Olevelela wa Yehova—Onawodhe Dhavi Otagiha?

1-2. (a) Mudhidhi gani endaga okala yorutxa omulevelela muttu? (b) Txini ekosile Denise?

WEYO onorutxiwa walevelela ena? Mwa enjene kahiyo elobo yovevuwa omulevelela muttu omunyimulile vaddiddi. Mbwenyi, enowodheya okosavo elobo wi nihikoye ntxiga vina nilevelele. Motagiha, koona empadduwele murogora onkuweliwa Denise,a iyene ohiwodha olevelela na mukalelo wotikiniha. Yaka ya 2017, Denise na amudhaye ahidhowa wona Katti Enddimuwa ya Anamoona a Yehova yamalile ofuguliwa-wene. Eyelelaga vatakulu nameddiha karo mwina wahivada karo mwali Denise na anamudhi aye. Denise wahileya ahiziwaga yapadduwa sabwa ya asidenti. Mvenyiliye, wahizinddiyela wi anaye ahivoreheya vaddiddi vina mamunaye Brian wahikwa. Obuwelaga dhipadduwile, Denise ohiloga, “Miyo ddahidhugudheya vaddiddi vina ddali ozuzumene.” Musogorhomwa iyene wahizinddiyela wi nameddiha karoya kazuzumile na dhilobo dhina vina kalezelile, venevo iyene wahimulobelela Yehova amukumbirhaga murenddele.

² Nameddihaya wahifugeliwa mukamburha sabwa ya ompa muttu na asidenti. Kowiliwa iyene wahifwanyiwana muladdu agahikalavi mukamburha. Mbwenyi, tribunali ehimwaddela Denise wila ottongiwa wa mulobwana ole ogaganiwe mowiwanana na egalogiliye. Denise ohiloga: “Yakala ninga muttu wafugulile elodda bekavo mwinyu, sabwani ddigahubuwela wili dhotene dhipadduwile siku nttile norutxa vaddiddi mwigumini mwaga.” Sumana dhing’onovi musogorho, Denise wali o tribunali avisasanyedhaga wi aloge na mulobwana ole watotele makattamiho menjene anamudhi aye. Txini elogiliye? Denise ohimukumbirha namattonga wi amulevelele mulobwanaya.b Mmaleliye ologa, namattongaya wahiroma wunla. Iyene ohiloga: “Vyaka esi dhotedhene dhinlaba miyo ninga namattonga, txipo kaddinewaga anamudhi apujiwe addikumbirhaga wi ddimulagihe ttagaraga muttuya onna muladdu. Enorutxa wiwa mazu okwela vina olevelela.”

3. Txini emuttukuleli Denise olevelela?

³ Txini emukamihedhile Denise olevelela? Iyene ohitanalela olevelela wa Yehova. (Mik. 7:18) Nigalagiha otamalela sabwa ya mukalelo onnilevelela Yehova, iyo ninottukuleleya walevelela attu ena.

4. Yehova onjedhela wila nikose eni? (Éfezo 4:32)

⁴ Yehova onfuna wi iyo notene nikale omala-nawale wi nalevelele ena dhahene ninga munnilevelela iyene. (Kengesa Éfezo 4:32.) Yehova onjedhela wi nalevelele abale anninyimula. (Ms. 86:5; Lk. 17:4) Mu nsunzoni ntti, ninele wona dhilobo ttaru dhinfwanyelihu okosa wi nikale attu olevelela.

KUPWAZE MUKALELO ONIVIWAMO WEYO

5. Mowiwanana na Gano 12:​18, muttu aganinyimula nindaga oviwamo dhavi?

⁵ Txino ninodhaga osilidheya vaddiddi na elobo ekosile obe elogile muttu, makamaka akala marho wofiyedheya obe mwanamudhi. (Ms. 55:​12-14) Masaka mena ninodhaga oviwamo ninga nilatiwe na mbeni. (Kengesa Gano 12:18.) Txino ninodhaga ovilibihedha okala ninga kipadduwile elobo obe ninga kaninyimuwile. Mbwenyi okosa ejuwene enkala ninga nilatiwe na mbeni banittiya mbeniya veloddani. Na mukalelo wakakene, kaninjedhela okala deretu nigapwaza mukalelo oniviwamo iyo.

6. Txini endaga iyo okosa muttu aganinyimula?

⁶ Muttu aganinyimula, txino elobo yoroma enubuwela iyo ja osilidhiwa vaddiddi na iyene. Bibilia onologa wi dila dhina kahiye yabure osilidhiwa. Mbwenyi, ononaddela wi kaninfwanyelela okala wosilidhiwene mwari mwa mudhidhi mwinjene. (Ms. 4:4; Ef. 4:26) Sabwaya? Sabwani mukalelo oniviwamo iyo onodhaga onittukulela okosa elobo. Osilidhiwa dila dhinjene kunnittukulela okosa dhilobo dhapama. (Tia. 1:20) Osilidhiwa onodhaga opadduwa mohijedheleya, mbwenyi odhowavi nikalaga wosilidhiwene yosakula yehu.

7. Dhubuwelo gani dhabure dhinkana iyo muttu aganinyimula?

⁷ Muttu aganeddiha bure, ninodhaga okana dhubuwelo dhina dhohifwanyelela. Motagiha, murogora onkuweliwa Ann ohiloga: “Valimi mwana, babani wahimuttiya mmani bamutela yaya waga. Miyo ddaviwamo ninga ddinyanyaliwe. Musogorhomwa vakanilani aima, miyo ddaviwamo ninga kaddali mwanaye. Miyo ddunuwile ddubuwelaga wi ddahinyanyaliwa.” Murogora onkuweliwa Georgette ohiloga mukalelo oviwilemo iyene mamunaye mulupeliye matelo. Iyene ohiloga: “Iyo nali amarho oromana muhimani. Nihilaba vamodha ninga apionero! Ddahikumuwa vaddiddi.” Murogora okuweliwa Naomi ohiloga: “Miyo txipo kaddobuwela wi mamunaga agahiddinyimula. Muddaddeliye wi wanawona attu bali yovi moviteya, ddahiviwamo ninga ddanyengettiwe vina ddekiwe ekotti.”

8. (a) Mwaha gani dhina dhinnittukulela walevelela ena? (b) Ekalele nni yapama okala namalevelela? (Koona kasha “Txini Enfwanyelihu Okosa Akala Muttu Ononikosela Elobo Ehinwodhihu Odduwala?”)

⁸ Kinwodheya wang’anela dhotene dhinloga vina dhinnikosela ena, mbwenyi enowodheya wang’anela mukalelo onaviwemo iyo. Dila dhinji elobo yapama enfwanyelihu okosa, olevelela. Sabwaya? Sabwani iyo ninomukwela Yehova vina iyene onjedhela wi nikale attu anlevelela. Nigadhowavi nikalaga osilidhiwene vina se olevelela, enele orutxa okosa dhosakula dha malago ofiyedha wika vang’ovini egumi yehu. (Gan. 14:​17, 29, 30) Koona yotagiha ya murogora okuweliwa Christine, iyene ohiloga: “Miyo ddigasilidhiwa obe ddiganyimuwa, kaddinteyetxa, kaddinja deretu, kaddinwodha ogona mowakwana-mwene vina enokala yorutxa wang’anela mukalelo oniviwamo miyo. Ejo enopatta matelo aga vina mandano aga na attu ena.”

9. Sabwaya jani kaninfwanyela okoya ntxiga?

⁹ Masiki akala muttuya oninyimulile kankumbirha nlevelelo, enowodheya iyo okosa elobo wi nivugule makattamiho anitoteliye. Dhavi? Georgette ologiwe mundduni, ohiloga: “Kiyali yovevuwa, mbwenyi movira wa mudhidhi ddahidha ottiya okala wosilidhiwene na mamunaga wa wale. Yodhelavoya, jawi ddahidha okana murenddele munddimuwa vaddiddi.” Nigahikoye yammirimani, kaninattiye wi ejile enipadduwele opatta mukalelo onaweddihehu attu ena. Ohikoya ntxiga enonipuriha iyo nanya—ninowodha odhowavi vasogorho vina okana egumi yowagalala. (Gan. 11:17) Kito akala kunakala womala-nawale wi olevelele?

ONAWODHE DHAVI ORABELA OKALA WOSILIDHIWENE

10. Ekalele nni yamakamaka ovivaha mudhidhi wi nivulumuwe mpaddi wa muyubuweloni? (Koona vina mafoto.)

¹⁰ Txini enfwanyeliwe okosa wi orabele okala wosilidhiwene vina wonyimuwene? Motagiha, muttu ovoreyile vaddiddi onottukula mudhidhi wi avulumuwe. Na mukalelo wakakene, iyo ninofuna mudhidhi wi nivulumuwe mpaddi wa muyubuweloni nihinatti okala omala-nawale wila nimulevelele muttu oninyimulile na murima wotene.—Ko. 3:3; 1 Pe. 1:22.

11. Yotagiha ya Ann ennisunziha eni mwaha wa nlobelo?

¹¹ Kamulobelele Yehova omukumbirhaga wi okale namalevelela.c Ann, ologiwe omaromo, ohiloga mukalelo omukamihedhile nlobelo. Iyene ohiloga dhahi: “Miyo ddahimukumbirha Yehova wi àlevelele amudhaga mwa dhilobo dhabure dhikosilani obe dhilogilani. Musogorhomwa ddahimulebela karta babani na mwadhiye ddawaddelaga wi ddahalevelela sabwa ya esile dhakosilani.” Ann ohilaga wi okosa ejuwene kiyali elobo yovevuwa. Mbwenyi iyene ohiloga dhahi: “Sabwa ya miyo otagiha olevelela wa Yehova njedhelo naga ttawi babani vina mwadhiye anodhaga ottukuleleya osunza mwaha wa Yehova.”

12. Ninfwanyelela nni omukuluvela Yehova ottiya mukalelo oniviwamo iyo? (Gano 3:​5, 6)

¹² Kamukuluvele Yehova ottiya mukalelo oniviwamo weyo. (Kengesa Gano 3:​5, 6.) Dila dhotene Yehova onoziwa eli yapama mwa iyo. (Iza. 55:​8, 9) Iyene txipo kananikumbirhe okosa elobo enaniputtule. Nona iyene agaloga wi nikale anamalevelela ninofwanyelela okuluvela wi enele onipurhiha iyo nanya. (Ms. 40:4; Iza. 48:​17, 18) Mwa mpaddi mwina, nigakuluvela mukalelo oniviwamo iyo, txino kaninawodhe olevelela. (Gan. 14:12; Jer. 17:9) Naomi, ohiloga: “Vamaromo ddobuwela wi ddahikana mwaha dhaddittukulela ohimulevelela mamunaga sabwa ya iyene wawona attu bali yovi. Ddanova wi iyene anadhe oddinyimula wili obe odduwala mukalelo oddinyimuliye. Ddanloga ddamwinya wi Yehova wannonelamo mukalelo waviwamo miyo. Venevo miyo ozinddiyela wi sabwa ya Yehova ononelamo mukalelo onviwamo miyo, kintapulela wi iyene onorumela merelo aga. Yehova onoziwa mowakwana-mwene dhinddipadduwela vina wi enottukula mudhidhi wila osilidhiwawa ovire, mbwenyi iyene onfuna wi ddikale namalevelela.”d

NINAWODHE DHAVI WUNUWIHA DHUBUWELO DHAPAMA

13. Mowiwanana na Roma 12:​18-21, txini enfwanyelihu okosa?

¹³ Iyo nigamulevelela muttu oninyimulile venjene ninofwanyela okosa elobo yina ottiya orabelavi ologa mwaha wa ejile epadduwile. Akala muttuya oninyimulile mbali obe murogora, iyo ninofwanyela okosa muli-mwetemwene wi nikane murenddele na iyene, yogana yehu ja oteyihana. (Mt. 5:​23, 24) Iyo ninfuna nitxinje osilidhiwa na ttagaraga, ntxiga na olevelela. (Kengesa Roma 12:​18-21; 1 Pe. 3:9) Txini enanikamihedhe okosa ejuwene?

14. Guru gani enfwanyelihu okosa vina sabwaya jani?

¹⁴ Iyo ninofwanyela ovilibihedha wi nimoone muttuya oninyimulile dhahene ninga munimoona Yehova. Yehova onosakula wona opama wa muttuya. (2 Ma. 16:9; Ms. 130:3) Dila dhinji ontamela, onofwanya—masiki dhilobo dhapama obe dhabure mwa attu ena. Nigafwaseyela wona mikalelo dhapama dha attu ena, enele okala yovevuwa walevelela. Motagiha, mbali onkuweliwa Jarrod ohiloga: “Mwa miyo enokala yovevuwa omulevelela mbali ddigapima obure oddikoseliye na dhilobo dhinji dhapama dhinziveliwa miyo mwa iyene.”

15. Ekalele nni yamakamaka omwaddela muttuya wi nihimulevelela?

¹⁵ Elobo yina yamakamaka enfwanyelihu okosa ja ologa na muttuya wi nihimulevelela. Sabwaya? Naomi, ologiwe mundduni, ohiloga: “Mamunaga wahiddivuza, ‘Weyo ohiddilevelela?’ Ddifunaga omwakula ‘ndde’ ddahikameya vina kaddiwodhile ologa. Venevo ddahizinddiyela wi kaddamulevelele mamunaga na murima wotene. Mwa ovira wa mudhidhi, ddahiwodha ologa mazu aba a ttima vaddiddi, ‘Ddihulevelela.’ Mmulevelele miyo mamunaga iyene wahiroma wunla. Miyo ddahitikina mukalelo waviwilemo iyene sabwa ya omulevelela, miyo vina ddahagalala. Musogorhomwa ddahiyelela omukuluvela wili, ovano nili amarho ofiyedheya.”

16. Txini esunzile weyo sabwa ya olevelela?

¹⁶ Yehova onfuna wi iyo nikale attu olevelela. (Kol. 3:13) Masiki dhawene, enodhaga okala yorutxa walevelela ena. Mbwenyi ninele owodha walevelela ena nigahipwaze mukalelo oniviwamo iyo vina nigavilibihedha ohikala wosilidheyene. Ninele owodha wunuwiha dhubuwelo dhofwanyelela.—Koona kasha “Ttarho Ttaru Dhinnikamihedha Olevelela.”

KATANALELA DHOPURELAMO DHA OLEVELELA

17. Dhopurelamo gani dhinkanihu nigaalevelela ena?

¹⁷ Iyo nihikana mwaha dhinji dhinnittukulela walevelela ena. Woroma, akala ninolevelela iyo ninomutagiha Babihu Yehova, ejo enomwagalaliha vaddiddi. (Lk. 6:36) Wanawili, ninolagiha vina otamalela sabwa ya Yehova onilevelela. (Mt. 6:12) Wanoraru, ninokana egumi yapama vina mandano ehu na attu ena anoliba.

18-19. Txini egadhile opadduwa sabwa ya okala anamalevelela?

¹⁸ Nigalevelela, dhilobo dhapama dhahajedhelihu dhinodhaga opadduwa. Motagiha, koona epadduwile na Denise ologiwe mundduni. Mudhidhi wottongiwa, iyene kaziwa wi mulobwana watotile asidenti wahigana ovipa makaniya agamala ottongiwa. Mbwenyi iyene wahitikina vaddiddi sabwa ya oleveleliwa na Denise ofiyedha oroma omusunza Bibilia na Anamoona a Yehova.

¹⁹ Ninodhaga wubuwela wi omulevelela muttu elobo yorutxa vaddiddi—mbwenyi enodhaga okala yogana yapama vaddiddi. (Mt. 5:7) Nikose mpaka munwodhelihu wila nitagihe olevelela wa Yehova.