Ddiabo Onomweha Yezu

Mmalele Yezu obatiziwa, muya wokoddela omuttukulela mwiddeddereni. Mwenemo wahipiwa dala vaddiddi sabwani wahimalamo malabo 40 ahijile. Venevo othwanyuwa Ddiabo wi amureze Yezu, balogane: ‘Weyo akala oli mwana Mulugu, kakosa wi malugu aba akale yoja.’ Yezu omwakula nomwaddela Malebo: ‘Ehilebiwa wi muttu kankalawo n’ojavi. Onokalawo vina na mazu a Yehova.’

N’omala Ddiabo omureza Yezu dhahi: ‘Akala nyuwo muli Mwana-Mulugu, mulupele vati. Mmaleboni mulebiwe dhahi: ‘Mulugu onowalamula aju aye augapeni.’ Dila yanawili Yezu ologa Malebo eraga: “Mmaleboni mulebiwe vina dhahi: Kumwehe [Yehova] Mulugu wawo.”

Novenya, Satana omoniha Yezu vilabo dhotene dha vati, omwaddela dhahi: “Mugakokora muddebedha, miyo ddinouvahani dhetenedhá.” Yezu omwakula: “Kadduwonevo Satana-wé! Elebiwa: Omwebedhe [Yehova] Mulugu wawo, omwimelelege iyene bahi.”

Mwa venevo Satana ovenyavo, adha anju a Mulugu anvaha Yezu yoja. Ovenya venevo, Yezu oroma olaleya Omwene. Aba ba mabasa adheli Yezu okosa velaboni ya vati. Attu anziveliwana dhasunziha Yezu, noona anninfwara mwetemwene mwaviriye.