Onawodhe Dhavi Ovaha Malago Apama?

1. Bani onfwanyela ovaha malago? Katapulela.

ONIVIWAMO dhavi ogavahaga malago? Ena anowagalala. Mbwenyi ena anowova, obe anozuzuma agafunaga ovaha malago. Kintanala ejile eniwamo iyo, masaka mena, notene ninofwanyela ovaha malago. Sabwaya? Sabwani obu mukalelo wa walagiha okwela abalihu na arogora, Yezu ohiloga wi ninofwanyela olagihana okwela muttu na mukwaye nigafuna okala anamafwara aye. (Jo. 13:35) Ottiya ejo, Bibilia onologa wi nigavahaga malago na murima wotene ninolibiha mandano ehu.—Gan. 27:9.

2. Anddimuwa a mmulogoni anfwanyela okala omala-nawale wi akose elobo gani vina sabwaya? (Koona vina kasha “Malago Anvahiwa Mmatugumanoni a Vari va Sumana.”)

² Makamaka anddimuwa a mmulogoni anofwanyela oziwa ovaha malago apama. Yehova, amulabihedhaga Yezu, ohattoma alobwana aba wi eddihe mulogo. (1 Pe. 5:​2, 3) Marhe mena anawodhani okosa ejuwene ba ovaha malago andela mBibiliani agakosaga madiskursu awa mmatugumanoni. Awene vina anonivaha malago egakala yofuneya, ottiya ejo anowakamihedha abale amunyanyalile Yehova wiyelela mmulogoni. Anddimuwa a mmulogoni vina iyo notene ninawodhe dhavi ovaha malago apama?

3. (a) Ninawodhe dhavi osunza okala anamalaga apama? (Izaiya 9:6; koona vina kasha “Kamutagihe Yezu Ogavahaga Malago.”) (b) Txini enasekeserhe iyo mu nsunzoni ntti?

³ Ninowodha osunza venjene okala anamalaga apama nigasekeserha dhotagiha dha attu anlogiwa mBibiliani, makamaka na yotagiha ya Yezu. Yezu vina onokuweliwa Namalaga Wotikiniha. (Kengesa Izaiya 9:6.) Mu nsunzoni ntti, ninele osekeserha enfwanyelihu okosa nigakumbirhiwa malago vina nigafunaga ovaha malago nihikumbirhiwe. Ninele osekeserha vina ttima ya ovaha malago mudhidhi wofwanyelela vina na mukalelo wofwanyelela.

NIGAKUMBIRHIWA MALAGO

4-5. Muttu aganikumbirha malago, nivuzo gani ninfwanyelihu ovikosa? Kavaha yotagiha.

⁴ Muttu agadha wukumbirha malago txino weyo onowagalala sabwa ya iyene wukuluvela, txino onodhaga ofuna omukamihedha momaguva. Mbwenyi vamaromo onofwanyela ovivuza, ‘Miyo ddinononelamo deretu makaniya wi ddiwodhe onvaha malago apama marho waga?’ Dila dhina elobo yapama enfwanyelihu okosa wi nimukamihedhe ja ohinvaha malagoya, mbwenyi nimutonyihedhe muttu onawodhe onvaha malago aniwanana na makaniya.

⁵ Katanalela yotagiha eji. Mukwawo okala muredda vaddiddi. Iyene onowaddela wi ohipepesa venjene mwaha wa mirobwe dhinfwanyeliye oja vina musogorhomwa onokumbirha wi ovahe monelo wawo mwaha wa murobwe onfwanyeliye oja. Masiki osakulaga mirobwe dhina, weyo kuli wa mediku vina kushagihiwe wi omukamihedhe na eredda yaye. Nona, elobo yamakamaka enfwanyeliwe okosa wi omukamihedhe marho wawo, ja omutamela muttu oshagihiwe wi omukamihedhe na eredda yaye.

6. Elobo gani enfwanyelihu okosa nihinatti ovaha malago?

⁶ Masiki nubuwelaga wi ninowodha ovaha malago aniwanana na makani mena, ninofwanyela ojedha vang’onovi nihinatti omwakula muttuya onikumbirhile malago. Sabwaya jani? Gano 15:28 onologa wi “muthu walamago, ahinathi wakula, onoroma wubuwela.” Kito akala ninubuwela wi ninoziwa yowakulaya? Masiki dhawene ninofwanyela otamela mudhidhi wi nipepese, nilobele vina nitanalele. Venevo ninele okala omala-nawale wi nivahe yowakula eniwanana na monelo wa Yehova mwaha wa makaniya. Katanalela yotagiha ya namavuhulela Natan.

7. Txini esunziliwe na yotagiha ya Natan?

⁷ Mwene Davidi wahimwaddela namavuhulela Natan wi wanfuna omaga mparha wa Yehova. Natan momaguva-mwene wahiloga wi asogorhena yogana yaye. Mbwenyi Natan wanfwanyela otamela mudhidhi wi anvuze Yehova. Sabwaya? Sabwani Yehova kafuna wi Davidi amage mparha. (1 Ma. 17:​1-4) Nipadduwo ntti ninolagiha wi nigakumbirhiwa malago, egahikala yeziwelo ‘ohimaguvela ologa.’—Tia. 1:19.

8. Mwaha gani mwina onittukulela okala txenjewa nigavahaga malago?

⁸ Katanalela mwaha mwina onnittukulela okalela txenjewa nigafunaga onvaha malago muttu: Niganvaha muttu malago ohifwanyelela ninodhaga okana muladdu vagapadduwa elobo yabure. Jamakamaka vaddiddi otxima vina wubuwela nofwaseya nihinatti ovaha malago.

OVAHA MALAGO AHIKUMBIRHIWEHU

9. Ebaribari gani enfwanyela okana anddimuwa a mmulogoni ahinatti ovaha malago? (Galásia 6:1)

⁹ Dila dhina, anddimuwa a mmulogoni anofwanyela okala omala-nawale wi anvahe malago mbali obe murogora oromile “wedda dila yabure.” (Kengesa Galásia 6:1.) Muttu onodhaga okosa dhosakula dhohifwanyelela esuwene dhinamuttukulele okosa yottega enddimuwa. Yogana ya anddimuwa a mmulogoni ja omukamihedha muttuya okala mudilani enimuttukulela okana egumi yohimala. (Tia. 5:​19, 20) Wila malago awa attidde mabasa, awene anofwanyela oziwa akala muttuya ohiroma weda dila yabure. Yehova ononittiya iyo notene okosa dhogana mowiwanana na mubuwelo wehu. (Rom. 14:​1-4) Kito akala mbali ohiroma wedda dila yabure vina anddimuwa a mmulogoni ogana wi anofwanyela onvaha malago?

10-12. Txini enfwanyela okosa anddimuwa a mmulogoni agavahaga malago ahikumbirhiwani? Kaladdaniha. (Koona vina mafoto.)

¹⁰ Kahiye yovevuwa anddimuwa a mmulogoni onvaha malago muttu ohikumbirhile. Dhavi? Murumiwi Paulo ohiloga wi muttu onodhaga oroma wedda dila yabure ahiziwaga. Nona ahinatti onvaha malago muttuya dhihikalawo dhilobo dhinfwanyela anddimuwa a mmulogoni okosa wila ekale yovevuwa muttuya ovuruwana malagoya.

¹¹ Katanalela yotagiha eji, namalima onotamela wala milima mmattakani ovadda. Mbwenyi ahinatti wala, iyene onofwanyela osasanyedha mattakaya. Omamalelowa iyene onohelela manje wila milimadha dhunuwe. Moligana na ejene, dhikalawo dhilobo dhing’onovi dhinfwanyela okosa munddimuwa wa mmulogoni wi ekale yovevuwa mbaliya ovuruwana malago anakeliye. Motagiha, munddimuwa wa mmulogoni onojedhela mudhidhi wofwanyelela, nomala onomwaddela mbaliya wi onomuzuzumela vina ehikalawo elobo egaziveliwiye ologa na iyene. Akala munddimuwaya onvaha malago onoziwiwa na ekalelo ya olagiha okwela vina opama, enele okala yovevuwa mwa ena orumela malago anvahiye.

¹² Mudhidhi onlogani makaniya, munddimuwa wa mmulogoni onofwanyela omukamihedha muttuya wakela malagoya modhela omubutxedha wi iyo notene ninokosa dhovonya vina dila dhina ninofwanyela ovahiwa malago. (Rom. 3:23) Na lizu nofwasa vina na nriho, munddimuwa wa mmulogoni onomulabihedha Bibilia s’opipiriha wi amulagihe emuttukulele oroma wedda dila ya bure. Mbaliya agarumela wi ohikosa yovonya, munddimuwa wa mmulogoni onomutapulelamo ahipipirihaga ejile enfwanyeliye okosa wila atxinje mweddelo waye. Omamalelo wa makaniya enowodheya munddimuwa wa mmulogoni omukamihedha mbaliya orumela malago akeliliye modhela omwaddela dhilobo dhapama dhinkosiye vina olobela vamodha na iyene.—Tia. 5:15.

13. Anddimuwa a mmulogoni anaziwe dhavi akala muttuya ohinonelamo malagoya?

¹³ Dila dhina, muttuya kannonelamo mowakwana-mwene malago akeliliye. Txini enfwanyela okosa anddimuwa a mmulogoni wi ejo enadhe opadduwa? Na oleleya anddimuwa a mmulogoni anofwanyela okosa mavuzo wi one akala muttuya ononelamo nlagona vina onoziwa enfwanyeliye okosa wi avirihemo.—Ko. 12:11.

OVAHA MALAGO MUDHIDHI WOFWANYELELA VINA NA MUKALELO WOFWANYELELA

14. Sabwaya jani kaninfwanyela ovaha malago nigakala osilidhiwene? Katapulela.

¹⁴ Iyo notene nili attu ohiligana, nona ninokosa obe ninologa dhilobo dhinasilidha ena. (Kol. 3:13) Bibilia onologa wi dila dhina muttu onodhaga ologa obe okosa elobo ennittukulela osilidhiwa. (Ef. 4:26) Mbwenyi kaninfwanyela ovaha malago nigali osilidhiwene. Sabwaya? Sabwani “osilidhiwa wa muttu kundhana oligana wa Mulugu.” (Tia. 1:20) Nigavahaga nlago oku banili osilidhiwene, ninodhaga ottabwiha makaniya. Eji kintapulela wi kaninfwanyela omulagiha muttu onisilidhile mukalelo oniviwamo iyo obe ejile enubuwelihu. Mbwenyi ninofwanyela ojedha wi nikale ofwaseyene nihinatti ologa na muttuya. Koona yotagiha yapama enittiyedhile namalaga wa Job, Eliyú.

15. Txini ensunzihu na yotagiha ya Eliyú? (Koona vina foto.)

¹⁵ Eliyú wahivira malabo menjene anvuruwanaga Job atamelaga ovibarela mwa dhologa dha amarho aye. Eliyú wahimweddela ttagaraga Job. Mbwenyi mutamelile Job ologa wi kana muladdu, iyene ohiloga dhilobo dhabure mwaha wa Yehova, ejo ehimuttukulela Eliyú okala wosilidhiwene. Masiki dhawene, Eliyú wahijedha mudhidhi waye wa ologa, musogorhomwa vamulagiye Job, ohiloga na opama vina na oleleya. (Job 32:2; 33:​1-7) Yotagiha ya Eliyú enonisunziha ebaribari ya ttima vaddiddi: Japama vaddiddi iyo ovaha malago nigakala ofwaseya, nigavaha na oleleya vina na okwela.—Ko. 3:​1, 7.

KADHOWAVI OVAHAGA VINA WAKELAGA MALAGO

16. Masalmo 32:8 onusunziha elobo gani?

¹⁶ Nlebo na nsunzo ntti, ninologa wi Yehova ononivaha malago na mento aye anang’anelaga. (Kengesa Masalmo 32:8.) Ejo enolagiha wi iyene onodhowavi anikamihedhaga. Ottiya onivahavi malago iyene ononikamihedha ovirihamo. Ejo yotagiha yapama mwa iyo! Nigafunaga wavaha malago ena, ninofwanyela odhowavi nakokomezaga vina nakamihedhaga okosa dhogana dha malago.

17. Ekaleli nni yapama okana anddimuwa a mmulogoni anvaha malago ohipipiriheya vina andela mBibiliani? (Izaiya 32:​1, 2)

¹⁷ Mwa ovano ninofwanyela ovaha vina wakela malago apama. (2 Tm. 3:1) Anddimuwa a mmulogoni anvaha malago ohipipiriheya andela mBibiliani ali “ninga mukulekule ondhana manje mwilaboni mwawuma.” (Kengesa Izaiya 32:​1, 2.) Amarho anziwa ejile enfunihu ovuruwana mbwenyi annaddela ejile enfwanyelihu ovuruwana anonivaha mvaho wattima vaddiddi onladdanihiwa na “yobo ya parata yabalelihiwe visangu dha nddarhama.” (Gan. 25:11) Iyo notene nidhowegevi nunuwihaga eziwelo enfunihu wi niwodhe ovaha vina wakela malago apama.