Yehova Onologa na Samuwel

Namakutta munddimuwa Elí wahikana aima eli aali anamakutta. Mazina awa baba: Ofini na Fineya. Awene kedda mudilani mwa Yehova, nona, anpuja vaddiddi. Ana Izrayel agamuhelelaga mukutto Yehova, Ofini na Fineya anttebamo piddula dhapamadha. Elí agaddeliwa dhera anaye, katanalawo. Yehova agahittiya esidha opadduwagavi?

Samuwel masiki valiye mwana, katagihile mweddelo wa Ofini na Fineya. Eji yamuhagalaliha Yehova. Omattiyu dhahi Samuwel agonaga, omwiwa muttu amukuwelaga. Mwiweliye ovenya, ottamagela wali Elí, ologa: “Ddili veneva.” Elí omwakula: “Mwanaga miyo kadduwithanile. Dhowa wagone.” Samuwel odhowa ogona wili. Ohiwa okuwa dila yina. Samuwel mwiweliye okuweliwa dila yanoraru, Elí ohubuwela wila ddi Yehova onimukuwela Samuwel. Iyene omwaddela Samuwel wi agewa wittaniwa dila yina, aloge dhahi: “Logani Nabuya. Mwimeleli wenyu onouvuruwanani.”

Samuwel ohiyelela ogona. Venevo ohiwa dhahi: “Samuwel wé! Samuwel wé!” Apo iyene ohakula: “Logani Nabuya; mwimeleli wenyu onouvuruwanani.” Yehova ompanga dhahi: ‘Omwaddele Elí wi ddinele omutolotxa iyene na amudhaye. Iyene onoziwa dhinira anaye mmusasani mwaga, kafunile walogana.’ Mumembesinimwa Samuwel obehedha ofugula misuwo dha musasa ninga mwalemeleliye wira. Iyene wela wova ompanga namakutta munddimuwa makani amwaddeli Yehova. Nowidhawo, Elí omwittana omvuza: “Mwanaga Samuwel, Nabuya owaddeli nni? Kuddivubele elo.” Apo Samuwel ompanga Elí dhetedhene dhamwaddeli Nabuya.

Vonuwa Samuwel, Yehova wanneddavi na iyene. Mwilaboni mwetemwene mwa Izrayel, kavo wakoddile oziwa wila Yehova wahimusakula Samuwel wi akale namattonga.