Kapitulu Tanu Na Biili
Ejile Ensunzihu Sabwa Ya Mulugu Othiya Obure Okalagawovi
1, 2. (a) Yehova kowatolotxa mudhidhene obule asadduweli abale mu Edeni, ejilene eganifanyile dhavi iyo? (b) Masasanyedho gani a okwela abene anikalihedhiwo Yehova?
NIKOLO na wale Yakobi wahiloga dhahi: “Vyaka dhimalilemi ddeddaga na goyi ddinoona ninga dhiyevile.” (Wita 47:9) Na mukalelo wakakene, Job wahiloga wila muthu “okalawo waye mwilaboni kungonela, makathamiho kanimmalela.” (Job 14:1) Ninga Yakobi na Job, enjiya mwa iyo ninokaanaga makathamiho, dhovirigana, vina ntowa. Masiki dhaene, obaaliwa wehu kayo ovirigana mpaddi wa Mulugu. Txibarene, iyo kanina mubuwelo vina maningo a wakwana na murala wa Paraizu wana Adamu na Eva omaromo. Ki Yehova kowatolotxa mudhidhene obule wasadduwilani? Txibarene kugakalile maredda, okubanya, obe okwa, nne nlogo na athu vina kanigakalilewo. Iyo kanigabaaliwe. Na thagaraga, Mulugu wahinvaha Adamu na Eva mudhidhi wa wabaala ana, masiki ana aba varavilani ohakwana. Modheela Kristu, Yehova ohinikosela musasanyedho wila nakele ejile eyeleeli Adamu—egumi ya mukalakala mparaizu velaboni ya vati.—Joau 10:10; Roma 5:12.
2 Enonilibiha vaddiddi owodha ojeedhela okalawo na mukalakala mwilaboni eswa yorijiwa na Paraizu, mwenemo muhinaakale maredda, okubanya, wiwa opa, na okwa vina mwenemo muhinaakale athu abure! (Gano dh’olelana 2:21, 22; Ovuhulela 21:4, 5) Mbwenye modheela dholeba dha Bibilia, ninsunza wila masiki oviluwa wehu vakalilani elobo ya makamaka wa iyo vina wa Yehova, ohikala vina elobo yina ya ntapulelo vaddiddi eniwanana na ejene.
Sabwa Ya Nzina Naye Nddimuwa
3. Txini eli mwari mwa osoriheya wa efunelo ya Yehova na elabo ya vati vina nlogo na athu?
3 Nzina na Mulugu nili mwari mwa osoriheya wa efunelo yaye na elabo ya vati vina nlogo na athu. Nzina nthi, Yehova, nintapulela “Iyene Onotota Okala.” Noona nzina naye ninowooniha ovuwa waye ninga Mulamuleli wa Elabo Yotene, Iyene Munddimuwa oddwene onimetxa dhofuna nanda mudhidhi wotene onosoriha dhofuna esi, vina Mulugu wa ebaribari. Sabwa ya mpaddo wa Yehova, murenddele vina okala deretu wa abale otene ali mwilaboni motene ongayela ovahiwaga nriho ninfanyeela nzina naye vina ejile eli mwari mwa nzina nthi, vina yawila athu otene amwiwelelege iyene.
4. Txini eli mwari mwa efunelo ya Yehova na elabo ya vati?
4 Mwamaleliye omuthandda Adamu na Eva, Yehova wahathomela mabasa wila akosege. Iyene wahooniha deretu yawila efunelo yaye kayali ya olamulelavi elabo yotene ya vati—dhaene otapula maddile a Paraizu—mbwenye yali vina ya odhaaliha elabo eji na ana awa. (Wita 1:28) Ki efunelo eji egahijomba sabwa ya othega wawa? Nzina na Yehova wa guru dhotene nigahiveya vaddiddi, iyene kohisoriha efunelo yaye mowiwanana na elabo eji ya vati vina nlogo na athu!
5. (a) Athu ooroma kooja musapo wa muri wa eziwelo ya ejile eli yaderetu vina yabure, agaakwile mudhidhi gani? (b) Yehova osorihile dhavi nzu naye na va Wita 2:17 bagariha efunelo yaye na elabo ya vati?
5 Yehova wahimala omulaga Adamu na Eva yawila kovanya nanda baja musapo wa muri wa eziwelo ya ejile eli yaderetu vina yabure, awene agahikwa “siku-ntho” nigajilani. (Wita 2:17) Mothiddeela nzu naye, siku nene nthile na othega wawa, Yehova wahapwatheliha muladdu, nanda baathongela okwa. Mmooneloni mwa Mulugu, Adamu na Eva akwile siku nene nthile. Mwa dhaene, wila adhowenavi efunelo yaye na elabo ya vati, Yehova wahathiya awene wabaala ana ahinathi okwa. Na dhaenevi, mwawila Mulugu onoona vyaka 1.000 ninga siku nimodha, mwakweli Adamu bana vyaka 930, eji yali mwari mwa “siku” nimodha. (2 Pedro 3:8; Wita 5:3-5) Dhaene, nihisoriheya nzu na Yehova mwaha wa mudhidhi ogasoriheyile othonga waye, nanda efunelo yaye na elabo ya vati kinongeyile sabwa ya okwa wawa. Mbwenye mwari mwa mudhidhi muñgonovi, athu ohakwana vamodha na athu abure, anothiyiwaga okalawo.
6, 7. (a) Mowiwanana na Obudduwa 9:15, 16, Yehova onathiyela eni athu abure okalagawovi? (b) Mpaddi wa Faraó, guru ya Yehova yalagihiwe dhavi, nanda nzina Naye nathithimihiwe dhavi? (c) Ogoma wa elabo eji yabure ya ovanene, onatote eni?
6 Ejile yampangile Yehova mulamuleli wa Ejipitu nsaka na Mizé enowooniha vina sabwa enathiyela Mulugu athu abure okalagawovi. Faraó mwakooddihedhiye ana a Izrayel obudduwa mu Ejipitu, Yehova kampile mudhidhene obule. Elaboya yahidheeliwana malavi [milili] kumi, bagalagiha ewodhelo ya Yehova na makalelo owumiha milomo. Bagalaga mwaha wa nlavi na notanu na meeli, Yehova wahimpanga Faraó yawila Iyene kofuna, agahimuseela Faraó vina nlogo naye banirimelamo mwilaboni. Yehova wahiloga dhahi: “Miyo ddiuthiya okalawo: ddirelé wi wone guru dhaga, vina nzina naga nthithimihiwe mwilaboni mwetemwene.”—Obudduwa 9:15, 16.
7 Yehova mwavuneliye akadda Izrayel, nzina naye txibarene nahidha oziweya mpaddi wotene. (Josuwé 2:1, 9-11) Nsaka na ovanene, okwaranya vyaka 3.500 musogorhomwa, ejile ekosile Yehova nsaka nthile kidduwaliwe. Kayo nzinavi na Yehova nthithimihiwe, mbwenye ehilaleyiwa vina ebaribari mwaha wa Oddule onthukula nzina nthi. Eji ehimetxa ovuwa wa Yehova ninga Mulugu oddwene onsoriha esile dhinroromelihiye, vina onkosa elobo mwa oderetu wa adhari aye. (Josuwé 23:14) Eji ehilagiha wila sabwa ya guru dhaye dhotene, kuli elobo enwodha okathamiha efunelo yaye. (Izaiya 14:24, 27) Dhaene iyo podi okaana nikuluvelo nawila ovanene, onela okosa elobo mwa oderetu wa adhari aye a nroromelo, modheela otolotxa elabo yotene yabure ya Satana. Mulagiho obu wa guru dhotene, vina nthithimiho ninvahani nzina na Yehova txipo kinadduwaliwe. Dhopuramodha kadhinaagome.—Ezekiyel 38:23; Ovuhulela 19:1, 2.
‘Monuwelo Wa Zelu Ya Mulugu’
8. Dhilobo gani dhinnikokomezela Paulo woona?
8 Mu kartani yaye yalebeliye akadda Roma, murumiwi Paulo onokosa nivuzo: “Nile Mulugu onoweddana nsakulano?” Iyene onowakula dhahi na owarala: “Nne-wene!” Venevo iyene onothukulela vadhulu thagaraga ya Mulugu vina onoromola ejile yalogile Yehova mwaha wa omuthiya Faraó okalawo mudhidhi wogoneela. Paulo vina onowooniha wila iyo athu, nili ninga ologo mmadani mwa namuba. Vasogorhova onologa dhahi: “Mulugu kófuna, agawodha woba owali waye, vina woniha guru dhaye; vano omaga murima, oavilela abale afwanyeliye wawoniha goyi, watolotxa. Eji okoselé aninonihena munuwelo wa owodha na wa thagaraga yaye, wi iyo onisakulileye mwa Ayuda na mmalogoni mena, niwodhe ojavo nthithimiho naye.”—Roma 9:14-24.
9. (a) “Abale afwanyeliye wonihiwa goyi” bani? (b) Yehova onkaanela eni nivilelo nddimuwa na anamapambiha aye, nanda omagomelowa onda dhavi okala mwa oderetu wa abale animukwela iyene?
9 Ovenya osadduwela wa mu Edeni, otene abale ampambihile Yehova vina apambihile malamulo aye anokalaga “abale afwanyeliye wonihiwa goyi.” Ovenya omaromelo wa masaka otene, Yehova onilaga ovilela. Athu abure anobeddaga esile dhikosile Yehova, anowafarafaraga adhari aye, mpaka ompa Mwana waye. Na olagiha nivilelo nddimuwa, Yehova onothiyaga mudhidhi wowakwana wila dhothanddiwa dhotene dhoone mowakwanela mfineza wa omusadduwela Mulugu vina wa athu ovilamulelaga anya s’ohilamuleliwaga na iyene. Mudhidhi wakakene, okwa wa Yezu ohivaha dila ya woboliwa wa nlogo na athu aniwelela vina “otolotxa mabasa a satana.”—1 Joau 3:8; Ahebreu 2:14, 15.
10. Yehova onathiyelaga eni athu abure mu vyaka esi 1.900?
10 Mwari mwa vyaka 1.900 oromana ovenya mu okwani wa Yezu, Yehova onowathiyaga “abale afwanyeliye wonihiwa goyi” ena, bagemetxa otolotxiwa wawa okale musogorho. Sabwa yani? Sabwa modha jawila iyene onowagumaniha abale anfuna okala na Yezu Kristu mu Omweneni waye wa odhulu. Muthengo wa aba bwa 144.000, nanda ba abene ali “thagaraga yaye” alogiwe na murumiwi Paulo. Voroma, athu mwari mwa Ayuda aahiwobeliwa wila akose epaddi ya nikuru nthi na odhulu. Musogorhomwa, Mulugu wahawobela athu a mu dhilabo dha Amalabo. Yehova kammageleli muthu mwa abene wila amulabege. Mbwenye abale aakuleleli masasanyedho aye na ntamaalelo, iyene wahavaha gari dhoñganimela dha okala alamuleli na Mwana waye mu Omweneni wa odhulu. Osasanyedhiwa wa gatha ejile ya odhulu ehali vañgono na opulihiwa.—Luka 22:29; Ovuhulela 14:1-4.
11. (a) Nikuru gani nimpuramo ovilela wa Yehova nsaka na ovanene? (b) Abale akwile anfuna opuramo dhavi?
11 Kito athu ankala velaboni ya vati? Ovilela wa Yehova ohiwodhiha vina ogumanihiwa wa “muthithi munddimuwa” wa vilabo dhetedhene. Nsaka na ovanene muthengoya onokwaranya matxikwi na matxikwi. Yehova ohiroromeliha wila gatha eji ya velaboni ya vati enela oviluwa omagomo wa elabo eji, vina ahikaana njeedhelo na egumi ya mukalakala mparaizu velaboni ya vati. (Ovuhulela 7:9, 10; Masalmo 37:29; Joau 10:16) Mmudhidhinimwa munfuna Mulugu, mithithi dha abale akwile dhinela ovenyihiwa bavahiwa gari ya okala alamuleliwi a velaboni ya vati a Omwene wa odhulu. Va Merelo a Arumiwi 24:15, Nzu na Mulugu ninothaga ologa dhahi: “Athu apama na abure anere ovenya mukwani.”—Joau 5:28, 29.
12. (a) Ninsunza eni mwaha wa Yehova othiyaga obure okalagawovi? (b) Weyo oniwamo dhavi sabwa ya mukalelo weeddihile Yehova dhilobo esi?
12 Mwa dhotene esi munokalaga ovirigana? Nne, sabwa ya okoodda watolotxa athu abure, obe “abale afwanyeliye wonihiwa goyi,” Mulugu onowakaanela thagaraga athu ena, mowiwanana na efunelo yaye. Eji enolagiha yawila iyene ddwa thagaraga vina ddwa okwela vaddiddi. Vina sabwa ya okaana gari ya woona weedda wa efunelo yaye, ninosunza vaddiddi mwaha wa Yehova. Ninotikina makalelo oothiyana thiyana a omuthu waye abene anooneya—wakwana waye, thagaraga yaye, ovilela waye, vina zelu yotikineya yaye. Mukalelo wa zelu wa Yehova weeddiha mwaha wa olamulela onddimuwa wa elabo yotene—ofanyeela waye olamulela—onela okala onamoona wa mukalakala wa ebaribari yawila mukalelo waye wa olamulela bukalile vaddiddi. Iyo vamodha na murumiwi Paulo, ninologa dhahi: “Nyuwo Mulugu, munuwelo gani wa ofuma, ononelamo na thontho yenyu! Dhitadilenyu kadhinfiyedheya, dila dhenyu dhovulumutxana kadhinnoneleyamo!”—Roma 11:33.
Gari Ya Olagiha Oviperheka Wehu
13. Nigatabuwaga nina gari gani, nanda txini enfuna onikamiha weedda na zelu?
13 Adhari enjene a Yehova anotabuwa na esile dhinapadduwela. Awene anotabuwavi sabwani Mulugu kanathi watolotxa athu abure bakalihawo nlogo na athu nomala ovenyihedhiwa, nthene nithagiwe ologiwa. Eji enofanyeela oninyonya? Obe ninofanyeela woona makathamiho aba ninga gari ya okamihedha wooniha wila Ddiabo muthambi? Iyo podi olibihedheya okosaga ejene, nigobuwelaga nikokomezo nthi: “Mwanaga, kalá wowarala, oddipangarazena; dhahene ddinowodha omwakula onddiyeviha.” (Gano dh’olelana 27:11) Satana, oddwene onimuyeviha Yehova, ohimageedha wila athu agayeleela mazanga awa obe agakaana segedho, awene anela ompwatheliha Mulugu muladduya, mpaka omuulumela. (Job 1:9-11; 2:4, 5) Nigamuroromela iyene oku banigatabuwa, ninohagalaliha murima wa Yehova, ninolagiha wila eji kimpadduwa na iyo.
14. Nigamukuluvela Yehova oku banigatabuwa na dhoweha, nimpuramo eni?
14 Nigamukuluvela Yehova oku banigatabuwa na dhoweha, ninela owodha okaana mikalelo dha thima. Motagiha, ninga misapo dha dhilobo dhatabuwilena Yezu, iyene “osunzamo omurumela Babe” na mukalelo wakooddiliye oziwa wale. Iyo vina podi osunza mwa dhoweha dhingumanihuna, badhiganikamiha ovilela, okaana ntidi, vina ononelamo vaddiddi dila dholigana dha Yehova.—Ahebreu 5:8, 9; 12:11; Tiago 1:2-4.
15. Nigavaddana makathamiho na ovilela, athu ena anfuna opuramo dhavi?
15 Athu ena anela woona esile dhinkosihu. Sabwa ya esile dhinnipadduwela sabwa ya iyo okwela oligana, na ovira wa mudhidhi txino ena mwa abene anodha waziwa bani Akristu a ebaribari nsaka na ovanene. Nanda modheela ogumana na iyo mu webedhani, awene podi ofanyeela wakela mareeliho a egumi ya mukalakala. (Mateu 25:34-36, 40, 46) Yehova na Mwana waye anfuna wila athu akaane mareeliho aba.
16. Mukalelo onoonihu makathamiho oniwanana dhavi na okala mumodhani?
16 Jotamaaleleya vaddiddi nigoonaga masiki goi ninga gari ya olagiha oviperheka wehu vamentoni va Yehova vina okamihedha osoriha efunelo yaye! Iyo nigakosaga ejene ninovaha onamoona wawila txibarene ninofuna wiwanana na Mulugu vina Kristu. Yezu wahilobela wa Yehova mwa oderetu wa Akristu otene a ebaribari, bagaloga dhahi: “Kaddinalobelela abavi, ddinowalobelela vina etene anaddiroromele miyo, ewaga nzu nawa ninlaleyani. Erani wi etene akale mmodha: n’ekalelo eli nyuwo Baba na miyo, miyo na nyuwo, awene vina avolowelane na iyo.”—Joau 17:20, 21.
17. Nigamuroromela Yehova ninkaana nikuluvelo gani?
17 Nigamuroromela Yehova txibarene, iyene onela onithuva na murima wotene. Nzu naye ninloga dhahi: “Mukale ovikomene, ohigulugudheya. Muthangarhamele mabasa a Nabuya, muziwaga wi omulabela wenyu Nabuya, kamunthiddana vati.” (1 Korinto 15:58) Nthi vina ninologa dhahi: “Mulugu ddoligana, kandduwala mabasinyu, okwela onimukwelenyuna.” (Ahebreu 6:10) Tiago 5:11 onologa dhahi: “Iyo ninowawira aliba gari abale aziwile ovilela ninga awene. Nyuwo muhiwa ologiwaga ovilela onddimuwa wa Jobi, muhiwa edhile omuthuva Nabuya omamalelowá. Ndde, Nabuya ddodhala thagaraga na nthebwa.” Job wathuviwe eni? “Ddabuno Nabuya omvaha Job gari opitha yana iyene wale.” (Job 42:10-16) Indde, Yehova “onoathuva abale animutamela.” (Ahebreu 11:6) Ninojeedhela othuviwa nlivo nddimuwa vaddiddi—egumi ya mukalakala mparaizu velaboni ya vati!
18. Omagomelo, txini enfuna opadduwela dhubuwelo dhotene dhinihuna dha wiwa opa?
18 Olamulela wa Omwene wa Mulugu onela ogomiha dhabure dhotene dhikoseliwe nlogo na athu mwari mwa matxikwi menjene a vyaka dhivirile. Ohagalala onfuna okalawo mudhidhi obo onela opitha goi goivi ejene engumanihuna ovanene. Kaninanyonyiwege na mubuwelo wotene wa goi yanigihuna wale. Mubuwelo wolibiha vina mabasa anakosiwege mu egumini ya siku na siku ya athu mwilaboni eswa vañgono vañgono anela ogomiha mubuwelo wa wiwa opa. Yehova onloga dhahi: “Miyo ddinopaddutxa erimu [nlamulelo na Omwene wa odhulu ninlamulela nlogo na athu], elabo eswa [nlogo na athu ooligana]; dhawale kadhinobuweliwe vina, dhivirile dhinodduwaliwa mudduwalelo. Thambazaní, thabelaní dhilobo dhinfuna miyo opaddutxa.” Indde, mwilaboni eswa ya Yehova, aligani anele owodha ologa dhahi: “Ovano elabo yotene efwasa, enojavo murenddele, enowiba n’othaba.”—Izaiya 14:7; 65:17, 18.
Osakulela
• Oku Yehova bagathiya obure okalagawovi, onlagihedha dhavi nzina naye nriho nddimuwa?
• Sabwa ya Mulugu wathiya “abale afwanyeliye wonihiwa goyi” iyo nikamihiwe dhavi okaana thagaraga yaye?
• Ninfanyeela okosela guru woona eni nigatabuwaga?
[Mafoto vanikukuni 67]
Yehova “omvaha Job gari opitha yana iyene wale”