Onawodhe Dhavi Omulobelela Yehova na Murima Wawo Wotene?

1-2. (a) Ekalele nni yorutxa onfugulela murima mwehu Yehova? (b) Ninziwa dhavi wi Yehova onovuruwana malobelo ehu?

WEYO onubuwela wi malobelo awo ankalaga akakene obe enowurutxa onfugulela murima wawo Yehova? Akala jijuwene, weyo kuli wega. Sabwa ya dhokosa dha labo na labo, txino onolobela na namaguve. Obe onorutxiwa omwaddela Yehova mukalelo oniviwamo weyo wubuwelaga wi kunfwanyela ologa na iyene.

² Bibilia ononikuluveliha wi mwa Yehova yamakamakaya kahiyo mazu okoddela anloga iyo mu nlobeloni, mbwenyi nigaloga na murima wehu wotene. Iyene onovuruwa “okuwa wa akurumuwi.” (Ms. 10:17) Yehova onovuruwa mazu anlogihu sabwani nili attima vamentoni vaye.—Ms. 139:​1-3.

3. Txini enone iyo mu nsunzoni ntti?

³ Mu nsunzoni ntti ninele wona dhowakula dha mavuzo aba: Ninfwanyelela nni omulobelela Yehova nihovaga elo? Ninawodhe dhavi olobela na murima wehu wotene? Malobelo alebiwe mBibiliani annikamihedha dhavi okosa ejoya? Txini enakosihu nigakala odhugudheyene nihiwodhaga omwaddela Yehova mukalelo oniviwamo iyo?

OMULOBELELE YEHOVA OHOVAGA ELO

4. Txini enanikamihedhe omulobelela Yehova nihovaga elo? (Masalmo 119:145)

⁴ Yehova marho woweddeya vina onfuna opama wehu. Niganonelamo ejoya ninokala otapuwa wi nimwaddele Yehova esili dhubuwelihu vina dhinizuzumiha. Namaleba Masalmo 119 wahitamela okana monelo obu mwaha wa Yehova mudhidhi walobeliye. Iyene kana egumi yoligana. Attu abure anipwatteliha muladdu. (Ms. 119:​23, 69, 78) Ottiya ejuwenevi, namaleba masalmo oddu masaka mena wankala wokumuwene sabwa ya dhovonya dhaye. (Ms. 119:5) Masiki dhawene iyene kova onfugulela murimaye Yehova.—Kengesa Masalmo 119:145.

5. Sabwaya jani kaninfwanyela wova omulobelela Yehova nigakosa elobo yabure? Kavaha yotagiha.

⁵ Yehova onowakonvidari attu otene omulobelela iyene masiki na abale akosile dhottega dhinddimuwa. (Iza. 55:​6, 7) Katanalela yotagiha eji: Weyo onokosa oleddo odhowaga mburo ohinziwiwe. Vasogorhova opupuruwa, mbwenyi onfwanya muttu onziwa muruddaya agawukamihedhile ofwanya dila enfuniwe. Kito ogahikana manyazo obe ogahova omukumbirha nikamihedho sabwa ya weyo opupuruwa? Nne-wene! Na mukalelo wakakene, nigapupuruwa obe nigakosa elobo yabure kaninfwanyela wova onfugulela murima wehu Yehova.—Ms. 119:​25, 176.

TXINI ENANIKAMIHEDHE ONFUGULELA MURIMA WEHU YEHOVA?

6-7. Txini enanikamihedhe olobela na murima wehu wotene? Kavaha yotagiha. (Koona vina nota.)

⁶ Niganfugulela murima wehu Yehova, nimwaddelaga esile dhinubuwelihu vina dhinnizuzumiha, ninele okala ofiyedheya na iyene. Kito ttarho gani dhinanikamihedhe okosa ejuwene?

⁷ Katanalela mikalelo dha Yehova.a Nigatanalela mikalelo dha Yehova enokala yovevuwa omwaddela esile dhinubuwelihu vina dhinizuzumiha. (Ms. 145:​8, 9, 18) Koona yotagiha ya murogora onkuweliwa Kristine, babe wali muwali vaddiddi. Iyene ohiloga: “Mwa miyo yali yorutxa omoona Yehova ninga Babi wafwanyelimi onfugulela murima waga. Miyo ddobuwela wi sabwa ya dhowonya dhaga, iyene agahiddinyanyala.” Mukalelo gani wa Yehova omukamihedhile Kristine? Iyene ohiloga: “Okwela woweddeya wa Yehova onoddikuluveliha wi iyene onoddikwela. Miyo ddinoziwa wi iyene kanaddinyanyale. Masiki ddigavonya, iyene onele odhowavi addikwelaga vina addikamihedhaga. Oziwa ejuwene ehiddikamihedha omwaddela Yehova dhilobo dhotene dhinddagalaliha vina dhinddikubanyiha.”

8-9. Mowiwana na yotagiha ya Aliska, ekaleli nni yapama otanalela ejile enfuniwe ologa mu nlobeloni?

⁸ Kobuwela ohinatti ologa. Ohinatti olobela, enowodheya ovikosa mavuzo ninga aba: ‘Makattamiho gani angumanana miyo ovanene? Ddinofwanyelela omulevelela muttu? Ehikalawo elobo etxinjile mwigumini mwaga ovanene enafunimi nikamihedho na Yehova wi ddivilele?’ (2 Am. 19:​15-19) Enowodheya ofwara nlobelo ninisunzihile Yezu nigakosaga malobelo ehu aniwanana na nzina na Mulugu, Omwene Waye vina efunelo Yaye.—Mt. 6:​9, 10.

⁹ Murogora dhahi onkuweliwa Aliska wahizinddiyela wi mamunaye wahikana eradda ya kanseri. Vamaromo, yannimurutxa omulobelela Yehova. Iyene onowubuwela: “Miyo ddakala wokubanyene vina yanddirutxa wubuwela mazu gani afwanyelimi ologa mu nlobeloni.” Kito, txini enimukamihedhile Aliska? Iyene ohiloga: “Ddihinatti olobela, ddinotamela mudhidhi wi ddubuwele mazu gani analogimi, ejo enoddikamihedha ohivizuzumela ddamwinya vina eredda ya mamunaga. Eji vina enoddikamihedha okala wofwaseyene mudhidhi onlobelimi.”

10. Ekalele nni yapama olobela ohimaguvaga? (Koona vina mafoto.)

¹⁰ Kalobela ohimaguvaga. Ebaribari wi malobelo ohigunela anonittukulela okala ofiyedheya na Yehova, mbwenyi nigatamela mudhidhi wa okosa malobelo a mudhidhi mwinjine, txino ninele omwaddela Yehova dhilobo dhotene dhinnizuzumiha.b Elijah mamuni wa Aliska ohiloga: “Miyo ddinolobela dila dhinjene valaboni vina ddigatamela mudhidhi wa okosa malobelo a mudhidhi mwinjene, ddinowona wi mandano aga na Yehova anoliba. Yehova ddovilela, iyene kasilidhiwa malobelo aga agakala a mudhidhi mwinjene. Nona, miyo ddinolobela mpaka mudhidhi onfunimi.” Katamela mudhidhi vina mburo wofwasa wi olobele, txino egawodheya na lizu nowiweya. Vina okane elemelelo ya olobela ohimaguvaga.

KATANALELA MALOBELO ALEBIWE MBIBILIANI

11. Ekalele nni yapama otanalela malobelo alebiwe mBibiliani? (Koona vina kasha “Weyo Oniviwamo Ninga Awene?”)

¹¹ Elobo enanikamihedhe ja otanalela malobelo alebiwe mBibiliani vina jibo dhinimuttittimiha Yehova. Osunza mwaha wa adhari a Yehova anfugulele murima wawa iyene, enele onikamihedha onfugulela murima wehu Yehova. Vina wona mazu alabihedhilani wi amuttittimihena Yehova enonikamihedha iyo ofwanya mazu maswa agalabihedhilihu mmalobeloni mwehu. Txino weyo onodhaga ofwanya malobelo adhari a Yehova agumanilena makattamiho oligana na awo.

12. Mavuzo gani anfwanyelihu ovikosa nigatanalelaga malobelo alebiwe mBibiliani?

¹² Ogengesa nlobelo ninfwanyeya mBibiliani, katanalela dhahi: ‘Okosile nlobelo ntti bani vina makattamiho gani agumaniliyena? Mazu alogiliye anddipatta dhavi? Txini ensunzimi na nlobelo naye?’ Txino enele ofuneya opepesa wi wakule mavuzo aba, mbwenyi ogavilibihedha okosa ejuwene onele opurelamo. Ndoweni none dhotagiha dhing’onovi.

13. Txini ensunzihu na nlobelo na Ana? (1 Samuwel 1:​10, 11) (Koona vina foto ya kapa.)

¹³ Kengesa 1 Samuwel 1:​10, 11. Mudhidhi okosile Ana nlobelo ntti, iyene wela ogumanana dhorutxa. Yoroma, iyene kabala vina yanawili munanddaye wanimbedda vaddiddi nona kakana wagalala. (1 Sa. 1:​4-7) Mbwenyi Ana wahilobela ahimaguvaga vina wahinfugulela murima waye Yehova. Vasogorhova iyene wahipangarhazeya. (1 Sa. 1:​12, 18) Txini ensunziwe na nlobelo na Ana ogagumanagana makattamiho anuttiya wokumuwene? Nigamuroromelana Nabuya mattamiho ehu vina nimwaddela dhotene dhinnikattamiha, iyo vina ninopangarhazeya.—Ms. 55:22.

14. (a) Elobo gani yina ensunzihu na yotagiha ya Ana? (b) Wengesa vina otanalela Nzu na Mulugu, ennikamihedha dhavi oziwa dhilobo dhinfwanyelihu ologa mu nlobeloni? (Koona vina nota.)

¹⁴ Ana wahikana mwana wakuweliwa Samuwel. Muvireli vyaka dhing’novi mmaleli Samuwel obaliwa, Ana wahimuttukulela wa Namakutta Munddimuwa Eli. (1 Sa. 1:​24-28) Iyene wahilobela na murima waye wotene, wahimutamalela Yehova sabwa ya wabarela adhari aye ororomeleya vina wazuzumela.c (1 Sa. 2:​1, 8, 9) Makattamiho a Ana kagomile, mbwenyi iyene wanfwaseyela mareliho avahiwiye na Yehova. Txini ensunzihu na yotagiha ya Ana? Ninele owodha ovilela makattamiho, nigafwaseyela ejile enikoseli Yehova vina ejile endowiye akosaga wi anikamihedhe.

15. Nlobelo na namavuhulela Jeremiya ninnisunziha eni? (Jeremiya 12:1)

¹⁵ Kengesa Jeremiya 12:1. Nsaka dhahi, namavuhulela Jeremiya wahikumuwa vawoniliye attu abure akalaga ninga àna egumi yowagalala. Iyene vina wahikubanya mudhidhi weddihiwiye nobure na ana Izrayel. (Jer. 20:​7, 8) Jeremiya kapwattelihile Mulugu muladdu, nona iyene wahimwaddela Yehova dhotene dhamuzuzumiha. Vasogorhova Jeremiya wahona mukalelo wasisigulile Yehova ana Izrayel àli avuruvuru. Ejo yahimukamihedha okuluvela oligana wa Mulugu. (Jer. 32:19) Nigawonaga attu abure dhilobo dhawa dhaweddelaga pama obe nigeddihiwaga na obure, ninodhaga oviwamo dhahene ninga Jeremiya. Moligana na iyene, enowodheya iyo vina omwaddela Yehova esile dhinnizuzumiha nikuluvelaga wi na mudhidhiya Yehova onele ogomiha obure wotene onnipatta.

16. Txini ensunzihu na nlobelo na Mulevita wahawodha omwebedha Mulugu mu mparhani? (Masalmo 42:​1-4) (Koona vina mafoto.)

¹⁶ Kengesa Masalmo 42:​1-4. Masalmo oddu olebiwe na Mulevita wahawodha omwebedha Yehova na ana Izrayel ena mu mparhani. Mazu aye anotonyihedha mukalelo waviwamo iyene. Nigafugeliwa mukamburha sabwa ya nroromelo nehu obe nigakana eradda ehinniwodhiha obudduwa vatakulu, txino ninodhaga oviwamo dhahene ninga Mulevita oddu. Nona kintanala mukalelo oniviwamo iyo, japama omwaddela Yehova esile dhinnizuzumiha. Ejo enele onikamihedha ononelamo pama esile dhinnizuzumiha vina okana monelo wopimeleleya mwaha wa makaniya. Motagiha, Mulevita oddu wahizinddiyela wi agahikana gari yina ya ottittimiha Yehova. (Ms. 42:5) Iyene vina wantamela mudhidhi wa otanalela mukalelo wamukoya Yehova. (Ms. 42:8) Omulobelela Yehova na murima wehu wotene, enonikamihedha ononelamo pama ejile eniviwamo iyo, wiyelela okana monelo wopimeleleya mwaha wa makaniya vina okana guru ya ovilela.

17. (a) Txini ensunzihu na nlobelo na namavuhulela Jona? (Jona 2:​1, 2) (b) Ekalele nni yapama okoya mmusorhoni malebo a mBibiliani ninga mazu anfwanyeya Mmasalmuni? (Koona vina nota.)

¹⁷ Kengesa Jona 2:​1, 2. Namavuhulela Jona okosile nlobelo ntti mudhidhi waliye mbani mwa oba enddimuwa. Iyene wahikodda omwiwelela Yehova. Masiki dhawene Jona wankuluvela wi Yehova agahivuruwana malobelo aye. Iyene wahilabihedha mazu menjene anfwanyeya Mmasalmuni.d Ejo enolagiha wi iyene wanziwa pama malebo. Otanalela malebo aba emukuluveliha wi Yehova agahimukamihedha. Na mukalelo wakakene, japama iyo vina okoya mmusorhoni malebo a mBibiliani. Dhahene, nigalobelaga mmidhidhini dhorutxa, ninele owodha wubuwela malebo aba vina anele onipangarhaza.

KADHOWAGAVI OKOSAGA MALOBELO ANUTTUKULELA OKALA WOFIYEDHEYA NA YEHOVA

18-19. Nikuluvelo gani ninnivaha Roma 8:​26, 27? Kavaha yotagiha.

¹⁸ Kengesa Roma 8:​26, 27. Masaka mena, ninokala ozuzumene nihiwodhaga omwaddela Yehova esile dhinnidhugudha. Mbwenyi ninofwanyela okuluvela nikamihedho naye. Mudhidhi ninga obu, muya wokoddela wa Mulugu “ononilobelela.” Ejoya empadduwa dhavi? Yehova wahilabihedha muya waye wokoddela wila wakamihedhe anamaleba Bibilia oleba malobelo menjene mBibiliani. Nigahiwodhe ologa dhinnizuzumiha mu nlobeloni mwehu, Yehova onodhaga wona malobelo alebiwe mBibiliani ninga dhokumbirha dhehu. Vina iyene onowakula malobelo aba akalaga ninga behu.

¹⁹ Oziwa ejuwene ehimukamihedha murogora dhahi onkala o Rússia onkuweliwa Yelena. Iyene wahifugeliwa mukamburha sabwa ya olobela vina omwengesa mBibilia. Yelena wali wokubanyene vina wanrutxiwa okosa nlobelo. Iyene ohiloga: “Miyo ddannubuwela wi ddigakala wozuzumene vina ddihikanaga mazu ologa mu nlobeloni, Yehova onorumela malobelo adhari aye a masaka awale . . . ekalaga ninga malobelo aga. . . . Ejo ehiddipangarhaza venjene mudhidhi obule worutxa.”

20. Ogakala wodhugudheyene txini enawukamihedhe olobela?

²⁰ Nigakala odhugudheyene vina nigafunaga olobela enodhaga onirutxa okala ottugareyene. Txini enanikamihedhe? Enowodheya onvuruwana audiyu a nivuru na Masalmo nihinatti okosa nlobelo. Vina enowodheya oleba ejile enivawamo iyo dhahene ninga yakosile Mwene Davidi. (Ms. 18, 34, 142; mwana-musorho NM.) Ebaribari wi kawo magano anloga mukalelo onfwanyelihu ovisasanyedha nigafunaga olobela. (Ms. 141:2) Nona, katamela okosa ejile enakale yovevuwa mwa weyo.

21. Ninfwanyelela nni omulobelela Yehova na murima wehu wotene?

²¹ Johagalaliha oziwa wi Yehova onononelamo mukalelo oniviwamo iyo nihinatti olobela. (Ms. 139:4) Masiki dhawene, iyene onowagalala vina ononivuruwana mudhidhi onimulobelelihu nitonyihedhaga wi ninimukuluvela iyene. Nona kuwove omulobelela Babi wawo wa wirimu. Kalabihedha malobelo alebiwe mBibiliani wi awukamihedhe. Kalobela na murima wawo wotene. Kamwaddele Yehova dhilobo dhotene dhinuwagalaliha vina dhinukubanyiha. Yehova ddi Marho wawo wapama vina mudhidhi wotene iyene onele okala na weyo!