Nimutagihe Yehova Niziwege Watanala Attu Ena

1. Alabeli a Yehova anlagiha dhavi wi anokwelana muttu na mukwaye?

ALABELI a Yehova orugunuwa elabo yotene ali ninga nikuru na anamudhi. Awene attu ana okwelana webaribari muttu na mukwaye. (1 Joau 4:16, 21) Dila dhinjene awene anokosa kukuttu wi akamihedhena ninga mukalelani vina anovilibihedha okosa elobo txilobo nokwela. Motagiha awene anologa mazu ozivela anavaha ttima abalawa. Anovilibihedha omutagiha Babiwa wa wirimu modhela watonyihedha ntanalo abalawa.​—Éfeso 5:1.

2. Yezu otagihile dhavi okwela wa Babe?

² Yezu ohiwodha omutagiha Babe mwawakwana-mwene. Dila dhinjene wanaweddiha attu ena n’oderetu. Iyene ohiloga: ‘Mudhe vali miyo ddinoulibihani, nyuwo motene mupwattelile muttoro, ddinoululuvihani.’ (Mateu 11:28, 29) Nigavilibihedha omutagiha Yezu ‘nilagihaga watanala ena na ovyeviha’ ninele owodha omuhagalaliha Yehova, vina ninele ofwanya ohagalala. (Masalmo 41:1) Mwari mwa mutoma obu, ninela osunza mukalelo wowatanala anamudhi, abali na arogora na abale angumanana iyo mmabasani a olaleya.

WATANALE AMUDHAWO

3. Mamuni onfwanyela omutanala mwadhiye dhavi? (Koona foto eli omaromo.)

³ Amamuni anofuniwana watanala anamudhi awa. (Éfeso 5:25; 6:4) Bibilia onakokomeza dhahi amamuni; mwarhemezege vina mwarihege awadhinyu. (1 Pedro 3:7) Mamuni ona mirugu onononelamo wi masiki akale ottiyana na mwadhiye, iyene kahiye muttu wattima opitta mwadhiye. (Wita 2:18) Onotanala dhubuwelo dha mwadhiye, onomuriha, omuttittimiha, vina onomurhemeza. Muteliwi dhahi onkala elabo ya Canadá ohiloga merelo a mamune: “Iyene txipo kanaddipwazaga ‘onovaha ttima dhubuwelo dhaga.’ Onoddivuruna nofwaseya. Onoddikamihedha wogolela etanalelo yaga.”

4. Mulobwana ontanala dhubuwelo dha mwadhiye onimweddiha dhavi mwadhiyeyá?

⁴ Mamuni ontanala dhubuwelo dha mwadhiye, txipo kananyengetta obe kanagayela ayana ena, kantamela oviziveliha. (Job 31:1) Agalabihedhaga internet kampupuruwela wang’ana dhinziveliwa mento aye, kankana mandano onyakuwa a mwinternetini na attu ena. Iyene onomutanala mwadhiye, sabwa ya onomukwela Yehova onovilibihedha widda dhili dhabure.​—Kengesa Masalmo 19:14; 97:10.

5. Muteliwi onawodhe dhavi omutanaalela mamune?

⁵ Mamuni onvilibihedha omutagiha Yezu Kristu oli musorho waye, mwadhiye onelege ‘omuriha-wene.’ (Éfeso 5:22-25, 33) Akala mwadhiye onomuriha, onelege otamela ononelamo dhubuwelo dha mamune, akala mamuneyá peno onozuzuma na mabasa a mmulogoni obe na makani mena, onelege omuziwelela vina kananyimuwege. Muteli dhahi onkala elabo ya Grã-Bretanha ohiloga: “Mudhidhi dhahi mwadhaga wahitxinja mubuwelo waga, oromawe-wene ddahinyaguleya. Mbwenye iyene walabihedhe mazu anfwanyeya va Gano 20:5, masiki ddiziwaga wi enofuneya mudhidhi wa ononelamo dhobuwelo dhaga, elobo yawodhile miyo orabela yali wakulana na iyene.”

6. Iyo notene ninawodhe dhavi wakamihedha aima wona wi anotanaliwa, aimaya ampurelamo nni?

⁶ Akala amambali anoweddihana na nriho, anawa anele orava mwedddelo wawa. Enofuneya wasunziha anawa wi atanalege attu ena vina akale attu ofwaseya. Motagiha, amambali anofuniwana wasunziha anawa wi anattamagege o Numbani ya Omwene. Mpaddi mwina bwawi agakala vapikinikini awaddelege aniwa wi agafuna oja elobo aziwege ojedha anddimuwa wi asasanyedhele. Attu otene vamatugumanoni atamelege wakamihedha amambali. Jowodheya omaguvela wakamihedha nigonaga wi anofuna okamihedhiwa ninga ofugula musuwo obe elobo yina. Ejo enela wakamihedha anawa osunza wi ‘ovaha onottabiha opitta ovahiwa.’​—Merelo 20:35.

WATANALEGE ABALI AWO A MMULOGONI

7. Yezu walagihile dhavi ntanalelo na mulobwana oddule wohona, yotagiha yaye ennisunziha nni?

⁷ Siku dhahi nadhowile Yezu o Dekápolis attu ahimudhelana ‘mulobwana wohiwa nanda wahivulumutxiwa momaguva.’ (Marko 7:31-35) Yezu wahawaddela wi kamwaddele muttu dhipadduwile. Sabwaya yali yivi? Sabwani mulobwana oddule wahiribiwa murima na muttitti wamurijile. Yezu wahimala oziwa nawale noona ‘apottowanavo’ vatakulu apale vali muttittiya, badhowa onvulumutxa wolapela. Iyo kaninwodha wira matikiniho, mbwenye nitanalelege dhinajombela abalihu ngamala nakamihedhe. Murumiwi Paulo ohileba: “Nubuwelanege wi nilibihe okwela, othidda mabasa a pama.” (Ahebreu 10:24) Yezu wahiwodha ononelamo dhubuwelo dha mulobwana oddule wohona, nanda wahikosa elobo egamukamihedhe okala wofwaseya. Eji yotagiha enddimuwa.

8, 9. Nilagihe dhavi ntanalo wa anddimuwa ali anakalaba ahina guru? (Kavaha yotagiha.)

⁸ Mwatanale anakalaba ahinna guru dha wirana mabasa. Ezinddiyelo enddimuwa ya Akristu ja okwelana. (Joau 13:34, 35) Okwela ononikosiha notene wakamihedha abalihu vamodha na arogora ali anakalaba obe ondeyile guru, odhowa omatugumanoni vina mmabasani a olaleya. Iyo ninovilibihedha wakamihedha masiki akala aweneya kanwodha okosa esile dhinkosihu. (Mateu 13:23) Michael mwanakalaba ohinwodha wedda onkala wogilatene vakaderani ya maroda onotamalela vaddiddi nikamihedho ninvahiwiye na anamudhi vina abali a mmulogoni. Iyene ohiloga: “Sabwa ya nikamihedho ntti ninvahiwa miyo kanddinjoba omatugumanoni vina mmabasani a olaleya. Miyo ddinziveliwetxa olaleya vanamwinjini.”

⁹ Numba dhinjene dha Betel, muhikala abali anddimuwa a anakalaba nanda ahikanavi guru. Asogoreli awa anowatanala nokwela, anokosa masasanyedho a awene owodha olaleya na karta obe muttitto. Bill, ona vyaka 86 onowodha walebela makarta attu ankala wego wolapela vaddiddi, iyene ohiloga: “Ddinotamalela gari ena miya ya oleba makarta.” Nanci ona vyaka waddamela 90, ohiloga: Dhingolopi esi dha makarta miyo ddinona ninga mabasa a olaleya ottiya wona ninga nvaho mwina wong’animela. Mmabasani aba. Attu enjene anofuna oziwa ebaribari!” Ethel, obaliwe yaka ya 1921, ohiloga: “Wiwa opa onokosa epaddi ya egumi yaga. Dila dhina ddinorutxiwaga wabala guwo dhaga.” Masiki egali dhawene, iyene onowagalala vaddiddi agalaleyaga vina wiyelelawo alabihedhaga muttitto. Barbara, ona vyaka 85 ohitapulelamo: “Sabwa ya wobana wa egumi yaga, odhowa mmabasani a olaleya enkalaga elobo yorutxa vaddiddi. Mbwenye muttitto onoddikamihedha ologa na attu enjene. Ddinomutamalela Yehova!” Mwari mwa mudhidhi mung’onovi yaka ehinamala, anddimuwa aba anvaha ttima mabasa a ololeya, ahilaba mawora owakwana 1.228, ahileba makarta owakwana 6.295, ahiloga mmuttittoni waddamela dila 2.000 vina ahipereka manivuru muttengo wa 6.315! Kavali waganyedha wi guru enda wa Mulugu enottabiha!​—Gano 27:11.

10. Ninakamihedhe dhavi abalihu wi apurelegemo matugumano?

¹⁰ Natanalege abali nigakala mmatugumanoni. Nigakala attu anziwa otanala ninele owodha wakamihedha abalihu opurelamo masasanyedho otene a matugumano. Dhavi? Mukalelo mmodha bwa wang’anela mudhidhi wi ninadhe nazuzumihe. Dila dhina, dhilobo dhahajedhelihu dhinodhaga onizuzumiha. Mbwenye akala nihikana elemelelo ya oyeluwa, ejo enowapatta abali ena, nirome otanalela wi nivugulele, nigakosa dhawene ninolagiha wi ninowatanala attu ena. Nubuwelege wi Yehova na mwanaye baniwobile wi nitugumanege. (Mateu 18:20) Ninolagiha nriho na awene nigalabihedha deretu mudhidhi!

11. Abale ansogorhela dhipaddi dha matugumano anfwanyelela nni ofwara malago a 1 Korinto 14:40?

¹¹ Akala ninowatanala abalihu, ninele owodha ofwarihedha malago a Bibilia: “Dhetenedhá dhiriwege n’orihana.” (1 Korinto 14:40) Abali ankosa dhipaddi dha matugumano anofwara malago aba mudhidhi wawa ogamala, anovenyawo. Agakosa ejuwene anolagiha wila anowatanala attu otene. Kobuwela mukalelo onapattiwe anamewa akala mudhidhi wa matugumano onovira. Abali ena ankala wolapela anofuna okosa oleddo namutanene wi afiye mmawani. Ena amamunawa obe awadhiwa kahiye anamoona ankala ang’anaga odila sabwani anoziwa mudhidhi ongoma matugumano.

12. Ninfwanyelela nni wariha vina wakwela anddimuwa a mulogo? (Koona kasha “Narihe Abale Attomeliwe Mabasa.”)

¹² Anddimuwa a mulogo anottidda mabasa manddimuwa mmulogoni vina olaleya, jofuneya ovahiwa nriho vina okwela. (Kengesa 1 Tesalónika 5:12, 13.) Mwebaribari nyuwo munopurelamo venjene mabasa ankosani. Jofuneya otonyihedha ovivelela, wiwelela nikamihedho nawa, sabwani ‘awene anowang’anelani, anele wakulela mabasa awa vamentoni va Mulugu.’​—Ahebreu 13:7, 17.

KATANALE ABALE ANALALEYIWE

13. Nisunzilevo nni na otanala olagihile Yezu?

¹³ Yezu wahiloga mazu aba ali va Izaiya anadda dhahi: “Kanamarihe murere woparuwa, kanathimihe panti enkuwara.” (Izaiya 42:3) Yezu wanakwela attu, na supaje ya mambali. Iyene wannonelamo makattamiho abale akukumuwile na masoso ‘obanile’ obe ali ninga ‘anddumeyiwa na motto,’ iyene wanaweddela ttagaraga vina wannatanala nofwaseya. Aima ang’ono annimususela Yezu sabwa yawi anziveliwana. (Marko 10:14) Iyo kaninfiyedha waziwa pama anamasunza ehu moligana na Yezu! Mbwenye enofuneya wi natanalege mowakwana abale anafwanya iyo mmabasani a olaleya modhela malogelo ehu vina merelo.

14. Nigalogaga na attu ena ninfwanyelela nni opima dhologa dhehu?

¹⁴ Nilogege dhavi na attu? Attu owinjiva masaka abano ‘ahundeya guru vina ahikukumuwa’ mwaha wa manyigalo, mpinddu dhabure, politika, anddimuwa a marelijiau obe elabo enkalani. (Mateu 9:36) Yodhavoya jawi attu ejene kanroromelana vina kana njedhelo. Mazu awa na mukaleloya onlogani, ontonyihedha wi anivitanala anya ottiya watanala attu ena! Attu owinjiva anonivuruwana, kahiye sabwa yolabihedha Bibilia mbwenye sabwa yawi ninowatanala vina ninowariha.

15. Nigalaleyaga mmuruddani mwehu ninfwanyela ologa nni?

¹⁵ Aba makalelo anfwanyela iyo wang’ananiha nigalogaga na attu mmalaleyoni. Nigakosaga nivuzo, ninofwanyela okalela pasope wi ninanyimule. Pionero dhahi walaba murudda onkala attu ana manyazo vaddiddi ohiloga wi iyene onokalela pasope mavuzo ankosiye wi attuya ahikane manyazo agahiwodhe wakula. Iyene onorabela okosa mavuzo ninga aba, “Weyo onoziwa nzina na Mulugu?” obe “Onoziwa entapulela omwene wa Mulugu?” Wanloga elobo yoligana na eji “Miyo ddihisunza mBibiliani wila Mulugu ohikana nzina. Ogahiziveliwa oziwa nzinana?” Mukalelo obu kalabihedha na attu otene sabwani yeddelo enottiyana. Ninofwanyela masaka otene wariha attu vina waweddiha noderetu. Nigakosa dhahene ninele okana eziwelo.

16, 17. Ninatonyihedhe dhavi ntanalo (a) Nigawiyelelaga attu? (b) Nigalogaga na attuya?

¹⁶ Mudhidhi gani onfwanyelihu wawiyelela attu? Nigalaleyaga numba-numba enkala rurumutxa wa attu enjene sabwani kaniromile ologana wi ddinodha owaniwawo. Noona niziwege okana malago wi niwodhe ozinddiyela akala attuya anoziveliwa makaniya. (Mateu 7:12) Motagiha, attu a mmuruddani mwawo anoyeluwa ovenya siku na sabuddu obe ddimingu? Egakala dhawene karoma mabasa awo olaleyaga mudila, okosaga onamona wa gari, obe oleddo wa wawiyelela abale anawona weyo wi mudhidhi obuno kana makani.

¹⁷ Mudhidhi mungasi onfwanyeliwe ogonela? Attu enje ahizuzuma na dhokosa, enofuneya oroma makani omaguva makamaka akala siku noroma. Japama oziwa ogwadda makani ottiya ologa mudhidhi mwinjene. (1 Korinto 9:20-23) Attuya agaziwa wi ninononelamo wila awene kana mudhidhi, labo nina anele ologa na iyo vina anele onivaha mudhidhi. Nigavilibihedha otonyihedha mikalelo dha muya wa Mulugu, ninele owodha ‘olaba vamodha na Muluguya.’ Yehova ononilabihedha wi nakamihedhe attu oziwa ebaribari!​—1 Korinto 3:6, 7, 9.

18. Nigaziwa watanala attu ena, elobo gani enjedhela iyo ottambirha?

¹⁸ Ndoweni notene natanalege anamudhi ehu, abali vamodha na arogora, vina abale anafwanyihu mmalaleyoni. Nigera dhawene ninele wakela mareliho oromana ovanene vina musogorho. Masalmo 41:2, 3 ohiloga: “Wagari ddule onimutanala musegedheyi, agadha okameya, Nabuya ononvuna. Nabuya onomukoya, onomvaha murenddele mwilaboni; kanamunyanyale mmadani mwa awogo aye.”