YEDDELO YA AKRISTU

Nilaleyena Dhavi Nivuru​—Txini Ennisunziha Bibilia?

Manivuru aba Ennisunziha Bibilia na Ensunziha Bibilia boladdana. Omeli manivuru osunzihana; ahikaana makasha anlagiha ebaribari na matapuleloya. Noona nivuru Ennisunziha Bibilia nihikaana mazu ovevuwa vina ohirutxa ononelamo. Ntti nisasanyedheliwe abale ana makattamiho ononelamo nivuru Ensunziha Bibilia. Nivuru ntti niswa Ennisunziha Bibilia nihikaana mpaddi ona yowenjedha, mwenemo mutapuleliwa mazu meena anfanyeya munivurunimwa. Makapituluya kana mavuzo a vadhulu oromana nne vina kana kasha yowiyelela. Noona omamalelo wa kapituluya ohikala dhibaribari dha mBibiliani dhitapuleliwe mwari mwa nsunzona. Ninga Nivuru Ensunziha Bibilia, nivuru Ennisunziha Bibilia mudhidhi mudhidhivi ninopakiwa, masiki akala kaninlabihedhiwa mwari mwa mweriya. Ninalabihedhe dhavi nivuru Ennisunziha Bibilia bahi nigamusunzihaga muttu?

DHILIMO: Marhe a wengesa ddimaya ya nivuru Ensunziha Bibilia nigamala banikosa nivuzona, enowakosiha attu abale omaletxa ologa. Niromeni woona eji: akala namasunzaya kannonelamo deretu mazuya obe akala kanengesa deretu. Akala enopadduwa dhawene, onvahe nivuru Ennisunziha Bibilia. Ogamala kamutapulele namasunzaya olabihedhaga mitomadha dha ttima dhinfanyeya mutxiddo mwa kapituluya, namasunza alibihiwe wengesaga agakala yeka. Epaddi modha-modha ya ebaribari ya Bibilia enowodheya osunzihiwa mwari mwa mitala 15. Vowi omamalelo wa kapitulu kunlebeliwa mitoma dhingwaddela kapituluya, jofuneya namasunzihaya ovisasanyedhela deretu; akaanaga muyubuweloni dhilobo dhinimujombela namasunzaya. Akala kapituluya enomala osunziwa, namasunzihaya addoddele mitoma dhing’ono dhing’ono wi agwaddelena.

YOWENJEDHA: Mazu andha mu yowenjedha anofanyeya mwari mwa dhipaddi dhosunzana. Namasunzihaya ddunone akala vanofuneya wiyelela mipaddi dhogwaddela dha nivuru ntti Ennisunziha Bibilia.