Mavuzo Ankosa Anamengesa

Valebile Davidi mazu anfwanyeya va Masalmo 61:9 [Masal. 61:8, Tradução do Novo Mundo] anloga, ddinele owibela nzina na Mulugu “namukalakala” yatapulela wi iyene kagakwile?

Nne. Mazu alebile Davidi beebaribari.

Koona dhilebiliye nversuni eji na versu dhina dholaddana: “Ddinere wibela nzina nenyu [namukalakala], ddinere ovirihagamovi dhipikirhelimi.” “[Yehova] Mulugu waga, ddinere outamalani na murima waga wotene, ddinothithimiha nzina nenyu [namukalakala].” “Dditamalaga nzina nenyu okala nokala-wene.”—Masal. 61:8; 86:12; 145:1, 2.

Valebile Davidi mazu aba, iyene kafuna ologa wi txipo kagakwile. Davidi wanziwa wi attu agahikwa sabwa ya yottega, iyene wahiloga wi wali muttu ohakwana. (Wita 3:3, 17-19; Masal. 51:4, 5) Vina wanziwa wi alobwana ena arumeeliwe na Mulugu ninga Abrahamu, Izaki vina Jakob ahikwa. Davidi kaganyedha wi iyene agahikwa. (Masal. 37:25; 39:4) Mbwenye mazu anfwanyeya va Masalmo 61:9 anloga wi onele omuziveliha Yehova namukalakala, atapulela wi agahikosa ejuwene okalawo waye wotene.—2 Sam. 7:12.

Masaka mena Davidi wanleba dhotagiha dha mwigumini mwaye, iyo ninowodha woona ejuwene mu nivuruni na Masalmo 18, 51 na 52. Munivuruni na Masalmo 23, Davidi onimutonya Yehova ninga mukumbuzi waye onimweddiha, onimukamihedha vina onnibarela. Davidi vina wali mukumbuzi. Iyene wanfuna venjene omulabela Mulugu mwigumini mwaye motene.—Masal. 23:6.

Kanidduwale wi ddi Yehova onvudheleli Davidi oleba mazu aba. Mazu alebile Davidi munofwanyeya mavuhulo a dhilobo dhigapadduwile musogorho. Motagiha, va Masalmo 110 Davidi ohileba mudhidhi ogagilatile Nabuyaye omononi woja wirimu vina ottambirha ewodhelo enddimuwa. Wila akose nni? Wi apuranye amwiddani a Mulugu vina “onere othonga malogo” a mwilaboni mwetemwene. Davidi nikolo na Yezu oli Mesiya, Mesiya onele olamulela ovenyana wirimu vina onele okala “namakutha [namukalakala].” (Masal. 110:1-6) Yezu wahiloga wi nivuhulo ninfwanyeya va Masalmo 110 ninloga sabwa ya iyene nigahakwanihedheya musogorho.—Mt. 22:41-45.

Ndde, Yehova wahinvudhelela Davidi wila alebe dhilobo dhigapadduwile nsaka naye vina dhigapadduwile musogorho mudhidhi ogavenyihiwe iyene wi amwagalalihe Yehova namukalakala. Nona, mazu anfwanyeya va Masalmo 37:10, 11, 29 anele wakwanihedheya na mudhidhiya kuloga musogorho. Mpaddi wa maversu aba akwanihedheyile nsaka na ana Izrayel vina anele wakwanihedheya kakamwe musogorho, Mulugu agakwanihedha mapikirhelo aye.—Koona ddima 8 mwari mwa nsunzo ntti mutoma “Onokala na Miyo [Mparaizu].”

Mazu anfwanyeya va Masalmo 61:9 na maversu mena antonyihedha wi Davidi wafuna amwagalalihe Yehova mwigumini mwaye mwetemwene. Eji entonya wi Davidi wafuna okose ejuwene mudhidhi oganvenyihile Yehova wi akalewo wili.