo ddinowubuwela mudhidhi wetene labo nttile. Arogoraga eli ahimwalela elabo yina yolapelana na miyo, ddannukeliwa vaddiddi nawene. Nameddelela milogo oddule wahiddilibiha vina wahiddikamihedha wona wi olapelana okule wali wa mudhidhi mung’onovi. Txino masaka abano kaninawodhe okala vamodha na amudhihu vina amarho ehu, mbwenyi mwilaboni eswa ninele okana gari ya okala na awene namukalakala.” Esi dhotagiha dhing’onovi ninoniha wi anameddelela milogo maruriho mwa abale anawaredhelani.—Mer. 20:37–21:1.

15. (a) Mowiwanana na 3 Joau 5-8, ninawodhe dhavi olagiha wi ninowatamalela anameddelela milogo? (Koona vina foto.) (b) Ninfwanyelela nni wavaha ttima awadhi a abali ansogorhela mulogo vina ninakose dhavi ejuwene? (Koona kasha “Wawubuwele Awadhi a Abali Ansogorhela Mulogo.”)

¹⁵ Murumiwi Joau ohimukokomeza Gayo wi awakele abali akosa oleddo wi alibihe milogo, iyene ohileba “[wavahe] dhinfuneya muleddoni mwawa n’ekalelo enimuzivela Mulugu.” (Kengesa 3 Joau 5-8.) Ninawodhe dhavi okosa yakakene? Mukalelo mmodha bwa omukonvidari nameddelela milogo wi nije vamodha. Mukalelo mwina bwa ozuzumela mabasa a olaleya sumana ya waredheliwa. Leslie ologiwe mundduni, onolagiha watamalela anameddelela milogo na mukalelo mwina, iyene onologa. “Miyo ddinomukumbirhaga Yehova wi azuzumele dhojombeliwa dhawa. Miyo na mamunaga vina nihileba makarta wi nitamalele mukalelo onkamihedhiwa iyo na waredheliwa wawa.” Kudduwale wi dhahene ninga iyo anameddelela milogo anopattiwa makattamiho vina anolema. Masaka mena, awene anogumanana makattamiho a eredda, anodhugudheya vina anokumuwa. Modhela mazu ehu apama obe nvaho wovevuwa, Yehova onodhaga onilabihedha wi akule malobelo a anameddelela milogo!—Gano 12:25.

NINOWAFUNAVI ALOBWANA ANASOGORHELE MULOGO

16. Nitanalelaga nlebo na Gano 3:​27, mavuzo gani anfwanyelela ovikosa mbali ddi mbali?

¹⁶ Mwilaboni mwetemwene, anofuniwa alobwana anasogorhele milogo. Akala weyo oli mbali wobatiziwa enowodheya okamihedha? (Kengesa Gano 3:27.) Ohikana efunelo ya okala mudhari wokamihedha? Akala weyo oli mudhari wokamihedha ohikana efunelo ya okala munddimuwa wa mmulogoni vina olaba venjene wi wazuzumele abali a mmulogoni?c Enowodheya weyo okosa matxinjo mang’onovi mwigumini mwawo wi okose Eskola ya Anamalaleya a Omwene? Eskola eji enele wushagiha vina wukamihedha wi olabihedhiwe venjene na Yezu. Akala onowona wi kuna ewodhelo ya okosa mabasa aba, kamulobele Yehova. Kakumbirha wi muya waye wokoddela wukamihedhe wakwanihedha mabasa-mabasavi anakeliwe.—Lk. 11:13; Mer. 20:28.

17. Abali ansogorhela milogo anlagiha eni mwaha wa Mwene wehu Yezu Kristu?

¹⁷ Abali analabihedha Yezu wi asogorhele milogo ezinddiyelo yawila iyene onodhowavi anizuzumelaga masaka abano omariha. (Mt. 28:20) Mwene wehu ddokwela, ddotapuwa mada, ononizuzumela vina ononivaha abali a ttotto wi azuzumele dhojombeliwa dhehu. Ogatanalela esi weyo onotamalela vaddiddi, kahiye mwenemo? Nona katamela marhe a olagiha wi onowavaha ttima abali abo anivilibihedha vaddiddi. Txipo kudduwale omutamalela Yehova onnivaha “dhapama dhetene na mivaho dhetene dhawakwana.”—Tia. 1:17.