Yehova Yafunga Yesu

Mu limwe limbo ku chivumbuko mu Izalele atu jako te kakufuliela ngwo tutongonoshi mahasa kwaasongwela. Ha umwe ufuku, amwe malunga aku Chivumbuko yamona limwe pangu lia umwe katongonoshi unatutuluka mwilu, chocho, ayo yaputuka kumukaula. “Katongonoshi” wacho yaatwala ndo ku Yerusaleme. Malunga jacho yaputuka kuhula atu ngwo: ‘Kulihi ali mwana yoze makapwa mwanangana wa A-Yunda? Tweza hanga tumuwayile.’

Heronde, Mwanangana wa Yerusaleme, muze evwile hakutwala kuli mwanangana mwaha, yaputuka kulipikala chinji. Yahula asasendote a lutwe ngwenyi: ‘Kulihi ali mwanangana yoze wasemuka?’ Ayo yamba ngwo: ‘Aprofeta kambile ngwo te masemukina ku Mbeteleme.’ Hachino, Heronde yasanyika malunga waze ejile ku chivumbuko ni kwaalweza ngwenyi: ‘Yenu ku Mbeteleme nukatale mwana wacho. Muze munufuna, nukangulweza kuze ali. Mumu ni yami ngunazange kumuwayila.’ Alioze wano eswe te mahuza.

“Katongonoshi” yaputuka kututuluka nawa. Malunga jacho yamukaula ndo ku Mbeteleme. “Katongonoshi” yamana helu lia zuwo nawa malunga jacho yanjila mukachi. Ayo yawana Yesu hamwe ni naye, Maria. Yafulamana nikumuwayila, yamulambula yawana ya oru ni libano ni mira. Shina Yehova mwe watumine malunga jacho hanga afupe Yesu? Ka.

Ha ufuku wacho Yehova yalweza Yosefwe mu chilota ngwenyi: ‘Heronde kanafupu kushiha Yesu. Anda mukwenu-pwo hamwe ni mwanenu hanga nuye ku Engitu. Twamenuko ndo haze mungunulweza ngwami munuhasa kufuna.’ Hazehene, Yosefwe yanda usoko wenyi yaya ku Engitu.

Yehova yalweza malunga waze akatukile ku chivumbuko ngwenyi, katambile kufunyina kuli Heronde. Muze Heronde evwile ngwo malunga jacho kechi kufunyina kuli iye, yevwa uli unji. Kukatuka hazehene, iye kakazangile nawa kuwana Yesu, chocho yatuma kushiha ana-malunga eswe waze te akwete miaka yimuwika ni Yesu mu Mbeteleme. Alioze Yesu yamulamwina, hakumutwala mu Engitu.

Hakupalika cha miaka, Heronde yafwa. Yehova yalweza Yosefwe ngwenyi: ‘Haliapwila muhasa kufuna.’ Yosefwe, Maria ni Yesu yafuna ku Izalele, nawa yatunga zuwo lio mu mbonge ya Nazare.