Onawodhe Dhavi Okalavi Wororomeleya na Yehova Masiki Weddihiwaga na Ohiligana

1-2. Na mikalelo gani dhigadhilehu weddihiwa na ohiligana?

YEZU ohiloga musibo mwaha wa mamukwela wamudidela namattonga wi amweddihe na oligana. Nipadduwo ntti txino nahiddiginya vaddiddi murima wa anamasunza a Yezu sabwani nsaka nttile attu anneddihiwa na ohiligana. (Lk. 18:​1-5) Musibo obu ononikamihedha ononelamo mukalelo waviwamo muyana oddule sabwani masaka abano dila dhinji ninoweddihiwa na ohiligana.

² Masaka abano attu enji anoweddihiwa na nsakulano vina obure, nona kanintikina akala ninoweddihiwa na ohiligana. (Koh. 5:8) Txino ehinjedhelihu weddihiwa na ohiligana na mbali obe murogora, mbwenyi ejo enodhaga opadduwa. Ebaribari wi abalihu kali ninga attu ena annitabutxa, awene ankosa ejuwene sabwani ali attu ohiligana. Enowodheya osunza na yotagiha ya Yezu wi niwodhe owanana weddihiwa na ohiligana. Akala ninovilibihedha wavilela abale ahinimwebedha Yehova vina anneddiha na ohiligana, ninofwanyela ovilibihedha vopitta wi navilele abalihu! Yehova oniviwamo dhavi aganona neddihiwaga na ohiligana na attu ena otakulu obe mmulogoni? Koddi Yehova ononitanala?

3. Ninziwa dhavi wi Yehova onofwaseyela wona mukalelo oneddihiwehu na attu ena?

³ Yehova onofwaseyela mukalelo oneddiwihu na attu ena. Yehova onokwela oligana. (Masal. 37:28) Yezu vina ononikuluveliha wi Yehova onele okosiha wi yiriwe yoligana momaguva nsakana nofwanyelela nigafiya. (Lk. 18:​7, 8) Mohigonela vina Yehova onele ogomiha dhodhelavo dhotene dhabure dhinnitotela makattamiho vina onele otolotxa mikalelo dhotene dhohiligana.—Masal. 72:​1, 2.

4. Nikamihedho gani ninivaha Yehova masaka abano?

⁴ Nsaka ntto nihinafiya ninofwanyela ojedhela mudhidhi onagomihe Yehova makattamiho otene, oku nijedhelaga mudhidhi obo Yehova ononikamihedha oziwa enfwanyelihu okosa akala attu ena anonitabutxa. (2 Ped. 3:13) Iyene ononisunziha ejile enfwanyelihu okosa wi ninattabwihe makattamihoya. Ottiya ejo, modhela Mwanaye Yezu, Yehova ononivaha yotagiha yoligana ya ovilela nigeddihiwa na ohiligana. Iyene vina ononivaha malago a mBibiliani anlagiha enfwanyelihu okosa akala ninoweddihiwa na ohiligana.

PORHE-PORHE NA ENAKOSIWE OGEDDIHIWA NA OHILIGANA

5. Ninfwanyelela nni okala txenjewa na ejile enakosihu nigeddihiwa na ohiligana?

⁵ Iyo ninodhaga wiwa opa vaddiddi vina odhugudheya sabwa ya weddihiwa na ohiligana. (Koh. 7:7) Adhari ororomeleya a Yehova a masaka a wale, ninga Job vina Habakuk anniviwamo dhahene. (Job 6:​2, 3; Hab. 1:​1-3) Ebaribari wi kahiye yabure oviwamo dhahene, mbwenyi ninofwanyela okala txenjewa wi ninakose elobo yohifwanyelela egadhile onitotela makattamiho ottabwa.

6. Yotagiha ya Absalau enisunziha eni? (Koona vina foto.)

⁶ Nigatabutxiwa obe nigamona muttu onimukwelihu bageddihiwa na ohiligana txino ninokanaga efunelo ya omwiyihedha obe omutxinutxa muttuya. Mbwenyi ejo enodhaga ottabwiha dhilobodha. Koona yotagiha ya Absalau mwana wa Mwene Davidi. Iyene wahisilidhiwa vaddiddi mudhidhi orarutxiwe murogoriye Tamar na mbalaye Amnon. Mowiwanana na Malamulo a Mizé, Amnon wanfwanyela opiwa sabwa ya ejile yakosiliye. (Onam. 20:17) Absalau wahikana mwaha dhinji dhamukosiha oviwamo dhahene, mbwenyi iyene kafwanyela ogwadda makaniya na mada aye.—2 Sam. 13:​20-23, 28, 29.

7. Txini ekosile munasalmo vagumaniliyena makattamiho?

⁷ Masaka mena enkala ninga attu ankosa dhilobo dhabure kantxinutxiwa, sabwa ya ejuwene ninodhaga wubuwela wi kimpuriha okosa dhilobo dhapama. Koona empadduwele munasalmo waromile wubuwela wi attu abure dhawa dhannaweddela pama oku attu a deretu ela winjiveliwa makattamiho. Iyene ohiloga “athu otakala murima ali dhahene: ankala ofwasene.” (Masal. 73:12) Iyene wahinyonyeya vaddiddi na ohiligana woniye ofiyedha waganyedha akala yampuriha omulabela Yehova, iyene ohiloga: Vatamelilemi ononelamo esidha, ddahittabwa odhugudheya. (Masal. 73:​14, 16) Iyene wahifiyedha ologa dhahi: “Miyo ddali nena nogwa, nosananguwa manyalo aga.” (Masal. 73:2) Jakakene yadhile ompadduwela mbalihu onamukuwele iyo Alberto.

8. Weddihiwa na ohiligana ompattile dhavi Alberto?

⁸ Alberto wahimagehedhiwa wiya kobiri ya mmulogoni. Sabwa ya ejuwene iyene wahiyelela dhittomo dhaye vina nriho na abali na arogora a mmulogoni adhile oziwa makaniya. Iyene ohiloga, “Miyo ddahisilidhiwa vaddiddi, ddahinyimuwa vina ddahikumuwa.” Iyene wahifiyedha wobana mpaddi womuyani vina wahittiya otugumana mwari mwa vyaka tanu. Empadduwele Alberto enolagiha endhaga onipadduwela nigahang’anele osilidhiwa wehu sabwa ya weddihiwa na ohiligana.

OTAGIHE MUKALELO OVILELILE YEZU WEDDIHIWA NA OHILIGANA

9. Obure gani wireliwe Yezu? (Koona vina foto.)

⁹ Yezu ohinittiyedha yotagiha yoligana ya mukalelo wovilela nigeddihiwa na ohiligana. Katanalela midhidhi dheddihiwiye na ohiligana na anamudhi aye vina attu ena. Anamudhi a Yezu ena anloga wi iyene wahitaduwa, asogorheli a marelijiau anloga wi iyene weddihiwa na adomonyo vina anyakoddo a akadda Roma ahimbedda, ahimutabutxa, omamalelowa ahimpa. (Mk. 3:​21, 22; 14:55; 15:​16-20, 35-37) Masiki dhahene Yezu wahiwodha ovilela ohiligana oku wetene vina keyihedhile obure na obure. Txini ensunzihu na yotagiha ya Yezu?

10. Yezu ovilele dhavi veddihiwiye na ohiligana? (1 Pedro 2:​21-23)

¹⁰ Kengesa 1 Pedro 2:​21-23.a Yezu ohinittiyedha yotagiha yohiligana ya ejile enfwanyelihu okosa ena aganitabutxaga obe aganeddihaga na ohiligana. Iyene wanziwa mudhidhi wofwanyelela wa ologa vina wa omala. (Mt. 26:​62-64) Iyene kavibareli mwa dhilobo dhabure dhamagedhiwiye na attu. (Mt. 11:19) Agalogaga iyene karuwana vina kamutxutxa muttu. Yezu wannivyang’anela sabwani “wavilevela Mulugu onthonga n’ebaribari.” Yezu wanziwa wi monelo wa Yehova mwaha wa makaniya wali wamakamakaya. Iyene wankuluvela wi Yehova agahigomiha weddihiwa na ohiligana mudhidhi wofwanyelela.

11. Na mikalelo gani dhinawodhihu wang’anela dhologa dhehu? (Koona vina mafoto.)

¹¹ Enowodheya omutagiha Yezu modhela wang’anela dhologa dhehu nigeddihiwa na ohiligana. Dila dhina kili yofuneya ologa obe okosa elobo sabwani obureya kahiyo onddimuwa. Mwa mpaddi mwina enowodheya osakula ohiloga elo sabwani nigaloga elobo ninodhaga ottabwiha makaniya. (Koh. 3:7; Tia. 1:​19, 20) Txino masaka mena enele ofuneya ombarela muttu ontabutxiwa obe ologa ebaribari wi nibarele esile dhinrumelihu. (Mer. 6:​1, 2) Mbwenyi nigakosaga ejuwene ninofwanyela okosa guru eli yotene wi niloge na ofwasa vina nriho.—1 Ped. 3:15.b

12. Txini enfwanyelihu okosa wi nimukuluvele Yehova onttonga na oligana?

¹² Enowodheya vina omutagiha Yezu modhela omukuluvela Yehova onttonga na oligana. Ena aganittonga obe aganitabutxa ninokuluvela wi Yehova onoziwa ebaribariya. Nikuluvelo ntti ninonikamihedha odhowagavi nivilelaga mukalelo obu wabure oneddihiwa iyo, sabwani ninoziwa wi Yehova onele wogolela dhilobodha. Nigamukuluvela Yehova vina nigamujedhela iyene wogolela dhilobodha, kaninasilidhiwe obe kaninakoyele ntxiga attu ena. Mikalelo esi dhabure dhinodhaga onittukulela okosa elobo yotakala, oyelela wagalala wehu vina ononga mandano ehu na Yehova.—Masal. 37:8.

13. Txini enanikamihedhe ovilela nigeddihiwa na ohiligana?

¹³ Enoziweya wi txipo kaninawodhe ofwara mowakwana-mwene yotagiha ya Yezu. Dila dhina ninodhaga ologa obe okosa elobo osogorhowa banitxinuwa. (Tia. 3:2) Masaka mena sabwa ya weddihiwa na obure na attu ena, enodhaga onitotela wiwopa vina okubanya egumi yehu yotene mwilaboni ejino yabure. Akala weyo wahiromaga weddihiwa na ohiligana, kakuluvela wila Yehova onoziwa dhinupadduwela. Yezu vina weddihiwe na ohiligana onononelamo mowakwana-mwene mukalelo oniviwamo weyo. (Aheb. 4:​15, 16) Ottiya onivahavi yotagiha yoligana ya Yezu, Yehova ononivaha malago annipuriha vina annikamihedha owanana weddihiwa na ohiligana. Ninele wona versu bili dha nivuru na Roma dhinanikamihedhe.

“MMUTHIYEDHE MULUGU NTXIGANÁ”

14. Mazu aba “mmuthiyedhe Mulugu ntxinganá” antapulela eni? (Roma 12:19)

¹⁴ Kengesa Roma 12:19. Murumiwi Paulo ohakokomeza Akristu wi “[amuttiyedhe] Mulugu ntxiganá.” Iyo ninomuttiyedha Yehova ntxiganá, nigamuttiya wi agwadde makaniya na mudhidhiya vina mukalelo onfuniye. Mbali onkuweliwa John weddihiwe na ohiligana ohiloga: “Miyo ddanfwanyela wang’anela osilidhiwa waga wi ddinagomihe makaniya na mukalelo waga, mbwenyi ejo kiyali yovevuwa. Roma 12:19 ohiddikamihedha odhowavi ddimujedhelaga Yehova.”

15. Ekalele nni yapama omujedhela Yehova ogomiha makaniya?

¹⁵ Dhihikalawo dhopurelamo dhinji dha omujedhela Yehova ogomiha makattamihoya. Nigakosa ejuwene, ninorabela okumuwa vina onyimuwa ogakanilehu sabwa ya otamela ogomiha makattamihoya nanya. Yehova oli womala-nawale wi anikamihedhe. Nigagumanana makattamiho enkala ninga onloga, ‘Kattiya na miyo, ddinele ogwadda makaniya.’ Nigarumela nipikirhelo na Yehova nawi “Ddi miyo onimvaha muthu enimfwanyelela,” ninofwanyela ottiya makaniya mmadani mwa Yehova sabwani iyene onoziwa enfwanyeliye okosa na oligana. Jijuwene emukamihedhile John, ologiwe mundduni. Iyene wannubuwela dhahi, “Ddigamuttiya Yehova ogomiha makattamiho aga, yodhelavoya enakale yapama vaddiddi opitta ejile egakosilemi wi ddigomihe makattamihoya.”

“MUPEMBERHE [OBURE] MWIRAGA DHAPAMA”

16-17. Nlobelo ninikamihedha dhavi opemberha obure niraga dhapama? (Roma 12:21)

¹⁶ Kengesa Roma 12:21. Paulo ohavaha vina nlago ntti Akristu “mupemberhe [obure] mwiraga dhapama.” Mu Diskursuni ya Vamwangoni Yezu ohiloga: “Mwakwelegevi anuwiddani vina mwalobelelege anufwara-fwarani.” (Mt. 5:44) Jijuwene ekosile iyene. Weyo wahiromaga otanalela wiwopa okaniliye mudhidhi okomeliwiye vapingirhizini na anyakoddo a akadda Roma? Kinwodheya otanalela mowakwana-mwene masoso agumaniliyena.

¹⁷ Yezu wahidhowavi amukwelaga vina amuroromelaga Yehova masiki vatabuwiliye vaddiddi. Ottiya okumbirha wi Yehova àtxinutxe anyakoddo amutabutxa, iyene ohilobela: “Babani, mwalevelele vowi kanziwa dhinirani.” (Lk. 23:34) Iyo nigaalobelela attu annitabutxa, ninovugula ntxiga nehu, osilidhiwa vina enowodheya otxinja monelo wehu mwaha wa muttuya onikosele obure.

18. Nlobelo nimukamihedhile dhavi Alberto vina John ovilela weddihiwa na ohiligana?

¹⁸ Nlobelo nihakamihedha abali eli alogiwe mu nsunzoni ntti ovilela ohiligana ogumanilanina. Alberto ohiloga: “Miyo ddannalobelela abali addeddiha na ohiligana. Ddihimukumbirha Yehova dila dhinjene wi addikamihedhe odduwala dhetene dhapadduwile.” Mowagalaliha-mwene, Alberto ohiyelela omulabela Yehova nororomeleya. John ohiloga: “Dila dhinjene ddihimulobelela mbali waddinyimulile. Sabwa ya malobelo aba Yehova ohiddikamihedha omulevelela, ohisilidhiwa na iyene vina ohimuttonga. Malobelo aba vina ahiddikamihedha okana murenddele.”

19. Txini enfwanyeliwe okosa mpaka ogoma wa elabo ejino? (1 Pedro 3:​8, 9)

¹⁹ Kaninziwa makattamiho gani anagumanihuna mpaka omagomo wa elabo ejino yabure. Mbwenyi kintanala ejile enagumanihuna, txipo kaninattiye omulobelela Yehova nimukumbirhaga nikamihedho, ottiya ejo kadhowagavi ovirihagamo magano a mBibiliani vina kudduwale maganoya ogeddihiwaga na ohiligana. Ogakosa ejuwene kakana ebaribari wi Yehova onele wururiha okala-nokala-wene.—Kengesa 1 Pedro 3:​8, 9.