Mbali—Weyo Onovilibihedha wi Okale Munddimuwa wa Mmulogoni?

1-2. Txini eniwanana na mabasa apama ankosa anddimuwa a mmulogoni?

AKALA weyo onokamihedha mwari mwa mudhidhi mwinjene ninga mudhari wokamihedha, txino oli mudilani yofwanyelela wi okale munddimuwa wa mmulogoni. Weyo ogahiziveliwa okosa mabasa a pama anttidda anddimuwa a mmulogoni?—1 Tim. 3:1.

² Mabasa gani ankosa anddimuwa a mmulogoni? Awene anosogorhela mabasa olaleya, anolaba venjene awaredhelaga, àsunzihaga abali vina anokamihedha olibiha mulogo modhela ejile enlogani vina enkosani. Nona Bibilia okana mwaha dhapama yowakuwela anddimuwa a mmulogoni anlaba na nttokoso ninga nvaho.—Ef. 4:8.

3. Txini enfwanyela okosa mbali wi awodhe okala munddimuwa wa mulogo? (1 Timóteo 3:1-7; Tito 1:5-9)

³ Txini enfwanyeliwe okosa wi okale munddimuwa wa mmulogoni? Wakwanihedha mikalelo dha okala munddimuwa wa mmulogoni ehittiyana na wakwanihedha mikalelo wi olabe mwimperezani. Dila dhinji wi ofwanye mabasa, enofuneya okana mikalelo dhintamela mwinya wa emperezaya. Mwa mpaddi mwina, akala weyo onofuna ottomiwa ninga munddimuwa wa mmulogoni, onofwanyela okosa venjene ottiya okana ttotto ya olaleya vina yosunziha. Weyo onofwanyelela wakwanihedha mikalelo dhinloga Bibilia dhinfuniwana anddimuwa a mmulogoni okana, dhinfwanyeya va 1 Timóteo 3:​1-7 vina Tito 1:​5-9. (Kengesa.) Mu nsunzoni ntti ninele wona ejile enjedheliwana anddimuwa a mmulogoni mu dhipaddi ttaru dhamakamaka: (1) okana mweddelo wapama mmulogoni vina otakulu, (2) okala yotagiha yapama ninga musogorheli wa ntakulu vina (3) okala womala-nawale wi okamihedhe mulogo.

OKANA MWEDDELO WAPAMA

4. Txini entapulela ohikana yosumuleliwana?

⁴ Wi okale munddimuwa wa mmulogoni onofwanyela ohikana yosumuleliwana, eji entapulela wi weyo ohikana mweddelo wapama mmulogoni sabwani kawo muttu onfwanyela wumagedha mweddelo wohifwanyelela. Ottiya ejuwenevi, onofwanyela okala “woriheya vina n’abale ahilí akristu.” Attu ena anodhaga wupambiha sabwa ya okala Mukristu, mbwenyi attuya kanfwanyela okana mwaha wa waganyedha akala oli muttu wokuluveleya vina wapama. (Dan. 6:​4, 5) Kavivuze, ‘Miyo ddikana mweddelo wapama mmulogoni vina otakulu?’

5. Elobo gani enfwanyeliwe okosa wi okwelege dhili dhapama?

⁵ Weyo onofwanyela okwela dhilobo dhapama, kuloga otamela dhilobo dhapama mwa attu ena vina watamalela abali sabwa ya mikalelo dhapama dhinanina. Weyo vina onofwanyela wagalala sabwa ya wakosela oderetu attu ena, masiki na dhilobo dhihinjedheliwana weyo okosa. (1 Tes. 2:8.) Mukalelo obu okaleleni wamakamaka mwa anddimuwa a mmulogoni? Sabwani awene anolabihedha mudhidhi wawa wila apangarhaze mulogo vina azuzumele mabasa attomeliwani. (1 Ped. 5:​1-3) Masiki dhawene, wagalala onkanani sabwa ya wakamihedha ena onopitta guru dhinkosani wila akamihedhe.—Mer. 20:35.

6. Na mikalelo gani dhinawodhiwe okala namakela aleddo? (Ahebreu 13:2, 16; koona vina foto.)

⁶ Weyo onolagiha wi wanamakela aleddo ogakosela dhilobo dhapama attu ena, otaganyiha na abale ahili amarho awo ofiyedheya. (1 Ped. 4:9) Nivuru dhahi ninomutapulelamo muttu oli namakela aleddo na mukalelo obu: “Musuwo wa vatakulu vaye—vina wa murima waye—onofwanyela okala wofuguwene mwa abale ahinaziwiye.” Kavivuze, ‘Miyo ddinoziwiwa ninga muttu onalagiha oderetu abale anaredhela mulogo waga?’ (Kengesa Ahebreu 13:​2, 16.) Muttu oli namakela aleddo onolagiha oderetu vina onowavaha ejile enwodhiye abale anawaredhela, otaganyiheya na abale ali ayelegi vaddiddi ahinwodha omwiyihedha elobo, anobiwa wi akose diskursu vina ena anlaba vaddiddi wi apangarhaze abali, ninga anameddelela milogo.—Wita 18:​2-8; Gano 3:27; Lk. 14:​13, 14; Mer. 16:15; Rom. 12:13.

7. Munddimuwa wa mmulogoni onlagiha dhavi wi kankweletxa kobiri?

⁷ Kanfwanyela ojiwa murima na kobiri. Ejo entapulela wi kunzuzumeletxa dhilobo dhomaningoni. Kintanala akala weyo oli mureli obe muttu woyelega, mudhidhi wetene weyo onowika vamburoni voroma Omwene mwigumini mwawo. (Mt. 6:33) Weyo onolabihedha mudhidhi wawo, guru yawo vina dhotene dhiniwena wi omulabele Yehova, wazuzumela anamudhi awo vina okamihedha mulogo. (Mt. 6:24; 1 Jo. 2:​15-17) Kavivuze: ‘Monelo waga mwaha wa kobiri buvi? Miyo ddinowagalala na dhilobo dhili dhofuneya bahi? Ddinozuzumela okana kobiri yinjene vina dhilobo dhinji dhomaningoni?’—1 Tim. 6:​6, 17-19.

8. Na mikalelo gani dhinalagihiwe wi oli muttu wovipimelela vina wovyang’anela?

⁸ Weyo ogakala muttu wovipimelela vina wovyang’anela, eji entapulela wi oli muttu wovipimelela mwa dhipaddi dhotene dha mwigumini mwawo. Kuloga, weyo onowodha wita maddile mwaha wa dhoja, dhomwa, mukalelo wa ovisasanyedha, wowabala vina mavego. Weyo kunfwara mweddelo wa attu ahinimulabela Yehova. (Lk. 21:34; Tia. 4:4) Weyo vina onodhowavi okalaga wofwaseya masiki akala attu ena anowuliga obe kanuweddiha na oderetu. Weyo kunfwanyela okala mulezeli; nne vina oziwiwa ninga muttu ommwa vaddiddi. Kavivuze, ‘Mukalelo onkalawo miyo onolagiha wi ddili muttu onivipimelela vina onivyang’anela?’

9. Okala wamalago vina wotadela eniwanana na okosa eni?

⁹ Wi okale muttu wamalago, onofwanyelela otanalela makani-makanivi olabihedhaga magano a mBibiliani. Weyo onotanalela na ofwaseya mukalelo oniwanana makaniya na magano a mBibiliani, mwadhahene onowodha okana monelo wofwanyelela vina onokosa dhogana dhapama. Weyo kungwadda makaniya ohinatti opepesa mowakwanamwene. (Gano 18:13) Sabwa ya ejuwene, onowodha okala muttu wovipimelela vina onkosa dhogana dhiniwanana na monelo wa Yehova. Mbwenyi wi okale muttu wotadela, onofwanyela okala muttu wosasanyedheya vina onkosa dhilobo na mudhidhiya. Onoziwiwa ninga muttu wokuluveleya vina onfwara magano. Mikalelo esi dhinele wukamihedha okana mweddelo wapama. Ninele wona onawodhe dhavi wakwanihedha mikalelo dhinloga Bibilia wi okale yotagiha yapama ninga mwazambo wa ntakulu.

KAKALA YOTAGIHA YAPAMA NINGA MWAZAMBO WA NTAKULU

10. Mulobwana onawodhe dhavi “[oziwa] weddiha pama muralaye”?

¹⁰ Akala weyo ohitela vina onofuna okala munddimuwa wa mmulogoni, anamudhi awo anofwanyela okana mweddelo wapama, mwadhahene weyo onofwanyela weddiha pama murala wawo. Enofuneya weyo oziwiwa ninga mwazambo wa ntakulu wokwela vina onivilibihedha wakwanihedha muttorho wawo, eji eniwanana na osogorhela dhotedhene dhiniwanana na omwebedha Yehova. Ekalele nni yamakamaka? Murumiwi Paulo ohitanalela na mukalelo obu: “Akala muthu kanziwa weddiha pama muralaye, onawodhe dhavi osogorhela [mulogo]?”—1 Tim. 3:5.

11-12. Sabwaya jani mweddelo wa aima bwamakamaka mwa mbali onfuna okala munddimuwa wa mulogo? (Koona vina foto.)

¹¹ Akala weyo oli babi, anawo anofwanyela okala orumeya vina oleleya. Na okwela onofwanyela wasunziha vina washagiha. Ebaribari wi weyo onofuna wi anawo akale owagalala vina avegege ninga munkosela ayima ena. Mbwenyi mashagiho apama anavahiwe anele wakamihedha okala owiwelela, a nriho vina oleleya. Ottiya ejuwenevi onofwanyela okosa mpaka munwodheliwe wi wakamihedhe anawo okana mandano ofiyedheyana na Yehova, ofwara magano a mBibiliani vina wunuwa mpaka ottukula ttarho ya obatiziwa.

¹² “Anaye akale aroromeli, ahoneyégena meddelo abure, ahikale avuru-vuru.” Akala mwana wa Munamoona wa Yehova onokosa yottega enddimuwa, ejo enimpatta dhavi babe? Akala babeya kanvahile malago vina kamusisigulile ninga mwafuneyelani, bahito iyene kanfwanyela ottomiwa ninga munddimuwa wa mmulogoni.—Koona A Sentinela 15 de Outubro de 1996, nikuku 21, ddima 6-7.

OKAMIHEDHA MULOGO

13. Onawodhe dhavi olagiha wi oli “wokurumuwa” vina kunivittukulela?

¹³ Abali anna mikalelo dhapama dh’Okristu anolabihedhiwa venjene mmulogoni. Muttu “wokurumuwa” onotamela murenddele. Akala weyo onofuna oziwiwa ninga muttu wokurumuwa, kaavuruwanege ena vina kakala womala-nawale wi orumele monelo dhottiyana. Mmatugumanoni a anddimuwa a mmulogoni, weyo ogali womala-nawale wi okamihedhe dhogana dha attu ena akala ejoya enowiwanana na malamulo vina magano a mBibiliani? Weyo vina kunfwanyela okala muttu “wovithukulela”, kuloga, otamela wi dhilobodha dhikosiwege na monelo wawo. Onofwanyela ovaha ttima monelo vina dhubuwelo dha attu ena. (Wita 13:​8, 9; Gano 15:22) Weyo kunfwanyela okala “muwali” nne vina namatota kani. Ottiya okala muttu wovadda murima vina onapambiha ena dila dhotene, weyo onofwanyela okala muttu wapama vina ologa na oderetu. Ninga muttu wa murenddele, onele ovilibihedha okana murenddele na attu ena, masiki akala dhilobodha dhinorutxa. (Tia. 3:​17, 18) Weyo akala onologa na oderetu na attu ena, masiki abale ahili abalihu, onele wakamihedha okala wofwaseyene vina ovugula osilidhiwa wawa.—Anam. 8:​1-3; Gano 20:3; 25:15; Mt. 5:​23, 24.

14. Mazu aba ohibatiziwe ovanene vina woweddeyana antapulela eni?

¹⁴ Wi awodhe wakwaniha mikalelo wila akale munddimuwa wa mmulogoni, mbaliya kanfwanyela okala muttu obatiziwe ovanenevi. Kili yofuneya wi iyene abatiziwe mwari mwa vyaka dhinjene mbwenyi mudhidhi onfuneya wi akale Mukristu woliba mpaddi womuyani. Ohinatti ottomiwa ninga munddimuwa wa mmulogoni, weyo onofwanyela okala dhahene ninga Yezu, woviyeviha vina wovilela ojedhelaga mudhidhi wi Yehova awuttomele mabasa mmulogoni. (Mt. 20:23; Fil. 2:​5-8) Weyo onele owodha olagiha wi oli woweddeyana ogamwiwelelaga Yehova, malamulo aye, magano aye vina ofwaraga magano anvaha nikuru naye.—1 Tim. 4:15.

15. Munddimuwa wa mmulogoni onofwanyela okala namakosa diskursu dhapama? Katapulelamo.

¹⁵ Bibilia kampipirhiha agalogaga wi anddimuwa a mmulogoni anofwanyela oziwa osunziha. Ejo entapulela wi anddimuwa otene a mmulogoni anofwanyela okosaga diskursu dhapama? Nne. Anddimuwa enji a mmulogoni masiki ahikalaga anamakosa diskursu dhapama, anoziwa osunziha deretu mmabasani olaleya vina agawaredhelaga abali. (Kaladdaniha na 1 Korinto 12:​28, 29 vina Éfeso 4:11.) Masiki ehikalaga yofuneya weyo okala namakosa diskursu dhapama vaddiddi, enofuneya ovilibihedha wi wunuwihe mikalelo dhawo dhosunziha. Onakose dhavi ejoya?

16. Weyo onawodhe dhavi okala namasunziha wapama? (Koona vina foto.)

¹⁶ “Amageyena magano a nroromelo.” Wi okale namasunziha wapama omulabihedhege Bibilia ogasunzihaga vina ogavahaga malago. Okale namasunza wapama wa Bibilia vina wa mapublikasau ehu. (Gano 15:28; 16:23) Ogasunzaga kafwaseyela wona akala weyo onotapulelamo vina onovirihamo maversu a mBibiliani na mukalelo wofwanyelela. Ogasunzihaga, kakosa mpaka munwodheliwe wi oddiginye murima wa abale anuvuruwana. Enowodheya wunuwiha ewodhelo yawo ya osunziha modhela okumbirha vina ovirihamo malago a anddimuwa ena a mmulogoni anna ttotto yinjene. (1 Tim. 5:17) Anddimuwa a mmulogoni anofwanyela owodha walibiha abalawa na arogora; mbwenyi dila dhina awene anofwanyela ovaha malago obe osisigula. Mwa dhipaddi esi dhotene anddimuwa a mulogoni anofwanyela olagiha opama. Weyo ogakala muttu wa deretu, wokwela vina onlabihedha Nzu na Mulugu ogasunzihaga, onele okala namasunziha wapama sabwani onelege omutagiha Namasunziha Munddimuwa, Yezu.—Mt. 11:​28-30; 2 Tim. 2:24.

KAKOSAGA MPAKA VANWODHELIWE

17. (a) Txini enamukamihedhe mudhari wokamihedha odhowagavi avilibihedhaga? (b) Anddimuwa a mmulogoni anfwanyela otanalela eni agampepesaga mbali wi anvahe mabasa? (Koona vina kasha “Kujedhele Oligana Mwa Attu Ena.”)

¹⁷ Agamala otanalela dhinfuneya wi akale anddimuwa a mmulogoni, adhari ena okamihedha anodhaga wubuwela wi txipo kanawodhe wakwanihedha mikalelo esi. Mbwenyi kobuwela wi Yehova vina nikuru naye kanjedhela wi abali akale oligana agalagihaga mikalelo esi. (1 Ped. 2:21) Bu muya wokoddela wa Yehova onawukamihedhe wunuwiha mikalelo esi. (Fil. 2:13) Ohikalawo mukalelo onfwanyeliwe wunuwiha? Kamulobele Yehova. Opepese mwaha wa makaniya vina kamukumbirhe munddimuwa wa mmulogoni malago mwaha wa epaddi enfwanyeliwe ovilibihedha.

18. Adhari otene okamihedha anfwanyela okosa eni?

¹⁸ Iyo notene, otaganyiha na anddimuwa a mmulogoni, ninofwanyela odhowagavi nivilibihedhaga okana mikalelo dhilogiwe mu nsunzoni ntti. (Fil. 3:16) Weyo oli mudhari wokamihedha? Bahito kutxime venevo! Kamukumbirhe Yehova wi awushagihe vina awukamihedhe wila owodhe olabihedhiwa vaddiddi mmulogoni. (Iza. 64:8) Yehova onele oruriha guru dhinkosiwe wi okale munddimuwa wa mulogo.