NIPADDUWO 87
Muzombwe Yezu Mu Mparhani
KAMWAÑGANE mwanamulobwana oddu bagaloga na anddimuwa aba. Awene anamasunziha mu mparhani wa Mulugu mu Yeruzalemi. Nanda mwanamulobwanaya ddi Yezu. Iyene ohunuwa vaddiddi. Ovanene ona vyaka 12 dha obaaliwa.
Anamasunzihaya anotikina vaddiddi sabwa yawila Yezu ohiziwa vaddiddi mwaha wa Mulugu vina dhilobo dhilebiwe mBibiliani. Ki Zuze na Maria akooddelini vina okala veneva? Awene ali wuvi? Ndoweni noone.
Kadda yaka Zuze onodhana murala waye o Yeruzalemi va mathangani a va woka antxemerhiwa Paskwa. Ovenya o Nazareti mpaka o Yeruzalemi obu oleddo wolapa. Kavo ona karo, vina kuli akamboi. Mmasikuni abale awene kaana dhilobo esi. Athu enjiya ela weedda, nanda anvira masiku mararu wila muthu afiye o Yeruzalemi.
Ovanene Zuze ohikaana murala munddimuwa. Noona vahikala abali vina arogori añgonoya a Yezu wila añganeliwege. Dhaene, Zuze na Maria ahidhowa na ana awa mu oleddoni wolapa wowiyelela o Nazareti. Awene anoona ninga Yezu oli na athu ena ali mu oleddoni. Mbwenye mwimelelani omamalelo wa siku, awene kaninfanya Yezu. Awene ahimutamela mwari mwa amudhi vina amarho awa, mbwenye iyene kaali na awene! Noona awene ahiyelela o Yeruzalemi wila amutamelewo.
Omamalelowa awene ahinfanya Yezu veneva na anamasunziha. Iyene onowavuruwana vina onowavuza. Nanda athu otene anowuma milomo na mukalelo wa zelu oliye. Mbwenye Maria ohiloga dhahi: ‘Mwana weyo, okoselini eji na iyo? Babi wawo na miyo nahikubanya vaddiddi banigatamela wufanya.’
Yezu ohakula dhahi: ‘Mwafanyeelela eni odditamela? Kamwaziwa wila ddanfanyeela okala mu numba ya Babi waga?’
Indde, Yezu wanziveliwa vaddiddi okala venevo vawodhiye osunza mwaha wa Mulugu. Iyo vina kanigafanyeeli wiwa dhaene? Mmudhi o Nazareti, Yezu wandowa sumana dhotene omatugumanoni a webedha. Sabwa ya iyene ovuruwanaga mudhidhi wotene, iyene wahisunza dhilobo dhinji dha mBibiliani. Ndoweni nikale ninga Yezu vina nifarege yotagiha yaye.
Lukas 2:41-52; Mateus 13:53-56.