Namawodha-wodha Ononitanala

1, 2. (a) Mukalelo onatanala Yehova attu, ottiyanile dhavi na mukalelo onatanala areli attu akwawa? (b) Mwari mwa mutoma obu ninasekeserhe nni?

ATTU orela anowapuja ayelegi vina anowatabutxa. (Mateu 20:25; Kohelét 8:9) Mbwenye Yehova kali dhawene! Masiki iyene balivi namawodha-wodha, bali vina muttu ona guru opitta muttu-muttuvi, onowatanala na murima wotene attu ohakwana. Iyene ddapama, onoziwa dhinubuwelihu vina dhinnijombela. Onoziwa wila kanakwanile, onononelamo vangomela guru dhehu, kannikokela wira ejile ehinwodhihu.—Masalmo 103:13, 14.

² Mbibiliani, ninofwanyamo mapadduwo a attu atanaliwe na Yehova. Ovano ndoweni nitakunele dhotagiha dha attu araru: Nipadduwo noroma, ninele wona ekalelo elagihile Yehova oderetu, venevo vamukamihedhiye muzombwe Samuwel okana guru yomwaddela Namakutta Munddiwa Eli mpaganyo wottonga wadha wa Yehova. Nipadduwo nanawili, ninele wona ovilela olagihile Yehova, venevo vavyona Mizé ninga muttu ohinna ewodhelo yosogorhela nlogo na Izrayel oromana mu Ejipitu. Nipadduwo nanoraru, ninele wona mukalelo olagihile Yehova watanala ana Izrayel, varomilani wunlela wiyelela mu Ejipitu. Na dhotagiha esi, dhilobo gani dhisunzilihu mwaha wa Yehova, ninawodhe dhavi omutagiha?

OHIMUTANALA MWANA MULOBWANA

3. Elobo gani empaduweli Samuwel omattiyu dhahi, kito nivuzo gani ninfwanyelihu ovikosa? (Koona foto eli omaromo.)

³ Samuwel oromile olaba mumparhani bali mpali. (1 Samuwel 3:1) Omattiyu dhahi, mudhoweliye ogona, morurumutxa ehiweya elobo.a (Koona yowenjedhedha.) (Kengesa 1 Samuwel 3:2-10.) Samuwel ohimwiwa muttu bagamukuwela. Iyene wobuwela wi ddi Namakutta Munddimuwa Eli. Na nriho notene ovenya odhowa vali Eli, baloga: “Miyo ddidha vowi nyuwo muddithana.” Venevo Eli omwakula: “Miyo kadduwithanile.” Samuwel mudhoweliye oginanti, wahittaniwa dila dhina bili, nowidhawo Eli ohimunonihedhamo wila ddi Mulugu wamwittana. Musogorhomwa Eli ohimwaddela yokosa agakuweliwa dila yina, muzombweya ohiwelela. Yehova okoddele nni omwaddela muzombweya wila ddi iyenene wamukuwela? Nivuzo ntti Bibilia kanvaha yowakulaya. Txino Yehova welela anamutxutxe muzombweya.

4, 5. (a) Txini ekosile Samuwel muvahedheliwiye mpaganyo na Yehova wila amwaddela Eli? (b) Nipadduwo ntti ninnisunziha nni mwaha wa Yehova?

⁴ Kengesa 1 Samuwel 3:11-18. Malamulo a Yehova aloga wi aima anofwanyela wariha anddimuwa, makamaka abale ana ettomo. (Obudduwa 22:28; Onamakutha 19:32) Yafuna ologa Samuwel yali elobo yorutxa, kobuwela dhahi; muzombwe Samuwel ovenyile membesene, nomala omunyalela Eli, noliba murima omwaddela muselu orumiweyi na Mulugu. Bibilia onloga wi Samuwel ‘wannova omwaddela namakutta Eli yiwaliye.’ Mbwenye Mulugu wahimunonihedhamo Eli wila wamukuwela Samuwel. Sabwa ya ejuwene Eli wahimudidela Samuwel wila aloge dhotedhene dhimwaddeli Mulugu. Samuwel ohiwelela elogile Eli ‘ohinfurumulelamo dhotedhene, kavitile elo.’

⁵ Eli kajedhela wiwa muselu ninga obule. Vowi masiku a mundduni wahiwa muselu woladdana warumiwena ‘namavuhulela dhahi wa Mulugu.’ (1 Samuwel 2:27-36) Nipadduwo ntti ninnisunziha wila Yehova ohikana eziwelo enddimuwa vina onomutanala muttu ddi muttu.

6. Nikamihedho nivahiwe Samuwel na Yehova, ninnisunziha nni?

⁶ Akala weyo oli muzombwe, nipadduwo ntti na Samuwel ninousunziha elobo? Ninousunziha wi Yehova onononelamo makattamiho angumaniwena vina eniwamo weyo. Masiki akala kunwodha walaleya attu anddimuwa obe ana vyaka dhottiyana na dhawo, kakana ebaribari wi Yehova onele wukamihedha. Kamulobelele Yehova omwaddele ejile eniwamo weyo. (Masalmo 62:8) Kakanaga mudhidhi wotanalela dhotagiha dha azombwe alebiwe mBibiliani atanaliwe na Yehova ninga Samuwel. Kawaddele makattamiho angumaniwena abali na arogora owunuwelavo a mmulogoni mwawo agumanilena makattamiho oligana na awo bali azombwe. Awene anele wuwaddela nikamihedho nivahiwani na Yehova, mudhidhi wahajedhelani.

OHIMUTANALA MIZÉ

7, 8. Yehova olagihile dhavi wi wantanala yewamo Mizé?

⁷ Mizé vaniyena vyaka 80, Yehova wahimuttomela mabasa orutxa: wafurula ana Izrayel ali mutxedhiwani mu Ejipitu. (Obudduwa 3:10) Mabasa ninga aba txino Mizé kajedhela, sabwani iyene wasapiha mabila o Median vyaka dhowakwana 40. Noona iyene wahiloga dhahi: ‘Miyo ddili ani wi ddidhowe ddaloge na Faraó, ddabuddutxe ana Izrayel mw’Ejipitu.’ Yehova wahinpangarhaza dhahi: “Miyo ddinakale na weyo.” (Obudduwa 3:11, 12) Yehova wahimpikirela wi anddimuwa a mu Izrayel ‘agahinvuruwana.’ Nowidhaho, Mizé wahiloga: “Awene kanaddivuruwane.” (Obudduwa 3:18; 4:1) Enkala ninga Mizé wafuna aloge wi esodha kadhinapadduwe! Yehova, ottiya osilidhiwa na Mizé, wahinfwaseyela onvuruwana. Wahinvaha vina Mizé ewodhelo yowira matikiniho. Ninga munlogela malebo Mizé ddi muttu woroma wakelile ewodhelo ya wira matikiniho.​—Obudduwa 4:2-9, 21.

⁸ Masiki na dhotedhene dhakoseliwiye, iyene wahikoddavi. Wahiloga wila onorutxiwa ologa. Mulugu wahimulibiha dhahi: ‘Miyo ddinele okala na weyo, vina ddinere wuwaddela enfwanyeliwe ologa.’ Kito Mizé wahirumela? Nne, iyene wahimukumbirha Mulugu wila amurume muttu mwina! Yehova wahinvilelavi. Wahimuttiya Mizé ologa yewamo iyene, musogorhomwa wahimuruma Aroni wila akale mulomo wa Mizé.​—Obudduwa 4:10-16.

9. Mudhidhi wakamihedhiwa Mizé wila akale musogorheli Yehova olagihile dhavi ovilela vina oderetu?

⁹ Nipadduwo ntti ninnisunziha nni mwaha wa Yehova? Iyene masiki valiye namawodha-wodha, kalabihedhi ewodhelo yaye wila amulage Mizé mpaka okala muttu wowiwelela. Mbwenye wahinvuruwana nofwaseya vina noderetu dhaloga Mizé vina wahimulibiha alogaga, ddinele okala na weyo. Dhotedhene esi dhikosiliye dhahittidda mpirha? Ndde. Mizé wahirumela osogorhela nlogo nttile na Mulugu. Iyene wali muttu oviyeviha vina attu annimurhemeza, Yehova vina wannimuriha.​—Olebeliwa 12:3.

10. Nigatanalaga ena ninga munkosela Yehova ninjavo nni?

¹⁰ Dhotedhene esi dhinnisunziha nni? Akala wa mamuni, babi obe wa munddimuwa wa mulogo, ohikana ettomo vari va attu ena. Noona sabwa ya ejuwene jamakamaka vaddiddi omutagiha Yehova, omutanalaga mwadhiyo, mwanawo na ena a mmulogoni vina walagihaga oderetu modhela wavuruwanaga nofwaseya. (Kolosi 3:19-21; 1 Pedro 5:1-3) Ogamutagiha Yehova vina Yezu, oli Mizé Munddimuwa, onele wawona ena aususelaga wila wakamihedhe. (Mateu 11:28, 29) Dhawene onele okala yotagiha yadaretu.​—Ahebreu 13:7.

NAMAWODHA-WODHA OKANA EWODHELO YOVUNA

11, 12. Ana Izrayel vabudduwani mu Ejipitu txini ekosile Yehova efiyedhi wawubuweliha wi ali obareleya?

¹¹ Ana Izrayel okwaranya matxikwi mararu abudduwa mu Ejipitu yaka ya 1513 Yezu ahinabaliwa. Vamuttittiniva vahikala aima enjene, anakalaba, txino vina aredda. Muttitti obu wa attu, wila owodhe ofiya oleddo wawa anfwanyela okana musogorheli onatanala vina onaweddiha nokwela. Yehova ddali ninga musogoreli wawa, mbwenye wamulabihedhi Mizé wila aweddihe. Awene ahikana nibarelo, noona ahirumela wiyelela owani wawa ahovaga elo.—Masalmo 78:52, 53.

¹² Txini ekosile Yehova wila nlogo nttile nivyonege ninga wobareleya? Iyene olowasasanyedha, awene bavenya mu Ejipitu “wotadanene.” (Obudduwa 13:18) Velani awene avenya wotadanene ahidha anonelamo wi ddi Mulugu onaweddiha vina onawang’anela. Yehova, na mutana wannavelela na “murabo,” na mattiyu wannavelela na “wariya wa motho,” dhotedhene eso dhannawubutxedha wi Yehova ddaweddiha vina ddabarela. (Masalmo 78:14) Nlogo nttile nanfwanyela okamihedhiwa sabwa ya elobo yafuna opadduwa.

13, 14. (a) Yehova wabareli dhavi ana Izrayel waddamana Mwinje Wofila? (b) Yehova olagihile dhavi wila ohikana guru opitta akadda Ejipitu?

¹³ Kengesa Obudduwa 14:19-22. Kavyubuwele buli na ana Izrayel. Buhina yokosa. Mundduni bagadha anyakoddo a Ejipitu, osogorho bugang’ana Mwinje Wofila. Mohigonela weyo wona matikiniho a Yehova. Murabo omwala osogorho odhowa mundduni, muraboya wuttiyanihagani na akadda Ejipitu. Awene bagedda mwipipini nyuwo bamuna txeza! Musogorhomwa weyo omona Mizé atapulelaga nlada naye bara, ngamala okalawo pevo enddimuwa bigakukuma nowali ofiyedha ogawa munjeya bukala oku na oku ninga virugu. Nowidhaho, weyo, amudhawo, vinama dhotedhe na ena bamugavira vati vawuma ddeddere wotadanene. Muhinyigalile murove nne munyetto. Bamugedda vari va mwinjeya, s’opadduwa elobo. Masiki ena bagedda vang’ono vang’ono, bamufiyedha kobela yina s’emakani.

¹⁴ Kengesa Obudduwa 14:23, 26-30. Dhotedhene eso dhipadduwaga, Faraó novittukulela waye, wahivenya vamodha na anyakoddo aye wafwaraga ana Izrayel. Musogorhomwa Mizé onovada wili baraya, manjeya ogumana. Bamedha Faraó na anyakoddo aye. Kavuneyilevo nne mmodha!​—Obudduwa 15:8-10.

15. Nipadduwo ntti ninnisunziha nni mwaha wa Yehova?

¹⁵ Nipadduwo ntti ninonisunziha elobo mwaha wa Yehova. Ninonisunziha wi Yehova, Mulugu wa matadelo, eji enonikamihedha ononelamo wila nili wobareleya. (1 Korinto 14:33) Ninga mukumbuzi onkwela vina onang’anela mabila aye, Yehova onokoya nlogo naye na marhe ottiyana-ttiyana. Iyene onowabarela wila anamottihiwe na amwiddani. Oziwa eji enonipangarhaza vina enonilibiha veneva vanziwehu wi omagomo wa elabo ejino oli vakuvi.​—Gano 1:33.

16. Mukalelo ovuniwe ana Izrayel onnipangarhaza dhavi?

¹⁶ Masaka abano vina, Yehova onokoya nlogo naye ninga nikuru. Iyene onowakamihedha okana mandano ofiyedheya na iyene vina onowabarela wila anamedhiwe na amwiddani awa. Onele wawaddela yokosa nsaka na goyi enddimuwa ejene enaddamela nowaguva vaddiddi. (Ovuhulela 7:9, 10) Masiki azombwe obe anakalaba vina aredda, ankosa epaddi ya nlogo na Mulugu awene kanove nigafiya nsaka na goyi enddimuwa.b (Koona yowenjedhedha.) Ottiya wova, awene anakale womala nawale! Anele wubuwela mazu aba a Yezu: ‘Esi dhigaroma opadduwa, libihani murima, ttukulelani kove odhulu, vowi woboleliwa wenyu oli vakuvi.’ (Luka 21:28) Masiki agafwara-fwariwaga na akadda Gog, nili nikuru na attu nina guru opitta dha Faraó, Nlogo na Yehova kaninove, ninakuluvele nibarelo naye. (Ezekiyel 38:2, 14-16) Nlogona ninkoddela nni wova? Sabwani awene anoziwa wila Yehova kansadduwa, enlogiye jijuwene. Iyene ohilagiha ewodheloya Vavuniliye nlogo naye.​—Izaiya 26:3, 20.

17. (a) Nigasunzaga mapadduwa anlagiha ekalelo ekoyile Yehova nlogo naye ninapurelemo nni? (b) Txini enfuna osekererhiwa mutoma ondawo?

¹⁷ Mwari mwa mutoma obu, nihona mukalelo onlagiha Yehova otanala vina oderetu, ageddihaga nlogo naye. Ogatanalelaga mapadduwo aba, karoma otamelamo dhilobo dhiswa mwaha wa Yehova txino dhihoniliwe wengesaga mapadduwoya masaka a mundduni. Ogasunzagavi mikalelo dhapama dha Yehova, omukwela wawo vina nroromelo nawo ninelegevi oliba. Mutoma onfwarela, ninele osunza mikalelo dhomutagiha Yehova nilagihaga watanala amudhihu, abalihu vina abale anafwanyihu mmabasani a olaleya.