Mukanda Wamuchiali wa Samuele

4 Muze Isheboshete mwana wa Saulu evwile ngwo Abenere hafwa ku Heprone, yevwa woma, A-Izalele eswe no yevwa woma. 2 Kwapwile malunga aali waze apwile ni kusongwela yizavu ya eji ya mwana wa Saulu, umwe jina lienyi te Bana, mukwo Rekabe. Ayo kapwile ana ja Rimone, Ka-Mberote, wa ku munyachi wa Mbenjamine. (Mumu chihunda cha A-Mberote kapwile ni kuchalwila mukachi ka yihunda ya Mbenjamine. 3 A-Mberote yachinyina ku Ngitaime, kwenako atwama ngwe njize ndo musono.)

4 Jonata mwana wa Saulu, kapwile ni umwe mwana chitonji ku molu. Mwana wacho kapwile ni miaka yitano muze lusango wa kufwa cha Saulu ni Jonata ahetele mu Yezerele. Ndeji yenyi yamusa mu kondo, yaputuka kuchina nenyi, alioze muze te anazomboka nenyi ni woma, mwana yaholoka, yapwa chitonji. Jina lia mwana wacho te Mefiposhete.

5 Rekabe ni Bana, ana ja Rimone Ka-Mberote, yaya ku zuwo lia Isheboshete mwalwa-kachi muze te anapombo tangwa ha muchima. 6 Yanjila mu zuwo ngwe kanayi ni kwanda tiliku, yamutuwa katana mu jimo, mba Rekabe ni Bana yachina. 7 Muze ayo anjilile mu zuwo, yawana Isheboshete mu chipatulo chenyi cha kupomba, kanapombo ha muhela. Yamutuwa katana, yamushiha, yamupatula mutwe. Chocho, yanda mutwe wacho, yenda ufuku weswe mu jila ya kuya ku Arapa. 8 Yaheta ku Heprone, yasolola mutwe wa Isheboshete kuli mwanangana Ndawichi, yamba ngwo: “Mutwe wa Isheboshete au, mwana wa Saulu mukwa-kole we, yoze wafupile kukushiha. Musono Yehova hanukala yenu mwene wami mwanangana kuli Saulu ni kuli munyachi wenyi.”

9 Alioze Ndawichi yamba kuli Rekabe ni Bana, ana ja Rimone Ka-Mberote ngwenyi: “Ni mwono wa Yehova yoze wangupulwila ku lamba liami lieswe, 10 muze umwe ejile ni kungulweza ngwenyi: ‘Saulu kafwa!’ Ni kunyonga ngwenyi kanangunehena sango jipema, yami yingumushiha ku Zikalage, yino ye fweto namuhele ngwe mukeji! 11 Yenu atu api waze nwashiha mukwa-ululi mu zuwo lienyi, ha muhela wenyi! Mungunumwesa lamba linji kuhiana, mungunufwetesa manyinga jenyi, mungununongesa hashi lia mavu.” 12 Ndawichi yatuma atu jenyi hanga aashihe. Yapatula moko ni molu jo, yasukika mijimba yo hakamwihi ni chitende cha Heprone. Alioze yanda mutwe wa Isheboshete yaufunda ku chifuka cha Abenere mu Heprone.