Mukanda Utangu wa Mianangana
5 Muze Hirame mwanangana wa Teru anyingikine ngwenyi, Solomone hasalakana tato ha wata, Hirame yatuma tuvumbi twenyi kuli Solomone, mumu iye kapwile sepa lia Ndawichi. 2 Solomone neye yatuma lusango kuli Hirame ngwenyi: 3 “Unanyingika ngwe, tata Ndawichi kakamutayijile kutunga zuwo lia Yehova Zambi yenyi, mumu lia jita jize ashile ndo muze Yehova anongesene akwa-kole jenyi eswe. 4 Alioze, haliapwila Yehova Zambi yami hangwaha uhwimino sali lieswe. Kukushi niumwe yoze unalimika ni yami, yuma yipi kuyishiko nawa. 5 Kashika, ngunazange kutunga zuwo lia Yehova Zambi yami ngwe chize Yehova ambile kuli tata Ndawichi ngwenyi: ‘Mwane yoze makakusalakana ha ngunja, mwe makatunga zuwo liami.’ 6 Kashika, tuma kama atu je haliapwila hanga akangutetele mitondo ya sedru ku Lebano. Tuvumbi twe makalakala ni tuvumbi twami. Mungwafweta kulita ni ndando yize mutesa. Mumu unanyingika kanawa ngwe, yetu kutwanyingikine kuteta mitondo ngwe chize akuteta A-Sendone.”
7 Muze Hirame evwile maliji a Solomone, yawahilila chinji, yamba ngwenyi: “Yehova afumane, mumu kahana kuli Ndawichi mwana wa mana hanga ayule vungu lino linene.” 8 Mba Hirame yatuma kulweza Solomone ngwenyi: “Natambula lusango we, mungulinga yuma yeswayo muzanga, mungukwaha mapaya a mitondo ya sedru ni a mitondo ya kupresu. 9 Tuvumbi twami makachiza mapaya ku Lebano makaatwala ku kalunga-lwiji. Mapaya jacho mungukaakasa hanga ngukapalike no mu kalunga-lwiji ndo ku chihela chize yena mutongola. Kwenako mungukaakasulwila, mba ukeze ni kwanda. Yena mukahana wika kulia kuli akwa zuwo liami.”
10 Chocho Hirame yahana kuli Solomone mapaya eswe a mitondo ya sedru ni a mitondo ya kupresu waze iye azangile. 11 Solomone yahana kuli Hirame kulia cha akwa-zuwo lienyi kore* ja tiliku 20,000 ni 20 a kore ja maji apema. Chino che kulia chize Solomone te akuhana kuli Hirame miaka yeswe. 12 Yehova yahana mana kuli Solomone ngwe chize amulakenyene. Chikwo nawa, kwapwile sambukila hakachi ka Hirame ni Solomone. Ayo kalingile usendo.
13 Mwanangana Solomone yasanyika malunga eswe a mu Izalele hanga alinge mulimo wa ungamba. Malunga waze ejile kapwile 30,000. 14 Ha kakweji iye te kakutuma ku Lebano malunga 10,000. Ayo te kakulinga kakweji umuwika ku Lebano, tukweji aali ku mazuwo jo. Adonirama mwe wapwile ni kusongwela malunga waze te akulinga mulimo wa ungamba. 15 Solomone kapwile ni akwa-kumbata yiteli 70,000 ni akwa-kupalula mawe ku milundu 80,000. 16 Kapwile nawa ni tupitau 3,300 waze te akusongwela akwa-milimo. 17 Mwanangana yatuma akwa-milimo hanga aye ni kupalula mawe anene-anene, mawe a ndando yinji, a kusonga hanga ase no fundamentu ya zuwo. 18 Kashika, akwa-kutunga ja Solomone ni akwa-kutunga ja Hirame ni A-Ngebale te akupalula mawe ni kululieka mapaya a kutunga no zuwo.