Ji Ejene Yafuna Mulugu?

KENGESA jornale jornalevi. Koona televizau obe kanvuruwane radio. Ohikala mapadduwo gwe a opanga, koddo, na otabala! Ovano katanaalela dhozuzumiha dhawo wamwinya. Txino oredda obe okweliwa mmudhi onowutotela goi enddimuwa vaddiddi. Txino weyo oniwa ninga mweweli Job mulobwana waderetu, oddwene walogile wila: ‘Ddihidhaaleliwa manyazo na masoso.’​—Job 10:15.

Kavivuze:

• Ji ejene yaddifunana Mulugu vina yafuniyena nlogo notene na attu?

• Ddifanye wuvi nikamihedho na wakwanihana makathamiho aga?

• Ohikala njeedhelo njeedhelovi nawila ninela woona murenddele velaboni ya vati?

Bibilia onovaha dhowakula dhaderetu wa mavuzo aba.

BIBILIA ONSUNZIHA WILA MULUGU ONELA ODHANA MASADDUWO ABA VELABONI YA VATI.

‘Iyene onela okuputha mmentoni mwawa mintori dhotene, kunakale viina okwa, nne vina olila, nne okuwa, nnewiwa opa.’​—Ovuhulela 21:4

“Akwethenkwe anere othamaga ninga nahe”.​—Izaiya 35:6

‘Mento a aliba ohoona anela okunuwa.’​—Izaiya 35:5

‘Ninodha nsaka nawila otene abale ali mmasiye owubuweliwa anela . . . obudduwa.’​—Joau 5:28, 29

‘Kavo namakalamo onaloge: “Ddili muredda.”’​—Izaiya 33:24

‘Vanodha okala milima dhinji velaboni ya vati.’​—Masalmo 72:16

KAPURAMO ESILE DHINSUNZIHA BIBILIA

Kumaguvele okoodda esile dhilogiwe va makukuni ooroma ninga dhofuna dhohikala dha ebaribari. Mulugu ohiroromeliha osoriha dhilobo esi, nanda Bibilia onotapulelamo mukaleloya onakosiye esi.

Mbwenye Bibilia onopureyamo na mikalelo dhinji. Oddu onovaha mfugulo wila weyo ojevo egumi yohagalaliha txibarene masiki vina ovanene. Kathukula mudhidhi muñgonovi wila otanaalele dhozuzumiha vina makathamiho awo. Esi txino dhinotaganyiheya na otuwiwa kobiri, makathamiho a murala, otuwa egumi, obe okwa wa mmudhi. Bibilia onowodha wukamiha wakwaniha makathamihoya ovanene, vina oddu onowodha odhana nifuruleyo modheela wakula mavuzo ninga aba:

• Iyo nintabuwela eni?

• Niwodhe dhavi wakwaniha dhozuzumiha dha egumi?

• Niwodhe dhavi okosiha murala wehu ohagalaletxe?

• Txini ennipadduwela nigakwa?

• Ninela odha wawoona wili amudhi ehu akwile?

• Niwodhe dhavi okaana ebaribari yawila Mulugu onela osoriha dhororomeliha dhaye dha musogorho?

Sabwa ya weyo wengesaga nivuru nthi enolagiha yawila weyo ogahiziveliwa oziwa esile dhinsunziha Bibilia. Nivuru nthi ninela wukamiha. Koona yawila ddimadha dhihikaana mavuzoya ali mutxiddo mwa nikuku. Attu matxikwi na matxikwi ahipuramo sabwa ya olabihedha marhe a ovuza na wakula agamusunzaga Bibilia na Anamoona a Yehova. Ninjeedhela yawila weyo vina onela opuramo. Ninfuna wila okaane nreeliho na Mulugu oku bugajavo ovanene dhowireya dhohagalaliha vaddiddi vina dhoziva dha esile dhinsunziha Bibilia txibarene!