Okwela wa Mulugu bwa Mukalakala

1-2. Makattamiho gani angumana adhari enjene a Yehova?

KAMUBUWELE barku bali vari va mwinje oku manebe amutukumelaga oku-noku. Se nikamihedho na nangura, barku oddu agahidhowa mburo-mburovi ontukumeliwiye na manebe. Nangura ninomukamihedha barkuya okala wowimelene wila anatukumiwe na otagala wa manebe.

² Nigagumanagana makattamiho orutxa, ninodhaga okala ninga barku oddu. Mukalelo oniviwamo iyo onodhaga otxinja momaguva. Labo nimodha, onodhaga okana ebaribari wi Yehova onowukwela vina onowukoya. Labo nina, txino onodhaga wubuwela wi iyene kanziwa enupadduwela. (Ms. 10:1; 13:1) Musogorhomwa marho wawo onodhaga ologa mazu anupangarhaza vina anuttukulela oviwamo pama. (Gan. 17:17; 25:11) Mbwenyi mwa ovira wa mudhidhi, weyo oroma waganyedha wili akala Yehova onowukamihedha-wene. Txino weyo onofiyedha wubuwela wi Yehova ohunyanyala. Kito txini enanikamihedhe okala olibene nigagumanagana makattamiho? Na mazu mena, txini enanikamidhe odhowagavi nikuluvelaga wi Yehova ononikwela vina ononikoya?

3. (a) Okwela woweddeyana txini? (Masalmo 31:​8, [Masalmo 31:7 NM] vina Masalmo 136:1) (b) Ninlogelani wi Yehova yotagiha enddimuwa ya okwela woweddeyana? (Koona foto.)

³ Elobo enanikamihedhe mudhidhi ongumanihuna dhorutxa, ja wubuwela okwela woweddeya wa Yehova. (Kengesa Masalmo 31:​8, [Masalmo 31:7 NM]; Masalmo 136:1.) Mazu aba okwela woweddeya antapulela okwela onddimuwa vina weddeyana onkana muttu na mukwaye. Yehova yotagiha enddimuwa ya okwela woweddeyana. Nona Bibilia onologa wi Yehova ‘ddodhala okwela woweddeya.’ (Obu. 34:​6, 7 NM) Bibilia vina onologa dhahi mwaha wa iyene: Okwela waye woweddeyana, onddimuwa mwa abale animwittana. (Ms. 86:5 NM) Katanalela entapulela ejiya: Yehova txipo kananyanyala adhari aye ororomeleya! Otanalela wi Yehova ddoweddeyana, enodhaga okala ninga nangura enulibiha mudhidhi ongumaniwena dhorutxa mwigumini mwawo.—Ms. 23:4.

KUDDUWALE WI OKWELA WA YEHOVA MASUNZIHO OROMA A MBIBILIANI

4. Kavaha dhotagiha dha masunziho oroma a mBibiliani vina katapulelamo ennittukulela okuluvela.

⁴ Mukalelo mmodha wa olibiha okuluvela okwela wa Yehova, ja wubuwela wi okwela oku onokosa mpaddi wa masunziho oroma a mBibiliani. Mwa weyo mazu aba “masunziho oroma a mBibiliani” antapulela eni? Txino onubuwela wi dhibaribari dhamakamaka dhisunziliwe mu Nzuni na Mulugu. Motagiha, weyo ohisunza wi nzina na Mulugu ddi Yehova vina Yezu ddi Mwana woroma wa Mulugu. Ohisunza wi abale akwile kanziwa elo vina elabo ya vati enele okala paraizu munakalege attu namukalakala. (Ms. 83:18; Ko. 9:5; Jo. 3:16; Ovu. 21:​3, 4) Ogamala orumela dhibaribari esi, enorutxa ottiya okuluvela. Sabwaya? Sabwani ohinonelamo wi dhibaribari esi dhikana matibelo. Wubuwela wi okwela wa Yehova eberibari yoroma ya a mBibiliani, enonikamihedha orabela waganyedha akala Yehova ononona nigagumanagana makattamiho obe akala ononitanala. Ndoweni none ejoya.

5. Katapulelamo enimuttukulela muttu orabela masunziho ottambi.

⁵ Txini yukamihedhile okodda masunziho ottambi varomiliwe omusunza Bibilia? Txino ololaddaniha ejile yasunziliwe mu kapelani mwawo na ejile ensunziha Bibilia. Ndoweni none yotagiha modha: Txino weyo warumela wi Yezu ddi Mulugu Namawodha-wodha. Mbwenyi muromeliwe omusunza Bibilia, wahiroma ovivuza dhahi: ‘Koddi ejoya ebaribari?’ Mmaleliwe otanalela ejile enloga Bibilia, wahizinddiyela wi kahiyo ebaribari. Venevo, wahitxinja ejile yasunziliwe mu kapelani mwawo na ebaribari eji ya mBibiliani: Yezu ddi “muttaji wa dhottanddiwa dhotene,” vina ddi “nammodha wa Mulugu.” (Kol. 1:15; Jo. 3:18) Ebarbari wi masunziho ottambi ankala ninga “ngome dhovadda” dhinrutxa obwanyula. (2 Ko. 10:​4, 5) Mbwenyi mmaleliwe osunza ebaribari, ohittiya orumela masunziho ottambi.—Flp. 3:13.

6. Onfwanyelela nni okuluvela wi okwela woweddeya wa Yehova bwa mukalakala?

⁶ Enowodheya okosa elobo yakakene mowiwanana na ejile ensunziha Bibilia mwaha wa okwela wa Yehova. Ogagumanagana makattamiho vina ogaroma waganyedha okwela wa Yehova, kavivuze dhahi: ‘Koddi eji enubuwelimi ja malago?’ Kaladdaniha dhowaganyedha dhawo na mazu anfwanyeya va Masalmo 136:1—nili nlebo na nsunzo ntti. Yehova onlogelani wi okwela waye boweddeyana? Mazu aba okwela waye woweddeyana bwa mukalakala anfwanyelani dila 26 va masalmo oddu? Ninga monelihu, okwela woweddeyana wa Yehova mwa nlogo naye, ebaribari yoroma ya mBibiliani dhahene ninga masunziho mena a mBibiliani aharutxiliwe orumela. Mubuwelo wawi Yehova kanukwela vina kanuvaha ttima, ottambi. Nona orabele momaguva-mwene mubuwelo obu dhahene ninga mugarabeliliwe masunziho mena ottambi!

7. Malebo gani a mBibiliani anukuluveliha wi Yehova onowukwela?

⁷ Bibilia onologa dhilobo dhinji dhinnikukuveliha wi Yehova ononikwela. Motagiha, Yezu wahawaddela anamafwara aye dhahi: ‘Nyuwo mukana ttima enddimuwa opitta balame dhing’ono.’ (Mt. 10:31) Yehova vina ohiloga dhahi na nlogo naye: “Miyo ddinoulibiha, ddinoukamyedha, ddinouthiddela na nlada naga noja nowodha-wodha.” (Iza. 41:10) Katanalela nikuluvelo ninivaha mazu aba. Yezu kalogile wi ‘txino ttima ena nyuwo enopitta balame dhing’ono,’ Yehova vina kalogile wi txino ‘ddinele wukamihedha.’ Ottiya ejo, awene alogile dhahi: ‘Nyuwo mukana ttima enddimuwa’ vina “[Miyo] ddinoukamyedha.” Ogagumanagana makattamiho, buroma waganyedha okwela wa Yehova, malebo ninga aba kanawukamihedhe bahi wona wi Yehova onowukwela, mbwenyi oziwa vina okuluvela ejoya. Malebo aba akana matibelo. Ogalobela vina ogatanalela sabwa ya ejuwene, onele ologa mazu anfwanyeya va 1 Joau 4:16: ‘Iyo ninoziwa okwela onikwelilena Mulugu vina ninorumela okwela oku.’a

8. Txini enfwanyeliwe okosa ogaganyedhaga okwela wa Yehova?

⁸ Kito akala onodhowavi waganyedhaga okwela wa Yehova? Kaladdaniha ejile eniviwamo weyo na enziwiwe. Kaninfwanyela okuluvela ejile eniviwamo iyo mbwenyi ninofwanyela okuluvela Malebo. Sabwani ejile ensunziha Bibilia mwaha wa okwela wa Yehova ehikana matibelo. Nigahikuluvele wi Yehova ononikwela, ninopwaza mukalelo waye wamakamaka—okwela.—1 Jo. 4:8.

KATANALELA OKWELA ONNA YEHOVA MWA WEYO

9-10. Mazu anfwanyeya va Joau 16:​26, 27 anloga wi “Baba onoukwelani,” Yezu walogana makani gani? (Koona vina foto.)

⁹ Ninowodha osunza venjene sabwa ya okwela wa Yehova modhela otanalela ejile yalogile Yezu na anamafwara aye: “Baba onoukwelani.” (Kengesa Joau 16:​26, 27.) Yezu kalogile mazu aba wi apangarhaze anamafwara aye. Makaniya a nlebo ntti anolagiha wi Yezu waloga mwaha wa nlobelo.

¹⁰ Yezu wahimala wawaddela anamafwara aye wi anfwanyela olobela modhela iyene ottiya omulobelela iyene. (Jo. 16:​23, 24) Yali yamakamaka awene oziwa ejoya. Mmaleli Yezu ovenyihiwa mukwani, txino anamafwara aye ahikana efunelo ya omulobelela iyene sabwani wali marho wawa. Awene txino agahidha wubuwela wi sabwa ya Yezu wakwela vaddiddi, agahivuruwana malobelo awa vina agahimukumbirha Babe wi akamihedhe. Mbwenyi Yezu wahawaddela anamafwara aye wi kafwanyela wubuwela dhawene. Sabwaya jani? Yezu ohiloga: “Baba onoukwelani.” Ebaribari eji enokosa mpaddi wa masunziho oroma a mBibiliani mwaha wa nlobelo. Ejo entapulela nni mwa weyo? Weyo ohisunza mwaha wa Yezu vina ohidha okala marho waye. (Jo. 14:21) Dhahene ninga anamafwara a Yezu, enowodheya omulobelela Yehova na nikuluvelo oziwaga wi ‘Baba onoukwela.’ Dila dhotene dhinimulobeleliwe Yehova, onotonyihedha wi onororomela mazu aba.—1 Jo. 5:14.

KAZIWA ENUTTUKULELA OKANA DHOWAGANYEDHA

11. Satana onttabelani iyo nigaganyedhaga okwela wa Yehova?

¹¹ Txini enuttukulela waganyedha okwela wa Yehova? Txino onodhaga ologa wi onita waganyedha oku ddi Satana, ejo ebaribari. Satana onomutamela “womuja.” Iyene onowagalala nigaganyedhaga okwela wa Yehova. (1 Pe. 5:8) Ku okwela-wene oku omuttukuleli Yehova onivaha yobolo—Satana onfuna wi nubuwelege wila kaninfwanyela ejoya. (Ahe. 2:9) Bani anapemberhe nigaganyedhaga okwela wa Yehova? Ddi Satana. Bani anaziveliwe nigattiya omulabela Yehova sabwa ya okumuwa? Ddi Satana vina. Satana onfuna wila nubuwelege wi Yehova kannikwela. Mbwenyi ejo ottambi. Ddi Satana ohinkweliwa na Yehova. ‘Murega’ onlabihedhetxa Satana ja onittukulela wubuwela wi ddi iyo ohinkweliwa vina ohinrumeliwa vamentoni va Yehova. (Ef. 6:11) Ozinddiyela ejile entamela okosa mwiddani wehu, enonittukulela ogana ‘omukodda Ddiabo.’—Tia. 4:7.

12-13. Yottega eravilihu ennikosiha dhavi waganyedha okwela wa Yehova?

¹² Mbwenyi ehikalawo elobo yina ennittukulela waganyedha okwela wa Yehova. Ejoya txini? Ohiligana oravilihu. (Ms. 51:5; Rom. 5:12) Yottega ehinimwalaniha na Muttanddi wehu. Yottega eji enopatta manigo ehu, mubuwelo wehu vina murima wehu.

¹³ Yottega enonitotela okala odhugudheyene, okana manyazo, ovipwatteliha muladdu vina ohikana nibarelo. Ejo enodhoga opadduwa nigakosa yottega. Vina ejo enopadduwa sabwani nili attu ohiligana, mbwenyi kahiyo ejuwene yanifunana Mulugu vanipaddutxiliye. (Rom. 8:​20, 21) Dhahene ninga karo ehinnedda pama roda nigatorowa, iyo vina sabwa ya okala attu ohiligana kaninwodha okosa dhilobodha ninga mwafuneyelani. Nona kanintikina nigaganyedhaga okwela wa Yehova. Ejo egapadduwa ninofwanyela wubuwela wi Yehova, Mulugu wottittima, wawopiha! Onowalagiha okwela woweddeyana abale animukwela vina aneddana malamulo aye.—Ne. 1:5 NM.

14. Otanalela yobolo enanikamihedhe dhavi okuluvela wi Yehova ononikwela? (Roma 5:8) (Koona vina kasha “Okale Txenjewa na ‘Guru ya Yottega.’”)

¹⁴ Ebaribari wi masaka mena ninodhaga wubuwela wi kaninfwanyela okweliwa na Yehova. Mwebaribari kaninfwanyela-wene. Jijene enkosiha okwela oku okala wavawoka. Yehova kannitonyihedha okwela oku sabwani ninofwanyelela. Masiki dhawene, Yehova sabwa ya okwela ohinivaha yobolo wi anilevelelena dhottega dhehu. (1 Jo. 4:10) Kudduwale wi Yezu kadheli wavuna aligani mbwenyi odheli wavuna attegi. (Kengesa Roma 5:8.) Kawo mwa iyo onwodha okosa dhilobo dholigana. Yehova vina kannijedhelana ejuwene. Niganonelamo wi ohiligana wehu ononittukulela waganyedha okwela wa Yehova, ninele okosa muli-mwetemwene wi ejoya enapadduwe.—Rom. 7:​24, 25.

KASAKULA OKALAVI WOWEDDEYANA

15-16. Nigakala oweddeyana na Yehova, ninfwanyela okana ebaribari gani vina sabwaya jani? (2 Samuwel 22:26)

¹⁵ Yehova onfuna wi nikose yogana ya deretu “[nikale] awiwananeyana na iyene.” (Oli. 30:​19, 20) Nigakosa ejuwene, ninokana ebaribari wi Yehova onele okala oweddeyana na iyo. (Kengesa 2 Samuwel 22:26.) Nigakala oweddeyana na Yehova, iyene onele onikamihedha kintanla makattamiho anagumanegena iyo mwigumini mwehu.

¹⁶ Ninga moonelihu mu nsunzoni ntti, nikana mwaha dhinji dhinnittukulela odhowagavi nikalaga olibene masiki nigagumanagana makattamiho mwigumini mwehu, dhahene ninga barku onkala wolibene agakana nangura. Iyo ninoziwa wi Yehova ononikwela vina onele onikamihedha. Jijuwene ensunziha Bibilia. Akala ninoroma waganyedha okwela wa Yehova, ninofwanyela wubuwela ejile enziwa iyo mwaha wa okwela wa Yehova ottiya okuluvela ejile eniviwamo iyo. Dhahene ninga munlogela Bibilia, ninfuna nidhowegevi nikuluvelaga wi okwela woweddeyana wa Yehova bwa mukalakala.