Mukanda Wamuchiali wa Samuele
8 Ha kupalika cha amwe mashimbu, Ndawichi yasa jita ni A-Filistea, yaakumba. Ndawichi yatambula mbonge ya Meteke-Ama kuli A-Filistea.
2 Yakumba nawa A-Moape, yaapombesa hashi, yaeseka ni lwoji. Yaahandununa mu yizavu. Yizavu yaali te mayishiha, chizavu chimuwika muchisala ni mwono. Chocho A-Moape yapwa ngamba ja Ndawichi, yaputuka kumufweta lijimu.
3 Ndawichi yakumba nawa Hadadezere mwana wa Rehobo, mwanangana wa Zoba, ha shimbu liacho te mu jila ali kanayi ni kukolesa wanangana wenyi ku yifuchi yatwama hakamwihi ni Lwiji Ufrateze. 4 Ndawichi yakwata akwa-kwendesa tuvwalu ja Hadadezere 1,700 ni maswalale waze te anende hashi 20,000. Tuvwalu eswe akukoka matemba a jita Ndawichi yaateta mijipa, yahichikaho wika unji wa tuvwalu 100.
5 Muze A-Seria a ku Ndamaseku ejile hanga akwase Hadadezere, mwanangana wa Zoba, Ndawichi yashiha A-Seria 22,000. 6 Ndawichi yasa maswalale mu Seria ya Ndamaseku, A-Seria yapwa ngamba ja Ndawichi, yaputuka kumufweta lijimu. Kweswako Ndawichi apwile ni kuya ni kwasa jita, Yehova kapwile ni kumukwasa kukumba. 7 Chikwo nawa, Ndawichi yatambula kepwe ja oru ja tuvumbi twa Hadadezere, yajineha ku Yerusaleme. 8 Mwanangana Ndawichi yanda unengu unji mu mambonge ja Hadadezere, mu Mbeta ni mu Berotai.
9 Toi mwanangana wa Hamate, yevwa ngwo Ndawichi hakumba maswalale eswe ja Hadadezere. 10 Kashika, Toi yatuma mwanenyi Jorame kuli Mwanangana Ndawichi hanga amumeneke ni kumuchichimieka ha kukumba Hadadezere, mumu Hadadezere te kakulimika ni Toi mashimbu eswe. Jorame yatwalila Ndawichi yikwata ya prata, ya oru ni ya unengu, 11 yize mwanangana Ndawichi asele ku usandu hanga yipwe ya Yehova ngwe chize alingile ni prata ni oru yize atambwile ku mavungu eswe waze akumbile ngwe: 12 A-Seria, A-Moape, A-Amone, A-Filistea ni A-Amaleke, ni upite weswe uze atambwile kuli Hadadezere mwana wa Rehobo, mwanangana wa Zoba. 13 Chikwo nawa, jina lia Ndawichi yilifumana muze akatukile ku mungulunga wa Mungwa, kuze ashihile A-Endome 18,000. 14 Yasa maswalale mu chifuchi cheswe cha Endome. A-Endome eswe yapwa ngamba ja Ndawichi. Kweswako Ndawichi apwile ni kuya ni kwasa jita Yehova kapwile ni kumukwasa kukumba.
15 Ndawichi te kakuyula A-Izalele eswe, ayo eswe yaayula kanawa ni ululi. 16 Joabe mwana wa Zeluia kapwile mwata wa maswalale. Yehosofate mwana wa Ahilude mwe wapwile ni kusoneka yuma ya wanangana. 17 Zadoke mwana wa Ahitube ni Ahimeleke mwana wa Abiatare kapwile asasendote, Seraia kapwile mukwa-kusoneka mikanda. 18 Benaia mwana wa Jehoiada kapwile ni kusongwela A-Kerete ni A-Pelete. Ana ja Ndawichi a malunga e apwile miata.