Ninfwanyelela nni Okumbirha Malago?

1. Ninawodhe dhavi okosa dhogana dha malago dhinanidhelena dhopurelamo dhapama? (Gano 13:10; 15:22)

IYO notene ninofuna okosa dhogana dha malago. Vina ninofuna wi matadelo ehu edde pama. Nzu na Mulugu ninonaddela enanikamihedhe okosa ejuwene.—Kengesa Gano 13:10; 15:22.

2. Txini empikirhela Yehova onikosela?

² Kaninaganyedha wi Muttu onfwanyelihu omutamela wi anivahe eziwelo vina malago ddi Babihu, Yehova. Iyene ohipikirhela onikamihedha alogaga dhahi: Ddinfuna dduvahe malago na mento aga awang’anelaga. (Ms. 32:8) Mazu aba anolagiha wi ottiya onivahavi malago—Yehova onomuzuzumela muttu-muttu wa iyo vina ononikamihedha ovirihamo malago aye.

3. Txini enasekeserhe iyo mu nsunzoni ntti?

³ Mu nsunzoni ntti, ninele olabihedha Nzu na Mulugu wi ninikamihedhe wakula mavuzo manayi: (1) Mikalelo gani dhinfwanyelimi okana wi ddiwodhe opurelamo malago anakelimi? (2) Bani anawodhe oddivaha malago apama? (3) Ddinawodhe dhavi olagiha wi txibarene ddinofuna wakela malago? (4) Ddinfwanyelela nni orabela wakumbirha ena wi addikosele dhogana?

MIKALELO GANI DHINFWANYELIMI OKANA?

4. Nigafuna opurelamo magano anakelihu, ninfwanyela okana mikalelo gani?

⁴ Ninofwanyela okala oviyeviha vina ovipimelela wi nipurelemo malago anakelihu. Jamakamaka vaddiddi orumela wi kaninziwa dhotedhene vina ninofuna nikamihedho na attu ena wila nikose yogana yamalago nigafunaga okosa yosakula ehinakosegihu. Nigahikale attu oviyeviha vina ovipimelela, Yehova kananikamihedhe vina mudhidhi onengesihu Nzu na Mulugu ninobuwelege wi malago annivahiye kanttidda mpirha mwa iyo. (Mik. 6:8; 1 Pe. 5:5) Mbwenyi nigakala oviyeviha, ninele okala omala-nawale wi nivuruwane vina nivirihemo magano anfwanyeya mBibiliani.

5. Dhilobo gani dhikosile Davidi dhigamuttukuleli okala muttu wovittukulela?

⁵ Katanalela ensunzihu na yotagiha ya Mwene Davidi. Masiki vakosiliye dhilobo dhapama iyene kadhile okala muttu wovittukulela. Ahinatti okala Mwene iyene wali muttu wovuwa vaddiddi sabwa ya ttotto yaye ya wiba. Iyene vina wahikonvidariwa wi amwibelege mwene. (1 Sa. 16:​18, 19) Mmaleliye omuttikittela Davidi ninga mwene wafwarela, Yehova wahinvaha muya waye wokoddela. (1 Sa. 16:​11-13) Iyene wahivuwa vaddiddi mwari mwa nlogo naye sabwa ya wapa amwiddani awa, otaganyiha na mukango Goliya. (1 Sa. 17:​37, 50; 18:7) Davidi kokala muttu wovittukulela, agahubuwela wi sabwa ya okosa dhilobo esi dhotene kafwanyela okumbirha malago a attu ena. Mbwenyi Davidi wali muttu woviyeviha.

6. Ninziwa dhavi wi Davidi wanziveliwa wakela malago? (Koona vina ya kapa.)

⁶ Mmaleliye okala mwene, Davidi wahasakula amarho agawodhile onvaha malago. (1 Ma. 27:​32-34) Ejo kahiye yotikiniha, Davidi wahikana elemelelo ya ovuruwana malago. Iyene karumelile malago a alobwana bahi mbwenyi vina a muyana wakuweliwa Abigaili. Iyene wateliwe na Nabal, mulobwana wahalagiha nriho, otamalela vina wa nrima. Na oviyeviha Davidi wahivirihamo nlago naye, sabwa ya ejuwene wahirabela okosa yovonya enddimuwa.—1 Sa. 25:​2, 3, 21-25, 32-34.

7. Dhilobo gani dhinsunzihu na yotagiha ya Davidi? (Kohelét 4:13) (Koona vina mafoto.)

⁷ Ninosunza dhilobo dhing’onovi na Davidi. Motagiha, txino ninowodha okosa pama elobo obe nihikana ettomo. Masiki dhawene, txipo kaninfwanyela wubuwela wi ninoziwa dhotedhene vina kaninfuna malago a attu ena. Ninga Davidi, ninfuna nikale omala-nawale wi nakele malago, ehitanalaga muttuya onnivaha. (Kengesa Kohelét 4:13.) Nigakosa ejuwene, txino ninele orabela okosa dhovonya dhinddimuwa dhiganitotele okubanya iyo nanya vina attu ena.

BANI ANAWODHE ODDIVAHA MALAGO APAMA?

8. Jónata wakalile nni muttu wofwanyelela wi anvahe malago Davidi?

⁸ Katanalela elobo yina ensunzihu na yotagiha ya Davidi. Iyene wanvuruwana malago a attu ana mandano ofiyedheya na Yehova vina anonelamo pama makattamiho agumaniyena. Motagiha, vafuna iyene oziwa yafwanyeliye okosa wi akaane murenddele na mwene Sawul, Davidi wahivuruwana malago a Jónata mwana Sawul. Jónata wakaleleni muttu wofwanyelela wi anvahe malago apama? Sabwani Jónata wahikana mandano ofiyedheya na Yehova vina wannimuziwa pama Sawul. (1 Sa. 20:​9-13) Ninawodhe dhavi ofwara yotagiha eji?

9. Ninfwanyela watamela ani nigafunaga malago? Katapulela. (Gano 13:20)

⁹ Nigafunaga malago ninokosa pama omutamela muttu ona mandano ofiyedheya na Yehova vina onnonelamo pama makaniya anfwanyeliye onikamihedha.a (Kengesa Gano 13:20.) Motagiha, kamubuwele mbali wa muzombwe onfuna onfwanya muttu wa omutela. Bani aganvahile malago apama? Iyene aganvuza muttu oli muziye onodhaga wakela magano apama akala muttuya ononvaha malago andela mBibiliani. Mbwenyi mbaliya onodhaga wakela malago a eziwelo agaavuza atelani animuziwa pama vina animulabela Yehova mwari mwa mudhidhene. Ottiya omwaddelavi enfwanyeliye okosa wila avirihemo malago a mBibiliani, awene vina anodhaga omwaddela esunzilani na matelo awa.

10. Txini enasekeserhe iyo ovanene?

¹⁰ Mpaka ovanene nisunza mikalelo minli dhinfwanyelihu okana vina bani anawodhe onivaha malago apama. Ovano ninele osekeserha mwahaya enfwanyelihu orumela malago anakelihu vina akala ninofwanyela wakumbirha ena wi anikosele dhogana.

NINAWODHE DHAVI OLAGIHA WI TXIBARENE NINOFUNA MALAGO?

11-12. (a) Dila dhina, txini enfwanyelihu okosa? (b) Txini ekosile Mwene Roboau mudhidhi wafwanyeliye okosa yogana yamakamaka?

¹¹ Dila dhina muttu onokala ninga ontamela malago, oku bamalile okosa yogana yaye, amutamelaga bahi muttu onakamihedhe yogana yaye. Akala jijuwene kantamela malago. Iyene onofwanyelela osunza na ejile empadduwele Mwene Roboau.

¹² Roboau okalile mwene mmaleli okwa babe Salomau. Mudhidhi okalile Roboau mwene, nlogo nahikana dhilobo dhapama, mbwenyi obuwela wi Salomau wahalabiha vaddiddi. Nlogo nahinfiyedha Roboau vina nahimuttidda myeddo wi avevutxe mabasa awa. Roboau wahakumbirha wi anvahe mudhidhi wila atanalele yogana gani egakosiliye. Iyene wahikosa pama, sabwani wahakumbirha malago anddimuwa amukamihedhile Salomau. (1 Am. 12:​2-7) Mbwenyi, iyene kafwarile malago a anddimuwaya. Iyene wakosele nni ejuwene? Roboau wahimala ogana egakosiliye, wamutamela bahi muttu agarumelile na yogana yaye. Iyene wajedhela wi anddimuwa abale arumele na yogana yaye, nona mudhidhi waakumbirhiliye malago amarho aye àli azombwe vaddiddi, awene ahirumela na yogana yaye vina iyene wahiziveliwa na dhologa dhawa. (1 Am. 12:​8-14) Roboau wahaddela nlogo ejilene yalogile amarho aye. Yodhelavoya, attu enji ahimusadduwela vina ahimusakula mwene mwina. Oromana venevo Roboau wahikana makattamiho.—1 Am. 12:​16-19.

13. Ninaziwe dhavi akala txibarene ninofuna wakela malago a attu ena?

¹³ Txini ensunzihu na yotagiha ya Roboau? Nigakumbirha malago, ninofwanyelela olagiha wi ninofuna wakela malagoya. Ninawodhe dhavi oziwa wi ninofuna malagoya? Ninofwanyela ovivuza, ‘Miyo ddinokumbirha malago musogorhomwa baddihisorhiha sabwani kahiye yajedhelimi wiwa?’ Ndowe nooneni yotagiha modha.

14. Nigakela malago, ninfwanyela wubuwela elobo gani? Kavaha yotagiha. (Koona vina foto.)

¹⁴ Kamutanalele mbali ovahiwe mabasa anamuttambirihege kobiri yinjene. Ahinatti orumela, iyene onomukumbirha malago munddimuwa wa mmulogoni. Onomwaddela wi mabasaya anele omuttukulela okala wolapelana na anamudhi aye mwari mwa mudhidhi mwinjene. Munddimuwa wa mmulogoni onomubutxedha magano a mBibiliani awi muttorho waye wamakamaka bwa wakwanihedha dhojombeliwa dhomuyani dha anamudhi aye. (Ef. 6:4; 1 Tm. 5:8) Mbaliya kanrumela malago a munddimuwa wa mmulogoni, nona iyene onodhowavi avuzaga ena mmulogoni mpaka onfwanya muttu analoge wi japama orumela mabasaya. Mbaliya txibarene ontamela malago obe omala okosa yogana vina onimutamela muttu onarumele na yogana yaye? Ninofwanyela ohidduwala wi murima wehu ononinyengetta. (Jer. 17:9) Ninodhaga wakela nlago nihiziveliwehu, mbwenyi dila dhina tti nlagonene ntto ninfunihu.

DDINOFWANYELA WAKUMBIRHA ATTU ENA WI ADDIKOSELE DHOGANA?

15. Ninfwanyela orabela elobo gani vina sabwaya?

¹⁵ Muttu-muttu wa iyo ohikana muttorho wa okosa dhogana dhaye. (Gal. 6:​4, 5) Ninga monelihu, muttu wa eziwelo onotamela malago mu Nzuni na Mulugu vina mwa Akristu oliba mpaddi womuyani ahinatti okosa yogana. Mbwenyi ninofwanyela okala pasope wi ninakumbirhe ena onikosela dhogana. Ena anodhaga okosa ejuwene modhela onvuza muttu onimukuluvelani: “Weyo ogakosile eni kokala vamburoni vaga?” Oku ena anodhaga okosa yogana yakakene ekosile muttu mwina ahitanalelaga makaniya.

16. Yogana gani yafwanyela okosa Akristu a mulogo w’o Korinto mwaha wa nama yakutteliwe amulugu? (1 Korinto 8:7; 10:​25, 26)

¹⁶ Katanalela yogana yafwanyelela okosa Akristu a mulogo w’o Korinto, mwaha wa nama yaperhekeliwe amulugu. Paulo wahalebela Akristu abale: “Ninoziwa wi amulugu kahiyo elobwene mwilaboni vina kawo Mulugu mwina ahili mmodha bahi.” (1 Ko. 8:4) Sabwa ya mazu a Paulo, ena a mmulogoni ahigana wi anfwanyela oja nama yagulihiwa omusika masiki vamalilani operhekeliwa amulugu. Oku ena ahigana ohija namaya wi ahizuzumihe mubuwelo wawa. (Kengesa 1 Korinto 8:7; 10:​25, 26.) Eji yali yosakula yomwinya. Paulo txipo kakokomezile akadda Korinto wakosela dhogana attu ena nne vina otagiha ejile yakosa ena. Muttu-muttu wa awene wanfwanyela ‘wakulela vamentoni va Mulugu.’—Rom. 14:​10-12.

17. Txini endaga opadduwa nigafwara ejile enkosa attu ena? Kavaha yotagiha. (Koona vina mafoto.)

¹⁷ Elobo yakakene egadhile dhavi opadduwa masaka abano? Katanalela makani aniwanana na dhipaddi dhing’ono dha nikami. Mukristu ddi Mukristu onofwanyela ogana akala onele orumela obe okodda dhipaddi esi.b Ninodhaga wubuwela wi jorutxa vaddiddi ononelamo makani aba mowakwana-mwene, mbwenyi okosa dhogana mwaha wa makani aba onokosa mpaddi wa mittorho dhinfwanyela muttu-muttu wa iyo ottukula. (Ro. 14:4) Kologiwa wila nela ofwara esile dhinloga attu ena, nigahidha wobaniha mubuwelo wehu. Ninowodha oshagiha pama mubuwelo wehu nigalabihedhaga. (Ahe. 5:14) Kito mudhidhi gani ofwanyelihu omukumbirha malago Mukristu woliba mpaddi womuyani? Ninfwanyela okosa ejuwene nigamala opepesa nanya, mbwenyi banoona wi ninofuna nikamihedho wi ninonelemo magano a mBibiliani aniwanana na makaniya.

KADHOWAGAVI OTAMELAGA MALAGO

18. Elobo gani enikosele Yehova?

¹⁸ Yehova onolagiha wi ononikuluvela vaddiddi modhela onittiya okosa dhosakula dhehu nooka. Iyene ohinivaha Nzu naye Bibilia vina amarho eziwelo, abuwene annikamihedha otanalela nilabihedhaga magano a mBibiliani. Iyene ohakwaniha muttorho waye ninga Babi wehu. (Gan. 3:​21-23) Txini enfwanyelihu okosa wila nilagihe otamalela wehu?

19. Ninawodhe dhavi odhowavi nimwagalalihaga Yehova?

¹⁹ Katanalela eji: Amambali anoziveliwa vaddiddi wawona anawa onuwaga, akalaga adhari a Yehova a eziwelo vina akamihedhaga attu ena. Na mukalelo wakakene, Yehova onowagalala aganonaga nunuwaga mpaddi womuyani, nitamelaga malago vina nikosaga dhogana dhinimwagalaliha.