Nunuwihaga Ewodhelo Yehu Mmabasani a Omwene—Nawakulaga Abale Agafunile Ogwadda Makani

Ekalile Eni Yamakamaka: Kobuwela wi weyo ohiziwa wi ngovi ya elabo enopadduwa mowaguva. Attu anele okwa agahittawele wego wobareleya. Weyo onodhowa vatakulu va mwanddamani wawo wi omwaddele, mbwenye iyene onowugwadda mazu, alogaga wi kana mudhidhi. Mohaganyedha, weyo kugattiyile momaguva ovilibihedha wi omukamihedhe! Enji mmuruddani mwehu anonipambiha akooddaga ononelamo miselu dhehu dha ovuna dhigumi. Mudhidhi wa oleddo wehu txino awene anokala ozuzuma. (Mt 24:37-39) Obe txino awene anokaanaga nsakulano mwaha wa dhilobo dhilogiwe dhihili dhebaribari. (Mt 11:18, 19) Awene txino anoona ninga ninoligana na marelijiau meena ahina milima dhamakamaka. (2 Ped 2:1, 2) Akala muliba numbaya vamaromo kana efunelo, iyo kanigafanyeelile omuttiya mowaguva.

Ninakose Dhavi:

• Ohinatti olaleya numba na numba, kaveda mudhidhi mug’onovi wi wubuwele sabwa ya abale agafunile ogwadda makani agafanyiliwe vina katanaalela mukalelo waderetu wa wakula.

• Akala mwinya wa vatakulu onopambiha, mofwaseya kadhowanavi makaniya. Txino weyo podi okosa ejuwene modheela omutamaalela. Ninga yotagiha, akala iyene onologa wi ohikaana relijiau yaye, weyo ogahifanyeela omwakula, “Miyo ddanjeedhela onfanye muttu ninga weyo ona efunelo ya dhilobo dhomuyani.” Mudhidhi mwina ononelamo dhubuwelo na mikalelo dha mwanamurala onele wukamihedha odhowavi osogorho bugavaha onamoona. Ninga motagiha, akala iyene onologa wi kana mudhidhi weyo ogahifanyeela ologa: “Miyo ddiziwa. Mbwenye ddihinadhowa ddigahiziveliwa wuvaha elobo eji.” Dila yina podi okosa nivuzo nimodha akala mwanamurala onologa wi kanfuna wiwa. Weyo ogahifanyeela ologa, “Weyo onfuna ologe wi kuna efunelo ya Bibilia, obe ya relijiauya?”

• Kalabihedha na yubuwelo yaderetu. Kobuwela wi Yehova kanimudidela muttu onvuruwana. (Olib 30:19) Otene anofanyeela ottukula ettomo yaye ya mabasa a omuyani. (Gal 6:5) Akala mwanamurala kanfuna wiwa-wene, yokosa yaderetu ja ovenyavo. Na mukalelo otonyihedhe dhubuwelo dha muttuya, iyo ninele wakamihedha attu eena wiwa miselu dha anamalaleya eena.​—1 Ped 3:15.

Kakosa Ejuwene Mwari mwa Mweri:

• Weyo ogafanya abale agafunile ogwadda makani, ogamala obudduwavo katanalela na mukwawo mukalelo ogakulile weyo mofanyeela.