Yehova Onele Wupangarhaza

1. Egumi ya Ayuda àkala o Babilónia yali dhavi?

KATANALELA mukalelo oviwilemo Ayuda àkala o Babilónia. Awene ahona elabo yawa etolotxiwaga. Movira wa mudhidhi awene ahittiya omwiwelela Yehova, nona iyene wahittiya wi akadda Babilónia àtxedhele elabo yawa, kito egumi yali dhavi mwilaboni ya Babilónia? (2 Ma. 36:​15, 16, 20, 21) Ebaribari wi o Babilónia, Ayuda ahikana ofuru wa okosa dhilobo dhawa dha siku-siku. (Jer. 29:​4-7) Masiki dhawene, egumi yawa kiyali yovevuwa, txibarene kuwiliwa ahikana ofuru wosakula, awene kagasakulile okala wenewale. Mwa dhetene esi awene aviwamo dhavi? Koona elogile mmodhaya: “Txerere dha minje dh’o Babilónia nangilatela wunla, nimubuwelaga Sioni.” (Ms. 137:1) Ayuda abale àli okumuwene vina anfuna nipangarhazo, agafwanyile wuvi nipangarhazona?

2-3. (a) Txini yakosele Yehova Ayuda àkala o Babilónia? (b) Txini enasekeserhe iyo mu nsunzoni ntti?

² Yehova “Mulugu wanipangarhazo notene.” (2 Ko. 1:3) Yehova onowakwela venjene adhari aye, mwadhawene iyene onowagalala agapangarhazaga otene animususela. Yehova wanziwa wi Ayuda ena ali o Babilónia agahirumela osaddeyiwa vina agahigana omulabela na mukalelo wofwanyelela. (Iza. 59:20) Jijuwene emuttukuleli Yehova ologa na Izaiya wi àfiyedhena miselu Ayuda vyaka 100 mundduni ahinatti otxedheliwa o Babilónia, miselu esi dhinofwanyeya mu nivuruni na Izaiya. Yehova okoseli nni ejuwene? Izaiya ohitapulelamo: “Pangarazaní, pangarazaní nlogo naga, onloga ddi Mulugu wenyu.” (Iza. 40:1) Yehova ohilabihedha mavuhulo alebile Izaiya wi àpangarhaze Ayuda afuna nipangarhazo.

³ Dhahene ninga Ayuda, mudhidhi na mudhidhi iyo ninofuna nipangarhazo. Mu nsunzoni ntti ninele wona mikalelo miraru dhilabihedhile Yehova wi àpangarhazena Ayuda: (1) Iyene wahipikirhela wi agahalevelela abale agatxinuwile, (2) wahivaha njedhelo nlogo naye, vina (3) wahakamihedha ohova. Nigasekeserhaga pontu esi ttaru, koona mukalelo onawodhihu opurelamo mazu a Izaiya.

YEHOVA DDATTAGARAGA VINA ONONILEVELELA

4. Yehova olagihile dhavi wila iyene Mulugu wa ttagaraga? (Izaiya 55:7)

⁴ Yehova “Babi wa ttagaraga enddimuwa.” (2 Ko. 1:3) Iyene ohilagiha wi ddattagaraga vapikirheliye walevelela Ayuda agatxinuwile. (Kengesa Izaiya 55:7.) Iyene ohiloga dhahi: “Dduweddela thagaraga, ddinere okala na weyo n’oukwela ohinamale.” (Iza. 54:8) Yehova olagihile dhavi ttagaraga yaye? Masiki Ayuda ninga nlogo vatabuwani sabwa ya dhodhelavo dha dhosakula dhawa, Yehova wahipikirhela wi awene kagakalile o Babilónia namukalakala. Mwa ovira wa mudhidhi, awene agahifuruliwa. (Iza. 40:2) Mazu aba a Izaiya txino ahapangarhaza Ayuda atxinuwile!

5. Sabwaya jani iyo nihikana mwaha dhinjidhene dhinnittukulela ovaha ttima ttagaraga ya Yehova opitta Ayuda?

⁵ Txini ensunzihu? Yehova oli womala-nawale wi àlevelele adhari aye. Masaka abano iyo nihikana mwaha dhinji dhinnittukulela otamalela olevelela wa Yehova opitta Ayuda. Sabwaya jani? Sabwani ninoziwa mowakwana-mwene ekosile Yehova wi awodhe olevelela dhottega dhehu. Vyaka dhinji musogorhomwa mmaleli Izaiya ovuhulela, Yehova wahimuruma Mwanaye wokweleya velaboni ya vati wi aperheke egumi yaye ninga yobolo mwa attegi otene agatxinuwile. Sabwa ya ejile ekosile Yezu, Yehova onowodha ottimiha dhottega dhehu—kuloga onilevelela mowakwana-mwene. (Mer. 3:19; Iza. 1:18; Ef. 1:7) Kavali waganyedha wi ninimulabela Mulugu oli wa ttagaraga vaddiddi!

6. Otanalela ttagaraga ya Yehova ennipangarhaza dhavi? (Koona vina foto.)

⁶ Akala weyo onovipwattelihaga muladdu sabwa ya yottega ekosiliwe mundduni, mazu anvudhelele Yehova Izaiya oleba va Izaiya 55:7 anodhaga wupangarhaza. Ena mwa iyo ninovipwattelihaga muladdu sabwa ya dhottega dhikosilihu mundduni masiki vamaleli iyo otxinuwa, ttabwa-ttabwa akala ninotabuwa na dhodhelavo dha dhottega dhehu. Mbwenyi akala weyo ohibweka dhottega dhawo vina ohittiya okosa dhabure, kakana ebaribari wi Yehova ohulevelela. Yehova agawulevela txipo kanubuwela vina dhottega dhawo. (Kaladdaniha na Jeremiya 31:34.) Nona akala Yehova kanubuwela vina dhottega dhikosilihu wale, iyo kaninfwanyela wubuwela. Mwa Yehova eli yamakamaka kahiye dhottega dhikosilihu mundduni, mbwenyi dhilobo dhapama dhinkosihu ovanene. (Eze. 33:​14-16) Mohigonela, Babihu wa ttagaraga onele ogomiha makattamiho otene ankana iyo sabwa ya dhottega dhehu.

7. Txini enanittukulele otamela nikamihedho na anddimuwa a mmulogoni akala ninokosa yottega enddimuwa?

⁷ Txini enfwanyelihu okosa akala ninokala wodhugudheyene vina mubuwelo wehu ononilemela sabwa ya ovita yottega enddimuwa ekosilihu? Bibilia onologa wi ninofwanyela otamela nikamihedho na anddimuwa a mmulogoni. (Tia. 5:​14, 15) Ebaribari wi enodhaga okala yorutxa wawaddela ekosilihu. Elobo enanikamihedhe, wubuwela wi Yehova onalabihedha alobwana aba wi anikamihedhe, awene anele oneddiha na okwela vina na ttagaraga ninga munkosela Yehova. Nigatanalela esuwene vina nigatxinuwa, enele okala yovevuwa ologa na anddimuwa a mmulogoni. Koona yotagiha ya mbali onkuweliwa Artur,a iyene wanivipwatteliha muladdu sabwa ya okosa yottega, mbwenyi wahipangarhazeya na ttagaraga ya Yehova. Iyene ohiloga: “Mwari mwa yaka modha obe ottamagela, ddanawona attu bali yovi. Mbwenyi mmalelimi wiwa diskursu yaloga mwaha wa mubuwelo, miyo ddahimwaddela mwadhaga vina anddimuwa a mulogoni esile dhakosilemi. Musogorhomwa ddahidha oviwamo pama, mbwenyi mubuwelo waga wanddilemelavi sabwa ya ejile yakosilemi. Anddimuwa a mulogoni ahiddubutxedha wi Yehova kaddinyanyalile. Iyene waddisaddeyile sabwani onoddikwela. Mazu a anddimuwa a mmulogoni ahiddiginya murima waga vina ahiddikamihedha ononelamo wi Yehova wahiddilevelela.” Ovano Artur onlaba ninga pionero vina mudhari wokamihedha. Jopangarhaziha vaddiddi oziwa wi Yehova oli womala-nawale wi anilevelele nigatxinuwa!

YEHOVA ONONIVAHA NJEDHELO

8. (a) Njedhelo gani navahile Yehova Ayuda? (b) Mowiwanana na Izaiya 40:​29-31, njedhelo nakamihedhile dhavi Ayuda?

⁸ Na monelo wa attu, Ayuda àli o Babilónia akala ninga kaana njedhelo. Babilónia waziwiwa ninga muttette wakoodda wafurula abale atxedhiye. (Iza. 14:17) Mbwenyi, Yehova wahivaha njedhelo nlogo naye. Iyene wahipikirhela wi agahafurula, kayiwo elobo egamutximihile. (Iza. 44:26; 55:12) Vamentoni va Yehova, Babilónia wali ninga mbwebwe. (Iza. 40:15) Kovudheliwa vang’onovi, mbwebweya wotene ogahirimela. Njedhelo ntti nakamihedhile dhavi Ayuda? Awene ahipangarhazeya. Ottiya opangarhazeyavi, njedhelo ntti nahidhana dhopurelamo dhina. Izaiya ohileba: “Abale animuroromela Nabuya, guru dhawa dhinolibihiwavi.” (Kengesa Izaiya 40:​29-31.) Njedhelo ntti nahavaha guru Ayuda. Awene agali ninga epungu envava wirimu, sabwani njedhelo nawa nigahalibiha.

9. Mwaha gani dhana Ayuda dhattukulela okuluvela mapikirhelo a Yehova?

⁹ Yehova wahavaha Ayuda mwaha dhattukulela okuluvela mapikirhelo aye. Dhavi? Kobuwela mavuhulo onile Ayuda akwanihedheyaga. Awene ahawona akadda Síria agonjihaga omwene wa Izrayel vina attukulaga nlogo ninga afungiwi. (Iza. 8:4) Awene ahawoona akadda Babilónia amutolotxaga Jeruzalemi vina atxedhaga attuyamo. (Iza. 39:​5-7) Vina ahimoona mwene w’o Babilónia akorhovoraga mento a Mwene Zedekiya vina amuttukulaga ninga mfungiwi. (Jer. 39:7; Eze. 12:​12, 13) Dhetene dhihipadduwa ninga mwalogile Yehova. (Iza. 42:9; 46:10) Otanalela dhotene esi txino ehilibiha nroromelo na Ayuda nawi mapikirhelo akosile Yehova agahakwanihedheya!

10. Txini enanikamihedhe olibiha njedhelo nehu masaka abano omariha?

¹⁰ Txini ensunzihu? Nigakala okumuwene, njedhelo ninowodha onipangarhaza vina onikamihedha okana guru wili. Iyo ninkalawo masaka orutxa vina ottiya ejo nihikana amwiddani a guru vaddiddi. Mbwenyi kaninfwanyela odhugudheya. Yehova ohinivaha njedhelo notikiniha—egumi yamukalakala, ya murenddele vina yottugareya. Ninofwanyela olibiha njedhelo ntti muyubuweloni vina mmurimani mwehu. Nigahikose ejuwene, njedhelo nehu ninodhaga okala ninga mburo wokoddela mbwenyi ohinonihu deretu sabwani ninang’anana vajanelani nopigidheya. Ninawodhe dhavi “okuputta janelana,” kuloga, ottiya njedhelo nehu nolibanene? Ninofwanyela otamela mudhidhi wi nitanalele mukalelo onakale egumi mwilaboni eswa. Enowodheya wengesa artigu, wona mavidiyu vina ovuruwana jibo dhinloga mwaha wa njedhelo nehu. Enowodheya ologa na Yehova sabwa ya mapikirhelo agaziveliwe iyo wona akwanihedheyaga.

11. Txini enimukamihedha Joy okalavi wolibene?

¹¹ Murogora onkuweliwa Joy ongumanana makattamiho a egumi ohipangarhazeya vina ohilibiheya na njedhelo, dhavi? Iyene ohiloga: “Ddigakala wozuzumene na makattamiho, ddinomwaddela Yehova dhiniwamo miyo, ddinokuluvela wi iyene onowodha ononelamo. Midhidhi esi, ddinowona wi Yehova onoddivaha ‘owodha onddimuwa.’” (2 Ko. 4:7) Joy onotanalela mukalelo onakale egumi yaye mwilaboni eswa, mudhidhi ohinalogege attu wi: “Miyo ddili muredda.” (Iza. 33:24) Enowodheya iyo vina wiyelela okana guru niganfugulela murimehu Yehova vina nigafwaseyela njedhelo nehu.

12. Txini ennittukulela okuluvela mapikirhelo a Yehova? (Koona vina foto.)

¹² Dhahene ninga mukosiliye na Ayuda, Yehova ononivaha mwaha dhinji wi nikuluvele mapikirhelo aye. Kobuwela mavuhulo anonihu akwanihedheyaga masaka abano. Motagiha, iyo ninowona potência mundial eli epaddi modha yoliba epaddi yina yowobana. (Da. 2:​42, 43) Iyo vina ninowiwa miselu dha “ottekenyeya wa mattaka mmimburoni dhottiyana-ttiyana,” vina ninokamihedha mabasa a olaleya “mwilaboni mwetemwene.” (Mt. 24:​7, 14) Mavuhulo aba na mena anolibiha nroromelo nehu nawi mapikirhelo mena akosile Yehova anele wakwanihedheya.

YEHOVA ONONIFWASIHA NIGATTIDDIWA WOVA

13. (a) Dhorutxa gani dhigumanilena Ayuda ahinatti ofuruliwa? (b) Mowiwanana na Izaiya 41:​10-13, Yehova wapangarhazile dhavi Ayuda?

¹³ Masiki vapangarhazile Yehova Ayuda na njedhelo notikiniha, iyene wanziwa wi awene agahigumanana makattamiho mudhidhi ogabudduwilani o Babilónia. Yehova wahiloga wi addamelaga omagomo wa otxedhiwa wa Ayuda, mwene mwina wa guru agahilupela malogo addamele Babilónia, musogorhomwa agahimulupela Babilónia vina. (Iza. 41:​2-5) Kito Ayuda anfwanyela okala ozuzumene? Atanalelaga ejuwene vyaka dhinji mundduni, Yehova wahipangarhaza nlogo naye alogaga dhahi: “Kuwove, vowi miyo ddili na weyo; kugurumele, vowi miyo ddili Mulugu wawo.” (Kengesa Izaiya 41:​10-13.) Yehova afuna aloge eni na mazu aba “Miyo ddili Mulugu wawo”? Iyene kela wawubutxedha Ayuda wi anfwanyela omwebedha, sabwani awene anziwa ejoya. Mwebaribari, Yehova wela wawubutxedha Ayuda wi iyene agahikalavi na awene.—Ms. 118:6.

14. Txini ekosile Yehova wi àkamihedhe Ayuda apattiwe wova?

¹⁴ Yehova wahafwasiha Ayuda attiddiwe wova modhela wawubutxedha ewodhelo vina eziwelo yaye ehingoma. Iyene wahakumbirha Ayuda wi ang’ane neneri odhulu. Wahawaddela wi ottiya ottanddavi neneridha iyene wanziwa neneri ji neneri na nzina naye. (Iza. 40:​25-28) Akala Yehova onoziwa neneri ji neneri na nzina naye, kavali waganyedha wi iyene onoziwa nzina na alabeli aye otene. Akala Yehova wahikana ewodhelo ya ottandda dhineneri, mwebaribari iyene ohikana vina ewodhelo ya okamihedha nlogo naye. Ayuda abale kaana mwaha wa okala ozuzumene vina owovene.

15. Yehova wakamihedhile dhavi Ayuda ovisasanyedhela dhigapadduwile musogorho?

¹⁵ Yehova vina wahaddela nlogo naye yafwanyelani okosa kofiya mudhidhi wa ofuruliwa. Yehova wahiloga dhahi na nlogo naye munivuruni na Izaiya: “Volowani mba mwenyu, fugani misuwodhá, kalaní mwenemo; vitalaní mudhidhi [mung’onovi] mpaka vanagome osilidheya wa Nabuya.” (Iza. 26:20) Txino mazu aba ahakwanihedheya dila yoroma vagonjihiwe Babilónia na Mwene Siru. Namaloga mmodha wa mapadduwo a Egregu ohiloga wi mudhidhi wavolowile Siru o Babilónia, iyene “wahilamula wi anyakoddo aye anfwanyela wapa otene agafwanyilani otakulu.” Katanalela mukalelo wazuzumile attu akala o Babilónia! Txino Ayuda ahiwodha ovuneya sabwani ahiwelela malago a Yehova.

16. Sabwaya jani kaninfwanyela ozuzumela venjene dhinapadduwe musogorho? (Koona vina foto.)

¹⁶ Txini ensunzihu? Mohigonela ninele opattiwa goyi enddimuwa ehinonaga attu. Mudhidhi onaromani, attu anele ozuzuma vina anele wova. Mbwenyi nlogo na Yehova kaninove. Sabwani iyo ninoziwa wila Yehova ddi Mulugu wehu. Vina ninele odhowavi nimukuluvelaga niziwaga wi woboleliwa wehu oli vakuvi. (Lk. 21:28) Masiki wiwanana wa malogo aganilupela, iyo ninele odhowavi nikalaga pwi vina nimukuluvelaga Yehova. Yehova onele walabihedha anju wi anibarele vina onele onivaha malago anavune dhigumi dhehu. Ninakele dhavi malago aba? Enele ofuneya ojedhela wi none. Txino ninakele malagoya modhela milogo. Dhahene milogo dhinele okala ninga mba mwehu, mwenemo munakalihu obareleyene. Kito ninavisasanyedhele dhavi dhilobo esi dhinapadduwe musogorho? Ninofwanyela okala ofiyedheya na abalihu vina arogora, wiwelela malago a nikuru na Yehova vina okuluvela wi ddi Yehova oneddiha nikuru naye.—Ahe. 10:​24, 25; 13:17.

17. Onawodhe dhavi otamela nipangarhazo na Yehova?

¹⁷ Masiki egumi vaalani yorutxa mwa Ayuda akala o Babilónia, Yehova wahavaha nipangarhazo nafunani. Yehova onele okosa yakakene na iyo. Nona kintanala enapadduwe musogorho, kadhowavi otamelaga nipangarhazo na Yehova. Kakuluvela ttagaraga ya Yehova. Konuwiha njedhelo nawo vina kudduwale wi Yehova ddi Mulugu wawo, kunfwanyela wova elo.