Txini Enfwanyeliwe Okosa wi Wagalale na Mikalelo Dhawo?

1. Txini entapulela wagalala na esile dhinihuna vina txini ehintapulelani?

WEYO onowagalala na mikalelo dhawo? Muttu onagalala na mikalelo dhaye, onottaba vina onokana murenddele modhela ofwaseyela mareliho anakeliye ovanene. Nona kankala wosilidhiwene obe wonyonyeyene sabwa ya dhilobo dhinimujombela. Masiki nagalalaga na mikalelo dha mwigumini mwehu, ejo kintapulela wi kaninfwanyela ozuzumela mukalelo oneddiha iyo egumi yehu. Motagiha, kahiyo yabure okosa venjene mmabasani a Yehova. (Rom. 12:1; 1 Tm. 3:1) Masiki nigahakele mabasa anfunihu kaninarimeliwe wagalala.

2. Dhilobo gani dhabure dhindaga opadduwa nigahikaane wagalala?

² Nigattiya wagalala na esile dhinihu ninodhaga oroma okosa dhogana dhohifwanyelela. Abale ahinagalala na esile dhinani anolabaga mudhidhi mwinjene wi akaane dhilobo dhomaningoni dhihili dhamakamaka. Mokubanyiha-mwene, Akristu ena ahifiyedha wiya kobiri vina dhilobo dhatamelani okana. Awene txino obuwela dhahi, ‘elobo eji enoddifwanyelela,’ ‘ddijedhela mudhidhi mwinjene,’ obe ‘miyo ddinele opitxa kobiri eji musogorho.’ Mbwenyi mikalelo dhotene dha wiya dhinomusilidha vina dhinomunyimula Yehova. (Gan. 30:9) Ena ahifiyedha omunyanyala Yehova sabwa ya ohakela dhittomo dhafunani. (Gal. 6:9) Enwodheya dhavi mulabeli wa Yehova okosa ejuwene? Makaniya bawi txino muttuya ohittiya wunuwiha ekalelo ya wagalala na esile dhiniyena.

3. Elobo gani yopangarhaza ensunzihu na Filipi 4:​11, 12?

³ Iyo notene ninowodha wunuwiha ekalelo ya wagalala na esile dhinihuna. Murumiwi Paulo ohileba wi ‘wahisunza wagalala na mikalelo dhaye.’ (Kengesa Filipi 4:​11, 12.) Iyene olebile mazu abene mudhidhi waliye mukambura. Masiki dhawene iyene karimeliwe wagalala. Wahisunza elobo ehinziwa attu enjene, kuloga, wagalala na esile dhaniyena. Nigavilibihedha okana wagalala, mazu a Paulo vina yotagiha yaye dhinele onikamihedha wunuwiha wagalala na mikalelo dhehu. Kaninfwanyela wubuwela wi jovevuwa wagalala na mikalelo dhehu. Ottiya ejo ninofwanyela osunza wagalala. Dhavi? Mu nsunzoni ntti ninele wona txini enanikamihedhe okana wagalala.

KAVILIBIHEDHE OKALA MUTTU WOTAMALELA

4. Okala attu otamalela ennikamihedha dhavi okana wagalala? (1 Tesalónika 5:18)

⁴ Muttu onna elemelelo ya otamalela dila dhinjene onokana wagalala. (Kengesa 1 Tesalónika 5:18.) Nigatamalela sabwa ya okana esile dhinnijombela txino kaninobuwele venjene dhilobo dhinfunihu mbwenyi dhihinwodhihu okana. Nigavaha ttima dhittomo dha mabasa dhinihuna ovanene, ninele ofwaseyela okosa mpaka munwodhelihu mmabasani attomeliwihu ottiya ozuzumela wakela mabasa maswa. Kanintikina Malebo aganikokomezaga omutamalela Yehova mmalobeloni mwehu! Nigakala attu otamalela ninele okana “murenddele wa Mulugu ompitta dhubuwelo dha attu.”—Flp. 4:​6, 7.

5. Ana Izrayel afwanyelela nni okala attu otamalela? (Koona vina foto.)

⁵ Koona epadduwile na ana Izrayel. Dila dhinjene ahimusadduwela Yehova, sabwani afuna aje dhoja dhali mu Ejipitu. (Ole. 11:​4-6) Ebaribari wi mwiddeddereni egumi kiyali yovevuwa. Txini egakamihedhile wagalala na esile dhanani? Awene anfwanyelela otamalela dhotedhene dhakosela Yehova vina wubuwela wi mudhidhi walani adhari mu Ejipitu antabutxiwa vaddiddi. Yehova wahidhana milili kumi dhapattile akadda Ejipitu vina wahavuna akadda Izrayel, mmalelani ovuniwa, awene ahittukula parata, nddarhama vina dhabalo dha akadda Ejipitu. (Obu. 12:​35, 36) Mudhidhi wafwariwa ana Izrayel na akadda Ejipitu mpaka Mwinje Wofila, motikiniha-mwene Yehova wahigawa mwinjeya. Mudhidhi walani mwiddeddereni iyene wanavaha maná malabo otene. Kito makaniya àli avi? Masiki vavahiwani na Yehova oja wawakwanela, awene katamalela esile dhanani.

6. Txini enanikamihedhe okala attu otamalela?

⁶ Weyo onawodhe dhavi okala muttu wotamalela? Yoroma, malabo otene otamele mudhidhi wa wubuwela dhilobo dhapama dhinziveliwiwe. Enowodheya oleba dhilobo bili obe ttaru dhintamaleliwe. (Ent. 3:​22, 23) Yanawili, kalagiha otamalela wawo. Kalá woroma watamalela ena mwaha wa esile dhinukoselani. Opitta esi dhotedhene, kamutamalele Yehova malabo otene. (Ms. 75:1) Yanoraru, kamaga mandano ofiyedheya na abale anna elemelelo ya otamalela. Akala amarho ehu kantamalela obe akana elemelelo yologa bure, iyo vina ninodhaga okala ninga awene. Mbwenyi akala amarho ehu ahikana elemelelo ya otamalela merelo awa apama anele onikamihedha okala attu otamalela. (Oli. 1:​26-28; 2 Tm. 3:​1, 2, 5) Nigatamela gari ya otamalela, kaninasilidhiwege na makattamiho ehu vina na dhilobo dhinfunihu mbwenyi dhihinwodhihu okana.

7. Aci wunuwihile dhavi otamalela vina yopurelamo gani ekaniliye?

⁷ Koona epadduwile na Aci, onkala o Indonésia. Iyene onologa: “Mudhidhi wa COVID-19, ddahiroma oladdaniha mikalelo dhaga na dha abalaga. Yodhelavoyá, miyo kaddakana wagalala.” (Gal. 6:4) Txini emukamihedhile otxinja monelo waye? Aci ohiloga: “Ddahiroma wubuwela maruriho akelimi malabo otene vina otanalela dhilobo dhapama dhanna miyo sabwa ya okosa mpaddi wa nikuru na Yehova. Nona ddahimutamalela Yehova sabwa ya dhilobo esi dhotedhene. Sabwa ya ejuwene ddahiwodha okana wagalala webaribari.” Akala weyo ohirimeliwa wagalala sabwa ya mikalelo dhawo, enowodheya okosa yakakene ekosile Aci wi okale muttu wotamalela?

KAKALA WOVIYEVIHA

8. Txini empadduwele Baruk?

⁸ Mukamihedhi wa namavuhulela Jeremiya, Baruk dila dhahi wahinyimuwa sabwa ya dhilobo dhapadduwa mwigumi mwaye. Baruk wahikana mabasa orutxa vaddiddi, omukamihedha Jeremiya mudhidhi walaleyiye muselu wovadda wa nlogo nahalagiha otamalela. Mbwenyi, ottiya ofwaseyela ejile yanfunana Yehova wi iyene akose, Baruk wahiroma wubuwela venjene ejile yafuniye okosa. Modhela Jeremiya, Yehova wahimwaddela Baruk dhahi: Weyo onotamela dhilobo dhinji, ttiya otamela dhilobo esi. (Jer. 45:​3-5) Na mazu mena iyene waloga dhahi: “Wagalele na mikalelo dhawo dhovanene.” Baruk wahirumela malagoya vina wahidhowavi arumeliwaga vamentoni va Yehova.

9. 1 Korinto 4:​6, 7, onnikamihedha dhavi okana monelo wofwanyelela mwaha wa dhittomo dha mabasa? (Koona vina mafoto.)

⁹ Dila dhina, Mukristu onodhaga wubuwela wi onofwanyela wakela ettomo ya mabasa. Iyene onodhaga wubuwela dhawene sabwani okana ewodhelo yinjene, onolaba na nttokoso obe onomulabela Yehova mwari mwa vyaka dhinjene. Mbwenyi ena anodhaga wakela ettomo yakakene egaziveliwiye okana. Txini enamukamihedhe ohisilidhiwa? Ja otanelela ejile elebile murumiwi Paulo, enfwanyeya va 1 Korinto 4:​6, 7. (Kengesa.) Dhittomo dhotedhene dhinakelihu vina ttotto dhinihuna dhinda wa Yehova. Yehova kannivaha dhilobo esi sabwa ya okala amakamaka opitta ena. Ottiya ejo Yehova onivaha dhilobo esi sabwani onikwela vina onilagiha opama.—Rom. 12:​3, 6; Ef. 2:​8, 9.

10. Ninawodhe dhavi wunuwiha oviyeviha?

¹⁰ Ninowodha wunuwiha oviyeviha nigatanalela venjene yotagiha enittiyedhile Yezu. Koona epadduwile omattiyu womariha mudhidhi wasuwile Yezu manyalo a anamasunza aye. Murumiwi Joau ohileba dhahi: “Yezu wanziwa [1] wi Babe wahimperhekela dhotedhene mmadani mwaye, [2] wanziwa vina wi wadhile wa Mulugu vina [3] wadhowa wa Mulugu, . . . oroma osuwa manyalo a anamasunza aye.” (Jo. 13:​3-5) Yezu agahubuwela wi anamasunza aye bafwanyelela omusuwa manyalo. Mbwenyi Yezu txipo kobuwela wi sabwa ya okala Mwana Mulugu wanfwanyela okana nyumba yottugareya vina kobiri yinjene. (Lk. 9:58) Yezu wali woviyeviha vina wanagalala na esile dhaniyena. Iyene onittiyedha yotagiha enfwanyelihu ofwara.—Jo. 13:15.

11. Oviyeviha omukamihedhile dhavi Dennis okana wagalala?

¹¹ Dennis, onkala o Holanda, wahitamela ofwara yotagiha yoviyeviha ya Yezu, mbwenyi kiyali yovevuwa. Iyene ohiloga: “Muttu agakela ettomo yafunimi dila dhina ddinokalaga wosilidhiwene sabwani ddinubuwela wi wafwanyela wakela ettomoya ddi miyo. Ejo egapadduwa, ddinosunza makani anloga mwaha wa oviyeviha. Nona mu aplikativuni JW Library^®, ddihileba malebo anloga sabwa ya oviyeviha wi ddiwodhe ofwanya momaguva-mwene vina wengesa wili. Vina ddihititiha mu telefonini mwaga mavidiyu mang’onovi anloga sabwa ya oviyeviha vina ddinovuruwanaga dila dhinjene.a Ddisunza wi mabasa otene ankosihu ninkosela wila nimuttittimihe Yehova, ottiya iyo nanya. Yehova na opama waye onomurumeliha muttu ddi muttu wa iyo okosa elobo-txilobo, mbwenyi ddi iyene onkosa wi mabasaya akane dhopurelamo.” Akala weyo kuna wagalala sabwa ya dhilobo dhinupadduwela, katamela marhe a wunuwiha oviyeviha. Ejo enele olibiha mandano awo na Yehova vina wukamihedha okana wagalala.—Tia. 4:​6, 8.

KATANALELA MAPIKIRHELO A YEHOVA

12. Njedhelo gani na musogorho ninnikamihedha okana wagalala? (Izaiya 65:​21-25)

¹² Iyo ninokana wagalala nigatanalela njedhelo notikiniha nipikirhele Yehova onihava musogorho. Mu nivuruni na Izaiya Yehova ononaddela wi onononelamo makattamiho angumanihuna. Mbwenyi vina onopikirhela ogomiha makattamiho otene. (Kengesa Izaiya 65:​21-25.) Ninele okana nyumba dhobareleya vina dhottugareya. Ninele okana mabasa owagalaliha, oja dhoja dhapama vina dhoziva. Kaninazuzume na elobo yabure endhaga onipadduwela obe wapadduwela anihu. (Iza. 32:​17, 18; Eze. 34:25) Ninofwanyela okuluvela wi mapikirhelo aba otene anele wakwanihedheya musogorho.

13. Dhorutxa gani dhinihuna vina otanalela njedhelo nehu na musogorho ninnikamihedha dhavi?

¹³ Ekaleli nni yamakamaka otanalelaga veli-veli njedhelo nehu? Sabwani ninkalawo “masiku omariha” vina iyo notene ninopattiwa makattamiho ali ‘orutxa vina awopiha.’ (2 Tm. 3:1) Yehova ononikamihedha ovilela malabo otene modhela onivaha malago, guru vina nikamihedho ninfunihu. (Ms. 145:14) Ottiya ejo, njedhelo nehu ninonikamihedha ovilela mmidhidhini dhorutxa. Txino weyo onorutxiwa wakwanihedha dhojombeliwa dha anamudhi awo. Ejo entapulela wi onele okala wa muyelegi namukalakala? Nne! Yehova ohipikirhela wuvaha ejile enujombela ovanene—vina dhinjidhene—mParaizuni. (Ms. 9:18; 72:​12-14) Txino weyo onowanana eredda ehina murobwe, odhugudheya wottabwa obe eredda yawopiha. Weyo onelege otabuwa dhahene namukalakala vina kunavulumuwe? Kahiyo ejuwene. Oredda vina okwa onele ogoma mwilaboni eswa. (Ovu. 21:​3, 4) Njedhelo ntti ninonikamihedha ohikala osilidhiwene obe onyanyuwa na dhilobo dhinnipadduwela. Enowodheya okana wagalala vina murenddele masiki muttu aganeddiha na ohiligana vina nigamuyelela muttu onimukwelihu mukwani obe elobo yina yabure eganipadduwela. Sabwaya? Sabwani kintanala makattamiho orutxa angumanihuna ovanene, ninoziwa wi ‘makattamiho annifwanya ba mudhidhi mung’onovi’ vina wi mwilabo eswa txipo kaninatabuwege.—2 Ko. 4:​17, 18.

14. Ninawodhe dhavi olibiha njedhelo nehu?

¹⁴ Vowi njedhelo nehu ninonikamihedha okala owagalalene, txini enanikamihedhe okuluvela wi mapikirhelo a Yehova anele wakwanihedheya? Dhahene ninga munfwanyelela muttu wabala okulu wi one pama dhilobo dhili wuddayi-wene, txino enele ofuneya otamela marhe a olibiha njedhelo nehu vina ovubuwela banili mParaizu. Motagiha nigakala wozuzumene sabwa ya ohiwodha okana kobiri enakwanela wi nikalewo, enowodheya wubuwela mukalelo onakale egumi mudhidhi ohinafunihu kobiri vina mudhidhi ohinakalewo muttu woyelega. Nigakala okumuwene sabwa ya ohakela mabasa anfunihu, ninofwanyelela otanalela wi dhilobo esi kahiyo dhamakamaka moladdana na egumi yotikiniha enakanihu nigakala oligana vina ninele omulabela Yehova okalawo wehu wotene. (1 Tm. 6:19) Masaka abano iyo ninozuzumela dhilobo dhinjene nona enodhaga okala yorutxa otanalela mapikirhelo aba a musogorho. Mbwenyi vandowihu nitanalelaga njedhelo notikiniha nipikirheli Yehova, enele okala yovevuwa ofwaseyela njedhelo ntti ottiya makattamiho ehu.

15. Txini esunziliwe na ejile elogile Christa?

¹⁵ Enowodheya osunza na yotagiha ya Christa, mwadhi wa Dennis, ologiwe mundduni. Iyene onologa: “Miyo ddikana eredda enttiya maningo aga owobanene, kanddiwodha wedda vina ddinofwanyela olabihedha kadera ya maroda, mudhidhi mwinjene ddinkala vakamani. Malabo otene ddinowiwa opa. Mediku waga ohiddaddela ovanenevi wi kaddinavulumuwe. Momaguva-mwene ddahubuwela, ‘Iyene kanwodha woona musogorho ninga munoonela miyo.’ Ddinozuzumela njedhelo naga, nttuwene ninddivaha murenddele wa mmurimani. Masaka abano, txino enele ofuneya miyo ovilela mwilaboni mpuno, mbwenyi ddinele okana egumi yotikiniha mwilaboni eswa!”

“ANIMOVA KANJOMBELIWA ELO”

16. Txini emuttukulele Mwene Davidi oleba wi abale animova Yehova “kanjombeliwa elo”?

¹⁶ Masiki nikalaga owagalala ninele opattiwa dhorutxa. Mwene Davidi wahayelela anaye araru mukwani. Attu ena ahimmagihedha wi iyene wahikosa dhilobo dhabure, amarho ena ahimwika ekotti, Saul wahitamela ompa vina onfwara-fwara mwari mwa vyaka dhinjene. Masiki na dhorutxa esi Davidi wahikana wagalala, iyene ohiloga dhahi sabwa ya Yehova: “Animova kanjombeliwa elo.” (Ms. 34:​10, 11, [Ms. 34:​9, 10 NM]) Iyene walogelani ejuwene? Sabwani wanziwa wi masiki vattiya Yehova makattamiho opadduwa mwigumini mwaye, iyene agahinvaha dhilobo dhamujombela. (Ms. 145:16) Nona, dhahene ninga Davidi enowodheya iyo okuluvela wi Yehova onele onikamihedha ovilela muwehiwani mwehu mwetemwene. Kintanala mikalelo dhehu enowodheya okana murenddele vina wagalala.

17. Onfunela nni okana wagalala?

¹⁷ Yehova onfuna wi weyo okane wagalala. (Ms. 131:​1, 2) Nona kakosa mpaka munwodheliwe wi okane wagalala. Ogavilibihedha wunuwiha otamalela, oviyeviha vina olibiha njedhelo nawo, onele ologa dhahi: Ndde, ddili owagalalene.—Ms. 16:​5, 6.