Kapitulu Makumi Meeli
Kobuwelaga Siku Na Yehova
1. Weyo wewilemo dhavi mwaromeliwe osunza wila ofuruleya mwa masoso a elabo eji yowuluvala oli vakukuvi?
MODHA mwa dhilobo dhoroma dhisunziliwe Mbibiliani, yali yawila efunelo ya Yehova jawila elabo yotene ya vati ekale paraizu. Mwilaboni ejo eswa, kamunakale koddo, otimbwini, oyelega, oredda, goi vina okwa. Masiki abale akwile anela ovenyihedhiwa okalawo wili. Nthi njeedhelo noñganimela vaddiddi! Waddamela wa njeedhelo nthi onooneyetxa na mutonyo wawila othwanyuwa wohooneya wa Kristu ninga Mwene onlamulela, oromile yaka ya 1914, nanda yawila oromana venevale ninkalagawo mmasikuni oomariha a elabo eji yabure. Omagomo wa masiku aba oomariha, Yehova onela otolotxa elabo eji ya ovanene, badhana elabo eswa ejene eroromelihiliye!
2. ‘Siku na Yehova’ txini?
2 Bibilia ontxemerha nsaka ntho ninda na otolotxiwa ninga “Siku na Nabuya [‘Siku na Yehova,’ NM].” (2 Pedro 3:10) Nthi thi “siku nintatamuwa owali wa Nabuya” mosadduwela elabo yotene ya Satana. (Sofoniya 2:3) Siku ntho ninofiya omagomowa va ‘koddo ya siku nddimuwa na Mulugu, mwinya wa guru dhetene . . . , enromoliwa mw’ilogeloni ya Hebreu Har–Magedon [Harmagedón],’ venevo vanfuna otolotxiwa “amwene etene a mwilaboni.” (Ovuhulela 16:14, 16) Mukalelo wawo wa okalawo onolagiha wila weyo onorumeela yawila “siku [ntho] na Yehova” nili vakukuvi?—Sofoniya 1:14-18; Jeremiya 25:33.
3. (a) Siku na Yehova ninfuna odha mudhidhi gani? (b) Sabwa ya Yehova okoodda onipanga ‘siku ntho obe mudhidhiya’ ekaleli eni yaderetu?
3 Bibilia kannipanga sikuna ninfuna odha Yezu Kristu ninga Namapa wa Yehova wila atolotxe elabo eji ya Satana. Yezu walogile dhahi: “Siku-ntho, mudhidhiyà kawo-wene onnona; anju kannona, Mwana-Muthu vina kedhi; onziwa ddi Baba bahi.” (Marko 13:32) Abale ahinimukwela wene Yehova, txino ahikaana emanya ya ojombiha siku ntho mmubuweloni mwawa, bagakalela otamelavi mazanga. Mbwenye abale animukwela wene Yehova anomulaba na murima wotene, peno mudhidhi gani onfuna ogoma elabo eji yabure.—Masalmo 37:4; 1 Joau 5:3.
4. Yezu ologile eni ejene enlaba ninga nlago?
4 Na mazu a walaga abale animukwela Yehova, Yezu onloga dhahi: “Mutxenjerhe, muyedhele, vowi kamunziwa mudhidhiyà.” (Marko 13:33-37) Iyene ononikokomeza wila nihithiye oja na omwa obe “ozuzumeletxa dha vati” othithetxa mudhidhi wehu mpaka okooddaga woona wila nsaka nthi kayo na ovegana.—Luka 21:34-36; Mateu 24:37-42.
5. Ninga mulogeli Pedru, siku na Yehova ninadhena eni?
5 Mwakakene Pedru ononilaga wila nubuwelegevi ‘siku ninadhe Nabuya, naguvihe odhawá. Siku-ntho elabo ya wirimu enere otolotxiwa na motho, vineneri dhiliwo dhinere onyuguluwa na óviha.’ Malamulelo otene a athu, “wirimu,” dhinere otolotxiwa, ninga munapadduwele nikuru na athu otene abure, “elabo,” vamodha na “dhilimo”—dhubuwelo vamodha na mabasa a elabo eji yabure, ninga mweddeloya wohifuna olamuleliwa na Mulugu vamodha na mweddeloya wonyakuwa vina egumiya yofunetxa oreela. Esi dhinela otxinjiwa na “erimu eswa [Omwene wa Mulugu wa Odhulu] vamodha na elabo eswa [nikuru na athu na velaboni ya vati]” mwenemo “muneddege dhetedhene ninga munfuneliye.” (2 Pedro 3:10-13) Mapadduwo aba anathekenye elabo anarome morurumutxa vina anadhe siku na mudhidhi ohinjeedheliwani.—Mateu 24:44.
Kakalelagavi Txenjewa Ezinddiyelo
6. (a) Wakula wa Yezu nivuzo na anamasunzaye nathiddihedheyi mabasa mpaka vavi, aaddagana magomo a elabo ya Ayuda? (b) Dhipaddi gani dha yowakula ya Yezu esene dhintonya dhowireya vina dhimanya dhinkalagawo ovenya yaka ya 1914 mpaka musogorho?
6 Sabwa ya masaka aba ankalihuwo, ninofanyeela oziwa deretu dhitagano dhotene dha ezinddiyelo eji ena dhipaddi dhinjidhene, esene dhintonya masiku oomariha—“ogoma wa elabo.” Nubuwelege wila Yezu mwakuleliye nivuzo na anamasunzaye, nthene nilebiwe va Mateu 24:3, dhilobo dhiina dhilogiliye va maversikulu 4 mpaka 22 dhasoriheyile vañgonovi mwilaboni ya Ayuda mwari mwa yaka ya 33 na 70 E.C. Mbwenye nivuhulona ninsoriheyetxa ovenya yaka ya 1914, nsaka na ‘okalavo [wa Kristu] vina ogoma wa elabo.’ Mateu 24:23-28 onologa ejile empadduwaga ovenya yaka ya 70 E.C. mpaka nsaka na okalavo wa Kristu. Mapadduwo alebiwe va Mateu 24:29–25:46 ampadduwa nsaka na omagomo.
7. (a) Ninfanyeelela eni ofugulela mento esile dhimpadduwa ovanene mukalelo onsorihani ezinddiyelo? (b) Kaakula mavuzo ali omagomo wa ddima eji, bugalagiha mukalelo onsoriheyaga ezinddiyelo oromana yaka ya 1914.
7 Ninofanyeela ofugulela mento mapadduwo vina mikalelo dhinsoriha ezinddiyelo. Wiwananiha dhilobo esi na mavuhulo a Bibilia onela onikamiha wubuwelaga vaddiddi siku na Yehova. Eji vina enela oniwodhiha okokomezaga nigaalagaga athu ena mwaha wa waddamela wa siku ntho. (Izaiya 61:1, 2) Banigobuwela esene, ndoweni nisekeserhe mavuzo ali mutxiddo abene anthukulela vadhulu dhipaddi dha ezinddiyeloya, ninga mulebeliwani va Mateu 24:7 vina Luka 21:10, 11.
Na mukalelo gani munddimuwa wasoriheyile nivuhulo ninloga ‘nlogo ninere owana koddo na nlogo nina, elabo na elabo yina’ ovenya yaka ya 1914? Masiki na koddo dhinrabiwa, txini empadduwaga ovenya nsaka nthile?
Ezini gani yapile athu gwe yaka ya 1918 opitha Koddo Yoroma Ya Elabo Yotene? Masiki na odhowa vasogorho wa oziwa dhilobo dha osipitale, maredda gani anapavi athu matxikwi na matxikwi?
Dala ethiddile dhavi motho velaboni ya vati masiki na odhowa vasogorho wa siensia mu vyaka zana dhomariha?
Txini enurumeeliha wila 2 Timóteo 3:1-5, 13 kanloga mukalelo wa egumi enkalagawo, mbwenye mukalelo othabwile mikalelo venevo vandowihu omagomo wa masiku aba oomariha?
Omwalanihiwa Wa Athu
8. (a) Elobo gani yina elebiwe va Mateu 13:24-30, 36-43, ejene yewananihile Yezu na omagomo wa elabo eji? (b) Musibo wa Yezu ontapulela eni?
8 Ohikala mapadduwo mena a makamaka vaddiddi, abene ewananihile Yezu na omagomo wa elabo. Nimodha mwa mapadduwo aba, ku omwalanihiwa wa ‘athu anrumela dh’omwene wodhulu’ na ‘athu anrumela dha satana.’ Yezu walogile ejene mmusiboni mwaye mwaha wa mundda wa tirigu obwene wapopilemo muwogo ntaje vadhuluva. Mmusiboni mwa Yezu “tirigu” ontapulela Akristu a ebaribari abene athikitheliwe. “Ntaje” ba abale anloga wila Akristu mbwenye na merelo awa, anolagiha wila ‘athu anrumela dha satana’ sabwani awene ahiwadelela elabo eji enlamuleliwa na Ddiabo. Aba anomwalanihiwa na ‘athu anrumela dh’omwene [wa Mulugu] wodhulu’ nanda anolebiwa ezinddiyelo wila atolotxiwe. (Mateu 13:24-30, 36-43) Eji enopadduwa ovanene?
9. (a) Muvireli Koddo Yoroma Ya Elabo Yotene, omwalanihiwa gani onddimuwa okosiwe wa athu otene abale aloga wila Akristu? (b) Akristu athikitheliwe atonyihedhi dhavi wila awene aali adhari a txibarene a Omwene?
9 Muvireli Koddo Yoroma Ya Elabo Yotene, otene abale aloga wila Akristu, aahimwalanihiwa bakala gatha biili: (1) Asogorheli a marelijiau a Akristu Ahili a Ebaribari vamodha na anamafara awa, abalene aakamihile vaddiddi nikuru na Liga das Nações (ovanene nintxemerhiwa Nações Unidas) mudhidhi wakakene bagomelela vaddiddi dhilobo dha elabo yawa, na (2) Akristu a ebaribari abalene aaliwo nsaka na koddo banivirile, abale aakamihedhi vaddiddivene Omwene wa Mesiya wa Mulugu, othiya okamihedha malogo a elabo eji. (Joau 17:16) Akristu abale aahilagiha wila awene adhari a txibarene a Omwene wa Mulugu modheela osogorhanavi mabasa a olaleya ‘muthaka wapama wa Omwene’ velaboni votene ya vati. (Mateu 24:14) Empadduwaga txini?
10. Yodhavo gani modha yoroma ya mabasa a olaleya Omwene?
10 Voroma, wahikala mabasa a wagumaniha oothikitheliwa na muya wa Mulugu, oohalavo, abene anjeedhela okala na Kristu ninga epaddi ya Omwene wa odhulu. Masiki abaya mwamwadheyelani mu dhilabo dhinjidhene, awene aahigumanihiwa mu nikuruni nowiwanana. Opulihiwa wa mabasa a wapida ezinddiyelo athikitheliwi aba oli vakukuvi.—Ovuhulela 7:3, 4.
11. Mabasa gani a ogumanihiwa aliwovi, nanda ejene eniwanana na nivuhulo gani?
11 Vasogorhova, mutxiddo mwa musogorhelo wa Kristu, wahiromiwa mabasa a wagumaniha a “muthithi munddimuwa . . . a vilabo dhetene, mahimo etene, malogo etene, a vilogelo dhetene.” Aba bankosa epaddi ya ‘mabila mena’ abene anfuna ovuneya “mmasosoni manddimuwa” bavolowa mwilaboni eswa ya Mulugu. (Ovuhulela 7:9, 14; Joau 10:16) Mabasa aba a olaleya Omwene wa Mulugu omagomo ohinathi ofiya anoweeddavi mpaka nsaka na ovanene apa. Na ororomeleya, muthithi munddimuwa wa mabila mena, ovanene oli matxikwi na matxikwi, onowakamiha athikitheliwi oohalavo wila alaleyege muselu wofuneya wa Omwene. Muselu obu onowiweya mu dhilabo dhotene?
Txini Enfuna Opadduwa Musogorho?
12. Muthengo gani ohalilewo wa mabasa a olaleya siku na Yehova nihinathi ofiya?
12 Mitonyo esi dhotene dhiromoliwe vadhulu, dhintapulela wila nihaddamela omagomo wa masiku oomariha, vina yawila siku na Yehova nili vakukuvi kakamwe. Kito ohikala mavuhulo anfuna osoriheya siku ntho nowopiha nihinathi oroma? Indde ahikalawo. Sabwani kanathi ogoma mabasa a omwalanihiwa wa athu sabwa ya Omwene. Mu dhipaddi dhiina mwenemwa mwali ofarafariwa wagoneeli vyaka dhinjidhene, muthengo wa anamasunza onowinjivamovi. Masiki mpule muli athu ankoodda bili yaderetu, onamoona onvahihu onowooniha thagaraga ya Yehova. Noona, mabasa awarale! Yezu ononiroromeliha wila mabasaya agapulihiwa, omagomo onela ofiya.
13. Ninga mulebeliwani va 1 Tesalónika 5:2, 3, yowireya gani ya makamaka enfuna opadduwa, nanda ejene enfuna etapulele eni wa iyo?
13 Nivuhulo niina na makamaka vaddiddi na Bibilia nahithaga ologa dhahi: “Vanaloge athu: ‘Dhetedhene dhifwasa, kulí yawopiha,’ panarurumutxiwani na segedho dhinatolotxa. Orurumutxeyawá onakale ninga wa muyana, ofiyedhiwe nsaka n’obala. Kawo onavuluwevo.” (1 Tesalónika 5:2, 3) Mukalelo onfuna olaleyiwa wila “dhetedhene dhifwasa” onela wooneya. Mbwenye eji kinatapulele wila asogorheli a elabo anela ogomiha wene makathamiho a nlogo na athu. Abale anubuwela vaddiddi siku na Yehova kanapupurutxiwe na muselu obu. Awene ahiziwa wila mohigoneela, otolotxiwa worurumutxa onela otomowa.
14. Mapadduwo gani anfuna okoseya vari va masoso manddimuwa, nanda anfuna apadduwege dhavi?
14 Omaromo wa masoso manddimuwa, alamuleli anela omusadduwela Babilonia Munddimuwa, omwene wa elabo yotene wa relijiau ya othambi, bamutolotxa. (Mateu 24:21; Ovuhulela 17:15, 16) Vasogorhova, dhilabo dhinela wasadduwela abale anvuneela olamulela onddimuwa wa Yehova. Veneva panatatamulani owali wa Yehova onfuniye okaanela malamulelo a politika vamodha na akamihedhiya, mpaka otene otolotxiwa. Ejene enapadduwe va Harmagedón, magomo a masoso manddimuwa. Venevo, Satana na adomonyo aye anela ofugeliwa mmuti, s’ohiwodha viina onyengetha nlogo na athu. Ejene jinapulihe siku na Yehova, venevo vanfuna olemeziwa nzina naye.—Ezekiyel 38:18, 22, 23; Ovuhulela 19:11–20:3.
15. Ekaleli eni otuwa zelu wubuwelaga wila siku na Yehova nili wolapela vaddiddi?
15 Omagomo wa elabo eji onela odha wene mmudhidhinimwa, mowiwanana na ofuna wa Mulugu. Masiki ogoneele, onopadduwa. (Habakuk 2:3) Kobuwela, otolotxiwa wa Jeruzalemi yaka ya 70 E.C. kuwayeluwile, mudhidhi wakoodda Ayuda ojeedhela, mudhidhi wobuwelani wila yowopiya ehivira. Ki Babilonia wa nsaka na wale? Wali wa guru vaddiddi, wovikuluvela, vina wahilibihiwa na marhinga manddimuwa. Mbwenye wagwile omathiyu mmodha. Noona vina, otolotxiwa wa elabo eji yabure onakale worurumutxa. Mudhidhi onfuna opadduwa ejene, nifanyiwe banili owiwanana mu webedhani webaribari, sabwa ya wubuwelaga siku na Yehova.
Osakulela
• Ekaleli eni yofuneya wubuwelaga siku na Yehova? Niwodhe dhavi okosaga ejene?
• Omwalanihiwa wa athu okwene onkoseya ovanene onfanyeela onipakela dhavi?
• Txini enapadduwe, siku na Yehova nihinathi oroma? Noona, ninfanyeela okosaga eni?
[Mafoto vanikukuni 180, 181]
Mohigoneela masiku oomariha anela ogoma modheela otolotxiwa wa elabo ya Satana