Otanalele Wili Dhilobo Dhimaliliwe Osunza

Yahiromaga wupadduwela odduwala elobo esunziliwe ovanenevi? Iyo notene ninopadduweliwa yakakene masaka mena. Ejo egapudduwa, txini enfwanyeliwe okosa? Katanalela wili dhilobo dhimaliliwe osunza.

Mudhidhi onkosiwe nsunzo nawo, katxima vang’onovi wi olebe mitoma dhamakamaka. Murumiwi Paulo ohakamihedha attu agengesile karta naye okosa ejuwene mulogiliye dhahi: “Yamakamaka ya makani andhehuna, jiji.” (Aheb. 8:1) Na mazu aba iyene ohakamihedha anamengesaya ononelamo yafuniye ologa vina ozinddiyela wiwanana wa mutoma modha-modha na makaniya.

Ogamala okosa nsunzo nawo nomwinya enowodheya oburutxa mitala mingasi, txino mitala 10 wi owodhe otanalela vang’onovi sabwa ya makani amakamaka amalile weyo osunza. Ogahiwodhe wubuwela, wang’ane wili mitomadha obe mazu amakamaka—txino mazu oroma a makani asunziliwe—okosa eji enele wukamihedha okoya muyubuweloni. Akala ohisunza elobo eswa, katagiha otapulela na mazu awo. Ogatanalela wili makani amakamaka, onele owodha okoya dhisunziliwe muyubuweloni vina onele ononelamo mowakwana-mwene mukalelo onukamihedha dhilobo dhisunziliwe mwigumini mwawo.