SUNZO 34

Ninatonyihedhe Dhavi wi Ninomukwela Yehova?

Yopidiwa

Ohizinddiyela wi onfiyedha wawo Mulugu ohunuwa opitta nsaka niromiliwe omusunza Bibilia? Ogahiziveliwa olibihavi mandano awo na iyene? Mudhidhi onona Yehova wi omukwela wawo onowunuwavi, iyene onele wukwela vina onelege wukamihedha. Kito onawodhe dhavi otonyihedha wi onomukwela Yehova?

1. Ninatonyihedhe dhavi wi ninomukwela Yehova?

Ninomutonyihedha Yehova okwela wehu, nigamwiwelelaga. (Kengesa 1 Joau 5:3.) Yehova kanimmagelela muttu omwiwelela. Ottiya ejo, iyene ohinivaha ofuru womwiwelela obe wohimwiwelela. Sabwaya? Sabwani Yehova onfuna wi iyo ‘nimwiwelelege na murima wotene.’ (Roma 6:17) Na mazu mena, iyene onfuna wi nimwiwelelege na ofuna wehu ottiya omageleliwa. Epaddi yanoraru na yanonayi ya nivuru ntti, dhinele wukamihedha omutonyihedha Yehova omukwela wawo mwa okosa dhilobo dhinimwagalaliha ottiya okosa dhilobo dhinidda iyene.

2. Ekaleleni yorutxa masaka mena omutonyihedha Yehova okwela wehu?

‘Segedho dhinimugwela muttu wapama dhili gwè.’ (Masalmo 34:19) Iyo notene ninowanana ohiligana wehu. Txino ninogumanana makattamiho menjene ninga: Oyelega, opujiwa, vina na makattamiho mena. Nigagumanagana makattamiho, masaka mena enokalaga yorutxa okosa ejile ennifunana Yehova. Txino ejo empadduwetxa makamaka nigonaga wi okosa elobo yabure enonivevuwela. Mbwenye ogakala muttu wororomeleya vina onimwiwelela Yehova, weyo onele otonyihedha wi onomukwela iyene opitta elobo-elobovi. Onowoniha vina wi oli muttu oweddeyana. Nona, Yehova onele okala woweddeyana na weyo. Iyene txipo kanawunyanyale.—Kengesa Masalmo 4:3.

KASUNZAVI

Koona sabwaya enimuttukulela Yehova ovaha ttima wiwelela wawo nanda txini enawukamihedhe okalavi wororomeleya na iyene.

3. Makani anupatta

Mbibiliani nivuru na Job, ninowengesamo wi Satana ohimmagedha Job na attu otene anfuna omulabela Yehova. Kengesa Job 1:1, 6–2:10, mugamala mutanaalele mavuzo aba:

Ninga elogile Satana, Job wamwiwelelani Yehova? —Koona Job 1:9-11.
Satana onloga eni mwaha wa attu otene, vamodha na weyo?—Koona Job 2:4.

Kengesa Job 27:5b, mugamala mutanaalele nivuzo ntti:

Job otonyihedhile dhavi wi wanimukwela Yehova txibarene?

Satana ampambihaga Yehova. Ammagedhaga Job sabwa ya weddeyana waye, odwene oli muredda na vilodda gwé, vina murogora onimulabela Yehova masaka abano. — Job wahitonyihedha wi wanimukwela Yehova mwaha wokala woweddeyana na iyene

Iyo ninatonyihedhe wi ninomukwela Yehova nigakala woweddeyana na iyene

4. Kagalaliha murima wa Yehova

Kengesa Gano 27:11, mugamala mutanaalele nivuzo ntti:

Yehova oniwamo dhavi ogakosaga dhilobo dhaderetu vina ogamwiwelelaga? Sabwaya jani?

5. Enowodheya weyo okala oweddeyana na Yehova

Iyo ninomukwela Yehova ejo enonittukulela ologa na attu ena sabwa ya iyene. Sabwa yokala attu oweddeyana na Yehova, iyo ninofuna omwiwelela masiki ekalaga elobo yorutxa. Karumiha VIDIYU, mugamala mutanaalele mavuzo aba.

VIDIYU: Kabarela Nroromelo Nawo Masiki Ogafwarafwariwaga (5:09)

Mwa weyo, elobo yorutxa ologa na attu ena mwaha wa Yehova?
Mvidiyuni, txini emukamihedhe Claudio opemberha wova?

Jovevuwa okala oweddeyana na Yehova nigakwela enkweliye vina nigeedda eniddiye. Kengesa Masalmo 97:10, mugamala mutanaalele mavuzo aba:

Wubuwelaga esile dhotedhene dhisunziliwe, dhilobo gani dhinkwela Yehova vina dhiniddiye?
Onawodhe dhavi osunza okwela eli yaderetu vina widda eli yabure?

6. Iyo ninopurelamo nigamwiwelelaga Yehova

Omwiwelela Yehova elobo ya makamaka enfwanyelela iyo okosa. Kengesa Izaiya 48:17, 18, mugamala mutanaalele mavuzo aba:

Weyo onona ninga onofwanyela okuluvela wi Yehova onoziwa eli yamakamaka mwa iyo? Sabwaya jani?
Dhilobo dhisunziliwe mBibiliani mwaha wa Yehova, dhukamihedhile dhavi mpaka ovanene?

ATTU ENA ANLOGA WI: “Merelo aga mwebaribari kanimpatta Mulugu.”