Kapitulu Kumi Na Tharu
Muthithi Munddimuwa Vamentoni Va Mpaddo Wa Yehova
1. (a) Adhari a Mulugu ooroma a Okristu, obe a 144.000 ahinathi othambirha nlivo nawa, txini enfanyeela wapadduwela? (b) Txini enfuna opadduwela “muthithi munddimuwa” obwene onkalawo mu nsaka nthino?
ADHARI oororomeleya a Mulugu, oromana Abeli mpaka Joau Baptista annika okosa efunelo ya Mulugu vasogorho va egumi yawa. Masiki dhaene, otene ahikwa, anjeedhela ovenya wawa mu okwani wila akalegewo velaboni ya vati mwilaboni eswa ya Mulugu. A 144.000, abene analamulelege na Kristu mu Omweneni wa odhulu wa Mulugu, anofanyeela vina okwa ahinathi othambirha nlivo nawa. Mwa dhaene, Ovuhulela 7:9 onlagiha wila mmasikuni aba oomariha, ogahikala “muthithi munddimuwa” wa athu ambudduwa mu dhilabo dhotene abene agakooddile okwa, mbwenye agakaanile njeedhelo na okalawo na mukalakala velaboni ya vati. Weyo oli mwari mwa abene?
Ndoweni Nizinddiyele Muthithi Munddimuwa
2. Txini ekamihile ononeliwamo deretu ozinddiyeliwa wa muthithi munddimuwa wa Ovuhulela 7:9?
2 Yaka ya 1923, adhari a Yehova aahizindiyela yawila “mabila” a musibo wa Yezu onfanyeya va Mateu 25:31-46 vina “[mabila] mena” abene aaddiliyena ninga mulebeliwani va Joau 10:16 ba athu abene agakaanile gari ya okalawo na mukalakala velaboni ya vati. Yaka ya 1931 athu abale alebiwe va Ezekiyel 9:1-11 ninga alebiwe ezinddiyelo va koveni vawa ahooneya vina okala abale ana njeedhelo na okalawo velaboni ya vati. Venevo yaka ya 1935 yahiziweya wila muthithi munddimuwa onokosa epaddi ya nikuru na mabila menagu abene alogile Yezu. Ovanene, muthengo wa muthithi obu munddimuwa wa gari oli matxikwi na matxikwi.
3. Mazu aba ‘wimela osogorho wa mpaddo’ ankooddela eni waddana nikuru nili odhulu?
3 Va Ovuhulela 7:9, muthithi munddimuwa kunooneya buli odhulu. ‘Wimela osogorho wa mpaddo’ wa Mulugu kuli wofuneya awene okala odhulu. Entapulela wila awene anowañganiwa na Mulugu. (Masalmo 11:4) Sabwa yawila muthithi munddimuwa, wa athu “ohelegeya” [oohengeseya], kayo nikuru nili odhulu, onlagihiwa modheela oladdaniha muthengoya ohinziweya na obule olebiwe va Ovuhulela 7:4-8 vina Ovuhulela 14:1-4. Mmaleboni aba muthengo wa athu anthukuliwa velaboni ya vati wila adhowe odhulu bwa 144.000.
4. (a) “Masoso manddimuwa” txini abene anviluwa muthithi munddimuwa? (b) Ninga mulogeliwani va Ovuhulela 7:11, 12, bani anañgana muthithi munddimuwa vina anebedha na awene?
4 Ovuhulela 7:14 onloga dhahi mwaha wa muthithi munddimuwa: “Aba babale avirile mmasosoni manddimuwa.” Athu aba anela oviluwa va masosoni manddimuwa vaddiddi ahinapadduwege ovenya okalawo wotene wa nlogo na athu. (Mateu 24:21) Awene agamutamaalelaga Mulugu vina Kristu sabwa ya oviluwa wawa, venevo adhari otene oororomeleya odhulu anela ogumana na awene bagaloga dhahi: “Amen! Matamalo, nthithimiho, ononelamo, otamalela, nriho, owodha, guru, sa Mulugu wehu okala n’okala-wene. Amen!”—Ovuhulela 7:11, 12.
Ejile Enfuneya Wila Niviluwe
5. Niwodhe dhavi oziwa ejile enfuneya wila nikose epaddi ya muthithi munddimuwa?
5 Okoyiwa wa muthithi munddimuwa va masosoni manddimuwa onkoseya mowiwanana na magano a ejile enfuna Yehova. Bibilia onosekeserha deretu mikalelo dhinfanyeela okaana abale anaviluwe. Dhaene, wa anamakwela ejile enafunana Mulugu enowodheya okosa elobo ovanene wila alagihe yawila anofanyeela oviluwa. Txini enfanyeela okosa athu aba?
6. Muthithi munddimuwa onfanyeelela eni oladdanihiwa na mabila?
6 Mabila bokurumuwa vina bowiwelela. Noona Yezu mwalogeliye wila wahikaana mabila menagu abene ahali a nikuru na odhulu, iyene wawaddana athu agafunile okalawo velaboni ya vati, vina ageweleli masunziho aye. Iyene ohiloga dhahi: “Mabilaga anovuruwana nzu naga: miyo ddinowaziwa, awene anoddifwara.” (Joau 10:16, 27) Aba ba athu anvuruwana vina ankosa txibarene esile dhinloga Yezu, bagakala anamasunza aye.
7. Mikalelo gani dhinfanyeela okaana anamafara a Yezu?
7 Mikalelo gani dhiina dhinfanyeela okaana kadda namafara wa Yezu? Nzu na Mulugu ninowakula wila munofanyeela “orula omuthu wenyu wawale na meddeloyá . . . muthukule makalelo a muthu muswa, opaddutxeliwe oladdana na Mulugu mweddagana oligana murima, omukoddelela Mulugu mwibaribarini.” (Éfeso 4:22-24) Awene anokaana mikalelo esene dhinlibiha wiwanana wa adhari a Mulugu—“okwela, othaba, murenddele, ovilela, murima wapama wofewa, wowiwananeyana, wokurumuwa wopimelela mwetemwene.”—Galásia 5:22, 23.
8. Muthithi munddimuwa onfuna ogumane na eni oku bagakamiha abale ansogorhela mabasa a olaleya?
8 Muthithi munddimuwa onokamiha muthengo muñgono wa athu abale ana njeedhelo na odhowa odhulu, abene ansogorhela mabasa a olaleya. (Mateu 24:14; 25:40) Mabila menagu anovaha nikamihedho nthi, masiki vaziwilani wila anela ofarafariwa sabwani omaromo wa masiku aba oomariha Kristu Yezu na angelo aye ahimuthamagiha Satana na adomonyo aye odhulu. Eji entapulela ‘olaveya nyuwo muli mwilaboni . . . vowi satana oulupelani n’owali onddimuwa, aziwaga wi ohalilena malabo mañgonovi.’ (Ovuhulela 12:7-12) Dhaene, Satana onothabwiha wafarafara adhari a Mulugu venevo vanaddamela magomo a elabo eji.
9. Adhari a Mulugu aneeddeleya dhavi mwa olaleya bili yaderetu, nanda sabwa yani?
9 Masiki na ofarafariwa wa otabala, mabasa a olaleya anosogorhavi. Omagomo wa Koddo Yoroma ya Elabo Yotene wali anamalaleya a Omwene matxikwi mañgonovi, mbwenye ovanene oli anamalaleya matxikwi na matxikwi, sabwani Yehova wahiroromeliha: “Noona kaiwo epano enawodhe ounonga.” (Izaiya 54:17) Masiki muthu dhahi wa muthego munddimuwa wa Ayuda wahiziwa wila mabasa a Mulugu kagagomihiwe. Mwaha wa anamasunza, iyene wahapanga dhahi Afarizi mu vyaka zana dhoroma: “Mwathiye adhowe. Akala masunziho na mereloyá bawavi, anogoma oka; akala ba Mulugu, nyuwo kamunawodhe watolotxa. Porhe-porhe, munadhe muwanege na Mulugu.”—Merelo 5:38, 39.
10. (a) “Ezinddiyelo” enlebiwa abale a muthithi munddimuwa entapulela eni? (b) Adhari a Mulugu aniwelela dhavi ‘nzu nindha wirimu’?
10 Abale a muthithi munddimuwa anologiwa wila anolebiwa ezinddiyelo wila aviluwe. (Ezekiyel 9:4-6) “Ezinddiyelo” eji bu mutonyihedho wawila awene ahiviperheka wa Yehova, ahibatiziwa ninga anamasunza a Yezu, vina anovilibihedha okaana omuthu ninga wa Kristu. Awene anowiwelela ‘nzu nindha wirimu’ ninloga mwaha wa omwene wa Satana wa elabo yotene wa relijiau ehili ya ebaribari: “Nyuwo athu a nlogo naga, budduwaní mmuthetheni-mpuno w’o Babilónia, munathege vamodha na athuyámo, munafwanyiwe goyi dhinfuna wagwela.”—Ovuhulela 18:1-5.
11. Mukalelo gani wa makamaka onlagiha abale a nikuru nddimuwa yawila awene adhari a Yehova?
11 Vina, Yezu wahapanga anamafara aye: “Mugakwelanaga, athu etene anoziwa wi muli anamasunza aga.” (Joau 13:35) Mothiyana, athu a relijiau ya elabo eji anowapa athu akwawa mu koddoni, wili wili sabwa ya okala a dhilabo dhiina bahi! Nzu na Mulugu ninloga dhahi: “Enathiyaniha ana a Mulugu na ana a satana, jiji: akala muthu kanvirihamo ofuna wa Mulugu, kanimukwela mbalaye, kabaliwe na Mulugu. . . . Enofuneya nikwelanege. Kaneddege n’ekalelo ya Kaini: iyene wali mukadda satana nona ampa mbale.”—1 Joau 3:10-12.
12. Va masosoni manddimuwa, Yehova onfuna akosele eni ‘miri’ dha relijiau dhimbaala milima dhabure?
12 Yezu ohiloga dhahi: “Muri wapama onobala milima dhapama, wabure onbala milima dhabure. Muri wapama kunwodha obala milima dhabure; wabure kunwodha obala milima dhapama. Muri ohinbala dhapama, onogwaddiwa, onovokeliwa vamothoni. Nona nyuwo munere waziwa monaga milima dhawa.” (Mateu 7:17-20) Milima dhimbaaliwa na relijiau dha elabo eji dhinowatonya athuya wila esi ‘miri dhabure,’ esene dhinfuna otolotxiwa mohigoneela na Yehova va masosoni manddimuwa.—Ovuhulela 17:16.
13. Muthithi munddimuwa onlagiha dhavi wila oli wowiwanana ‘buwimelile osogorho wa mpaddo’ wa Yehova?
13 Ovuhulela 7:9-15 onolagiha deretu dhilobo esene dhinfuna wavuna athu a muthithi munddimuwa. Awene anolagihiwa bali owiwanana ‘bemelile osogorho wa mpaddo’ wa Yehova, bagakamihedha olamulela waye onddimuwa. Awene ahimala ‘ofula dhabalo dhawa akoddelihaga na nikame na Mwana-Nibila,’ bigalagiha wila anononelamo mukutho okosile Yezu wila dabi dhehu dhileveleliwe. (Joau 1:29) Awene ahimala oviperheka vamentoni va Mulugu nanda ahilagiha oviperheka oku modheela obatiziwa mmanjeni. Dhaene awene anojavo yimelelo yokoddela vamentoni va Mulugu, ejene enlagihiwa na dhabalo dhotxena, nanda ‘amwimelelaga mathiyu na mutana.’ Ohikala mikalelo dhinawodhiwena wiwananiha vaddiddi egumi yawo na eji elogiwe apa?
Esile Dhimpurihumo Ovanene
14. Dhopuramo gani dha vawoka dhinkaana adhari a Yehova bahi masiki ovanene?
14 Mwakakene, weyo ohimala woona dhopuramo dha vawoka dhinwodha okaana masiki ovanene abale animulaba Yehova bahi. Ninga yotagiha modha, musunzeliwe mwaha wa dhifunelo dholigana dha Yehova, weyo ohinonelamo wila ohikala njeedhelo noñganimela na musogorho. Noona ovanene weyo ohikaana efunelo yatxibarene mwigumini yawo—ya omulaba Mulugu webaribari na njeedhelo nohagalaliha na okalawo na mukalakala mparaizu velaboni ya vati. Indde, Mwene Yezu Kristu “onere okala mukumbuzi wawa [muthithi munddimuwa], onowavelela muli fukuwa dhinbudduwa manje ankaliha egumi.”—Ovuhulela 7:17.
15. Anamoona a Yehova ampuramo dhavi sabwa ya othiddeela magano a Bibilia mowiwanana na politika vina dhilobo dha mweddelo?
15 Dhopuramo dhotikiniha esene dhinjiwavo na muthithi munddimuwa si esi, okwela, othiddeelana, vina wiwanana onfanyeya vari va adhari a Yehova a velaboni yotene ya vati. Vowila iyo notene ninja yoja ya omuyani yakakene, iyo notene ninowiwelela malamulo vina magano akakene anfanyeya mu Nzu na Mulugu. Ji sabwa ya ejene ekooddelihu ovapana sabwa ya mubuwelo wa politika obe wa elabo enkalihu. Vina, ninokaanavi mweddelo wa vadhulu vaddiddi obwene onfunana Mulugu nlogo naye. (1 Korinto 6:9-11) Dhaene, othiya okaanaga magudulano, ovanyana, vina ogonihana wonyakuwa odhaalile mwilaboni, nlogo na Yehova ninojavo ejile enfanyeela otxemerhiwa paraizu wa omuyani. Koona mukalelo onlogiwa eji va Izaiya 65:13, 14.
16. Masiki na makathamiho akwaneliwe mwigumini ya athu, abale a muthithi munddimuwa ana njeedhelo gani?
16 Nne, athu ali adhari a Yehova kayo owakwana. Nanda awene anofanyiwa makathamiho abene anfanyiwa athu otene mwilaboni mpuno, ninga okaana makathamiho a otuwiwa kobiri, obe otabuwa s’ohikaana muladdu, na koddo dhinwana dhilabo. Awene vina anobulela, anotabuwa, vina anokwa. Mbwenye awene ahikaana nroromelo nawila mwilaboni eswa, Mulugu “oner’okuputha muntori bu muntori wa mmentoni mwawa. Kunakale vina okwa, kutho, obulela, segedho, vowi dhamwilaboni yawale dhivira.”—Ovuhulela 21:4.
17. Masiki na ejile txino enanipadduwele ovanene, musogorho gani motikiniha muli vamentoni va abale animwebedha Mulugu wa ebaribari?
17 Masiki akala ovanene weyo onokwa sabwa ya wuluvala, oredda, ngovi, obe ofarafariwa, Yehova onela wuvenyihedha egumi Mparaizu. (Merelo 24:15) Venevo onelege ojavovi mathanga a omuyani mwari mwa Olamulela Wa Kristu Wa Vyaka Txikwi. Omukwela wawo Mulugu onela ovaya venevo vanoonigiwe efunelo yaye bigasoriheya na nthithimiho. Nanda vina mareeliho a omaningoni anfuna operheka Yehova agamala anela wenjedha ovayiha omukwela wawo iyene. (Izaiya 25:6-9) Mpo munakale musogorho motikiniha vaddiddi wa nlogo na Mulugu!
Osakulela
• Bibilia oniwananiha muthithi munddimuwa na nipadduwo gani nddimuwa?
• Akala txibarene ninofuna wikiwa mmuthithini munddimuwa obwene onjavo mahala a Mulugu, txini enfanyeelihu okosa ovanene?
• Mareeliho anjavo ovanene, vina anfuna ojavo muthithi munddimuwa, anukalela dhavi makamaka?
[Foto vanikukuni 123]
Matxikwi na matxikwi a athu a muthithi munddimuwa anomwebedha mowiwanana Mulugu webaribari