Nlogo na Mulugu Ninokwela Oligana

1. Yoweha gani egumanilena José, nanda txini ekosiliye?

JOSÉ mwana Jakob wahigumanana yoweha. Muyana wahimulogana dhahi: “Kagona na miyo.” Muyana oddo wali mwadhi nabuye, Putifar. José karumelile. Masaka abano txino muttu onodhaga ovivuza dhahi, ‘Sabwaya jani José arabela yoweha ejile?’ Oku Putifar bamalile ovenyavo. Ottiya ejo, José wali mudhari wa ntakulu nttile vina kokodda ogona na mwadhi Putifar muyana oddule agahittabwiha odhari waye. Masiki dhayene, José wahikodda. Sabwaya? Iyene ohiloga dhahi: “Ddinwodha dhavi wira elobo ninga eji, yothabwetxa otakala, ddimudawelaga Mulugu?”—Wita 39:7-12.

2. José oziwile dhavi wi mararuwo yottega vamentoni va Mulugu?

² José oziwile dhavi wi vamentoni va Yehova, oraruwa yali yottega “yothabwetxa otakala”? Nlamulo na Mize, ninloga sohipipiriha “Kuraruwe,” nidhile olebiwa vasogoro muvirile vyaka mazana meli. (Obud. 20:14) Masiki dhawene José wanziwa wi Yehova kagarumelile mweddelo obule wohifwanyelela. Motagiha, iyene wanziwa wi Yehova witile matelo wi akosiwege na attu eli, mulobwana mmodha na mwiyana mmodha. Vina iyene wahiwa mukalelo wambarele Yehova bibe Sara dila bili mudhidhi wafuniye opujiwa na merelo a mararuwo. Dila yina Mulugu wahimbarela Rebeka mwadhi Izaki. (Wita 2:24; 12:14-20; 20:2-7; 26:6-11) José wahidha ononelamo ejile enonamo Mulugu ninga yapama vina yabure. Sabwa ya José omukwela Mulugu vina okwela malamulo oligana a Yehova, iyene wahigana ovirihamo ejile yanfunana Yehova.

3. Txini enasekeserhihu mwari mwa nsunzo ntti?

³ Weyo onokwela oligana? Se waganyedha onokwela. Mbwenye iyo notene nili attu ohiligana vina nigahikale txenjewa, monelo wa elabo ejino sabwa ya oligana onodhaga onipatta. (Iza. 5:20; Rom. 12:2) Nona ninele osekeserha oligana txini? Nanda ninapurelemo dhavi nigakwela merelo oligana. Omamalelowa ninele osunza ttaro ttaru dhinanikamihedhe olibiha efunelo yehu ya okwela malamulo oligana a Yehova.

OLIGANA TXINI?

4. Attu enjene ana dhubuwelo gani sabwa ya muttu woligana?

⁴ Egalogiwaga sabwa ya muttu woligana, attu enjene anubuwela wi muttu woligana ddule onasisigula akwaye, ddopanela vina oniviwonana ttima opitta ena. Mbwenye Mulugu kanziveliwa mikalelo esi. Yezu bali velaboni ya vati, wahasisigula venjene asogorheli a marelijiau akalilewo nsaka naye aviwonana oligana opitta attu ena. (Koh. 7:16; Lk. 16:15) Oku muttu woligana vamentoni va Yehova kaniviwonana ttima opitta attu ena.

5. Mowiwanana na Bibilia, oligana txini? Kavaha yotagiha.

⁵ Oligana mukalelo wokoddela vaddiddi. Na mazu ogwaddela, weddana merelo oligana entapulela okosa ejile eli yapama vamentoni va Yehova Mulugu. Mbibiliani, nzu ntti “oligana” nintapulela okalawo mowiwanana na malamulo oligana a—Yehova. Motagiha, Yehova wahiloga wi anyamarhondda alabihedhege ‘mipimo dholigana.’ (Olib. 25:15) Na mazu a Hebraiku nzu ntti “ororomeleya” ninotapuleliwa vina ninga “oligana.” Nona, Mukristu agafuna okala woligana vamentoni va Mulugu, onofwanyela okala wororomeleya mmarhonddani mwaye. Muttu onkwela dhilobo dholigana—onowidda omona muttu eddihiwaga nohifwanyelela. Wi ‘amwagalalihe Yehova’ muttu woligana txibarene onotanalela mukalelo onona Yehova dhosakula dhaye.—Kol. 1:10.

6. Ninfwanyelela nni okuluvela malamulo oligana a Yehova mwa ejile eli yapama vina yabure? (Izaiya 55:8, 9)

⁶ Bibilia onomutonya Yehova ninga Nipara na oligana. Sabwa ya ejuwene, onokuweliwa ninga ‘mburo woligana.’ (Jer. 50:7) Ninga Muttanddi, Yehova bahi ddina omwinya wa wita malamulo mwa ejile eli yaderetu vina yabure. Vowi Yehova ddoligana, iyene ddina moonelo wofwanyelela wa elobo yapama vina yabure, opitta moonelo wehu, vowi iyo nili attegi vina nili attu ohiligana. (Gano 14:12; kengesa Izaiya 55:8, 9.) Bili dhawene, sabwa ya wi nittanddiwe moligana na Mulugu, enowodheya okalawo mowiwanana na malamulo aye oligana. (Wita 1:27) Vina ninokwela ovirihamo malamulo aye. Omukwela wehu Babihu wa wirimu onele onittukulela omutagiha mpaka apale vanwodhelihu—Ef. 5:1.

7. Ninfunela nni magano? Kavaha yotagiha.

⁷ Iyo ninele opurelamo nigeddana magano oligana a Yehova, mwa ejile eli yapama vina yabure. Onfuna wone? Kobuwela egapadduwile munyamarhondda kowita mpimo wayene womugulihana nambedde obe anamamaga numba kolabihedhaga mpimo dhawa-dhene dhottiyana, yodhelavoya egahitota makattamiho menjene. Obe kowiliwa empereza dhinsasanya mirobwe dhosipitale elo wika mmakininuni dhilobo dhina ahifwaraga magano emetxiwe, eji egahatatamulela aredda ena okwa. Attu agafwara vina agarumela malago emetxiwe anobareleya. Na mukalelo wakakene malago a Mulugu mwa ejile eli yabure vina eli yapama anonibarela.

8. Mareliho gani anakele abale ankwela dhilobo dholigana?

⁸ Yehova onowareliha abale anvilibihedha weddana magano aye. Iyene ohapikirhela: ‘Attu apama anele okala anya a elabo, akalegemo masiku otene.’ (Masal. 37:29) Onowodha wubuwela wiwanana, murenddele vina wagalala onakaane nlogo notene muttu-muttu agavilibihedha weddana magano a Yehova? Yehova onfuna wi okane wagalala ninga oku mwigumini mwawo. Nona muttu-muttu wa iyo ohikana mwaha dhapama dhinimuttukulela okwela oligana! Ninawodhe dhavi wunuwiha okwela dholigana? Ninfuna nisekeserhe ttarho ttaru dhinanikamihedhe.

OLIBIHE OKWELA WAWO MAGANO A YEHOVA

9. Txini enanikamihedhe okwela dholigana?

⁹ Ttarho 1: Nimukwele Oddule witile magano. Akala ninofuna okwela dholigana vamaromo ninofwanyela wunuwiha omukwela wehu Yehova, witile magano anttiyaniha yaderetu na yabure. Venevo vanunuwa omukwela wehu Yehova, efunelo yehu yoweddana magano oligana enele wunuwavi. Wi niladdanihe: Kowiliwa Adamu na Eva annimukwela Yehova, awene txipo kagavanyile malamulo aye oligana.—Wita 3:1-6, 16-19.

10. Abrahamu wunuwihile dhavi omuziwa waye Yehova?

¹⁰ Iyo kaninfuna okosa yovonya yakakene ekosile Adamu na Eva. Ninele orabela okosa yovonya yakakene, nigavilihedha osunza sabwa ya Yehova, otamalela mikalelo dhaye vina nigatamela ononelamo dhubuwelo dhaye. Nigakosa dhahene omukwela wehu Yehova onele wunuwa. Nilogeni sabwa ya Abrahamu. Mwebaribari, iyene wannimukwela Yehova, muziwiliye yogana ya Yehova, Abrahamu kapambihile vina wahitamela omuziwa deretu. Motagiha, muziweliye wi Yehova onfuna atolotxe sidadi ya Sodoma na Gomora, vamaromo Abrahamu wahova obuwelaga wi “namathonga wa elabo yotene” onele watolotxa attu apama vamodha na attu abure? Abrahamu wahoona wi ejo kigapadduwile, nona na oviyeviha wahimukosa Yehova mavuzo menjene. Yehova wahimwakula novilela. Omamalelowa, Abrahamu wahidha ononelamo wi Yehova onopima mirima dha attu otene vina txipo kanatolotxe attu abure otaganyiha na attu apama.—Wita 18:20-32.

11. Abrahamu wonihile dhavi wi wannimukwela Yehova vina wannimukuluvela?

¹¹ Makani alogile Abrahamu na Yehova sabwa ya otolotxa muttette wa Sodoma na Gomora, ahilibiha vaddiddi omukwela waye Yehova. Oromana venevo iyene wahidhowavi amukwelaga vina amurihaga Babi waye wa wirimu, opitta masaka a mundduni. Vyaka dha musogorho, nroromelo na Abrahamu nahehiwa. Yehova wahimukumbirha Abrahamu wi amuttukule mwanaye wamukweletxiye wi amukuttele Iyene. Abrahamu wahimuziwa pama Mulugu. Mbwenye dila eji kamukosile mavuzo, iyene wahivisasanyedha wi avirihemo yogana ya Yehova. Masiki dhawene onowodha otanalela mukalelo wewilemo opa Abrahamu wi awodhe ovirihamo yogana eji! Abrahamu txino wahitanalela venjene, esile dhasunziliye mwaha wa Yehova. Abrahamu wanziwa wi dhilobo dhinkosa Yehova s’okwela vina soligana. Ninga mulogile murumiwi Paulo, Abrahamu wanziwa wi Yehova, agahinvenyiha mukwani mwanaye Izaki. (Aheb. 11:17-19) Yehova wahipikirhela wi Izaki agahikala Babi wa malogo. Mbwenye nsaka nene nttile Izaki wali ahinatti okana mwana, masiki dhawene Abrahamu wandhowavi amukwelaga Yehova vina akuluvelaga wi Babi waye onelege odhowavi akosaga dhilobo dholigana. Masiki mwari mwa makattamiho, nroromelo naye nihimuttukulela omwiwelela Yehova.—Wita 22:1-12.

12. Ninamutagihe dhavi Abrahamu? (Masalmo 73:28)

¹² Ninamutagihe dhavi Abrahamu? Dhahene ninga ekosiliye, iyo nidhowevi nisunzaga sabwa ya Yehova. Okosa eji enele onikamihedha okala ofiyedheya na iyene vina omukwela wehu onelege wunuwavi. (Kengesa Masalmo 73:28.) Mubuwelo wehu onele oswagiheya wi nubuwelege ninga iyene. (Aheb. 5:14) Yopurelamoya, muttu aganikwekwettela okosa elobo yabure, ninele orabela. Ninelege widda dhubuwelo dhohifwanyelela dhigadhile omukubanyiha Babi wehu wa wirimu vina ononga mandano ehu na iyene. Elobo gani yina enfwanyela iyo okosa wi nonihe wila ninokwela oligana?

13. Ninavilibihedhe dhavi weddana dholigana? (Gano 15:9)

¹³ Ttarho 2: Ovilibihedhe weddana merelo oligana siku na siku. Nigafuna wi maningo ehu akale oliba ninofwanyela onddamurhaga masiku otene, na mukalelo wakakene ninofwanyela okwela malamulo oligana a Yehova anoniha—eli yabure vina yaderetu. Aba mabasa anfwanyeliwe okosa labo na labo. Yehova kannikumbira okosa dhilobo dhihinwodhihu. (Masal. 103:14) Iyene ohinikuluveliha wi ‘onowakwela abale aneddana dholigana.’ (Kengesa Gano 15:9.) Nigakana yogana yomuttiddela Yehova mabasa, ninovilibihedha wi nifiyedhe. Yakene jimpadduwa akala ninofuna weddana merelo oligana. Na ovilela Yehova onele onikamihedha odhowa vasogorho vina na mudhidhiya ninele owodha.—Masal. 84:5, 7.

14. “Yabalo ya mujila” txini nanda ekaleli nni yofuneya?

¹⁴ Na okwela Yehova ononubutxedha wi weddana nigano noligana kahiye muttorho, ottiya ejo ninonibarela. (1 Jo. 5:3) Iyo vina ninofuna obareleya siku na siku. Kobuwela dhipano dhotene dhilogile murumiwi Paulo dhinnibarela mpaddi womuyani. (Ef. 6:14-18) Epano gani yabarela murima wa munyakoddo? Yali “yabalo ya mujila,” obe oligana murima yatonya malamulo oligana a Yehova. Dhahene ninga yabalo ya mujila yabarela murima, malamulo oligana a Yehova anobarela murima wehu wa nladdaniho, omuttu wehu wa mwari. Nona okane ebaribari wi mwari mwa dhipano dhinnibarela mpaddi womuyani munofwanyeya yabalo ya mujila!—Gano 4:23.

15. Onabale dhavi yabalo ya mujila?

¹⁵ Onawodhe dhavi wabala yabalo ya mujila? Onabale yabalo ya mujila, ogatanalelaga magano a Yehova mwa dhotagiha dhinkosiwe siku na siku. Ohinatti ogana enfwanyeliwe ologa, jibo dhinvuruwaniwe, mavego anoniwe obe manivuru anengesiwe onofwanyela ovivuza: ‘Elobo gani enfwanyelimi wika mmurimani mwaga? Ejiya enoddittukulela okala worumeliwa vamentoni va Yehova? Enoddikwekwettela okosa mararuwo, opanga,—omukumbela vaye obe enokosa mpaddi wa dhilobo dhinona Yehova wi sohiligana?’ (Fil. 4:8) Akala dhosakula dhawo dhinowiwanana na efunelo ya Yehova, murima wawo onele wubarela ohikwekwetteleya dhilobo dhohiligana.

16-17. Izaiya 48:18 onnikamihedha dhavi okalawo mowiwanana na malago a Yehova okala-nokala-wene?

¹⁶ Weyo onowova akala onele owodha odhowavi wiwelelaga magano oligana a Yehova siku na siku, yaka na yaka? Katanalela nladdaniho nilabihedhile Yehova ninfwanyeya va Izaiya 48:18. (Kengesa.) Yehova ohipikirhela wi oligana wehu ogali ‘ninga manebe a mbara.’ Karoma otanalela buwimelile nikome na bara, wang’anaga manebe atepuwelaga noku-noku. Mburo ninga obo wa murenddele onodhaga wova wi na labona otepuwa wa manebe onele ogoma? Nne vangono! Weyo onoziwa wi vyaka matxikwi na matxikwi manebe anodhowavi atepuwelaga otakulu vina eyelelaga mbara.

¹⁷ Oligana wawo onele oladdanihiwa na manebe a mbara! Dhavi? Ogakosa dhosakula otanalelaga vamaromo ejile enufunana Yehova vina ogewelelaga malago aye. Kintanala akala yoganaya jorutxa, Babi wehu wokwela wa wirimu onele odhowavi anikamihedhaga wi nikanege wagalala vina nidhowege niwelelaga malago Aye oligana.—Iza. 40:29-31.

18. Sabwaya jani kaninfwanyela wattonga attu nifwaraga magano ehu?

¹⁸ Ttarho 3: Omuttiye Yehova attonge. Oku nivilibihedhaga okalawo na malago oligana a Yehova, kaniladdanihege dhinkosihu na dhinkosa attu ena nubuwelaga wi onkosa pama ddi iyo. Akala attu ena anokosa dhilobo dhihimuzivela Yehova iyo kaninfwanyela wattonga, kanidduwale wi Yehova ddi “Namathonga wa elabo yotene.” (Wita 18:25) Yehova kanittomeli wattonga attu ena. Nona Yezu aloga wi: “Kammuttonge muttu, wi nyuwo vina munadhe muttongiwe.”—Mt. 7:1.b

19. José wonihile dhavi wi wankuluvela ottonga wa Yehova?

¹⁹ Ndoweni nitanaalele wili yotagiha ya mulobwana woligana José. Iyene wahirabela wattonga attu ena, masiki veddihiwiye nohifwanyelela. Iyene wahilupeliwa na abalaye amuguliha ninga mudhari nomala badhowa omwaddela babe wi José ohikwa. Vyaka dhina musogorhomwa, José wahigumana wili na amudhaye. Mudhidhi obo José wahikana ettomo enddimuwa agahidha wattonga abalaye n’ohifwanyelela vina wawihedha ntxiga. Abalaye ahova ejile egadhiliye wakosela, masiki k’otxinuwa-wene. Mbwenye José wahapangarhaza na mazu aba: “Kamove! Miyo ddinoligana na Mulugu?” (Wita 37:18-20, 27, 28, 31-35; 50:15-21) N’oviyeviha José ohittiya ottonga mmadani mwa Yehova.

20-21. Ninarabele dhavi ovyonana oligana opitta ena?

²⁰ Dhahene ninga José, ottonga nimuttiyedhe Yehova. Motagiha, iyo kaninfwanyela ottonga emuttukuleli mbali obe murogora okosa elobo. Iyo kaninwodha wengesa murima; ‘Yehova bahi ddimpima dhubuwelo.’ (Gano 16:2) Iyene onowakwela attu otene, a dhilabo dhottiyana-ttiyana vina dhilemelelo dhottiyana. Iyene ononiwoba wi ‘ninfugulele murima wehu.’ (2 Kor. 6:13) Iyo ninoveda wakwela amudhehu otene omuyani, mbwenye kanattonge.

²¹ Eji kintapulela wi nattongege abale ahili mwibaribarini. (1 Tim. 2:3, 4) Wahiromaga omuttonga mmudhawo ohili mwibaribarini, ologaga wi “Muttu oddu txipo kanasunze ebaribari”? Nne, obu ogali mukalelo wopanela, nubuwelaga wi nili aligani opitta awene. Yehova onojedhelavi avahaga mudhidhi “athu a mwilaboni mwetemwene” wi arugunutxe murima. (Mer. 17:30) Kudduwale, abale anivyona wi aligani vamentoni va Yehova kaliganile.

22. Txini yuttukuleli okwela oligana?

²² Okwela magano oligana a Yehova ononidhelana wagalala, onowattukulela attu ena okala ofiyedheya na iyo vina na Mulugu wehu. Kanitxelele ‘otamela venjene oligana.’ (Mt. 5:6) Okane ebaribari wi Yehova onowona guru enkosiwe vina onowagalala wuwoona ovilibihedhaga okosa dhilobo dhapama. Mazu aba anonipangarhaza, sabwani attu a elabo ejino anodhowavi attabwihaga okosa dhilobo dhohiligana! Kudduwale, ‘Yehova onowakwela abale aneddana murima woligana.’—Masal. 146:8.