Kuyuka ha Kuzeyela Shimbi ya Zambi Hakutwala ku Wata

KUZEYELA Yehova, Sakatanga wa malilu ni hashi, chili chilemu nyi tunazange kulilulieka hanga tulinge upale wenyi. Twakukaula shimbi ya wata ku mwono wetu ni kutayiza wata wa Mwanenyi mu Chikungulwila cha akwa-Kristu. Kuzeyela ku shimbi yacho chakutuyukisa tulieswe.

² Chikuma cha kuzeyela ku wata wa Zambi chaputukile mu munda wa Endene. Chikuma chacho, chili ha shimbi ja Zambi jize jili ha Uputukilo 1:28; 2:16, 17. Yitangiwa ya hano hashi, te yatamba kuzeyela atu. Ni Alama ni Eva no katambile kulinga upale wa Zambi ni kuzeyela ku wata wenyi. Kuzeyela ku wata wa Zambi te muchineha sambukila ni kukwasa hanga yuma yeswe yende kanawa. Kulutwe, shimbi ya wata yayilumbununa ha 1 A-Korindu 11:3. Postolo Paulu yasoneka ngwenyi: “Ngunazange yenu nunyingike, Kristu iye we mutwe wa lunga mweswe. Lunga, iye mutwe wa pwo. Zambi iye mutwe wa Kristu.” Chino chinasolola ngwo, yitangiwa yeswe yatamba kuzeyela ku umwe wata. Yehova wika mwe keshi ni wata uze atamba kuzeyela.

³ Atu anji musono, keshi kukaula hanji ngwetu kufunga shimbi ya wata. Mumu liaka? Mulonga waputukile mu munda wa Endene, muze yisemi jetu atangu asakwile ene kwecha kwononokena wata wa Zambi. (Uputu. 3:4, 5) Chipwe chocho, kakapwile ni utuswilo wamwenemwene. Alioze, yakaula chiyulo cha mungelo mupi, Satana Ndiapu. Ungalwe uno, yiuhandununa atu kuli Zambi. (Kolo. 1:21) Kashika, atu anji musono, kali mu chiyulo cha mwe chingulungulu.—1 Yoa. 5:19.

⁴ Muze twakulilongesa umwenemwene wa Liji lia Zambi ni kuukaula, twakukatuka mu chiyulo cha Satana. Amu hitunalihana ni kutupapachisa ngwe Yela ja Yehova, twakutayiza Yehova ngwe Mwata wetu ku mwono wetu weswe. Ni yetu twakutayiza maliji ja Mwanangana Ndawichi yoze wambile ngwenyi, Yehova kali “mutwe helu lia yuma yeswe.” (1 Sango 29:11) Twakutayiza ni mbunge yeswe maliji akwamba ngwo: “Nyingikenu ngwenu, Yehova iye Zambi watutangile, tuli ninyenyi. Tuli atu jenyi; tuli mapanga a ku kelo jenyi.” (Samu 100:3) Tunanyingika ngwetu Yehova kali munene, kashika twatamba kumuzeyela ni mbunge yeswe mumu iye mwe watangile yuma yeswe. (Uso. 4:11) Amu tuli tuvumbi twa Zambi wamwenemwene, twakwimbulula Yesu Kristu yoze watuhele chilweza chingunu cha kuzeyela kuli Zambi.

⁵ Yika Yesu alilongesele ha lamba lize amwene hano hashi? Mukanda wa A-Hepreu 5:8 unambe ngwo: “Chipwe wapwile Mwana, hindu walilongesele kwononoka mu yuma yize amwenene lamba.” Yesu kanungine ni kuzeyela kuli Tato wa mu malilu ni muze apalikile mu yipikalo yinji. Chikwo nawa, kakalingile chuma nichimwe ku nyonga lienyi mwene. Kakahanjikile kulita ni manyonga jenyi, chipwe kufupa uhenya wenyi mwene. (Yoa. 5:19, 30; 6:38; 7:16-18) Muze apwile ni kwambujola, Yesu kevwile kuwaha chinji kulinga upale wa Tato, chipwe ngwe te kumamuhungumiona ni kumumwesa lamba linji ha kulinga chino. (Yoa. 15:20) Chipwe chocho, Yesu yazeyela kuli Zambi. Mbimbiliya yinambe ngwo, “walikehesele” ndo ‘ku kufwa ha mutondo wa lamba.’ Kuzeyela kuli Yehova ni mbunge yeswe chamunehenene yiwape yinji, ngwe kunangamisa ni kuhalisa Tato ni kutwaha kutalatala cha mwono wa mutolo.—Fwili. 2:5-11; Hepre. 5:9.

CHIZE MUTUZEYELA KULI ZAMBI

⁶ Muze twakuzeyela kuli Zambi hanga tulinge upale wenyi, twakwehuka kusakalala ni lamba lize akumona atu waze keshi kuzeyela ku wata wenyi. Mukwa-kole yetu Ndiapu, nihindu kanafupu kutuumbula. Kashika, twatamba kulimika nenyi ni kulikehesa ku kwoko lia ndundo lia Yehova ni kuzeyela kuli iye ni mbunge yeswe, mba tuhase kutusuka kuli au mukwa-kole yetu mupi.—Mateu 6:10, 13; 1 Petu. 5:6-9.

⁷ Mu chikungulwila cha akwa-Kristu, twakutayiza usongwelo wa Kristu ni wata uze ahana kuli ‘ndungo wamwenemwene, wakanyama.’ Chino chakukwata ku yitanga yetu ni chize twakutwama ni akwetu. Kuzeyela kuli Zambi muchitukwasa kwononokena Liji lienyi hakutwala ku yuma yeswe ya mu uwayilo wetu. Kwononoka chacho, chinatale ha mulimo wetu wa kwambujola, kuya ku kukunguluka ni kuhana makumbululo ha kukunguluka, ni kulivwashana ni makulwana a mu chikungulwila ni kukaula usongwelo wa mu ululikiso wetu.—Mateu 24:45-47; 28:19, 20; Hepre. 10:24, 25; 13:7, 17.

⁸ Kuzeyela kuli Zambi chakuneha sambukila, kutwama kawape ni kukwasa hanga yuma yende kanawa mu chikungulwila. Waze eswe akuzeyela kuli Yehova kakusolola yitanga yenyi. (1 Kori. 14:33, 40) Yuma yize yetwene twamona mu ululikiso wa Yehova, yinatukwasa kupwa ni manyonga ngwe a Mwanangana Ndawichi. Hanyima lia kumona kalisa watwama hakachi ka tuvumbi twa Yehova ni atu api, Ndawichi yamba ni chiseke ngwenyi: ‘Kawaha atu waze akwete Zambi yo Yehova!’—Samu 144:15.

⁹ “Lunga iye mutwe wa pwo,” mu ulo ni mu usoko. Ni lunga nawa katamba kuzeyela kuli Kristu yoze neye ukwete mutwe wenyi, Zambi. (1 Kori. 11:3) Mapwo katamba kuzeyela kuli akwo-malunga, ana kuli yisemi jo. (Efwe. 5:22-24; 6:1) Asoko kakupwa ni sambukila nyi hita mutu mu usoko, makaula shimbi ya wata.

¹⁰ Lunga katamba kuzachisa wata wenyi ni zango ha kwimbulula Kristu. (Efwe. 5:25-29) Nyi lunga kazachishile chipi wata wenyi hanji kwehuka chiteli chenyi mu usoko, pwo ni ana jenyi mamuzeyela ni mbunge yeswe. Pwo katamba kupwa chikwashi cha mukwo-lunga. (Uputu. 2:18) Nyi pwo makwasa ni kuvumbika mukwo-lunga ni uhomboloji, mukwo-lunga mamuzanga ni kupwa ni utayizo wenyi ni kuhalisa Zambi. (1 Petu. 3:1-4) Nyi malunga ni mapwo makaula shimbi ya Mbimbiliya hakutwala ku wata, mahana chilweza chipema kuli ana jo cha kuzeyela kuli Zambi.

¹¹ Kuzeyela kuli Zambi, chinakwata nawa ha chize twakumona waze ali ni “poko ya kuyula,” mumu “hanaaselacho kuli Zambi.” (Roma 13:1-7) Etu akwa-Kristu twakwononokena shimbi ja mu chifuchi chize twatwama, ha kufweta lijimu ni kuhana kuli “Sesare yuma ya Sesare, ni kuli Zambi yuma ya Zambi.” (Mateu 22:21) Chikwo nawa, katalilo twakulinga wa kwambujola mu njiza yetu, kakukaula shimbi ya nguvulu ya kufunga sango ja atu. Kuzeyela ni kwononokena waze ali ni poko ya kuyula ha yuma yeswe yize kuyishi kulimika ni shimbi ja Yehova, chakutukwasa kulihulikila ha mulimo wetu wa kwambujola.—Marku 13:10; Yili. 5:29.

¹² Ha yuma yeswe ku mwono wetu, twatamba kuzeyela ku shimbi ya Zambi, hakutwala ku wata. Kupalikila mu ufulielo, mutuhasa kumona mashimbu waze atu eswe makazeyela kuli Yehova Zambi. (1 Kori. 15:27, 28) Waze akutayiza wata wa Yehova ni uwahililo, ni kununga ni kuzeyela kuli iye, makaawahisa ni kuzuka utayizo wenyi ku miaka yeswe!