Ishano, 10 na Otuburu
Nipara na ononelamo, kumuriha Yehova.—Gano 9:10.
Ninga Akristu txini enfwanyelihu okosa akala mohijedheleya mutelefonini mwehu munodha mafoto anlagiha attu bali yovi? Momaguva-mwene ninele orabela wona. Enanikamihedhe okosa ejuwene ja wubuwela wi elobo elitxi yamakamaka ba mandano ehu na Yehova. Masiki akala mafotoya kanlagiha attu bali yovi, anodhaga onittukulela okana mubuwelo wonyakuwa. Ninfwanyelelani orabela wona mafoto aba? Sabwani iyo kaninfuna wubuwela dhilobo dhigadhile onittukulela okosa mararuwo. (Mt. 5:28, 29) Munddimuwa wa mmulogoni wo Tailândia onkuweliwa David ohiloga: “Miyo ddinovivuzaga: ‘Masiki akala mafotoya txino kanalagiha attu bali yovi, Yehova onele wagalala miyo ddigadidela wona mafotoya abo?’ Ovikosa mavuzo ninga aba enoddikamihedha okosa dhosakula dhapama.” Wova okosa elobo-txilobo enamukubanyihe Yehova enele onikamihedha okosa dhilobo na zelu. Bibilia onloga dhahi, “nipara” na “ononelamo” kumova Mulugu. w23.06 23 ddima 12-13
Sabuddu, 11 na Otuburu
Nyuwo attu a nlogo naga, volowani mba mwenyu.—Iza. 26:20.
Nzu tti “mba” ninlogiwa versu eji enaddiwana mmulogoni mwehu. Mu goyini enddimuwa Yehova ohipikirhela wi onele onibarela akala ninodhowavi nimulabelaga iyene vina nakwelaga abali na arogora. Nona ninofwanyela ovilibihedha wunuwiha okwela onihu na abali vina arogora. Ninele ovuneya nigakosa ejuwene! “Siku ninddimuwa na Nabuya [Yehova]” ninele okala norutxa mwa attu otene. (Sof. 1:14, 15) Nlogo na Yehova vina ninele ofwanyiwa makattamiho. Mbwenyi akala ninovisasanyedha ovanene ninele owodha okala ofwasa vina ninele wakamihedha attu ena. Iyo ninele ovilela makattamiho ananipatte. Abalihu agatabuwaga ninele okosa muli mwetemwene wi nakamihedhe modhela waweddela ttagaraga vina wavaha dhinajombela. Vina akala ninovilibihedha wakwela abalihu na arogora ovanene kinanirutxe watonyihedha okwela musogorho. Yehova onele onittuva na egumi yamukalakala mwilaboni muhinakale dhifoyo vina munadduwaliwe makattamiho otene.—Iza. 65:17. w23.07 7 ddima 16-17
Ddimingo, 12 na Otuburu
Mulugu onowulibihani, onowuwaralihani, onowimetxani pwi.—1 Ped. 5:10.
Bibilia onowaloga emeleli ororomeleya a masaka a wale ninga attu anna owodha vina oliba. Mbwenyi dila dhina abale akala ninga oliba masaka mena kavyona dhawene. Motagiha midhidhi dhina Mwene Davidi wanvyona wi ohiliba ninga mwango, mbwenyi midhidhi dhina wangulugudheya. (Masal. 30:7) Oku Sansau wali muttu woliba vaddiddi sabwa ya muya wa Mulugu, masiki dhawene iyene wannonelamo wi se nikamihedho na Mulugu, guru dhaye dhigahittawa, bakala ninga alobwana ena. (Anam. 14:5, 6; 16:17) Alobwana aba aliba sabwa ya nikamihedho navaha Yehova. Murumiwi Paulo vina wanfuna guru dha Yehova. (2 Kor. 12:9, 10) Iyene wanwanana makattamiho a egumi. (Gal. 4:13, 14) Vina masaka mena wela ovilibihedha wi akose dhilobo dhaderetu. (Rom. 7:18, 19) Midhidhi dhina wannova ejile egadhile ompadduwela. (2 Kor. 1:8, 9) Masiki dhawene mudhidhi wobana Paulo palibiye. Eji yapadduwa sabwani Yehova waninvaha guru wi awodhe owanana makattamiho aye. w23.10 12 ddima 1-2