Enowodheya Okana Murenddele Mudhidhi Worutxa

1. “Murenddele wa Mulugu” txini vina ninapurelemo dhavi nigakana? (Filipi 4:6, 7)

OHIKALAWO murenddele ohinziwa attu a mwilaboni, “murenddele wa Mulugu.” Murenddele obu onda sabwa ya iyo okana mandano ofiyedheya na Babihu wa wirimu. Iyo nigakana murenddele wa Mulugu ninkala obareleyene. (Kengesa Filipi 4:6, 7.) Ninokana mandano na attu animukwela Yehova. Vina ninokana mandano ofiyedheya na Mulugu “onvaha murenddele.” (1 Tes. 5:23) Nigamuziwa, nigamukuluvela vina nigamwiwelela Babi wehu, murenddele wa Mulugu onele onikamihedha okala ofwasa nigafwanyiwa makattamiho orutxa.

2. Sabwaya jani enfwanyela iyo okana nikuluvelo nawi enowodheya okana murenddele wa Mulugu?

² Enowodheya okana murenddele wa Mulugu nigapattiwa maredda ovapeya, dhifoyo dha mwilaboni, owana-wana wa malogo vina ofwarafwariwa? Nigapattiwa makattamiho ninga aba ninodhaaleliwa wova. Nona Yezu awaddela anamafwara aye: “Murima wenyu ohidhugudheye, ohove.” (Jo. 14:27) Mohagalaliha mwene, abali vamodha na arogora ahifwara nlago ntti na Yezu. Na nikamihedho na Yehova, awene ahiwodha ofwanya murenddele masiki agumanagana makattamiho orutxa.

NINAWODHE DHAVI OKANA MURENDDELE VAGAPADDUWA OVAPEYA WA EREDDA

3. Eredda yovapeya egadhile dhavi ozuzumiha murenddele wehu?

³ Vizini dhinodhaga otxinja egumi yehu. Karoma otanalela mukalelo opattiwe attu enjene na eredda eji ya COVID-19. Dhopepesiwa dhikosiwe, dhinoniha wi attu ena a mwilaboni ahiloga wila ahikana makattamiho a ofwanya tturho mwari mwa ezini eji. Eredda eji ehatotela attu enjene odhugudheya, maredda a muyubuweloni, ottabwiha omwa, oja mirobwe dhinnonga ogogo, violência domestica vina otagiha ovipa. Akala murudda onkaliwe ohipattiwa na eredda yovapeya, onawodhe dhavi wang’anela odhugudheya vina okana murenddele wa Mulugu?

4. Mavuhulo alogile Yezu mwaha wa masiku omariha annivaha dhavi murenddele?

⁴ Yezu wahiloga dhilobo dhigapadduwile masaka omariha ninga viredda dhoraviheya, “mmimburoni [dhottiyana-ttiyana].” (Lk. 21:11) Oziwa dhimpadduwa masaka aba omariha dhinnivaha dhavi murenddele? Nigonaga winjiva wa maredda kanintikina. Sabwani dhilobodha dhinopadduwa dhahene ninga mwalogile Yezu wi dhigahipadduwa. Nona nihikana mwaha wa ofwara nlago na Yezu navahiliye attu agakalile masaka omariha, nawi: “Kamutxutxeye.”—Mt. 24:6.

5. (a) Mowiwanana na Filipi 4:8, 9, txini enfwanyelihu olobelela nigafwanyiwa ovapeya wa eredda? (b) Ovuruwana audiyu dhogaravariwa dha mBibiliani enupuriha dhavi?

⁵ Ovapeya wa eredda onodhaga onittukulela wova. Eji ehimpadduwela murogora dhahi onkuweliwa Desi.b Mumalile okwa tio waye, primwaye vina dotoro na COVID-19 iyene wannova orava eredda eji vina omuraviha maye owunuwelavo. Eredda eji yahika vang’ovini ganyo yaye, iyene wannivivuza mukalelo ogawodhiliye ovisapela vina opitxela numba. Esi dhannimuzuzumiha mpaka iyene oyelela tturho omattiyu wotene. Mbwenye Desi wahidha ofwanya murenddele. Dhavi? Iyene wahimukumbirha Yehova ejile yafuniye, okala wofwasa vina wubuwela dhilobo dhapama. (Kengesa Filipi 4:8, 9.) Desi wannimwiwa Yehova “alogaga” na iyene modhela dhovuruwana dha mBibiliani. Iyene ohiloga, “Dhovuruwana dha mBibiliani dhiddipangaraza vina dhiddiridhiha murima, ddahubuwela ttagaraga ya Yehova.”—Masal. 94:19.

6. Nsunzo nawo n’omwinya vina otugumana ninawukamihedhe dhavi?

⁶ Ovapeya wa eredda onodhaga ozuzumiha dhilobo dhinkosiwe siku na siku, mbwenye kuttiye ejo ozuzumiha nsunzo nawo n’omwinya vina otugumana. Dhotagiha dha abali dhinfwanyeya mmanivuruni vina mmavidiyuni, dhinele owubutxedha wi awene anovilibihedha okalavi oweddeyana masiki afwanyiwaga makattamiho ninga aba. (1 Ped. 5:9) Guru enkosiwe ya wonaga matugumano enele wukamihedha okana dhubuwelo dhapama dhindela mBibiliani. Ottiya ejo dhinele wukamihedha walibiha attu ena. (Rom. 1:11, 12) Ogobuwela mukalelo wakamihedhile Yehova alabeli aye, mudhidhi ofwanyiwani makattamiho a eredda, mudhidhi wavyonani woka vina mudhidhi wodhugudheya nroromelo nawo ninele oliba, ottiya ejo onele okana ebaribari yawi Yehova onele wukamihedha.

7. Onsunzavo eni na yotagiha ya murumiwi Joau?

⁷ Ologege na abalawo vina arogorawo. Egakalawo eredda yovapeya enodhaga ofuneya okalaga wolapela na abalihu. Mudhidhi obu onodhaga oviwamo ninga murumiwi Joau. Iyene wanfuna omoona mukwaye Gayo kove na kove. (3 Jo. 13, 14) Masiki dhawene wannonelamo wi obule kuwali mudhidhi wa iyene omoona mukwaye Gayo. Nona Joau wahimulebela karta Gayo. Egakala yorutxa wawaredhela abalihu obe wawona kove na kove, enowodheya waligarela na muttitto, wawona modhela vidiyu konferensia, ologa na awene modhela mensagem. Nigalabihedhaga marhe aba wi niwodhe ologa na abalihu, ninele okala obareleya vina ninele okana murenddele. Ogadhugudheya muyubuweloni, kavede anddimuwa a mmulogoni vina orumeela nikamihedho ninfunani wuvaha.—Iza. 32:1, 2.

OKANE MURENDDELE OGAFWANYIWA EFOYO

8. Efoyo endaga dhavi ozuzumiha murenddele wawo?

⁸ Akala weyo wahiroma otabuwa sabwa ya muneri, ottekenyeya wa elabo obe ogweliwa numba, txino wahidhugudheya muyubuweloni mwari mwa mudhidhi mwinjene, masiki muvirile makattamihoya. Akala ohayelela anamudhi okweleya mukwani vina dhilobo dhawo dhinongeya sabwa ya dhifoyo wahitabuwa venjene vina wahiyeleliwa njedhelo obe wahisilidheya. Eji kintapulela wi weyo onokwela dhilobo dhomaningoni obe kunna nroromelo. Attu ena anodhaga wubuwela wi wel’ottongiwa mwaha wa makattamiho abo aupattile obe anodhaga wubuwela wi onele wiyelela mundduni. (Job 1:11) Masiki na makattamiho aba otene, enowodheya weyo ofwanya murenddele. Dhavi?

9. Txini enaddelile Yezu sabwa ya dhilobo dhigapadduwile musogorho?

⁹ Kobuwela dhilobo dhalogile Yezu wi dhigahipadduwa. Mottiyana na attu a mwilaboni ahinjeedhela opattiwa na dhifoyo, iyo ninojedhela winjiva wa makattamiho antoteya na dhifoyo, vina mena anele onipatta. Yezu wahawaddela anamafwara aye sabwa ya “othekenyeya wa elabo” vina makattamiho mena agapadduwile omagomo wa elabo. (Lk. 21:11) Iyene vina wahiloga wi onele okalawo “winjiva wa obure,” Yezu txipo kalogile wi makattamiho aba agapattile abale agamunyanyalile Yehova. (Mt. 24:12) Mwebaribari alabeli enji a Yehova ahifwanyiwa makattamiho. (Iza. 57:1; 2 Kor. 11:25) Txino Yehova kanakose matikiniho wila anibarele mwa dhifoyo dhotene dhinanipadduwele mbwenye iyene onele onivaha dhinfwanyeelelihu mudhidhene obule, murenddele na ofwasa.

10. Ovisasanyedha ovanene nihinatti opattiwa efoyo entonya dhavi wi nihikana nroromelo? (Gano 22:3)

¹⁰ Ninele okala ofwaseyene nigavisasanyedhela efoyo. Ovisasanyedhela oku ontapulela wi kaninimuroromela Yehova? Kahiye mwenemo. Mwebaribari, nigavisasanyedhela dhifoyo ninotonyihedha wi nikana nroromelo wila Yehova ohikana ewodhelo yonikamihedha. Dhavi? Nzu na Mulugu ninonisunziha ovisasanyedhela dhifoyo. (Kengesa Gano 22:3.) Vina modhela artigu dhinfwanyeya mmarevistani, matugumano, dhovuwiha dhinkosaga nikuru na Mulugu mudhidhi na mudhidhi wila nivisasanyedhele dhifoyo.c Iyo ninomukuluvela Yehova? Akala ninomukuluvela ninele ofwara malago aye ovanene—nihinatti opattiwa efoyo.

11. Txini ensunziwe na yotagiha ya Margaret?

¹¹ Koona yotagiha ya murogora onkuweliwa Margaret. Muromile murudda waye ottidda motto iyene wahaaddeliwa wi attawe. Vowi attu otene attawa mumodhani rampa dhotene dhahidhaala attu karo kadhawodha ovira. Muruddaya wahidhaala witxi woriba mudhidhene obo Margaret wali mu engarafamento mukaroni mwaye. Margaret wahivuna egumi yaye sabwani wahivisasanyedhela nottaga. Iyene wahikoya mapa mpastani mwaye amukamihedhile ofwanya dila yina. Wahivira dilaya ejile efoyo ehinatti opadduwa wi awodhe ottawelawo ogapadduwa efoyo. Nona vapadduwile efoyoya iyene wahittawela dilene ejile aziwaga wadhowiye, dhahene wahivuna egumi yaye.

12. Ninfwanyelela nni ofwara malago a ovibarelana?

¹² Wila nibareleye vina okalewo wiwanana enodhaga ofuneya wawiwelela alamuleli aganaddela wi nittawe obe nikale mburho mburhovi. Attu ena anodhaga ogonela wiwelela wila ang’anele dhofuma dhawa. Txini enkosa Akristu? Bibilia ononaddela: “N’omukwela [Yehova, mwawiwelele] anddimuwa etene a elabo: akale mwene oli munddimuwa-nddimuwa; akale anamathonga [attomiwe].” (1 Ped. 2:13, 14) Nikuru na Mulugu ninonivaha malago wila nivibarele, mudhidhi na mudhidhi ninowaddeliwa wi ninofwanyela wavaha anddimuwa a mmulogoni manumero ehu a telefoni wi awodhe onifwanya egapadduwa efoyo. Weyo ohimala okosa ejuwene? Vina ninodhaga wakela malago mwaha wa mburho onfwanyelihu okala, wottawela, mukalelo wokaana dhoja vina akala jofuneya wakamihedha attu ena. Iyo nigahiwelele malago aba ninele wika egumi yehu vangovini vina egumi ya anddimuwa a mmulogoni. Kudduwale wi alobwana aba ororomeleya anonizuzumela. (Aheb. 13:17) Margaret ohiloga, “Ddihikaana ebaribari yawi evunile egumi yaga ofwara malago a anddimuwa a mmulogoni vina a nikuru nehu.”

13. Txini yakamihedhile Akristu enjene attiyile numba dhawa okanavi wagalala vina murenddele?

¹³ Abali enjene vamodha na arogora attiyile numba dhawa sabwa ya efoyo, koddo vina owana-wana wa malogo ahikosa muli mwetemwene wi awodhe okalawo mowiwanana na dhilobo dhapadduwa nsakanene nttile vina anzuzumela dhilobo dhomuyani. Dhahene ninga Akristu oroma attiyile numba dhawa sabwa ya ofwarafwariwa, awene “[anolaleyavi] nzu na Mulugu mwetemwene [munvirani].” (Mer. 8:4) Olaleya miselu dhapama ehakamihedha ozuzumela Omwene ottiya makattamiho apattiwani. Yodhelavoya, awene ahikanavi wagalala vina murenddele.

OKAANE MURENDDELE OGAFWARAFWARIWAGA

14. Ofwarafwariwa onniyeleliha dhavi murenddele?

¹⁴ Ofwarafwariwa ononiyeleliha dhilobo dhinjene esuwene dhanidhelana murenddele. Ninowagalala nigakala vamodha mmatugumanoni, nigalaleyaga vina nigakosaga elobo txilobo se wova ofugeliwa. Dhilobo esi dhigatximihiwa ninodhaga odhugudheya vina novaga enadhe opadduwa musogorho. Oviwamo dhahene kahiye yabure mbwenye ninofwanyela okala txenjewa. Yezu ohiloga wi ofwarafwariwa egadha wattukulela anamafwara aye okakattuwa. (Jo. 16:1, 2) Ninawodhe dhavi okana murenddele nigafwarafwariwaga?

15. Ninkoddela nni wova ofwarafwariwa? (Joau 15:20; 16:33)

¹⁵ Nzu na Mulugu ninonaddela: “Etene anfuna wiwananeyana na Mulugu, aluwelana na Yezu Kristu, anofwanya [ofwarafwariwa].” (2 Tim. 3:12) Mbali onkuweliwa Andre wanrutxiwa orumela wi alabeli otene a Yehova anele ofwarafwariwa. Iyene ohiloga: ‘Okuno oli iyo ahikalawo anamoona enjene, alamuleli anawodhe dhavi onifugela iyo notene?’ Mubuwelo obu ottiya omudheelana murenddele, wamuttiya odhugudheyene. Abali ena annimukuluvela Yehova vina txipo kobuwela wi kanafugeliwe. Oziwa ejuwene ehakamihedha awene ohikala odhugudheyene ninga Andre. Andre wahigana omukuluvela Yehova, mohigonela iyene wahikana murenddele. Ovanene onowagalala masiki afwanyiwaga makattamiho. Eji enodhaga onipadduwela. Vanaddeli Yezu wi ninele ofwarafwariwa. Wahinaddela wi enowodheya okala ororomeleya.—Kengesa Joau 15:20; 16:33.

16. Malago gani anfwanyela iyo wiwelela nigafwarafwariwaga?

¹⁶ Mabasa ehu agatximihiwa vina agakoddihiwaga, txino ninele wakela malago andela ofilial obe na anddimuwa a mmulogoni. Alobwana aba attomiwe wi anibarele anokaana ebaribari yawi ninowakela yoja yomuyani, ottiya ejo anonikamihedha olaleyavi egawodheya. Kakosa mpaka vanwodheliwe wi wiwelele malago anakeliwe, masiki akala kunnonelamo pama envahedheliwe malagoya. (Tia. 3:17) Txipo kanawaddele attu ahinfwanyela oziwa dhilobo dhoviteya, mwaha wa abalihu vina dhilobo dha mmulogoni.—Koh. 3:7.

17. Dhahene ninga arumiwi a nsaka zana noroma, iyo ninfwanyela ogana okosa nni?

¹⁷ Elobo modha enimuttukulela Satana ofwarafwara nlogo na Yehova jawi awene “aneddanavi dhilaleyile Yezu.” (Ovuh. 12:17) Kuttiye Satana vina elabo yaye wutxutxa. Nigalaleyaga vina nigasunzihaga masiki nifwarafwariwaga ononidhelana wagalala vina murenddele. Vyaka zana dhoroma, vakoddiha anddimuwa a Ayuda arumiwi olaleya, alobwana aba ororomeleya, ahisakula omwiwelela Mulugu. Awene ahidhowavi alaleyaga, okosa mabasa aba anavaha wagalala. (Mer. 5:27-29, 41, 42) Txibarene mabasa ehu agatximihiwa, txino enele ofuneya olaleya moviteya. (Mt. 10:16) Mbwenye enele ofuneya okosa mpaka vanwodhelihu wila nikane wagalala onda sabwa ya wasunziha attu ena miselu dhinvuna dhigumi.

“MULUGU ONVAHA MURENDDELE ONOKALA NA NYUWO”

18. Murenddele webaribari Onda wuvi?

¹⁸ Okane ebaribari wi masiki nigafwarafwariwaga enowodheya iyo okana murenddele. Midhidhi ninga esi, ninofwanyela wubuwela wi murenddele onfunihu, murenddele wa Mulugu, murenddele obu, murenddele onvaha Yehova. Omukuluvele iyene ogapattiwa eredda yovapeya, dhifoyo obe ofwarafwariwa. Okale vakuvi na nikuru naye. Wubuwelege dhilobo dhapama dhinjeedhelihu wakela musogorho. Ogakosa dhawene, “Mulugu onvaha murenddele, onokala na [weyo].” (Fil. 4:9) Nsunzo ninfwarela ninele wona mukalelo onakamihedhe iyo Akristu akwihu okana murenddele wa Mulugu agafwanyiwa makattamiho.