NIPADDUWO 112
Otweya Wa Sikarera Va Suwa
KAÑGANA! Sikarera eji eli mmakathamihoni! Enonyenyeya dhipathaso dhipathaso! Weyo onowawoona athu alupelile mmanjeni? Ena ahimala ofiya o kobela. Oddu oli apa ddi Paulo? Ndoweni noone txini enimpadduwela.
Kobuwela, mwari mwa vyaka biili Paulo mfugeliwi o Sezarea. Mumalelani iyene na afugeliwi ena ahikiwa mu sikarerani, nanda awene ahiroma oleddo wa odhowa o Roma. Muvirelani waddamana na suwa ya Kreta, nthithimo nowopiha vaddiddi nihafanya. Pevoya ehikukuma vaddiddi mpaka alobwana aba okoodda owodha onyaaliha sikareraya. Nanda na omutana awene kanwodha woona nzuwa obe neneri na omathiyu. Omagomelowa, muvireli masiku menjene, abale otene ali mu sikarerani ahigomeliwa njeedhelo notene na oviluwa.
Venevo Paulo ohiimela nanda ohiloga dhahi: ‘Kavo mmodha mwa nyuwo onayelele egumi yaye; sikarera bahi jinayeleliwe. Sabwani omathiyu ovirile mungelo wa Mulugu wahiddidheela nanda baloga wila, “Paulo, kuwove! Weyo onofanyeela wimela vamentoni va Sezari mulamuleli wa Roma. Vina Mulugu onela wavuna athu otene antxapa na weyo.”’
Othamagela vari va mathiyu a siku na 14 nthithimona baniromile, anamatxerhengaya ahoona wila manjeya kanvayetxa! Sabwa ya wova ogudula mwarha mu eddimani, awene ahavoka anangura awa. Mmangwananimwa na membesi awene ahoona etigo. Awene ahigana otamela otxapa sikareraya mpaka o gombe okule.
Dhaene, awene mufiyelani waddamana na kobela, sikareraya ehigudula thukuwa ya mutxesa nanda ehilika. Mumalelani neebe nihiroma ovada sikareraya, nanda sikareraya ehiroma onyenyeya dhipathaso dhipathaso. Kazembeya wa anyakoddo wasogorhela ohiloga dhahi: ‘Nyuwo motene munwodha ohabelela karomani olupela mmanjeni nanda muhabelele mpaka okobela. Nyuwo ena mulupelemo awene agamala, nanda muthiddeele dhipathaso dha sikareraya.’ Nanda ji ejene ekosilani. Dhaene athu otene 276 aali mu sikarerani ahiviluwa mpaka okobela, ninga mwaroromelihedhi mungelo txibarene.
Suwaya entxemerhiwa Malta. Athuya baderetu vaddiddi, nanda ahakamiha abale abudduwile mu sikarerani. Nyazaya mumaalelani, Paulo ohikiwa mu sikarerani yina bathukuleliwa o Roma.