Mukanda Wamuchiali wa Samuele
2 Kulutwe lia yuma yino, Ndawichi yahula Yehova ngwenyi: “Natamba kuya ku yimwe mbonge ya mu Yunda?” Yehova yakumbulula ngwenyi: “Yako.” Ndawichi yahula ngwenyi: “Mbonge yika yize natamba kuya?” Iye yakumbulula ngwenyi: “Yako ku Heprone.” 2 Chocho Ndawichi yayako hamuwika ni mapwo jenyi aali: Ahinoame Ka-Yezerele ni Abigale yoze wapwile pwo lia Nabale, wa ku Karmela. 3 Ndawichi yaya nawa ni atu jenyi, mutu ni mutu ni akwa-zuwo lienyi. Ayo yatwama mu yihunda yize te yajingilika Heprone. 4 Chocho, malunga a mu Yunda yeza, yawayisa Ndawichi apwe mwanangana, ayule akwa-zuwo lia Yunda.
Ayo yamba kuli Ndawichi ngwo: “Atu a mu Njabeshe-Ngiliate e afunjile Saulu.” 5 Kashika, Ndawichi yatuma mikeji kuli atu a ku Njabeshe-Ngiliate hanga aalweze ngwo: “Yehova anuwahise, mumu nwasolola zango lize kulishi kuhwa kuli Saulu mwene wenu ha kumufunda. 6 Yehova anusolwele zango lize kulishi kuhwa ni ushishiko. Ni yami mungunusolwela utu mumu lia yize nwalinga. 7 Haliapwila jikizenu, hamukenu, mumu mwene wenu Saulu hafwa. Akwa-zuwo lia Yunda hanguwayisa hanga ngupwe mwanangana wo.”
8 Abenere mwana wa Nere, mwata wa maswalale ja Saulu, yaya ni Isheboshete mwana wa Saulu ku Mahaneme, mu sali likwo lia lwiji, 9 yamupwisa mwanangana wa Ngiliate, wa A-Ashure, Yezerele, Eframe, Mbenjamine ni wa A-Izalele eswe. 10 Isheboshete mwana wa Saulu, kapwile ni miaka 40 muze aputukile kuyula mu Izalele, yayula ha miaka yaali. Alioze akwa-munyachi wa Yunda kapwile sali lia Ndawichi. 11 Ndawichi kayulile munyachi wa Yunda ha miaka shimbiali ni tukweji asambano.
12 Ha kupalika cha amwe mashimbu, Abenere mwana wa Nere ni tuvumbi twa Isheboshete mwana wa Saulu, yakatuka ku Mahaneme yaya ku Ngibeone. 13 Joabe mwana wa Zeluia ni tuvumbi twa Ndawichi no yaya, yaawana ku chitende cha Ngibeone. Chizavu chimwe yichipwa sali limwe lia chitende, chizavu chikwo yichipwa sali likwo. 14 Chocho Abenere yamba kuli Joabe ngwenyi: “Akweze akatuke, alilambe kumeso jetu.” Joabe yakumbulula ngwenyi: “Kushi mulonga, akatuke.” 15 Chocho, ayo yaya hanga alilambe. Yasakula A-Mbenjamine 12 a mu chizavu cha Isheboshete mwana wa Saulu, ni tuvumbi twa Ndawichi 12. 16 Mutu ni mutu yakwata mukwo ku mutwe, yatuwa katana mu pachi lia yoze te analitachika nenyi, eswe yalimbuka, yafwa ha shimbu limuwika. Kashika chihela chize chatwama mu Ngibeone achivulukile ngwo Helekata-Hazurime.
17 Jita yize yasulileho ha tangwa liacho yapwile yikalu chinji, Abenere ni malunga ja A-Izalele yaakumba kuli tuvumbi twa Ndawichi. 18 Ana atatu a malunga a Zeluia waze apwileho kapwile wano: Joabe, Abishai ni Asahele. Asahele te kakuzomboka ngwe kai mu yambu. 19 Asahele yaputuka kuzombwesa Abenere. Muze te anazombwesa Abenere, Asahele kakondolokele chipwe ku sali lia utata, chipwe ku sali lia umama. 20 Muze Abenere atalile kunyima, yahula ngwenyi: “Yena Asahele nyi?” Iye yakumbulula ngwenyi: “Ewa, yami.” 21 Abenere yamba kuli iye ngwenyi: “Kondoloka sali lia utata hanji lia umama, ukwate umwe wa kuli atu wano, umutambule yuma yize ali nayo.” Alioze Asahele te kasolo kulitwamina kumukaujola. 22 Abenere yamba nawa kuli Asahele ngwenyi: “Kanda ungukaula, nyi ka, mungukushiha. Nyi nakushiha kuchi yayenu Joabe makangumona?” 23 Alioze Asahele kamupanjikile. Chocho Abenere yamutuwa ni chikundo cha kunga mu jimo, yichifwapukila mu nyima, iye yalimbuka ni kufwila hazehene. Atu eswe apwile ni kupalika ha chihela haze Asahele afwilile, kapwile ni kumanaho.
24 Chocho, Joabe ni Abishai yakaula Abenere. Ha kunjila cha tangwa, yaheta ku mundundena wa Ama uze watwama kulutwe lia Ngia mu jila yinayi ku puya ya Ngibeone. 25 A-Mbenjamine yalichinga ni Abenere, yapwa chizavu chimuwika, yamana helu lia mundundena. 26 Mba Abenere yakololoka kuli Joabe ngwenyi: “Katana manunga ni kushiha atu ndo kulihi? Kuwanyingikine ngwe yuma yino muyineha lamba linji? Tangwa lika mulweza atu je hanga alitwamine kukaujola mandumbu jo?” 27 Joabe yakumbulula ngwenyi: “Ni mwono wa Zambi wamwenemwene, nyi te kuwahanjikile, kachi atu wano makaujola mandumbu jo ndo hamene chimene.” 28 Chocho Joabe yemba chitavwi, atu jenyi yalitwamina kukaujola A-Izalele, jita yiyihwa.
29 Abenere ni atu jenyi yenda ufuku wacho weswe, yapalika mu Arapa, yazauka Yordau, mba yaheta ku Mahaneme. 30 Muze Joabe echele kukaujola Abenere, yakungulula atu eswe. Hakachi ka tuvumbi twa Ndawichi, te hanahono atu 19, ni Asahele nawa. 31 Tuvumbi twa Ndawichi, kakumbile A-Mbenjamine ni atu ja Abenere. Atu jo waze afwile kapwile 360. 32 Ayo yanda Asahele, yaya nenyi, yamufunda mu fuka lia tato ku Mbeteleme. Joabe ni atu jenyi yenda ufuku weswe, yaheta ku Heprone muze te kunayi ni kucha.