11 Kupwa Chikilikita

YIKA CHINO CHINALUMBUNUKA?

Mutu yoze uli chikilikita hi chileya ko. Kwamba pundu, iye kakuzanga kukalakala chinji hanga alise asoko ni kukwasa atu akwo. Chikwo nawa, iye kakuchilinga chipwe muze mulimo wacho wapwa ukehe.

MUMU LIAKA CHINO CHILI CHILEMU?

Chipwe ngwe mutayiza hanji ka, alioze umwenemwene uli ngwo, mwono unazala too ni yuma yakulinga. Hashi hano hanazala too ni atu waze keshi kuzanga chinji kukalakala, kupwa chikilikita chakuneha yiwape yinji.—Chilumbununyi 3:13.

“Namona ngwami, nyi muosa tachi ku milimo, muwahilila chinji ha yuma yize mulinga. Chino changukwashile kuzanga kukalakala. Kupwa chikilikita chakukwasa nawa kupwa ni lufuma mupema.”—Reyon

CHIYULO CHA MU MBIMBILIYA: “Milimo yeswe yili ni kufumbuka.”—Yishima 14:23.

YIZE MUHASA KULINGA

Nyi unazange kupwa ni nyonga lialita hakutwala ku mulimo, kaula yikuma yino:

Wahilila ha kulilongesa kulinga kanawa yuma. Milimo yeswayo mulinga ku zuwo hanji ku shikola, sako tachi hanga uyilinge kanawa. Muze munyingika kulinga kanawa umwe mulimo, eseka kuulinga kawashi-washi, chikwo nawa ulinge kanawa. Nyi muopwa ni utotombo unji ha mulimo uze wakulinga, muzanga kulinga mulimo wacho.

CHIYULO CHA MU MBIMBILIYA: “Unamono chipalakata ku milimo yenyi, nyi? Kumakamana kumeso ja mianangana; kechi kumana kumeso ja atu amokomoko.”—Yishima 22:29.

Nyonga ha chize mulimo we wakuyukisa akwenu. Muze mulinga kanawa mulimo we, atu anji mahasa kuyuka. Chakutalilaho, muze wakulinga kanawa mulimo we ku zuwo, chakutepulula mulimo wa atu akwo ku zuwo.

CHIYULO CHA MU MBIMBILIYA: “Chinawaha kutambula alioze shinaho kuhana.”—Yilinga 20:35.

Kanda ulinga mulimo mumu ngwo watamba kuulinga. Kanda uwahilila wika ha tuma tukehe-tukehe. Linga kuhiana yuma yize akutumanga kulinga. Nyi walinga chino, mumona ngwe yena mwe wakusongwela mwono we. Chino muchikukwasa kulinga milimo, chapwile ngwo mumu watamba kuyilinga, alioze mumu unazange kuyilinga.—Mateu 5:41.

CHIYULO CHA MU MBIMBILIYA: “Chitanga che chipema kuchichi kapwa cha kuzangisa, alioze ku upale wa yena mwene.”—Fwilimu 14.

Pwako ni nyonga lialita. Mutu yoze ukwete nyonga lialita hi chileya ko, chipwe chocho, mwono wenyi hi mulimo wika ko. Pwako ni nyonga lialita ha kusa mashimbu a kukalakala ni kuhwima.

CHIYULO CHA MU MBIMBILIYA: “Kwoko limuwika lia too ni kuhwima hapwa, moko aali akuhondangana ni kuhanga ye fuji, kunyima.”—Chilumbununyi 4:6.