Kukwasa Mulimo wa Wanangana mu Njiza Yetu ni Hashi Heswe

AMU UPROFETO wa Yesu hakutwala ku matangwa akusula unamanunuka, Yela ja Yehova kanambujola sango lipema lia Wanangana “ndo ku masongo a hashi.” (Yili. 1:8; Mateu 24:14) Mumu lia chino, ayo kakulihana ni tachi jo jeswe hanga ambujole kuli akwo. Kakujikijila ha ukwaso wa Yehova ni kununga ni kusa Wanangana wa Zambi kulutwe mu mwono wo weswe. (Mateu 6:25-34; 1 Kori. 3:5-9) Hamukunda wa chino, ayo kakuzuka yiwape yinji ni utayizo wa Yehova.

KUKWASA MULIMO WA WANANGANA HASHI HESWE

² Muze atu amwe akumona milali yize twakwambulwilamo ni chize twakuhana Mbimbiliya ni mikanda yikwo yawana, kakuhula ngwo: “Kuchi nwakuhasa kulinga chino?” Kwamba pundu, kutuhwisa Mbimbiliya ni mikanda yikwo, chakufwika mbongo jinji. Kutunga Mbetele ni kuyifunga hanga mandumbu waze akufwambwisa mikanda ni kulinga milimo yikwo ni waze akusongwela mulimo wa kwambujola atwame kanawa, necho chakufwika mbongo. Chikwo nawa, tulayi a mambonge, mamishionaliu, mapionelu alipwila ni mandumbu akwo ali mu mulimo walipwila wa shimbu lieswe no kakwahako jimwe mbongo jakulikwasa najo hanga anunge mu mulimo wo. Kashika, mulimo wa kwambujola sango lipema mu njiza yetu hanji hashi heswe wakufupiwa mbongo jinji. Mba kulihi mbongo jacho jakukatuka?

³ Atu anji waze azanga mulimo uze Yela ja Yehova akulinga, kakuhana milambu hanga akwase mulimo wacho. Alioze mbongo jinji jize jakukwasa ku mulimo wacho jakukatuka kuli Yela ja Yehova ene. Amwe a kuli ayo kakutuma milambu yo ku mutango wa mu chifuchi cho. Kakusolola mbunge ya kuhana, ngwe chize te akulinga tuvumbi twa Yehova ku mashimbu akunyima, hakutunga mazuwo waze apwile ni kulikungulwila ha kuwayila Yehova. (Kutuhu. 35:20-29; 1 Sango 29:9) Milambu yimwe yili yikumba yize mandumbu amwe akuhichika ngwe yihinga. Yikwo yakukatuka kuli mandumbu, ku yikungulwila ni ha kukunguluka cha mambonge. Milambu yacho kakuyihana yikehe-yikehe, alioze muze akuyichinga, yakukwasa hanga mulimo wa kwambujola ununge.

⁴ Chili kuyuka chinene kuli Yela ja Yehova kuzachisa mbongo jo ni yikumba yo yikwo hanga akwase mulimo wa kwambujola. Yesu ni tumbaji twenyi kapwile ni yimwe kasha muze te akusa mbongo ja kulikwasa najo. (Yoa. 13:29) Mbimbiliya yakuhanjika hakutwala kuli mapwo waze apwile ni kukwasa Yesu ni tumbaji twenyi. (Marku 15:40, 41; Luka 8:3) Postolo Paulu kapwile ni kutayiza ni mbunge yeswe ukwaso uze apwile ni kumwaha kuli waze azangile kumukwasa mu mulimo wenyi ni waze nawa azangile kukalakala nenyi. (Fwili. 4:14-16; 1 Tesa. 2:9) Yela ja Yehova no kakukaula yilweza yacho hakukwasa mulimo wa kwambujola ni kupwa yihanyi. Hachino, chakupwa chashi kuhana “chawana e meya a mwono” kuli waze hanafunjikila ku mwono wa mutolo.—Uso. 22:17.

KUTALA HA YIZE YAKUFUPIWA MU HITA CHIKUNGULWILA

⁵ Yuma yize yakufupiwa mu chikungulwila neyo kakuyilinga ni mbongo jize mandumbu akuhana. Keshi kwita mbongo mu chikungulwila, hanji kutesa mbongo jize mutu atamba kuhana. Hita chikungulwila chili ni kasha ya milambu muze hita mutu mahasa kusa mulambu wenyi “nikulita ni chize hanapale mu mbunge yenyi.”—2 Kori. 9:7.

⁶ Kanji-kanji mbongo jize akulambula kakujilanda yuma yakululieka nayo ha Zuwo lia Wanangana. Chizavu cha makulwana mahasa kutuma jimwe mbongo ku mutango wa mu chifuchi cho ja kukwasa mulimo wa kwambujola hashi heswe. Chikungulwila chatamba kulinga chivwashano chakutayiza mbongo jacho. Yikungulwila yinji yakuhana milambu mashimbu eswe mu mulali uno hanga akwase mulimo wacho. Nyi mandumbu eswe manyonga ha yize yakufupiwa mu chikungulwila, kuchichi kufupiwa kutwa mitambi mashimbu eswe hakutwala ku kuhana milambu.

CHIZE AKUFUNGA MILAMBU

⁷ Hanyima lia hita kukunguluka, mandumbu aali kakuchiza mbongo jize mandumbu akusa mu kasha ya milambu ni kusoneka unji wa mbongo jacho. (2 Mia. 12:9, 10; 2 Kori. 8:20) Chizavu cha makulwana chakusa shindakenyo ngwo mbongo jacho kanajifungu kanawa ndo ni muze majituma ku mutango hanji kujizachisa ku yize yinafupiwa mu chikungulwila. Ndumbu yoze watala ha mulimo wa kufunga mbongo, kakusoneka chize mbongo jakalakala ha kakweji hanga alweke chikungulwila. Ha kupalika cha tukweji atatu, kasongo wa chizavu cha makulwana kakululieka hanga mukulwana umwe ahitulule mu mbongo amone chize jinakalakala.

YIZE YAKUFUPIWA MU HITA MBONGE

⁸ Mbongo jize akuzachisa ha kukunguluka cha mbonge ni ku yuma yikwo yakulingiwa mu mbonge, jakukatuka ku milambu ya Yela ja Yehova a mu mbonge yacho. Mu yihela ya kukungulukila mwakupwa makasha muze akusa milambu ha kukunguluka cha hita mbonge. Yikungulwila muyihasa nawa kuhana milambu ha mashimbu eswawo mazanga, yize mahasa kuzachisa ku yuma yize yinafupiwa mu mbonge yo.

⁹ Hita mbonge yatamba kupwa ni mbongo jakulinga najo yeswayo muyifupiwa mu mbonge yacho. Mbongo jeswajo mujisalaho katamba kujituma ku mutango jikakwase mulimo unalingiwa hashi heswe. Nyi yikungulwila kuyishi ni mbongo jize mazachisa ha kukunguluka cha mbonge hanji jakululieka najo kukunguluka cha mbonge chize makapwa nacho kulutwe, kalayi wa mbonge mahasa kwiulula yikungulwila hakutwala ku ulemu wa kuhana milambu. Hita chizavu cha makulwana muchilishimwinya hanga atese unji wa mbongo jize matuma ku mbongo ja mbonge yo. Hanyima ya kulitesa, katamba kulinga chivwashano ha mbongo jacho.

¹⁰ Muze mukusoloka chimwe chikuma chinatale ha mbongo ja mbonge, makulwana kakuliwana ni kutala ha chikuma chacho ha tangwa lia kukunguluka cha mbonge. Kuchizaho mbongo jize mazachisa ku milimo ya mbonge, makulwana katamba kulinga chivwashano ha yuma yikwo mazachisa mbongo ja mbonge. Cheswacho chivwashano chize malinga katamba kuchisoneka kulita ni mbongo jacho, ni kwita nawa utayizo wa makulwana eswe shimbu kanda ajizachisa.

¹¹ Hakupalika cha mashimbu, katamba kuhitulula mu mbongo ja mbonge amone chize jinende.

KUFUNGA YISWALE

¹² Chikuma chimwe chize Yesu ni tumbaji jenyi apwile ni kutulikila mbongo chapwile kukwasa yiswale. (Marku 14:3-5; Yoa. 13:29) Chiteli chacho chinanungu ndo musono kuli akwa-Kristu, mumu Yesu kambile ngwenyi: “Yiswale kali hamwe ni yenu matangwa eswe.” (Marku 14:7) Kuchi Yela ja Yehova akulinga mulimo wacho musono?

¹³ Mashimbu amwe, mandumbu amwe ashishika a mu chikungulwila kakufupiwa ukwaso mumu lia ushinakaji, misongo hanji kapinda mukwo. Asoko ni atu akwo waze ananyingika chikuma chacho masaha kukwasa. Achi chinalite ni maliji a postolo Yoano akwamba ngwo: “Alioze yoze mapwa ni yikumba ya hano hashi, mamona ndumbwenyi kanahono, makalisa mbunge yenyi kuli iye, ngwe kuchi zango lia Zambi mulitwama muli iye? Anami akepe, kanda tuzanga ni liji, chipwe ni limi; alioze ni yitanga ni umwenemwene.” (1 Yoa. 3:17, 18; 2 Tesa. 3:6-12) Kukwasa waze anamono lamba, necho chili chihanda cha uwayilo wamwenemwene.—Tia. 1:27; 2:14-17.

¹⁴ Ha mukanda wenyi utangu uze asonekenene Timoteu, postolo Paulu kalumbunwine chize mutuhasa kukwasa waze anafupiwa ukwaso. Mutuhasa kuwana maliji jenyi ha 1 Timoteu 5:3-21. Mukwa-Kristu mweswe kali ni chiteli cha kukwasa usoko wenyi. Mandumbu waze hapwa tushinakaji ni waze hatenguka katamba kutambula ukwaso kuli ana jo, ajikulu jo ni asoko jo. Ha mashimbu amwe ayo mahasa kutambula ukwaso ku nguvulu, hanji ku yizavu yize yakukwasa waze anahono, chocho asoko hanji atu akwo mahasa kwakwasa atambule ukwaso wacho. Ni chikungulwila necho muchihasa kulitesa hanga akwase mandumbu ashishika waze ashimbula chinji mu ufulielo, muze mafupiwa ukwaso. Nyi mandumbu wano keshi ni ana, ajikulu hanji asoko waze maakwasa, chipwe ukwaso wa nguvulu, makulwana mahasa kukwata chiyulo cha kukwasa mandumbu jacho. Kuli akwa-Kristu chili kuyuka chinene kulianyina yuma yo ni mandumbu waze anafupiwa ukwaso.

¹⁵ Mandumbu amwe kakumona lamba hamukunda wa kwahungumiona, wa jita, minyiko, masanga a meya, kapunga hanji luyinda mweka ni mweka yoze unalingiwa ha matangwa wano akusula. (Mateu 24:7-9) Nyi yikungulwila kuyahashile kulikwasa umwe ni mukwo mu njiza yo, Chizavu cha Tusongo, chakwita mandumbu a ku yihela yeka hanga ahane ukwaso. Achi chinalite ni yize akwa-Kristu a mu Azia Yikehe alingile ha kutuma kulia kuli mandumbu jo a mu Yundeya ha mashimbu a zala. (1 Kori. 16:1-4; 2 Kori. 9:1-5) Nyi twakaula chilweza cha mandumbu wano, mutusolola ngwetu twakuzanga mandumbu jetu ni kusolola nawa ngwetu tuli tumbaji twa Yesu Kristu.—Yoa. 13:35.

KWANYINA MANDUMBU MIKANDA

¹⁶ Mbimbiliya ni mikanda yetu yikwo yakukwasa chinji mu mulimo wa kwambujola sango lipema lia Wanangana. Kanji-kanji makulwana kakusakula kavumbi yoze matala ha mulimo wa kuhana mikanda kuli mandumbu. Ndumbu akwaha mulimo uno kakusa chinji mbunge ku mulimo wacho. Kakusonejeka chize mikanda yinende hanga ahase kwita mikanda yikwo yize yinafupiwa mu chikungulwila.

¹⁷ Hakupwa akwa-Kristu ajama, tunanyingika ngwetu, mashimbu jetu, uhashi wetu, mana jetu, yikumba ni mwono wetu yili yawana ya kuli Zambi, chocho twatamba kuyizachisa mu mulimo wenyi. (Luka 17:10; 1 Kori. 4:7) Nyi twazachisa yikumba yetu mu mulimo wa Zambi, mutusolola ngwetu twakumuzanga chinji. Tunazange kulemesa Yehova ni yikumba yetu yeswe, mumu tunanyingika ngwetu, kakuwahilila ni chawana cheswacho mutumwaha ni mbunge yetu yeswe. (Yishi. 3:9; Marku 14:3-9; Luka 21:1-4; Kolo. 3:23, 24) Yesu kambile ngwenyi: “Hinunatambula wana, hanenu wana.” (Mateu 10:8) Mutuwahilila chinji nyi twalihana kuli Yehova ni kuzachisa yikumba yetu mu mulimo wenyi.—Yili. 20:35.