Muttu Onimukwelihu Agamunyanyala Yehova

1. Ena aniwamo dhavi muttu onimukwelani agaburutxiwa mmulogoni?

WEYO ohikaana marho obe munammudhi oburutxiwe mmulogoni? Eji elobo enkubanyiha vaddiddi! Murogora dhahi ontxemeriwa Hilda ohiloga: “Mamunaga okwile banina vyaka 41 dhotelana, miyo ddobuwela wi wiwopa oku wali wottabwaya.b Mbwenye muttihile mwanaga ebaribari vina mwadhiye na anaye opawa wahittabwa vaddiddi.”

2-3. Mowiwanana na Masalmo 78:40, 41, Yehova oniwamo dhavi emeleli aye agattiya omwebedha?

² Kobuwela mukalelo wewile Yehova opa mudhidhi wattihile anju omulabela! (Juda 6) Nanda katanalela mukalelo okubanyile Yehova mudhidhi wasadduweliwiye wili-wili na nlogo naye. (Kengesa Masalmo 78:40, 41.) Kakana ebaribari wi mukwawo obe mwanammudhi agattiya ebaribari, Yehova onokubanya venjene. Okane ebaribari wi Babihu wokweleya wa wirimu onoziwa wiwopa wawo. Na mukalelo wofwanyelela Yehova onele wuvaha nikamihedho vina nipangarhazo ninfuna weyo.

³ Mwari mwa nsunzo ntti, ninele wona enfwanyela iyo okosa wi nakele nikamihedho na Yehova. Ninele wona vina mukalelo owakamihedha attu a mmulogoni anfwanyiwa makattamiho aba orutxa. Nihinatti, ninele wona mubuwelo wabure onfwanyela iyo orabela.

KUVIPWATTELIHE MULADDU

4. Attu enji aniwamo dhavi aniwa agattiya omulabela Yehova?

⁴ Mwana wokweleya agattiya omulabela Yehova, amambali anozugudheya vaddiddi obuwelaga egakosilani wi amukamihedhe mwanawa okalavi mwibaribarini. Mwana wa mbali onkuweliwa Luke, muburutxeliwiye mmulogoni iyene ohiloga: “Miyo ddanivipwatteliha muladduya. Miyo ddanrowa sabwa ya ejuwene. Masaka mena ddanunla vina murima waga wanddipa.” Elizabeth, murogora dhahi opattiwe makattamiho akakene, masaka menjene wanivitabutxa obuwelaga: “Miyo ddivonyile vavi? Ddinubuwela wi kaddikosile muli-mwetemwene wila ddimukamihedhe mwanaga okwela ebaribari.”

5. Muttu agattiya omulabela Yehova, muladduya bwani?

⁵ Iyo ninofwanyela wubuwela wi Yehova onvaha muttu-muttu ofuru wosakula. Muttu-muttu wa iyo onofwanyela osakula akala onele omulabela Yehova obe nne. Motagiha, azombwe enji amambali awa kali yotagiha yapama masiki dhawene awene ahisakula omulabela Yehova. Ahikalawo azombwe ena, aleliwe na amambali ali Anamoona a Yehova abuwene avilibihedhile wasunziha Magano a Yehova masiki dhahene azombwe aba ahittiya ebaribari mudhidhi wunuwilani. Eji ennisunziha eni? Eji ennisunziha wi muttu ddi muttu ddinsakula omulabela Yehova. (Jos. 24:15) Noona akala weyo wa babi obe wa mai onkubanya sabwa ya mwanawo obudduwa mmulogoni kakana ebaribari wi weyo kuna muladdu, akala mubuwelo obu onodha mmusoroni mwawo kavilibihedhe oburutxamo!

6. Muzombwe oniwamo dhavi mambali waye agattiya ebaribari?

⁶ Masaka mena, mambali mmodha onottiya ebaribari vamodha na anamudhi aye. (Masal. 27:10) Eji enokalaga elobo yorutxa mwa ahima sabwani animona babiwa ninga yotagiha. Esther, omonile babe bagaburutxiwa mmulogoni ohiloga: “Miyo masaka menji ddanunla, yaddunliha kahiye iyene oburutxiwa mmulogoni bahi yali sabwa ya iyene ogana ohiyelela mmulogoni vina. Miyo ddinomukwela venjene babani noona muburutxeliwiye mmulogoni ddantamela oziwa mukalelo waliye. Masaka mena ddanubuwela vaddiddi ofiyedha okaana makattamiho a muyubuweloni.”

7. Yehova onimoona dhavi muzombwe ona mambali mmodha oburutxiwe mmulogoni?

⁷ Azombwe, akala mambali wenyu mmodha ohiburutxiwa mmulogoni, iyo ninowukubanyedhani venjene! Ninoukumbirha, kakana ebaribari wi Yehova onoziwa wiwa opa wawo. Iyene onowukwela vina onovaha ttima ororomeleya wawo—iyo vina abalawo na arogora ororomeleya. Ottiya ejo, kudduwale wi kahiyo weyo omukokomezile mambali wawo okosa yosakula ekosiliye. Ninga mulogeliwe mundduni Yehova ohinvaha muttu-muttu ofuru wosakula. Muttu-muttu “onopwathela dhitoteyile na merelo aye.”—Gal. 6:5.

8. Amujedhaga munammudhi oburutxiwe mmulogoni omwiyelela Yehova txini enfwanyela okosa anamudhi ena? (Koona kasha “Volte para Jeová.”)

⁸ Muttu onimukweliwe agattiya omulabela Yehova, onokana njedhelo wi muttuya onele omuyelela. Txini enfwanyela weyo okosa mudhidhi oli muttuya otakulu wa mulogo? Jamakamaka weyo odhowavi bugonuwa mpaddi womuyani. Dhahene weyo onele ottiya yotagiha yaderetu wa anamudhi ena vina mwa oddule oburutxiwe mmulogoni. Weyo vina onele wakela guru dhinfuniwe wi owanena mubuwelo wohikala. Ndowe noone dhilobo dhinfwanyela weyo okosa.

TXINI ENFWANYELA WEYO OKOSA WILA OVADDE MPADDI WOMUYANI

9. Txini enakose weyo wi wakele guru dha Yehova? (Koona kasha “Malebo Anawukamihedhe Opemberha Wiwa Opa.”)

⁹ Osunzege malabo otene Mazu a Mulugu. Jamakamaka odhowavi bugalibiha nroromelo nawo vina na anamudhi awo a vamuralani. Onakose dhavi? Kagana omwengesa Bibilia masiku otene, otanalela vina wona matugumano, ejo enele wukamihedhe wakela guru dha Yehova. Joanna, ohiloga dhahi sabwa ya mbale vina babe oburutxiwe mmulogoni: “Ddinokurumuwa ddigamala wengesa mapadduwo a attu ali mBibiliani ninga Abigaili, Ester, Job, José, na Yezu. Dhotagiha dhawa dhinoddikamihedha odhaliha mubuwelo waga na dhilobo dhapama dhinddikamihedha owanana makattamiho aga. Wona clipes musicais dhinoddipangarhaza venjene.”

10. Weyo ogakala wokubanyene nlebo na Masalmo 32:6-8 ninawukamihedhe dhavi?

¹⁰ Kamwaddele Yehova ejile eniwamo weyo. Ogakala wokubanyene kuttiye olobela. Kamukumbirhe wi awukamihedhe woona makattamihoya ninga munonela iyene. Omukumbire vina wila awusunziye ‘dila enfwanyela weyo wedda.’ (Kengesa Masalmo 32:6-8.) Masaka mena enele okala yorutxa omwaddela Yehova ejile eniwamo weyo. Mbwenye iyene ononona wiwa opa wawo. Yehova onowukwela venjene vina onowukokomeza wi omwaddele dhotene.—Obud. 34:6; Masal. 62:7, 8.

11. Mowiwanana na Ahebreu 12:11, ninfwanyelela eni okuluvela nlago na Yehova? (Koona kasha “Oburutxiwa Mmulogoni—Yotonyihedha wa Okwela wa Yehova.”)

¹¹ Okamihedhe yogana ya anddimuwa a mmulogoni. Oburutxiwa mmulogoni masasanyedho a Yehova. Mukalelo wapama wa omukamihedha muttuya ottegile vina elobo yamakamaka vaddiddi wa mulogo wotene. (Kengesa Ahebreu 12:11.) Txino weyo wahiromaga omwiwa mbali bagaaloga bure anddimuwa a mmulogoni sabwa ya muttu mmodha oburutxiwa mmulogoni mbwenye mbaliya oddo kanziveliwa ologa dhilobo dhabure dhikosile muttuya oburutxiwe mmulogoni. Ebaribariya jawi iyo kanina matibelo etene. Kakana ebaribari wi abali akosile epaddi ya Comição Judicativa, ahikosa muli mwetemwene wila afware malago ali mBibiliani vina ogomiha makaniya mowiwanana na ‘efunelo ya Yehova.’—2 Map. 19:6.

12. Yopurelamo gani yamakamaka enkana abale akamihedhile nlago na Yehova?

¹² Weyo ogakamihedha yogana ya anddimuwa a mmulogoni, txino onodhaga omukamihedha muttuya oburutxiwe mmulogoni wiyelelamo. Murogora Elizabeth ologiwe mundduni owenjedhedha: “Ohiloga na mwanihu oburutxiwe mmulogoni yali elobo yorutxa vaddiddi. Mbwenye muyeleliye mmulogoni wahiloga munya wi wahifwanyelela oburutxiwa mmulogoni wene. Musogoromwa, iyene wahiloga wila wahisunza dhilobo dhinji dhamakamaka. Eji ehiddikamihedha woona wi nlago na Yehova ttamakamaka.” Mark mamuni wa Elizabeth ohiloga vina: “Muvireli mudhidhi mwinjene, mwanehu ohiloga wi emukamihedhile wiyelela mmulogoni yali yogana yehu yokosa dhilobo dhapama. Miyo ddinomutamalela venjene Yehova mwaha wa onikamihedha okala attu owiwelela.”

13. Txini enawukamihedhe weyo owanana wiwopa?

¹³ Kaloga na amarho annonelamo makattamiho awo. Warhedhege na abali oliba mpaddi womuyani anawukamihedhe okaana mubuwelo wofwanyelela. (Gano 12:25; 17:17) Joanna, ologiwe mundduni, ohenjedhedha alogaga: “Mmurimani mwaga ddavihona meka. Mbwenye mudhidhi waloga miyo na amarho okuluveleya ddankala deretu.” Ki akala abali ena a mmulogoni anologa dhilobo dhinusilidha?

14. Sabwaya jani enfwanyela iyo ‘ovilelana vina olevelelana na murima wotene’?

¹⁴ Kakala wokurumuwa na abali awo ororomeleya. Mwebaribari kahiye attu etene analoge dhilobo dhofwanyelela. (Tia. 3:2) Iyo notene nili attu ohiligana noona kutikine akala attu ena kanakane yologa obe akala anologa elobo sofuna enunyimula. Kobuwela nlago nivahile murumiwi Paulo: “Muvilelagane, mulevelelagane dila dhetene dhinthegelana nyuwo. Muthu-muthu amulevelele mukwaye n’ekalelo euleveleleni Nabuya.” (Kol. 3:13) Murogora mmodha wana munammudhi oburutxiwe mmulogoni ohiloga: “Abali ena ahitamela okosa dhilobo dhapama na mukalelo wohiligana. Mbwenye Yehova ohiddikamihedha walevele la.” Txini enfwanyela okosa mulogo wila aakamihedhe abale ana munamudhi oburutxiwe mmulogoni?

MULOGO ONOWODHA OKAMIHEDHA

15. Txini enakose iyo wila nakamihedhe abali ana munammudhi oburutxiwe mmulogoni?

¹⁵ Kakala marho wa anamudhi a muttu oddule oburutxiwe mmulogoni. Mbali a murogora Miriam muburutxeliwiye mmulogoni, Miriam wanova odhowa mmatugumanoni. Iyene ohiloga: “Miyo ddannova dhafuna ologa attu ena. Mbwenye abali ahiddakela na mada meli vina ahikubanya vamodha na miyo. Awene vina kalogile elobo yohikala sabwa ya ejile epadduwile na mmabalaga. Sabwa ya nikamihedho na abali vina arogora miyo kaddiwanilena makattamiho aga meka.” Murogora mwina onowubuwela: “Vaburutxiwe mwanihu mmulogoni abali ehu okweleya ahidha onipangarhaza. Ena ahinaddela wi kaana yologa masiki dhawene awene ahunla na iyo. Enagu ahiddiperhengeza makarta opangarhaza. Ekosilani ehiddilibiha venjene!”

16. Mulogo onadhowevi dhavi bugakamihedha murala wa muttu oburutxiwe mmulogoni?

¹⁶ Kadhowavi bugakamihedha anamudhi a muttu oburutxiwe mmulogoni. Ovanene awene anofuna olagihiwa okwela vina nipangarhazo opitta mwawale. (Aheb. 10:24, 25) Dila dhina, abali enagu anottiya ologa na abali ana muttu oburuxiwe mmulogoni ekalaga ninga awene vina ale oburutxiwa mmulogoni. Kuttiye ejo opadduwa! Anfunetxa nikamihedho vina opangarhaziwa ba azombwe ana mambali mmodha oburutxiwe mmulogoni. Maria, omonile mamunaye aburutxiwaga mmulogoni vasogorhova anyanyala murala waye ohiloga: “Akwaga ena ahidha vatakulo ahinipiyela vina ahinikamihedha okosa nsunzo na ntakulu. Awene ahiwa opa waga vina ahunla na miyo. Muromile ovavihiwa muselu wottambi mwaha wa miyo awene kaddinyanyalile alivi na miyo vina ahiddibarela. Awene txibarene ahiddilibiha!”—Rom. 12:13, 15.

17. Txini enakose anddimuwa a mmulogoni wila apangarhaze anamudhi a muttu oburutxiwe mmulogoni?

¹⁷ Anddimuwa a mulogo, kapurani gari ena nyuwo yolibiha nroromelo na abali ana muttu oburutxiwe mmulogoni. Nyuwo muhikaana ettomo enddimuwa yowapangarhaza abali ana anamudhi aburutxiwe mmulogoni. (1 Tes. 5:14) Mutamele wapangarhaza matugumano ahinatti oroma obe agagoma. Mwawaredhele abali aba vina mulobele nawene. Kalaba na awene mmabasani olaleya, egawodheya wawobele va webedhani venyu wa ntakulu. Akumbuzi oliba mpaddi womuyani anoziwa wi anofwanyelela otonyihedha okwela vina ozuzumela mabila a Yehova anfwanyiwa makattamiho.—1 Tes. 2:7, 8.

KURIMELIWE NJEDHELO KADHOWAVI BUGAMUROROMELA YEHOVA

18. Mowiwanana na 2 Pedro 3:9, txini enfuna Mulugu wila attu abale aburuxiwe mmulogoni akose?

¹⁸ Yehova “kanfuna orimela wa muthu nne mmudha; onfuna wi etene afwanye mudhidhi worugunutxa murima.” (Kengesa 2 Pedro 3:9.) Masiki akala muttu wile okosa yottega enddimuwa egumi yaye ekana ttima vamentoni va Yehova. Yehova ohipitxa muttengo munddimuwa—na egumi ya Mwaneye—wi avune attu otene. Na okwela onddimuwa Yehova onowakamihedha attu abale aburutxiwe mmulogoni wila amwiyelele. Iyene onjedhela wi attu aba arumele nikamihedho ntti ninga munlogela musibo wa Yezu wa mwana wopawula. (Lk. 15:11-32) Attu enji anyanyalile ebaribari musogoromwa ahimwiyelela Babiwa wokwela wa wirimu. Nanda mulogo owawakela na mada omeli. Elizabeth, ologiwe mundduni wahagalala mumoniliye mwanaye bageyelela mmulogoni. Obuwelaga masaka a mundduni ohiloga: “Ddinowatamalela otene addikamihedhile okanavi njedhelo.”

19. Enfuneyela nni iyo odhowavi banigamukuluvela Yehova?

¹⁹ Iyo ninofwanyela odhowavi banigamukuluvela Yehova. Mashagiho otene annivaha Yehova anonipuriha. Iyene Babi onaweddiha deretu ananye vina ddovaha. Yehova onowakwela otene animwebedha na murima wotene. Kakana ebaribari wi ogafwanyiwa makattamiho orutxa Yehova txipo kanawuttiye. (Aheb. 13:5, 6) Mark ologiwe mundduni ohiloga: “Yehova txipo kanittihile. Masaka otene afwanyiwihu makattamiho iyene wali na iyo.” Yehova onodhowavi bagahuvahani “owodha onddimuwa.” (2 Kor. 4:7) Noona masiki akala muttu onimukweliwe onomuttiya Yehova kakana ebaribari wila enowodheya weyo odhowavi ororomeleya vina ohirimeliwa njedhelo.