Mukalelo Wapama wa Owanana Obure

1-2. Txini enkosa attu enjene ageeddihiwa n’obure vina mavuzo gani aniteya?

ATTU enjene masaka abano anoweddihiwa na obure, ninga motagiha, ena anopujiwa sabwa ya okala ayelegi, mburo obaliwani obe ottiyana wa ttebe na dhilobo dhina. Attu enjene anotabuwa sabwa ya areeli anziveliwetxa kobiri vina alamuleli abure. Obure obu ononipatta iyo notene na mikalelo dhottiyana-ttiyana.

² Kahiyo yovene attu osilidhiwaga agonaga obure mwilaboni ejino masaka abano. Iyo notene ninofuna okala mburo wobareleya vina ninofuna weddihiwa na opama. Attu ena anotamela ogomiha obure mwilaboni mwawa. Awene anowasadduwela alamuleli, malamulo obe anowasakula asogorheli a politika ampikirhela ogomiha makattamihoya. Mwa mpaddi mwina, Akristu anosunzihiwa “ohikosa epaddi ya elabo” mbwenyi okuluvela Omwene wa Mulugu onagomihe obure wetene. (Jo. 17:16) Masiki dhawene, iyo ninokubanya vina ninosilidhiwa nigaawonaga attu eddihiwaga na obure. Mbwenyi onodhaga ovivuza: ‘Ekalawo elobo enfwanyelimi okosa ovanene?’ Nihinatti wakula mavuzo aba ndoweni none mukalelo onviwamo Yehova vina Mwanaye Yezu attu ageddihiwaga na obure.

YEHOVA NA YEZU ANOWIDDA OBURE

3. Ninkalela nni osilidhiwene nigoonaga obure? (Izaiya 5:7)

³ Bibilia onologa sabwaya ehinziveliwihu weddihiwa n’obure vina wawona attu ena eddihiwaga na obure. Bibilia onloga wi Yehova onipaddutxile moladdana na Iyene vina “onokwela oligana na omyala murima.” (Ms. 33:5; Wi. 1:26) Yehova txipo kanaweddiha attu n’obure, nona iyene onfuna wi nikose yakakene! (Ole. 32:​3, 4; Mik. 6:8; Zak. 7:9) Motagiha, nsaka na namavuhulela Izaiya Yehova wahiwa kutto dha ana Izrayel apujiwa na ana Izrayel ena. (Kengesa Izaiya 5:7.) Yehova wahasosotta abale akodda wiwelela malamulo aye vina abale aweddiha akwawa n’obure.—Iza. 5:​5, 13.

4. Yezu onviwamo dhavi muttu ageddihiwaga n’obure? (Koona vina foto.)

⁴ Dhahene ninga Yehova, Yezu onokwela oligana mbwenyi onowidda obure. Siku dhahi, Yezu wahimoona mulobwana waragalile nlada. Venevo wahimweddela ttagaraga vina wahimukamihedha mbwenyi asogorheli a relijiau moonelani eso dhipadduwaga ahisilidhiwa. Ahiloga wi Yezu wahilupa nlamulo na Sabuddu. Awene azuzumela malamulo awa ottiya omuzuzumela mulobwana ole watabuwa. Yezu oviwilemo dhavi mooniliye ejoya? Yezu ‘wahikubanya mwaha wa ovadda wawa murima.’—Mk. 3:​1-6.

5. Txini enfwanyelihu wubuwela nigoonaga obure?

⁵ Yehova vina Yezu anosilidhiwa agonaga obure, nona kahiyo yabure iyo vina osilidhiwa. (Ef. 4:26) Mbwenyi, kaninfwanyela odduwala wi masiki nikane mwaha dhapama dhinnittukulela osilidhiwa kaninawodhe ogomiha obure. Mwebaribari, nigattiya wang’anela osilidhiwa obe nigasilidhiwa mwari mwa mudhidhi mwinjene, ejo enodhaga onitotela makattamiho a muyubuweloni. (Ms. 37:​1, 8; Tia. 1:20) Kito txini enfwanyelihu okosa nigeddihiwaga na obure? Ninele wona ejoya nisunzaga yotagiha ya Yezu.

TXINI EKOSILE YEZU VAWONIYE ATTU EDDIHIWAGA N’OBURE

6. Obure gani wapadduwa nsaka nali Yezu velaboni ya vati? (Koona vina foto.)

⁶ Vali Yezu velaboni ya vati iyene ohona obure mwinjene. Iyene ohawona asogorheli a marelijiau etaga malamulo arutxiha egumi ya attu. (Mt. 23:​2-4) Iyene vina ohawona alamuleli a akadda Roma aweddihaga attu na obure onddimuwa. Ayuda enjene anfuna ovifurula mwa akadda Roma nona ena ahita makuru wi awane na akadda Roma. Masiki Yezu onaga dhilobo esi dhotedhene iyene katamelile okosa mpaddi wa makuru aba wi atxinje dhilobodha. Ottiya ejo, mudhidhi wafuniye osakuliwa ninga mwene iyene wahittawa.—Jo. 6:15.

7-8. Sabwaya jani Yezu katamelile ogomiha obure valiye velaboni ya vati? (Joau 18:36)

⁷ Yezu valiye velaboni ya vati kakosile mpaddi wa politika atamelaga ogomiha obure. Sabwaya jani? Iyene wanziwa wi attu kanfwanyela ovilamulela anya vina kana ewodhelo ya okosa ejoya. (Ms. 146:3; Jer. 10:23) Awene vina kana ewodhelo ya ogomiha nipara na obure: Satana vina ohiligana. Satana mulamuleli wa elabo ejino, muttu womuyani wabure vaddiddi vina onolabihedha owodha waye wi akosena obure. (Jo. 8:44; Ef. 2:2) Sabwa ya ohiligana masiki muttu akanaga dhifunelo dhapama iyene kanwodha okosa dhilobo dholigana mudhidhi wetene.—Ko. 7:20.

⁸ Yezu wanziwa wi bu Omwene wa Mulugu onawodhe ogomiha kakamwe dhetene dhintota obure. Nona iyene wanlabihedha mudhidhi waye vina guru dhaye “alaleyaga vina avuwihaga miselu dhapama dha Omwene wa Mulugu.” (Lk. 8:1) Dhahene iyene wanapangarhaza attu onlela ogoma wa makattamiho vina wa obure. (Mt. 5:6; Lk. 18:​7, 8) Kawo mulamuleli wa elabo onawodhe okosa matxinjo aba. Ejo enawodheye na Omwene wa Mulugu, obuwene ‘ohinkosa epaddi ya elabo ejino.’—Kengesa Joau 18:36.

KAMUTAGIHE YEZU OGEDDIHIWAGA N’OBURE

9. Txini enukuluveliha wi Omwene wa Mulugu onele ogomiha obure wotene?

⁹ Iyo ninkalawo “masiku omariha” a elabo ejino, nona obure onoonihu ovanene onopitta obure wonile Yezu valiye velaboni ya vati. Mbwenyi napanovi ontota obure ddi Satana na attu ohiligana anlabihedhiwa na iyene. (2 Tm. 3:​1-5, 13; Ovu. 12:12) Dhahene ninga Yezu iyo ninoziwa wi bu Omwene wa Mulugu bahi onawodhe ogomiha kakamwe obure. Vowi ninkamihedha Omwene obu, iyo kaninkosa manifestasau nitamelaga ogomiha obure. Koona empadduwele murogora onkuweliwa Stacy.a Ahinatti osunza ebaribari, Stacy wahivitaganyiha mmakuruni akosa manifestasau. Mbwenyi mwa ovira wa mudhidhi iyene wahiroma waganyedha akala yakosiye yanakamihedha attu vina akala agahiwodha ogomiha makattamihoya. Iyene ohiloga dhahi: “Masaka mena ddanvivuza akala dhakosimi dhali dhapama, mbwenyi ovano ddinoziwa wi bu Omwene wa Mulugu bahi onagomihe makattamiho otene. Vina ddinoziwa wi Yehova onele ogomiha obure wetene. Ejo elobo ehinawodhe miyo okosa.”—Ms. 72:​1, 4.

10. Sabwaya jani iyo kanintamela otxinja malamulo obe watxinja alamuleli? (Mateu 5:​43-48) (Koona vina foto.)

¹⁰ Attu enjene masaka abano anovitaganyiha na makuru antamela watxinja alamuleli. Mbwenyi enji mwa abuwene anolupa malamulo vina anowaputtula ena. Kahiyo ejuwene enisunzihile Yezu. (Ef. 4:31) Mbali onkuweliwa Jeffrey ohiloga: “Enonimi jawi, masiki manifestasauya akalaga ofwasa, attuya anodhaga okala osilidhiwene, momaguva-mwene anoroma ononga dhilobo, wawiyela akwawa vina ovoreyana muttu na mukwaye.” Mwa mpaddi mwina Yezu ohinisunziha wi ninofwanyela wakwela attu otene, masiki abale annipambiha obe annifwara-fwara. (Kengesa Mateu 5:​43-48.) Ninga Akristu, ninokosa muli-mwetemwene wila ninakose dhilobo dhottiyana na esile dhinisunzihile Yezu.

11. Masaka mena enkalela nni yorutxa omutagiha Yezu?

¹¹ Iyo ninoziwa wi Omwene wa Mulugu bunagomihe kakamwe obure, masiki dhawene enodhaga okala yorutxa omutagiha Yezu nigeddihiwaga na obure. Koona empadduweli Janiya weddihiwe na obure sabwa ya ttebe yaye. Iyene ohiloga: “Miyo ddahisilidhiwa venjene. Ejile yahiddipa vaddiddi vina ddafuna wi attuya atxinutxiwe. Venevo ddahigana ovitaganyiha na nikuru nawanela oligana wa attu otene vina ogomiha obure. Miyo ddobuwela wi okosa ejene egahitxinja dhilobodha.” Mbwenyi movira wa mudhidhi, Janiya wahizinddiyela wi wanfwanyela okosa matxinjo. Iyene ohenjedhedha “Miyo ddahiroma wattiya attu ena weddiha mubuwelo waga vina ddahiroma wakuluvela attu ottiya omukuluvela Yehova. Venevo, ddahigana ohivitaganyiha na nikuru ntti vina mmakanini aniwanana na abene.” Ebaribari wila ninosilidhiwa nigeddihiwa n’obure obe nigaawonaga attu ena eddihiwaga n’obure, masiki dhawene ninofwanyela wang’anela osilidhiwa wehu vina ninavivolotxe mmakanini a mwilaboni.—Jo. 15:19.

12. Ninfwanyelela nni okala pasope na ejile enengesihu, eniwihu vina enoonihu?

¹² Txini enanikamihedhe wang’anela osilidhiwa wehu nigonaga obure? Elobo enanikamihedhe ja osakula deretu ejile enengesihu, eniwihu vina enoonihu. Miselu dhina mwinternetini dhinkoseliwa watikiniha attu vina wattukulela waloga bure alamuleli. Masaka menji, anamavuwiha miselu anloga monelo wawa ottiya ejile epadduwile. Masiki miseludha dhikale dhebaribari, koddi okala wubuwelaga ejuwene enele otxinja dhilobodha? Niganongaga mudhidhi mwinjene na miselu ninga esi, ninodhaga okumuwa obe osilidhiwa. (Gan. 24:10) Yottabwaya, ninodhaga odduwala wila Omwene wa Mulugu bunagomihe obure wetene.

13. Masasanyedho a deretu a omusunza Bibilia vina otanalela ananikamihedhe dhavi nigoonaga obure?

¹³ Masasanyedho aderetu a omwengesa Bibilia vina otanalela anele onikamihedha owanana obure. Murogora onkuweliwa Alia wankumuwa venjene sabwa ya mukalelo weddihiwa attu mmuruddani mwaye. Vina yakala ninga attuya akosa ejuwene katxinutxiwa. Iyene ohiloga: “Miyo dditxima vang’onovi vina ddihivivuza, ‘Koddi ddinokuluvela-wene wi Yehova onele ogomiha makattamiho aba?’ Venevo ddihengesa Job 34:​22-29. Maversikulu aba ahiddubutxedha wi Yehova onowona dhotedhene. Iyene bahi ddili woligana vina ddi iyene bahi onwodha ogomiha kakamwe makattamiho aba.” Koddi ekalawo elobo yina enwodhihu okosa ovanene oku nijedhaga Omwene wa Mulugu ogomiha obure?

TXINI ENFWANYELIHU OKOSA OVANENE?

14. Elobo gani enfwanyelihu okosa ovanene? (Kolosi 3:​10, 11)

¹⁴ Iyo kaninwodha wang’anela dhinkosa attu ena, mbwenyi ninowodha wang’anela dhokosa dhehu. Ninga moonilehu, nigalagiha okwela ninimutagiha Yezu. Okwela oku ononittukulela wariha attu—masiki abale anaweddiha ena na obure. (Mt. 7:12; Rom. 12:17) Yehova onowagalala nigaweddihaga attu ena n’opama vina n’oligana.—Kengesa Kolosi 3:​10, 11.

15. Ninfwanyelela nni ologa na ena dhibaribari dha mBibiliani?

¹⁵ Mukalelo wapama wa owanana obure bwa olaleya dhibaribari dha mBibiliani. Ninlogelani ejuwene? Sabwani eziwelo ya Yehova enodhaga omutxinja muttu wali muwali bakala muttu wapama vina wa murenddele. (Iza. 11:​6, 7, 9) Mulobwana dhahi onkuweliwa Jemal ahinatti osunza ebaribari, wahivitaganyiha na nikuru na asadduweli nawanela otxinjiwa wa alamuleli a elabo yaye aboya àli abure vaddiddi. Iyene ohiloga: “Kinwodheya omudidela muttu otxinja mikalelo dhaye. Miyo kaddidideliwe otxinja. Dditxinjile musunzile miyo dhibaribari dha mBibiliani.” Dhilobo dhisunzile Jemal dhihimuttukulela otxinja. Akala ninowasunziha attu ena dhibaribari dha mBibiliani ninele wakamihedha awene ottiya wakosela attu ena dhilobo dhabure.

16. Txini enuttukulela ologa na attu ena sabwa ya Omwene wa Mulugu?

¹⁶ Dhahene ninga Yezu, iyo ninofuna wawaddela attu wi Omwene wa Mulugu bunawodhe ogomiha obure. Njedhelo ntti ninowapangarhaza abale aneeddihiwa n’obure. (Jer. 29:11) Stacy, ologiwe mundduni, ohitapulelamo: “Oziwa wi Mulugu onele ogomiha matabuwo enoddikamihedha okala wofwaseyene ddigeddihiwa n’obure obe ddigaawona ena eddihiwaga n’obure. Yehova ononipangarhaza modhela miselu dha mBibiliani.” Mbwenyi wila olaleye miselu dhopangarhaza dha mBibiliani, onofwanyela ovisasanyedha pama. Ogahaganyedhe ejile enloga Bibilia sabwa ya obure, onele okala womala-nawale wi otapulelemo pama makani aba oskola obe omabasani.b

17. Yehova onnikamihedha dhavi owanana obure onoonihu masaka abano?

¹⁷ Mokubanyiha-mwene sabwa ya Satana okala “mulamuleli wa elabo ejino” iyo ninele odhowavi nitabuwaga. Mbwenyi ninojedhela masaka aderetu, sabwani Yehova opikirhela onikamihedha ovanene vina omuttamagiha Satana na ogomiha obure wotene. (Jo. 12:31) Amulabihedhaga Bibilia Yehova ononisunziha sabwaya ekalilewo obure vina mukalelo onviwamo iyene nigatabuwaga. (Ms. 34:​17-19) Modhela Mwanaye, Yehova ononisunziha enfwanyelihu okosa nigoonaga obure masaka abano vina ejile enakose Omwene waye wila ogomihe kakamwe obure. (2 Pe. 3:13) Nona nihitxelele olaleya miselu dhapama dha Omwene na murima wotene oku nijedhaga nowagalala nsaka ninadhale mwilaboni opama vina oligana.—Iza. 9:​6, [Iza. 9:7 NM].