Kapitulu Makui Meeli Na Modha
Efunelo Ya Yehova Enosoriheya Na Nthithimiho
1, 2. (a) Efunelo ya Yehova na dhothanddiwa dhaye dha zelu jivi? (b) Bani aali mwari mwa murala wowiwanana wa anamebedha a Mulugu?
DHOTHANDDIWA dhotene dha zelu dhihiwananihiwa mwa omwebedha Mulugu mmodha webaribari nanda dhotene dhinojavo ofuru wa nthithimiho ninga ana a Mulugu—eji ji efunelo yokwela ya Yehova. Ji ejene vina enfuna vaddiddi anamakwela dholigana.
2 Yehova waromile osoriha efunelo eji enddimuwa mwaromeliye mabasaye a othandda. Yothandda yaye yoroma wali Mwana, oromana ovenya waye mu okwani ddi “warya ononiha nthithimiho Mulugu, ddi nladdaniho nawakwana ninniziwiha eli Muluguyá.” (Ahebreu 1:1-3) Mwana oddu, wali wa vawoka sabwa ya othanddiwa na mwinyene Mulugu. Vasogorhova, modheela Mwana oddu dhotene dhihithanddiwa: voroma angelo odhulu, vasogorhova athu velaboni ya vati. (Job 38:7; Luka 3:38) Otene aba bali murala wa elabo yotene. Mwa abene otene, Yehova wali Mulugu, Mulamuleli Munddimuwa wa Elabo Yotene, vina Babi wawa wokwela.
3. (a) Iyo notene nibaaliwe na eni ovenyedha mwa ababi ehu ooroma? (b) Musasanyedho gani wokwela wakoseli Yehova ana a Adamu?
3 Ababi ehu ooroma mwathongeliwani okwa ninga athegi na pudha, awene aahithamagihiwa mu Edeni vina banyanyaliwa na Mulugu. Awene aahithiya okosa epaddi ya murala wa elabo yotene. (Wita 3:22-24; Olibiha 32:4, 5) Iyo notene nili ana awa, noona iyo nihibaaliwana dhimanya dha ofunaga othega. Mbwenye Yehova wahiziwa wila ana ena a Adamu na Eva agahikwela dhilobo dholigana. Noona, na okwela Iyene wahisasanyedha wila abene akaane “ofuru, nthithimiho ninakele ana Mulugu.”—Roma 8:20, 21.
Izrayel Wahiyeleela Omarho Wakaaniliye Na Mulugu
4. Gari gani yanvahile Yehova Izrayel wa wale?
4 Muvireli vyaka 2.500 Adamu bathanddiwe Yehova wahavaha athu ena gari ya wandana wa vawoka na Iyene. Iyene wahimusakula Izrayel wa wale wila akale nlogo naye nanda wahinvaha Nlamulo naye. (Wita 12:1, 2) Iyene wahasasanyedha bakala nlogo, nanda wahalabihedha mowiwanana na efunelo yaye. (Olibiha 14:1, 2; Izaiya 43:1) Mwa dhaene, awene aalivi mu odharini wa yothega vina okwa, noona awene kajavo ofuru wa nthithimiho obule waana Adamu na Eva omaromo.
5. Aizrayel ayeleeli dhavi wandana wawa wa vawoka na Mulugu?
5 Masiki dhaene, Aizrayel aahikaana omarho na Mulugu. Awene vina anfanyeela omuriha Yehova ninga Babi wawa, vina olabaga mowiwanana na efunelo yaye. Yezu wahooniha deretu ofuneya wa iyene osoriha mabasa afuniwiyena. (Mateu 5:43-48) Mbwenye, nlogo na Izrayel nahijombela okosa ejene. Oku Ayuda abale bagaloga “nikana babihu [mmodha], Mulugu,” Yezu walogile wila merelo awa vina makalelo awa anvanya esile dhalogani. (Joau 8:41, 44, 47) Yaka ya 33 E.C., Mulugu wahigomiha Nlamulo, nanda wandana okule wa vawoka wa Izrayel na iyene wahigoma. Mbwenye ejilene yatapulela wila athu txipo kagandanile viina na Mulugu?
Ogumanihiwa Wa ‘Dhilobo Dha Odhulu’
6. ‘Osongorhihedha’ oromolile Paulo va Éfeso 1:9, 10 kwa eni?
6 Murumiwi Paulo wahilagiha wila athu ena mwari mwa nlogo na athu agahikaana wandana wa vawoka na Mulugu. Motagiha, mowiwanana na musasanyedho wa Yehova, obwene onawodhiha abale ana nroromelo okala athu a murala Waye, Paulo ohileba dhahi: “[Mulugu] oniziwiha dhitadileye n’ofuna waye moviteyani, eli ddima yapimeleliye mutanene opuliha na mada a Kristu. Dhahene Mulugu onosongorhihedha omapulelo dha mwilaboni dhetene: nsaka nigafiya, onogumaniha dhodhulu na dhavati, onothiya mmadani mwa Nameddiha mmodha bahi, oli Kristu.” (Éfeso 1:9, 10) ‘Osongorhihedha’ oku oli mwa Yezu Kristu. Modheela iyene, athu anowandana na Mulugu. Muthengo muñgonovi wa awene ohikaana njeedhelo na okala odhulu. Muthengo mwinjiya onela okalawo na mukalakala velaboni ya vati.
7. ‘Dhilobo dha odhulu’ bani?
7 Voroma, ovenya va Pentekoste yaka ya 33 E.C., dhatanaaliwetxa si ‘dhilobo dha odhulu,’ kuloga dhahi, abale agakelile Omwene wa odhulu vamodha na Kristu. Sabwa ya awene ororomela thima ya mukutho wa Yezu, Mulugu waharomola wila awene aligani. (Roma 5:1, 2) Na mudhidhi, Ayuda na Amalabo aahikiwamo, nanda ‘dhilobo dha odhulu’ dhigahakwana muthengo wa 144.000. (Galásia 3:26-29; Ovuhulela 14:1) Añgonovi bahi balivi velaboni ya vati.
Ogumanihiwa Wa ‘Dhilobo Dha Vati’
8. ‘Dhilobo dha vati’ bani, nanda awene anandana dhavi na Yehova?
8 Osongorhihedha wakakene onogumaniha vina ‘dhilobo dha vati.’ Nsaka na ovanene athu matxikwi na matxikwi anogumanihiwa na njeedhelo na okalawo na mukalakala velaboni ya vati. Mowiwanana na anamakela Omwene oohalavo, awene anothithimiha nzina na Yehova vina anovuwiha webedha waye. (Izaiya 2:2, 3; Sofoniya 3:9) Awene vina anonfiyedha Yehova ninga “Babi” sabwani awene anoziwa wila iyene ddi nipara na egumi. Nanda awene anohagalala sabwa ya wandana na iyene modheela ororomela nikami nikuthulile Yezu. (Ovuhulela 7:9, 14) Mbwenye vowila awene alivi ohakwana, nsaka na musogorho panfunani wooniwa deretu ninga ana a Mulugu.
9. Roma 8:21 onroromelihedha eni nlogo na athu?
9 Aba ana njeedhelo na okalawo velaboni ya vati, ovanene anojeedhela vaddiddi nsaka ninfuna nlogo na athu “ovuniwa mmadani modhari ontolotxa.” (Roma 8:21) Ofuruliwa oko onfuna orome Kristu vamodha na anyakoddo aye a odhulu agagomiha masoso manddimuwa modheela ogoma na Harmagedón. Oku onakale otolotxiwa wa elabo yotene yabure ya Satana, ejene enfuna ofarihedhiwa na mareeliho a Olamulela wa Kristu wa Vyaka Txikwi, na guru ya Omwene.—Ovuhulela 19:17-21; 20:6.
10. Adhari a Yehova anfuna ebe jibo gani ya omutamaalana?
10 Enela okala elobo yohagalaliha vaddiddi, mudhidhi onfuna adhari a Yehova a velaboni ya vati mowiwanana ologa mazu akakene anloga adhari aye a odhulu, abene ankuwa na othaba: “Nabuya Mulugu wowodha-wodha, dhawira dhenyu dhili dhinddimuwa, dhowumiha milomo. Dila dhenyu somyala, sebaribari, nyuwo mwene wa malogo! Bani onakodde ourihani nyuwo Nabuya? Bani onakodde othithimiha nzina nenyu? Nyuwovi muli wokoddela-wene. Athu a malogo etene aner’odha owebedhani, vowi omyala wa merelo enyu omala oziweya.” (Ovuhulela 15:3, 4) Indde, adhari otene a Yehova anela wiwanana mwa omwebedha Mulugu mmodha webaribari. Masiki abale akwile anela ovenyihiwa bavahiwa gari ya ogumaniha lizu nawa wila akuwe na omutamaala Yehova.—Merelo 24:15.
Ofuru Woñganimela Osogorho
11. Ofuru gani waderetu vaddiddi onfuna okaana abale anaviluwe va masosoni manddimuwa?
11 Masoso manddimuwa agavira, abene anfuna ogoma va Harmagedón, bakuputhile obure velaboni ya vati, Satana Ddiabo kanakale viina “mulugu wa vatapano.” Anamebedha a Yehova kanawane viina na nipakelo nabure na Satana. (2 Korinto 4:4; Ovuhulela 20:1, 2) Relijiau ehili ya ebaribari kinamutakalihe viina Yehova, bigamwalaniha nlogo na athu. Adhari a Mulugu webaribari kanakoseliwe viina dhovirigana vamodha na ojeliwa na malamulelo a omuthu. Athu anela okaana ofuru waderetu vaddiddi!
12. Athu otene anfuna afuruliwe dhavi mu yothega vamodha na esile dhintotani?
12 Vowila ddi “Mwana-Nibila wa Mulugu onthimiha yothega ya elabo,” Yezu onela olabihedha thima ya mukutho waye wila athimihe dhothega dha nlogo na athu. (Joau 1:29) Yezu bali velaboni ya vati wanlevelela dhothega dha athu, venevo wannavulumutxa athuya wila oonihe nlevelelona. (Mateu 9:1-7; 15:30, 31) Na mukalelo wakakene, Kristu Yezu, ninga Mwene wa odhulu wa Omwene wa Mulugu, onela wavulumutxa na ntikiniho aliba ohoona, aliba ohiloga, aliba ohiwa, aragali, abale ana eviravira, vamodha na abale ana eredda ereddavi. (Ovuhulela 21:3, 4) Athu otene aniwelela anela ofuruliwa okala ‘adhari a yothega’ mwawila dhubuwelo dhawa vina mereloya anelege wahagalaliha anya vina Mulugu. (Roma 7:21-23) Omagomo wa Vyaka Txikwi, anela okala owakwana, mu ‘nladdaniho’ na Mulugu mmodha webaribari.—Wita 1:26.
13. Omagomo wa Olamulela wa Vyaka Txikwi, Yezu onakose eni, nanda txini enfuna opadduwavo?
13 Kristu agasaddula nlogo na athu banikala nowakwana, vasogorhova iyene onela omwiyihedha Babi waye olamulela wavahiwiye wila akosena mabasa aba: ‘Kristu agamala otolotxa olamula wotene, onddimuwa wotene, owodha wotene; onoperheka omwene mmadani mwa Mulugu Baba. Venevo panapule dhetene. Txibarene enofuneya Kristu athonge mpaka vanànyigaliye amwiddanaye otene.’ (1 Korinto 15:24, 25) Olamulela wa Omwene wa Vyaka Txikwi onela okosa mowakwanela ejile yafuniwanina; noona kunakale viina ofuneya wa nlamulelo nthi nokamihedha wila nikale vari va Yehova na nlogo na athu. Vowila yothega na okwa onela ogomihiwa kakamwe, vina nlogo na athu banimalile woboliwa, ofuneya wa Yezu ninga Moboli onogoma. Bibilia ontapulela dhahi: “Iyene vina oli Mwana, onovithiya mmadani mwa Mulugu, omwirile mwinya wa dhetedhene. Dhahene Mulugu oner’okala mwinya wa etene na dhetene.”—1 Korinto 15:28.
14. Athu otene anasadduliwe bakala owakwana anfuna akoseliwe eni, sabwa yani?
14 Mwa ofarihedha esene, nlogo na athu banili nowakwana ninela ovahiwa gari ya osakula wila ofuna wawa kwa omulaba Mulugu mmodha webaribari na mukalakala. Dhaene, ahinathi wathukula kakamwe ninga ana aye, Yehova onela wathiya wehiwa athu aba asadduliwe bakala owakwana, na weha womariha. Satana na adomonyo aye anela oburutxiwa mmuti. Abale anamukwele txibarene Yehova, kanaputhuleye na mukalakala. Mbwenye muthu muthuvi odduwene onarumeele onyengethiwa omusadduwela Yehova onela otolotxiwa na mukalakala, vamodha na musadduweli woroma na adomonyo aye.—Ovuhulela 20:7-10.
15. Elobo gani enfuna okalawo wili vari va dhothanddiwa dhotene dha zelu dha Yehova?
15 Venevo athu otene asadduliwe bakala owakwana, abalene avuneeli olamulela onddimuwa wa Mulugu nsaka nthile na wehiwa womariha, Yehova onela wathukula bakala ana aye. Ovenya nsaka nthile mpaka osogorho, anelege ojavo mowakwanela ofuru wa nthithimiho wa ana Mulugu ninga epaddi ya murala wa elabo yotene wa Mulugu. Wili, dhothanddiwa dhotene dha zelu odhulu vina velaboni ya vati dhinela wiwananihiwa mwa omwebedha iyene ninga Mulugu mmodha webaribari. Efunelo ya Yehova enela osoriheya na nthithimiho! Weyo onofuna okosa epaddi ya murala obo wa elabo yotene, wosanzaya, vina wa mukalakala? Akala onofuna, ninowulibiha wila ovuruwane ejile enloga Bibilia va 1 Joau 2:17: “Elabo na dhowunlela dhaye dhetene, dhinovira; onira enimfunana Mulugu onokalawovi.”
Osakulela
• Othega wa mu Edeni ohinathi, wandana gani waana anamebedha otene a Yehova na iyene?
• Mabasa gani ana adhari a Mulugu?
• Bani anfuna okala ana a Mulugu, nanda ejene eniwanana dhavi na efunelo ya Yehova mwaha wa webedha wa wiwanana?
[Foto vanikukuni 190]
Athu aniwelela anela okalawo mparaizu wa elabo yotene