Kudduwale Walobelela Ena

1. Ninziwa dhavi wi malobelo ehu ba makamaka mwa Yehova?

NLOBELO mvaho wamakamaka. Kobuwela dhahi: Yehova ohavaha anju mabasa. (Ms. 91:11) Iyene vina ohinvaha Mwanaye muttorho munddimuwa vaddiddi. (Mt. 28:18) Koddi iyene ohimuttoma muttu wila avuruwanege malobelo? Nne. Yehova ddili Namavuruwana malobelo. (Ms. 65:2 NM) Iyene mwinyene ddinnivuruwana nigalobelaga.

2. Paulo okalile dhavi yotagiha yapama mwaha wa walobelela ena?

² Ninofwanyela okala wotapuwene wi nimwaddele Yehova dhotene dhinnizuzumiha. Vina ninofwanyelela walobelela ena. Murumiwi Paulo ohinivaha yotagiha yapama mwaha wa ejuwene. Iyene wahilebela dhahi mulogo w’o Éfezo: “Ddinelege ouromolanivi mmalobeloni mwaga.” (Ef. 1:16) Paulo wanalobelela ena aromolaga mazina awa. Motagiha, iyene wahimwaddela dhahi Timóteo: “Ddinomutamalela Mulugu, . . . mudhidhi wotene ddinouwubuwela mmalobeloni mwaga, ankosimi na ntidi mattiyu na mutana.” (2 Tm. 1:3) Egumi ya Paulo kiyali yovevuwa, iyene wahikana makattamiho menjene vina wanlobela sabwa ya ejuwene. (2 Ko. 11:23; 12:​7, 8) Masiki dhawene, iyene wantamela mudhidhi wa walobelela attu ena.

3. Nindaga dhavi odduwala walobelela ena?

³ Masaka mena ninodhaga odduwala walobelela attu ena. Ejoya empadduwela nni? Murogora onkuweliwa Sabrinaa ohiloga mwaha mmodha. Iyene ohiloga: “Sabwa ya iyo okana dhilobo dhinjene dhokosa, ninodhaga ozuzumela makattamiho ehu ofiyedha ovilobelelaga nanya mwaha wa esile dhinizuzumiha.” Ejo yahiromaga wupadduwela? Akala ndde, nsunzo ntti ninele wukamihedha (1) osunza ekalelani nni yamakamaka walobelela ena vina (2) wona monelo dhinawukamihedhe okosa ejoya.

NINFWANYELELA NNI WALOBELELA ENA?

4-5. Malobelo ehu andaga dhavi okana “ewodhelo enddimuwa” mwa attu ena? (Tiago 5:16)

⁴ Walobelela attu ena ‘ehikana ewodhelo enddimuwa.’ (Kengesa Tiago 5:16.) Malobelo ehu anodhaga wakamihedha attu ena. Yezu wanziwa wi malobelo anowakamihedha attu ena. Aziwaga wi Pedro agahimukodda, iyene ohiloga dhahi: “Miyo ddinoulobelelaga wa Mulugu wi nroromelo nawo nihobane.” (Lk. 22:32) Paulo vina wanziwa wi malobelo akana ewodhelo. Mudhidhi wafugeliwiye o Roma, iyene wahimulebela dhahi Filémoni: “Ddinokuluvela wi na malobelo anddikoselinyu ddinele ofuruliwa, ddidhé ddikale na nyuwo.” (Flm. 22) Jijuwene yapadduwile. Mudhidhi mung’onovi vasogorhova, Paulo wahidha ofuruliwa vina wahiyelela olaleya.

⁵ Ebaribari wi ejo kintapulela wi malobelo awo anomuddidela Yehova okosa elobo yahafuniye okosa. Mbwenyi Yehova onofwaseyela ovuruwana malobelo adhari aye, masaka mena iyene onogana okosa ejile ekumbirhani. Oziwa ejuwene enonikamihedha omulobelela Yehova na murima wehu wotene mwaha wa makattamiho ehu vina omukuluvela iyene, nittiyaga makaniya maddani mwaye.—Ms. 37:5; koona 2 Korinto 1:11.

6. Mowiwanana na dhotagiha dhoonilihu, txini epadduwa nigalobelela ena? (1 Pedro 3:8)

⁶ Walobelela ena enonikamihedha okana “ttagaraga.” (Kengesa 1 Pedro 3:8.) Muttu onkana ttagaraga onononelamo makattamiho a attu ena vina onokana efunelo yowakamihedha. (Mk. 1:​40, 41) Walobelela attu ena enodhana dhopureleyamo dhinjene. Motagiha mundimuwa wa mmulogoni onkuweliwa Michael ohiloga: “Miyo ddigalobelaga mwaha wa esile dhinajombela attu ena, ddinowodha ononelamo pama makattamiho angumananina vina ejo enowunuwiha wakwela waga. Miyo ddinkala ninga ddili wakuvi na awene, masiki aweneya ahiziwaga.” Munddimuwa mwina wa mmulogoni onkuweliwa Richard ohiloga: “Nigamulobelaga muttu, ninottukuleleya omukamihedha. Nigakosa elobo wi nimukamihedhe muttuya, enkala ninga ninkamihedha wakuliwa wa malobelo ehu.”

7. Walobelela attu ena ennikamihedha dhavi okana monelo wopimeleleya mwaha wa makattamiho ehu? (Filipi 2:​3, 4) (Koona vina mafoto.)

⁷ Walobelela ena enonikamihedha okana monelo wopimeleleya mwaha wa makattamiho ehu. (Kengesa Filipi 2:​3, 4.) Ninkala mwilaboni enlamuleliwa na Satana. Nona iyo notene ninogumanana makattamiho. (1 Jo. 5:19; Ovu. 12:12) Okana elemelelo ya walobelela attu ena enonubutxedha wi “[abalihu], orugunuwa elabo yotene anofwanyiwa makattamiho akakene.” (1 Pe. 5:9) Murogora dhahi oli pionera onkuweliwa Katherine ohiloga: “Walobelela ena enoddubutxedha wi kahiyo miyo meeka ongumanana makattamiho. Ejo enoddikamihedha ohizuzumeletxa makattamiho angumanana miyo.”

AWENE ANOFUNA MALOBELO EHU

8. Bani anfwanyelihu waromola mmalobeloni mwehu?

⁸ Bani onfwanyelihu omuromola mmalobeloni mwehu? Enowodheya walobelela attu ninga aba: Abale angumanana makattamiho a egumi, azombwe antabuwa sabwa ya odideliwa oskola wi akose elobo yabure obe abale angumanana makattamiho sabwa ya wunuwelavo. Abalihu enjene vina anogumanana ofwara-fwariwa na anamudhi obe na alamuleli. (Mt. 10:​18, 36; Mer. 12:5) Sabwa ya owanawana wa alamuleli, abalihu ena ahifiyedha ottiya nyumba dhawa. Oku ena anotabuwa sabwa ya dhifoyo. Txino kaninaziwa abali na arogora aba. Mbwenyi nigaalobelelaga, ninotonyihedha wi ninowiwelela nlamulo na Yezu na ‘okwelana muttu na mukwaye.’—Jo. 13:34.

9. Ninfwanyelela nni walobelela abale asogorhelela nikuru na Yehova vina awadhiwa?

⁹ Enowodheya vina walobelela abale ansogorhela nikuru na Yehova. Motagiha, abali a Nikuru Nolamulela, akamihedhi awa, Asogorheli a Filiali, asogorheli a Beteli, anameddelela milogo, anddimuwa a mmulogoni vina adhari okamihedha. Abali aba anolaba na nttokoso wi anikamihedhe. Ottiya ejo, enji mwa awene anowanana makattamiho awa. (2 Ko. 12:15) Motagiha, nameddelela milogo onkweliwa Mark, ohiloga: “Yorutxa enddimuwa engumanimina ja okala wolapelana na amambalaga. Awene bowunuwelavo vina anogumanana makattamiho a egumi. Miyo ddinoziwa wi murogoraga na mamunaye anowakamihedha. Mbwenyi ddinokubanya sabwa ya ohiwodha wakamihedha ninga mwafunelimi.” Kaninziwa makattamiho otene angumanana abali aba, mbwenyi japama waromolaga mmalobeloni mwehu. (1 Te. 5:​12, 13) Enowodheya vina walobelela awadhiwa, sabwani anowakamihedha abali aba odhowagavi azuzumelaga mabasa attomeliwani.

10-11. Ninziwa dhavi wi nigalobelelaga abalihu orugunuwa elabo yotene, Yehova onowagalala masiki nihiromolaga mazina awa?

¹⁰ Ninga moonelihu, dila dhinjene ninowalobelela abalihu na arogora. Motagiha, masiki nihiromulaga mazina awa, ninomumbirhaga Yehova wi akamihedhe abali ali mukambura vina abale amuyelelile muttu mukwani. Munddimuwa wa mmulogoni onkuweliwa Donald ohiloga, “Nikana abali enjene angumanana makattamiho, dila dhina ninomulobelela Yehova wila akamihedhe abali orugunuwa elabo yotene antabuwa.”

¹¹ Koddi malobelo aba anomwagalaliha Yehova? Ndde! Iyo kaninziwa mowakwana-mwene esile dhinajombela abalihu. Nona kahiyo yabure walobelela abali orugunuwa elabo yotene. (Jo. 17:20; Ef. 6:18) Malobelo aba anolagiha ‘okwela onihuna na abali ali orugunuwa elabo yotene.’—1 Pe. 2:17.

KALOBELA OROMOLAGA MAZINA AWA

12. Ofwaseyela wang’ana ennikamihedha dhavi walobelela ena?

¹² Ofwaseyelege wang’ana. Ottiya walobelela bahi abali na arogora otene, enowodheya omolobelela mbali oromolaga nzina naye. Onomuziwa mbali wa mmulogoni mwawo onwanana eredda ehina murobwe? Ohikalawo muzombwe oli wokumuwene obe ongumanana makattamiho oskola? Onomuziwa mbali obe murogora onivilibihedha omulela mwana yeka ‘afwaraga malago a Yehova’? (Ef. 6:4) Ogafwaseyela wang’ana onele owodha watonyihedha ttagaraga attu ena, ejo enele wukamihedha waromola malobeloni mwawo.b—Rom. 12:15.

13. Txini enanikamihedhe okosa malobelo naromolaga abale ahinaziwihu?

¹³ Kalobelele abali oromolaga mazina awa. Mmalobeloni mwehu enowodheya oromola mazina a abali ahinaziwihu. Ninga motagiha, abali enjene na arogora ali mukambura o Cingapura, Crimeia, Eritreia vina o Rússia. Mu site jw.org, munofwanyeya mazina a abali aba.c Nameddelela milogo onkuweliwa Brian ohiloga dhahi: “Ddihinonelamo wi oleba nzina na mbali oli mukambura, enoddikamihedha oromola nzina naye mmalobeloni mwaga.”

14-15. Txini enanikamihedhe omukumbirha Yehova mmalobeloni mwehu ejile enajombela abalihu?

¹⁴ Ogalobelaga karomola ejile egaziveliwiwe wi Yehova akose. Michael, ologiwe mundduni ohiloga dhahi: “Ddigengesaga dhotagiha dhili mu saiti jw.org dha abali afugeliwe, ddinotamela ovika vamburoni vawa. Mwebaribari miyo ddigahizuzuma sabwa ya mwadhaga, dditamelaga bani agamukoyile. Eji enoddikamihedha walobelela kakamwe abali atelile ali mukambura.”—Ahe. 13:3.

¹⁵ Otamela ononelamo makattamiho angumanana abalihu ali mukambura enonikamihedha oromola makattamiho awa mmalobeloni mwehu. Motagiha, enowodheya olobela wi ang’aneli aweddihege deretu abalihu vina alamuleli àrumelihe omwebedha Yehova na ofuru. (1 Tm. 2:​1, 2) Nilobele wi yotagiha ya abali aba ororomeleya yalibihe abali a mulogo waddamelani vina attu ahinimulabela Yehova agoona mweddelo wawa attukuleleye orumela miselu dhapama. (1 Pe. 2:12) Enowodheya vina olabihedha monelo esi wi nalobelele abali angumanana makattamiho mena ottiyana-ttiyana. Nigakala attu anfwaseyela wang’ana, niromolaga mazina a abalihu mmalobeloni mwehu vina niromolaga kakamwe ejile enfunihu, ninowoniha okwela wehu webaribari muttu na mukwaye.—1 Te. 3:12.

KAKANA MONELO WOPIMELELEYA MWAHA WA MALOBELO AWO

16. Ninfwanyelela nni okana monelo wopimeleleya mwaha wa malobelo ehu? (Mateu 6:8)

¹⁶ Ninga moonelihu, malobelo ehu anodhaga omukamihedha muttu. Mbwenyi ninofwanyelela okana monelo wopimeleleya mwaha wa malobelo. Nigalobelaga kaninimwaddela Yehova elobo ehinziwiye. Wi Yehova akose yogana obe agomihe makaniya na mukalelo wapama, kili yofuneya iyo onvaha malago. Muttu ahinatti oziwa ejile enimujombela—obe iyo nihinaziwa—Yehova onoziwa dhinimujombela. (Kengesa Mateu 6:8.) Kito ekalele nni yofuneya walobelela ena? Ottiya mwaha dhonilihu, walobelela attu ena entonyedha okwela onihuna muttu na mukwaye. Yehova onowagalala vaddiddi agawonaga adhari aye atonyihedhagana okwela.

17-18. Yotagiha gani ennikamihedha okana monelo wopimeleleya mwaha wa malobelo ehu?

¹⁷ Dila dhina ninodhaga wubuwela wi malobelo ehu kanttidda mpirha. Masiki dhawene, malobelo ehu anolagiha okwela onihuna na abalihu vamodha na arogora. Ottiya ejuwenevi, Yehova onofwaseyela ovuruwana malobelo ehu. Wi niladdanihe, kawubuwele amambali anna aima eli—mwana mulobowana na mwana muyana. Oku mwana mulobwanaya okala muredda vaddiddi. Mwana muyanaya onomunlela babe alogaga dhahi: “Ddinowukubirhani mmukamihedhe murogoraga. Iyene muredda vaddiddi!” Babe onoziwa dhotene; iyene onomukwela mwanaye vina onokosa muli-mwetemwene wi mwanaya avulumuwe. Katanalela wagalala onkana babe agamoona mwanaye wa muyana amuzuzumelaga murogoriye vina ofiyedha omunlela babe wi amukamihedhe.

¹⁸ Jijuwene ennikokomeza Yehova okosa. Iyene onfuna wi nizuzumelagane vina nilobelelagane muttu na mukwaye. Nigakosa ejuwene, ninolagiha wi kaninivuzuzumela nanya bahi, mbwenyi ninowakwela abalihu na murima wehu wotene. Yehova onowona ejoya. (2 Te. 1:3; Ahe. 6:10) Ninga moonelihu, masaka mena malobelo ehu anodhaga wakamihedha abale angumanana makattamiho mwigumini mwawa. Nona kanittiye walobelela attu ena.