Kadhowavi Weddaga na Nroromelo

1. Txini yamuttukulela Paulo wagalala na mukalelo weddiha iyene egumi yaye?

MURUMIWI Paulo wanziwa wi mohigonela agahipiwa, mbwenyi iyene wahikana mwaha dhapama dhowagalala na egumi yaye. Ang’anaga mundduni, iyene ohiloga: “Ddittamaga mpaka omagomo, ddikalawo na nroromelo.” (2 Tm. 4:​6-8) Paulo ohikosa yogana yamalago ya olabihedha egumi yaye wi amulabele Yehova vina wanziwa wila Yehova wahagalala na dhosakula dhaye. Iyo vina ninofuna okosa dhogana dha malago vina orumeliwa na Mulugu. Ninawodhe dhavi okosa ejuwene?

2. Txini entapulela wedda na nroromelo?

² Paulo ohiloga dhahi mwaha waye vina mwaha wa Akristu ena ororomeleya: “Iyo nineddihiwa na nroromelo ottiya na esile dhinonihu.” (2 Ko. 5:7) Paulo wafuna aloge eni na mazu aba? Mbibiliani nzu ntti, “wedda” dila dhinjene enaddiwana mukalelo onsakula muttu weddiha egumi yaye. Attu ahinimuroromela Yehova, anokosa dhogana mowiwanana na ejile enonani, eniwani vina mukalelo oniviwanimo. Mwa mpaddi mwina, muttu ageddihiwaga na nroromelo, onokosa dhogana mowiwanana na omuroromela waye Mulugu. Dhokosa dhaye dhinolagiha wi onokuluvela wila Mulugu onele omuttuva vina iyene onele opurelamo sabwa ya ofwara malago a Yehova anfwanyeya mu Nzuni Naye.—Ms. 119:66; Ahe. 11:6.

3. Dhopurelamo gani dhinkanihu sabwa ya wedda na nroromelo? (2 Korinto 4:18)

³ Dila dhina, iyo notene ninofwanyela okuluvela esile dhinonihu, dhiniwehu vina mukalelo oniviwamo iyo nigakosaga dhogana. Mbwenyi ninodhaga okaana makattamiho, nigatanalela esile bahi dhinonihu obe dhiniwehu nigakosaga dhogana mwaha wa makani amakamaka. Sabwaya? Sabwani esile dhiniwehu vina dhinonihu dila dhinji kadhinkuluveleya. Nigakosa dhogana nitanalelaga esile bahi dhinonihu, dhiniwehu obe mukalelo oniviwamo iyo na mudhidhiya ninele okosa elobo ehinimmuzivela Yehova. (Ko. 11:9; Mt. 24:​37-39) Mbwenyi nigakosaga dhogana modhela nroromelo nehu, ninele okosa dhogana “dhinimuzivela Nabuya.” (Ef. 5:10) Ofwara malago a Mulugu enele monivaha murenddele wa mmurimani vina wagalala webaribari. (Ms. 16:​8, 9; Iza. 48:​17, 18) Nigmadhowavi neddihiwaga na nroromelo, ninele okalawo namukalakala.—Kengesa 2 Korinto 4:18.

4. Muttu onziwa dhavi akala onowedda na nroromelo obe na esile dhinoniye?

⁴ Ninawodhe dhavi ozinddiyela akala nineddihiwa na nroromelo obe esile dhinonihu? Iyo notene ninofwanyelela ovivuza: Ddinimukuluvela ani ddigakosaga dhogana? Ddinkuluvela bahi dhilobo dhinwodhimi wona? Obe ddinoweddihiwa na malago a Yehova? Ndoweni noneni mukalelo onawodhihu odhowavi needdaga na nroromelo mwa dhipaddi ttaru dhamakamaka: nigasakulaga ganyo, nigamusakulaga muttu womutela obe woteleliwana vina nigakela malago anvahiwihu na nikuru na Yehova. Mwa epaddi modha-modha, ninele osekeserha enfwanyelihu wubuwela wi nikose dhogana dhapama.

OGAFUNAGA OSAKULA GANYO

5. Txini enfwanyelihu otanalela nigatamelaga ganyo?

⁵ Iyo notene ninofuna ovisapela nanya vina wasapela anamudhi ehu. (Ko. 7:12; 1 Tm. 5:8) Ganyo dhina dhinottambirhiha kobiri yinjene opitta dhina. Ganyo dhina dhinomuttambirhiha namalabaya kobiri dhinamukamihedhe wakwanihedha dhojombeliwa dha anamudhi aye vina okoya kobiri eng’onovi enamukamihedhe musogorho. Mbwenyi ganyo dhina, dhinottambirhiha kobiri ennikamihedha bahi wavaha anamudhi ehu ejile enajombela ninga dhoja, dhowabala, mburo wokala vina vogona. Nigafunaga ogana akala ninele orumela ganyo, kavali waganyedha wi ninele otanalela muttengo onattambirhege iyo. Mbwenyi akala nintanalela muttengo onattambirhege iyo bahi nineeddihiwa na esile dhinona iyo.

6. Ninawodhe dhavi wedda na nroromelo nigasakulaga ganyo? (Ahebreu 13:5)

⁶ Nigeddihiwaga na nroromelo, ninele otanalela mukalelo onapatte ganyo mandano ehu na Yehova. Ninofwanyela ovivuza: ‘Mabasa aba anomwagalaliha Yehova obe anowiwanana na okosa dhilobo dhinidda iyene?’ (Gan. 6:​16-19) ‘Ejo egahipatta omwebedha waga Yehova obe egahiddittukulela okala wolapelana na anamudhi aga mudhidhi mwinjene?’ (Flp. 1:10) Akala yowakula ya mavuzo aba jawi ndde, egahikala yamalago ohirumela, masiki ekalaga yorutxa ofwanya ganyo. Sabwa ya weddihiwa na nroromelo, ninokosa dhogana dhinlagiha wi ninokuluvela wila Yehova onele onikamihedha wakwaniha dhojombeliwa dhehu.—Mt. 6:33; kengesa Ahebreu 13:5.

7-8. Mbali w’o América do Sul weddile dhavi na nroromelo? (Koona vina foto.)

⁷ Mbali onkala o América do Sul onkuweliwa Javier,a ohona ttima ya weddana nroromelo. Iyene ohiloga: “Miyo ddahitamela mabasa agaddittambirhihile kobiri dila bili opitta mabasa aga awale vina ejo egahiddagalaliha vaddiddi.” Mbwenyi Javier wahikana efunelo enddimuwa ya olaba ninga pionero. Iyene ohenjedhedha: “Yahikosiwa masasanyedho wi ddikose entrevista wila ddirome olaba. Entrevistaya ehinatti, miyo ddimulobelela Yehova ddikumbirhaga nikamihedho, sabwani ddankuluvela wi Yehova wanziwa eli yapama mwa miyo. Miyo ddanfuna venjene okana mabasa aderetu, mbwenyi kaddafuna wi mabasaya aba additximihe wakwaniha dhogana dhaga dhomuyani.”

⁸ Javier ohiloga: “Mudhidhi wakosiwa miyo entrevista, munddimuwaya wahiddaddela wi ddanfwanyela olaba mawora menjene opitta akwaga. Namukalelo woleleya miyo ddahimwaddela wi kaddigawodhile okosa ejoya sabwa ya mabasa aga a Omwene.” Ndde, Javier wahikodda mabasaya. Sumana bili musogorhomwa, iyene wahiroma olaba ninga pionero. Musogorhomwa yakene ejile, iyene wahifwanya ganyo ya mudhidhi mung’onovi. Iyene ohiloga: “Yehova ohivuruwana malobelo aga vina ohiddivaha ganyo egaddikamihedhile olaba ninga pionero. Ddinowagalala venjene sabwa ya okana ganyo enddikamihedha olabihedha mudhidhi waga wi ddimulabele Yehova vina ddakamihedhe abalaga.”

9. Txini ensunziwe na yotagiha ya Trésor?

⁹ Kito nigazinddiyela wi mabasa ehu maswa kannirumeliha wedda na nroromelo? Katanalela yotagiha ya Trésor, onkala o Congo. Iyene ohiloga: “Mabasa aga maswa elobo yafunetximi vaddiddi. Miyo ddanttabirha dila ttaru opitta mabasa aga awale vina attuya anddoona ninga muttu wamakamaka.” Mbwenyi, Trésor wanjomba dila dhinjene o matugumanoni sabwa ya mabasa omwinjivela. Ottiya ejo, dila dhina anamalaba akwaye annimudidela wi azivalele attu wila ahiziwe dhilobo dhabure dhakosa emprezaya. Trésor wanfuna ottiya mabasaya mbwenyi wannova okala se ganyo. Txini emukamihedhile? Iyene ohiloga: “Habakuk 3:​17-19 ohiddikamihedha ononelamo wila masiki kuyelela ganyo ejile Yehova agahiddikoya. Nona miyo ddahittiya ganyoya.” Iyene ohiloga: “Enjene anatamela attu wi alabele, anubuwela wila muttu agafuna okana mabasa animuttambirhiha kobiri yinjene, onele okosa elobo-txilobo ofiyedha oyelela mudhidhi ogakaliliye na amudhaye vina mudhidhi oganongiliye na mabasa omuyani. Ddinowagalala venjene sabwa ya obarela mandano aga na Yehova vina na anamudhi aga. Yaka modha musogorho, Yehova ohiddikamihedha ofwanya ganyo egaddikamihedhile wakwanihedha dhojombeliwa dhaga vina okana mudhidhi wi ddizuzumele mabasa omuyani. Nigamwika Yehova vamburoni voroma, txino mwa mudhidhi mung’onovi ninele ojombeliwa kobiri, mbwenyi Yehova onele onikoya.” Ndde, nigakuluvela malago vina dhilobo dhinipikirhele Yehova, ninele odhowavi neddaga na nroromelo vina iyene onele oniruriha.

OGAMUSAKULAGA MUTTU WOMUTELA OBE WOTELIWANA

10. Txini eli yamakamaka nigamutamelaga muttu womutela obe woteliwana, mbwenyi txini enfwanyelihu orabela okosa?

¹⁰ Matelo mvaho wa Yehova vina kahiyo yabure ofuna otela obe oteliwa. Nona agamutamelaga muttu woteliwana, murogora txino onotamela wona mikalelo dhaye, akala okoddela obe nne, dhinloga attu mwaha waye, mukalelo ononiwiye na attu ena, akala okaana kobiri obe nne, akala onowazuzumela anamudhi aye vina mukalelo onimweddihiye.b Esi dhilobo dhamakamaka. Mbwenyi akala iyene onotanalela bahi dhilobo esi oneddihiwa na esile dhinoniye.

11. Ninawodhe dhavi wedda na nroromelo nigamusakulaga muttu womutela obe woteliwana? (1 Korinto 7:39)

¹¹ Yehova onowagalala venjene na abalihu vina arogora anfwara malago aye agafunaga omusakula muttu womutela obe woteliwana! Motagiha, awene anovirihamo malago a mBibiliani vina anojedhela okaana yimo yofwanyelela ahinatti wubuwela otela obe oteliwa. (1 Ko. 7:36) Awene anotamela oziwa makamaka akala muttu onfunani omutela obe oteliwana ohikana mikalelo dhinloga Yehova wila mamuni wapama obe muteliwi wapama onofwanyela okaana. (Gan. 31:​10-13, 26-28; Ef. 5:33; 1 Tm. 5:8) Awene kanrumela omweddelela obe weddeleliwa na muttu ohili Munamoona wa Yehova, ottiya ejo anofwara nlago na otela mwa “Nabuya bahi,” ninfwanyeya va 1 Korinto 7:39. (Kengesa.) Anodhowavi eddaga na nroromelo, akuluvelaga wi Yehova onowodha ozuzumela dhojombeliwa dhawa opitta muttu mwina.—Ms. 55:22.

12. Txini esunziliwe na yotagiha ya Rosa?

¹² Koona epadduwile na Rosa, pionera onkala o Colombia. Mabasa aye annimuttukulela ovira mudhidhi mwinjene na mulobwana wahali Munamoona wa Yehova, sabwa ya ejuwene awene ahiroma ofunana. Rosa ohiloga dhahi: “Iyene wakala ninga mulobwana wapama. Wanakamihedha attu a murudda waye vina wahikana mweddelo wapama. Ddanziveliwa na mukalelo waddeddihiye. Iyene wahikana mikalelo dhotedhene dha muttu wamujedhelimi odditela, mbwenyi makaniya bawi iyene kaali Munamoona wa Yehova.” Iyene onodhowavi alogaga: “Yali elobo yorutxa omwaddela wi kigawodheyile weddelelana sabwani miyo ddaninfuna. Mudhidhi obulene miyo ddanniviwamo meka vina ddanfuna oteliwa, mbwenyi kaddawodha onfwanya muttu wali Munamoona wa Yehova wi additele.” Mbwenyi Rosa kafwaseyele esile dhoniye. Iyene wahitanalela yogana eji egapattile dhavi mandano aye na Yehova. Nona, iyene wahigwadda mandano na mulobwana oddule vina wahizuzumela mabasa a Omwene. Mudhidhi mung’onovi musogorhomwa, iyene wahikonvidariwa wi adhowe akose Eskola ya Anamalaleya a Omwene, ovano onokamihedha ninga pionera wa vawoka. Rosa ohiloga: “Yehova ohidhaaliha murima waga nohagalala onddimuwa vaddiddi.” Masiki ekalaga yorutxa wedda na nroromelo mmakanini ampatta murima wehu, ninopurelamo nigedda na nroromelo.

OGAKELA MALAGO A NIKURU NA YEHOVA

13. Txini egadhile onittukulela weddihiwa na esile dhinonihu nigakela malago a mu nikuruni na Yehova?

¹³ Anddimuwa a mmulogoni, anameddelela milogo, filiali vina Nikuru Nolamulela—dila dhinjene anonivaha malago mwaha wa omulabela Yehova. Mbwenyi dila dhina kaninwodha ononelamo sabwaya enattukulela abali onivaha malago mena. Ninodhaga waganyehedha akala malagoya ba pama. Txino ninodhaga ofwaseyela dhovonya dha abali avahile malagoya.

14. Txini enanikamihedhe wedda na nroromelo nigakelaga malago a nikuru na Yehova? (Ahebreu 13:17)

¹⁴ Ninokuluvela wi Yehova onosogorhela nikuru naye vina onoziwa makattamiho annipatta. Yodhelavoyá, ninomaguvela wiwelela vina ninokosa ejo na moonelo wofwanyelela. (Kengesa Ahebreu 13:17.) Ninoziwa wi nigafwara malago ninokamihedha mulogo wehu okalavi wowiwanana. (Ef. 4:​2, 3) Masiki abali annisogorhela akalaga ohiligana, ninokuluvela wi nigewelela, Yehova onele oniruriha. (1 Sam. 15:22) Na mudhidhiya, iyene onele wogolela elobo-txilobo enfwanyelela wogoleliwa.—Mik. 7:7.

15-16. Txini emukamihedhile mbali mmodha wedda na nroromelo masiki vaniyena dhowaganyedha mwaha wa malago akeliliye? (Koona vina foto.)

¹⁵ Katanalela yotagiha enoniha yopurelamo ya wedda na nroromelo. O Peru, masiki Espanhol elogiwaga vaddiddi, attu enji anloga dhilogelo dhobaliwana. Modhaya, Quíchua. Mwari mwa vyaka dhinjene abali na arogora a elogelo ya Quíchua annatamela attu aloga elogelo eji mmuruddani mwalaleyani. Mbwenyi wila niwodhe wawiwelela alamuleli, vahikosiwa matxinjo a mukalelo wa walaleya attuya. (Rom. 13:1) Yodhelavoyá, Abali ena annivivuza akala ejo kigarutxihile mabasa a murudda obule. Mbwenyi sabwa abaliya wiwelela matxinjo aba, Yehova wanruriha guru dhawa dha wafwanya attu enjene anloga Quíchua.

¹⁶ Kevin, munddimuwa wa mulogo wa elogelo ya Quíchua wali mmodha wa abali aba àli ozuzumene. Iyene ohitapulelamo: “Miyo ddanubuwela, ‘Ddinawodhe dhavi wafwanya attu anloga Quíchua?’” Txini ekosile Kevin? Iyene ohiloga: “Ddahubuwela nlebo na Gano 3:5. Vina ddahitanalela yotagiha ya Mizé. Yehova wahinvaha malago akala ninga ohipureleyamo, iyene wahimwaddela Mizé wi àsogorhele ana Izrayel aburutxaga mw’Ejipitu mpaka Mwinje Wofila wenewo wakala ninga kagawodhile wattawa akadda Ejipitu afwara-fwara. Masiki dhawene iyene wahiwelela vina Yehova wahiruriha wiwelela waye na mukalelo wotikiniha.” (Obu. 14:​1, 2, 9-11, 21, 22) Kevin wali womala-nawale wi aparhapattele mukalelo walaleyiye. Yodhelavoyá? Iyene ohiloga: “Ddahitikina mukalelo wanirurihile Yehova. Wale nannedda vaddiddi mmabasani a olaleya, dila dhina nanfwanya muttu mmodha obe eli aloga elogelo ya Quíchua, ovano nindowa mirudda munkala attu anloga Quíchua, sabwa ya ejuwene ninowodha ologa na attu enjene, wawiyelela vina okana masunzo menjene a Bibilia. Muttengo wa attu anona matugumano ehu ohunuwa.” Ndde nigedda na nroromelo Yehova onele oniruriha.

17. Txini esunziliwe mu nsunzoni ntti?

¹⁷ Iyo nihona mukalelo onawodhihu odhowavi neddaga na nroromelo mu dhipaddi ttaru dhamakamaka. Mbwenyi ninofwanyela odhowavi neddaga na nroromelo mwa dhipaddi dhotene dha mwigumini mwehu, ninga nigafunaga osakula mavego, nigafunaga okosa dhogana mwaha wa masunzo obe walela aima. Kintanala yogana enakosehu, kaninfwanyela weddihiwa na esile dhinonihu bahi, mbwenyi na mandano ehu na Yehova, malago aye vina nipikirhelo naye na onikoya. Nigakosa ejuwene ninele owodha “weddagavi na Nabuya [Yehova] Mulugu wehu.”—Mik. 4:5.