Dezembro

Shina Yehova kali ni ndundo ja kuhindwisa afu? Ewa, kali najo! Iye kali ‘Mukwa-ndundo jeswe.’ (Uso. 1:8) Kali ni ndundo jinji ja kwonwona mukwa-kole mweswawo, chipwe lume kufwa. (1 Kori. 15:26) Kuli nawa chuma chikwo chize chinatukwase kupwa ni shindakenyo ngwetu, Zambi makahindwisa afu. Chuma chacho chili ngwo, manyonga jenyi keshi kuzala. Mba tunyingike chikuma chacho, iye kakuvuluka hita katongonoshi ha jina lienyi. (Iza. 40:26) Chikwo nawa, kakwiwuluka atu waze hanafu. (Yombi 14:13; Luka 20:38) Iye mahasa kwiwuluka yitanga ni ndako ja atu waze makahindwisa, yino yinachingi yifwa yo, yize apalikile ku mwono ni yuma yikwo nawa. Kwamba pundu, mutuhasa kufuliela ha chilakenyo cha Yehova cha uhindukilo, mumu tunanyingika ngwetu iye kali ni ndundo, nawa kanazange kuchimanununa. Tutalenu chuma chikwo chize chinatukwase kufuliela ha uhindukilo. Chuma chacho chili ngwo, Yehova hanahindwisa afu. Kunyima, iye kahanyine ndundo kuli amwe tuvumbi twenyi, kuchingako Yesu hanga ahindwise afu. w23.04 9-10 ¶7-9

Nyi mutuhanjika ni vumbi ni kushimbika, atu mazanga kutupanjika ni kununga kuhanjika ni yetu. Tunanyingika ngwetu, nyi mutu mazanga kuzwela hanji kuhanjika yuma yipi ha yize twafuliela, kutwatambile kununga ni kuhanjika nenyi hanji kukumbulula yize ahula. (Yishi. 26:4) Alioze, hi atu eswe ko akusolola yitanga yacho. Kanji-kanji, atu anji kakutupanjika. Kupwa mukwa-kushimbika chili chuma chilemu ku mwono wa mutu. Eta kuli Yehova hanga akukwase ununge ni kupwa mutu yoze washimbika muze muzanga kukumbulula mutu yoze unakusosomba, hanji yoze unahanjika yuma yipi ha yize wafuliela. Nyingika ngwe kumbululo lie lipema, mulihasa kukwasa hanga nuhone kuzwela. Chikwo nawa, kukumbulula ni vumbi ni kushimbika, muchihasa kukwasa atu amwe kuzanga kutupanjika ni kwalumuna manyonga jo hali yetu ni ha Mbimbiliya. Lilulieke hanga ukalile yize wafuliela, alioze “chilinge ni kulihumikiza cheswe ni vumbi.” (1 Petu. 3:15) Kashika, echa kushimbika chisolole ngwe ukwete tachi! w23.09 19 ¶18-19

Talenu majila awana waze mutuhasa kusolwelamo kulihumikiza. Yitangu, mutu yoze walihumikiza keshi kulivutula ni kawashi. Muze akwo mamuvwisa uli, iye kakuhwima mbunge; keshi kufunyisa upi ha upi. Iye nawa keshi kulinga akwo yuma yipi muze anapalika mu umwe ukalu. (Kutuhu. 34:6) Yamuchiali, mutu yoze walihumikiza kakuhwima mbunge muze anashimbwila yimwe. Iye keshi kwivwa uli hanji kulivutula muze yuma yize anashimbwila kuyishi kwiza ni kawashi. (Mateu 18:26, 27) Yamuchitatu, mutu yoze walihumikiza keshi kulinga yuma chakuhona kunyonga. Muze mutu yoze walihumikiza muze anambe kulinga chimwe chuma chilemu, iye keshi kuchilinga chakuhona chitangu kunyonga hanji kuchilinga kafuji-fuji hanga chihwe ni kawashi. Shimbu alinge chocho, iye kakusa mashimbu anyonge chize malinga chuma chacho ni kupalikisa mashimbu alita hanga achilinge. Yamuchiwana, mutu yoze walihumikiza kakusa tachi hanga akumbe yipikalo chakuhona kulinyenyeta. Kashika uhumikizo unalite ni kunyongonona. Chikwo nawa, mutu yoze wakulihumikiza kakusa tachi hanga anunge ni kulingila Yehova ni uwahililo. (Kolo. 1:11) Tuvumbi twa Yehova kanafupiwa kusolola uhumikizo mu yuma yino yeswe. w23.08 20-21 ¶3-6

Chuma chilemu chize twakufungila mbunge yetu, chili ngwo Yehova kakuhengwola mbunge yetu. Maliji wano kanasolola ngwo, kulisa ni atu waze mahasa kumona wika haze, Yehova kakumona yize yili mu mbunge yetu. Nyi mutuzalisa mbunge yetu ni yiyulo yipema ya Yehova, iye matuzanga ni kutwaha mwono wa mutolo kulutwe lia matangwa. (Yoa. 4:14) Nyi twachilinga, yitanga yipi ya hano hashi, ni mahuza a Satana kuyichi kutupiangula, mumu kutuchi kuyaha unjililo. (1 Yoa. 5:18, 19) Nyi twasa tachi hanga tukundame kuli Yehova, mutumuzanga ni kumuvumbika chinji. Twakuzanga chinji Yehova, kashika twakuvwila kole chipwe manyonga a kulinga shili yinene. Marta, umwe pangi ku Croâcia yoze wapwile mu cheseko cha kulinga utanji, yamba ngwenyi: “Kuli yami chapwile chikalu kumona yuma kanawa ni kwehuka kulivwisa kuwaha ha mashimbu akehe. Alioze kuvwila woma Yehova changufungile.” Mba kuchi woma wa Yehova wakwashile Marta? Yamba ngwenyi, te kakupukuna ha lamba lize muliza ku yize malinga. Ni yetu che twatamba kulinga. w23.06 20-21 ¶3-4

Yesu kanyingikine ngwenyi, nyonga litangu lia Yehova lili kuhalisa jina Lienyi, ni kusolola kuli atu ngwo, yuma yize amwambile mu munda wa Endene yili ya mahuza. Kashika, alongesele tumbaji twenyi kulemba ngwenyi: “Tata yetu nuli mu malilu, jina lienu lipwe lisandu.” (Mateu 6:9) Yesu kanyingikine ngwenyi, chikuma chino te chinatale hali yitangiwa yeswe. Kukushi chitangiwa nichimwe mu malilu ni hashi, chize chasele tachi hanga chihalise jina lia Yehova kuhiana Yesu. Alioze mulonga uka amusumine muze amukwachile kuli akwa-kole jenyi? Ayo kambile ngwo, kashililika Zambi! Kwamba pundu, Yesu kanyingikine ngwenyi, kwamba yuma yipi ha jina lisandu lia Tato chapwile shili yinene yize mutu mahasa kulinga. Kumukwata ni kumushiha hamukunda wa chitela chino, chamunehenene yikola yinji ku mbunge. Chino kota che chatwalile Yesu, mba alipikale chinji ha amwe mashimbu muze te kanda achimukwata.—Luka 22:41-44. w24.02 11 ¶11

Mu kuzomboka chetu cha mwono, twatamba kuzanga chinji Yehova ni Yesu kuhiana asoko jetu. (Mateu 10:37) Alioze chino kuchalumbunukine ngwo, twatamba kulengulula yiteli yize tukwete mu usoko. Mumu nyi tunazange kuvwisa Yehova ni Yesu kuwaha, twatamba kuyilinga. (1 Timo. 5:4, 8) Nyi twachilinga, mutuwahilila chinji. Yehova kananyingika ngwenyi, asoko kakuwahilila muze lunga ni pwo akulizanga ni kulivumbika, muze yisemi akuzanga ana jo ni kwafumba kanawa ni muze ana akwononokena yisemi jo. (Efwe. 5:33; 6:1, 4) Chipwe ngwe uli lunga, pwo hanji mwana, chuma chilemu kulinga chili kukaula shimbi ja Zambi. Kanda ulinga wika yuma yize wakunyonga ngwe yalita hanji yize yakulingiwa kuze watwama. Chipwe kweseka kukaula yuma yize amwe akwa-mana akwamba ngwo watamba kulinga. Zachisa kanawa mikanda yetu yize yakukatuka mu Mbimbiliya. Mikanda yino, yakuhana yiyulo yipema ya chize mutuhasa kukaula shimbi ja Zambi. w23.08 28 ¶6-7

Ndumbu wa pwo katamba kulilongesa yuma yize muyimukwasa ku mwono wa tangwa ha tangwa. Yimwe ya ku yuma yacho mahasa kulilongesayo ku wanuke, mba muyimukwasa muze makola. Ngwe chilweza, kulilongesa kutanga ni kusoneka kanawa. Ku yihela yimwe, atu anji kakunyonga ngwo, pwo katambile kulilongesa kutanga ni kusoneka. Alioze, yino yili yuma yize Akwa-Kristu eswe atamba kunyingika. (1 Timo. 4:13) Kashika, kanda wecha chuma nichimwe hanga chikukwike kulilongesa kutanga ni kusoneka kanawa. Yika muzuka ni wachilinga? Muchikukwasa kuwana mulimo ni kununga ku mulimo wacho. Chikwo nawa, muopwa longi mupema wa Mbimbiliya ni kuhasa kulongesa atu akwo. Alioze chahiana yino yeswayi, muhasa kutanga Mbimbiliya ni kupukuna kanawa ha yize unatange mba mukundama chinji kuli Yehova.—1 Timo. 4:15. w23.12 20-21 ¶10-11

Eta ukwaso wa Yehova hanga ukumbe yeseko. Yetu tuli yihenge, kashika tunafupiwa kusa tachi mba twehuke kulinga yuma yipi. Satana kanase tachi hanga atutwale kulinga yuma yacho. Yuma yimwe yize iye akuzachisa hanga atweseke, yili yiheho yipi. Yiheho ya mutapu au, muyihasa kuzalisa manyonga yetu ni yuma ya luchisa. Kupwa ni manyonga a mutapu au, muchihasa kututwala kulinga shili yinene yize muyituhonesa utayizo wa Yehova (Mar 7:21-23; Tia 1:14, 15) Mba twehuke kulinga yuma yize kuyalitele, tunafupiwa ukwaso wa Yehova. Yesu kasele chikuma chacho mu kulemba cha Mwene, muze ambile ngwenyi: “Kanda ututwala ku cheseko, alioze tulamwine kuli mwe mupi.” (Mateu 6:13) Yehova kanazange kutukwasa, alioze yetu twatamba kwita ukwaso wenyi. Chikwo nawa, twatamba kulinga yuma kulita ni yize tunete mu yilemba. w23.05 6-7 ¶15-17

Muze lunga ni pwo akulemesa usepa wo ni Yehova, ayo kakukaula yiyulo yenyi, chino chakwakwasa kwehuka yuma yize muyihasa kukeketesa zango lio. Mutu yoze wajama ku ufulielo, kakusa tachi hanga embulule yitanga ya Yehova ngwe, upeme, uhomboloji ni kukonekena. (Efwe. 4:32–5:1) Nyi lunga ni pwo malisolwela yitanga yino, zango lize lili hakachi ko mulikola. Pangi avuluka ngwo Lena, yoze halinga miaka mu ulo kuhiana 25, yamba ngwenyi: “Chapwa chashi kuzanga ni kuvumbika mutu yoze wajama ku ufulielo.” Tutalenu chimwe chilweza cha mu Mbimbiliya. Muze Yehova afupile kusakula atu waze te mapwa yisemi ja Mesaya, iye kachi kasakwile atu eswawo mu chisemuko cha Ndawichi, alioze yasakula Yosefwe ni Maria. Mumu liaka? Mumu ayo eswe aali kapwile ni usepa ukolo ni Yehova. Yehova kanyingikine nawa ngwenyi, iye nihindu te mapwa ha chihela chitangu mu ulo wo. w23.05 21 ¶3-4

Chipwe ngwe mwata wetu Yesu kali mungunu, nihindu waze iye akuzachisa hanga atwehe usongwelo hano hashi, kali yihenge. Kashika, ha mashimbu amwe muchipwa chikalu kwoononokena, chipi-chipi muze matwita hanga tulinge chuma chize yetu kutwazangile. Ha mashimbu amwe, Petulu chapwile ni kumukalila kwononoka. Iye katambwile usongwelo kuli mungelo hanga alie tushitu waze te apwa ha luchisa kulita ni Shimbi ya Mose. Petulu yalituna kwononoka hi kamuwika ko; alioze katatu. (Yili. 10:9-16) Mumu liaka Petulu alingile chocho? Kuli iye, usongwelo wacho waha te kuwalitele. Sali likwo, Postolo Paulu kononokene muze mandumbu waze apwile ni kusongwela amulwezele hanga aye ni malunga awana mu tembele, akalipemese kulita ni chako cha A-Yunda. Kulinga chino, te muchisolola ngwo Paulu kanavumbika shimbi. Paulu kanyingikine ngwenyi, Akwa-Kristu kafupiwile nawa kukaula Shimbi ya Mose; chikwo nawa, iye kakalingile chuma chipi nichimwe. Chipwe chocho, “Paulu yaya hamwe ni e malunga; yaalipemesa.” (Yili. 21:23, 24, 26) Kwononoka cha Paulu chakwashile mandumbu kulinunga.—Roma 14:19, 21. w23.10 10 ¶15-16

Chikalu kwamba ngwo, woma uli chimwe chitanga chilemu mukachi ka masepa. Alioze, waze anazange kupwa masepa ja Yehova katamba ‘kumuvwila woma.’ Chipwe ngwe twakulingila Yehova ha miaka yinji hanji ha miaka yikehe, tulieswe twatamba kumuvwila woma mu mutapu uze walita. Mba kuvwila woma Zambi yika chinalumbunuka? Kuvwila Yehova woma chinalumbunuka kumuzanga chinji, ni kuhona kulinga chuma chize muchihasa kupihisa usepa wetu ni iye. Chakutalilaho, woma wa mutapu au we Yesu apwile ni kuvwila Zambi. (Hepre. 5:7) Iye kakapwile ni kuvwila Yehova mwongo. (Iza. 11:2, 3) Kwamba pundu, iye te kakuzanga chinji Yehova nawa kazangile kumwononokena. (Yoa. 14:21, 31) Chizechene ngwe Yesu, ni yetu twakuvumbika Yehova ni kumuvwila woma, mumu tunanyingika ngwetu, kakwete zango, mana, ululi ni ndundo. Tunanyingika nawa ngwetu, Yehova kakutuzanga chikwo nawa, yeswe yize twakulinga muyihasa kumuvwisa chinyengo hanji kuwaha.—Samu 78:41; Yishi. 27:11. w23.06 14 ¶1-2; 15 ¶5

Muze Mwanangana Uzia apwile lunga wa ndundo, iye yavulama yuma yeswe yipema yize Yehova amulingilile. Longeso lika twawana hano? Longeso lili ngwo, twatamba kwiwuluka mashimbu eswe ngwetu, yiwape ni yiteli yize tuli nayo yinakatuka kuli Yehova. Shimbu tulizate ha yize twakulinga, twatamba kuhalisa Yehova ha yuma yacho. (1 Kori. 4:7) Chikwo nawa, twatamba kulikehesa ha kunyingika ngwetu, tuli yihenge nawa tunafupiwa fumbo. Umwe ndumbu wa miaka 60, yasoneka ngwenyi: “Nalilongesa ngwami, kuchatambile kupwa ni kwivwa uli hanji kunenganyana nyi akwetu mangulweza upi uze nalinga.” Ha mashimbu amwe, nakulinga yuma yize kuyalitele; chocho akwetu mangukwasa ha yuma yacho. Hachino, nakusa tachi hanga ngwehuke yuma yacho ni kununga kulingila Yehova mu jila yalita. Nyi twononokena Yehova ni kununga ni kulikehesa, mutupwa ni uwahililo wamwenemwene.—Yishi. 22:4. w23.09 10 ¶10-11

Akwa-Kristu atangu kafupiwile kunyongonona. Ayo kapwile ni kupalika mu yipikalo ngwe yize apwile ni kupalika atu eswe ha mashimbu jacho. Alioze, o kapwile ni kapinda munji mumu lia kupwa Akwa-Kristu. Anji a kuli ayo kahungumionene hi wika ko kuli mangana A-Yunda ni kuli nguvulu wa A-Roma, alioze ni kuli asoko jo nawa. (Mateu 10:21) Mu chikungulwila, ha mashimbu amwe o katambile kusa tachi hanga ehuke manyonga a yitanganyanyi waze afupile kuhandununa mandumbu. (Yili. 20:29, 30) Chipwe chocho, Akwa-Kristu jacho kanyongonwene. (Uso. 2:3) Kuchi ahashile kuchilinga? Ayo kapwile ni kunyonga ha yilweza ya kunyongonona yize te akuwana mu Yisoneko ngwe chilweza cha Yombi. (Tia. 5:10, 11) Te kakulemba kuli Yehova hanga aehe tachi. (Yili. 4:29-31) Chikwo nawa, te kakulihulikila ha yuma yipema yize apwile ni kuzuka ku kunyongonona cho. (Yili. 5:41) Ni yetu mutuhasa kunyongonana nyi mutununga ni kulilongesa ni kupukuna ha yilweza ya kunyongonona yize yili mu Liji lia Zambi ni mu mikanda yetu. w23.07 3 ¶5-6

Yehova ni Yesu kechi keza katwehuka nilimwe tangwa. Hanyima lia postolo Petulu kulituna Yesu, iye katambile kukwata chimwe chiyulo chilemu. Shina te mecha kupwa kambaji ka Yesu, nyi te manunga ni kunyongonona? Yesu yeta kuli Yehova hanga ufulielo wa Petulu uhone kukeketela. Iye yalweza Petulu hakutwala ku kulemba chacho, ni kusolola pundu ngwenyi, Petulu te matakamisa mandumbu jenyi. (Luka 22:31, 32) Hita shimbu apwile ni kwiwuluka yize Yesu ambile, Petulu kota te kakuwana utakamiso unji. Chizechene nawa, nyi tunambe kukwata chiyulo chilemu ku mwono wetu, Yehova mahasa kutukwasa hanga tununge ni kushishika kuli iye. Iye mahasa kuchilinga kupalikila muli tufunga a zango. (Efwe. 4:8, 11) Ngwe chizechene afungile Petulu ni apostolo akwo ha yize te akufupiwa ku musunya, ni yetu Yehova matukwasa nyi mutusa Wanangana wenyi ha chihela chitangu. w23.09 24-25 ¶14-15

Yehova kakumona yuma yeswe yipema yize twakulingila akwetu chipwe ngwe yuma yacho yili yikehe-yikehe. Iye kakuyilemesa ni kuyimona ngwe kongo lize makatufweta kulutwe. Mba yika mutwamba nyi kunyima wapwile kavumbi hanji mukulwana mu chikungulwila? Yehova kakwiwuluka milimo yeswe yize walingile kunyima, ni yize yakutwalile mba uyilinge. (1 Kori. 15:58) Iye nawa kakumona zango lize unanungu ni kusolola. Yehova kanazange hanga yetu eswe twokese zango lietu hali iye ni hali akwetu. Mutuhasa kukolesa zango lietu hali Yehova ha kutanga Liji lienyi ni kulipukuna ni kulemba kuli iye mashimbu eswe. Mutuhasa kusolola zango hali mandumbu jetu, ha kwakwasa ha yize anafupiwa. Nyi zango lietu mulioka, mutukundama kuli Yehova ni kuli mandumbu jetu. Chikwo nawa, usepa wacho muununga ku miaka yeswe! w23.07 10 ¶11; 11-12 ¶13; 13 ¶18

Hita Mukwa-Kristu, katamba kutesa chize mafunga mujimba wenyi. Muze Mukwa-Kristu masakula umwe uukiso, shimbi ja mu Mbimbiliya jize atamba kunyonga, jili jize jakukanjisa manyinga ni uukiso wa yipanda-panda. (Yili. 15:20; Ngala. 5:19, 20) Kuchizako yino, hita Mukwa-Kristu kali ni ulite wa kusakula uukiso uze matambula. Kashika, twatamba kuvumbika chiyulo cha hita ndumbu ha uukiso uze mwene asakula, chipwe ngwe mututayiza uukiso wacho hanji ka. Hachino, twatamba kwiwuluka yikuma yino: (1) Wanangana wa Zambi wika we mukahwisa misongo yeswe ya atu. (Iza. 33:24) (2) Hita Mukwa-Kristu katamba kupwa ni shindakenyo ha yize mwene ananyongo ngwenyi muyimukwasa. (Roma 14:5) (3) Kanda tupatwila akwetu ha yiyulo yize akukwata, chipwe kupwa liwe lize muliahukanyisa, ka. (Roma 14:13) (4) Akwa-Kristu kakusolola zango nawa kananyingika ngwo, kulinunga cha chikungulwila chili chilemu kuhiana manyonga jo ene.—Roma 14:15, 19, 20. w23.07 24-25 ¶15

Shina wakulemesa usepa we ni Yehova? Nyi wakuchilinga, chize ku shakulu, atu anji kalivwile ngwe chizechene yena wakulivwa musono. (Samu 104:33, 34) Atu anji kasele tachi ni kwecha yuma yinji, mba ahase kulingila Yehova. Yino ye apwile ni kulinga A-Nazireu hanji akwa kulihana mu Izalele ya ku shakulu. A-Nazireu kapwile A-Izalele alihana waze te akwecha kulinga yuma yimwe, hanga alingile Yehova mu jila yalipwila. Shimbi ya Mose te yakutayiza ngwo, lunga hanji pwo mahasa kulinga chilakenyo chalipwila kuli Yehova, ha kusakula kupwa Ka-Nazireu ha amwe mashimbu. (Kwa. 6:1, 2) Muze Ka-Izalele umwe te akulihana mu mulimo wa Nazireu, mutu wacho apwe pwo hanji lunga, te katamba kukaula jimwe shimbi jize A-Izalele akwo katambile kujikaula. Mba mumu liaka A-Izalele amwe te akusakula kupwa A-Nazireu? Kota te kakuchilinga mumu lia kuzanga Yehova ni kumusakwilila ha yiwape yize apwile ni kuzuka.—Shimbi 6:5; 16:17. w24.02 14-15 ¶1-2

Mbimbiliya kanji-kanji yakuhanjika ha ‘ushishiko’ hanji ‘zango lingunu’ lize Zambi akusolola kuli masepa jenyi. Mbimbiliya yakuhanjika nawa ha ushishiko uze tuvumbi twa Zambi akulisolwela umwe ni mukwo. (2 Samue. 9:6, 7) Ushishiko wetu muhasa kukola chinji ha kupalika cha mashimbu. Yino ye yalingiwile kuli Daniele. Ushishiko wa Daniele kuli Yehova wapwile mu cheseko ku mwono wenyi weswe. Alioze, cheseko chinene chalingiwile muze te ali ni miaka 90. Yilolo ja mwanangana te keshi kuzanga Daniele, nawa te keshi kuvumbika Yehova. Chocho, yatesa kulinga yimwe hanga ashihe Daniele. Ayo yatwala mwanangana kusa chijikilo ha shimbi yize te yinakanjisa atu kulemba kuli umwe Zambi hanji kuli mutu mweswawo yoze te hi mwanangana ko. Chuma chize Daniele atambile kulinga chapwile kwecha kulemba kuli Yehova ha matangwa 30. Hachino, te masolola ngwenyi kanashishika kuli mwanangana ni kuhona kumumwesa lamba. Alioze, Daniele yalituna kuchilinga.—Danie. 6:12-15, 20-22. w23.08 5-6 ¶10-12

Yehova kanazange hanga tununge ni kuzanga mandumbu jetu. Nyi umwe ndumbu matulinga yuma yize kuyalitele, twatamba kunyingika ngwetu, iye katulingile yuma yacho ku tachi, nawa ngwetu, iye kanase tachi hanga alinge yuma kulita ni manyonga ja Yehova. (Yishi. 12:18) Yehova kakuzanga tuvumbi twenyi ashishika chipwe ngwe kakuhengesa. Iye kananungu ni kupwa sepa lietu; keshi kutufungila toto. (Samu 103:9) Yetu twakuwahilila chinji ha chize Yehova akutukonekena, kashika twatamba kumwimbulula ha kukonekena akwetu! (Efwe. 4:32–5:1) Chili chilemu kunyingika ngwetu, tunakundama ku songo lia hano hashi. Kashika, twatamba kusa tachi hanga tulikate ni mandumbu jetu. Mutuhasa kushimbwila kwoka cha yihungumiona ni kutusa mu mazuwo a ususu mumu lia ufulielo wetu. Nyi yino muyilingiwa, mutufupiwa chinji ukwaso wa mandumbu jetu kuhiana kunyima.—Yishi. 17:17. w24.03 15-16 ¶6-7

Mbimbiliya yakuhanjika hali akweze waze akundamine kuli Yehova ni kuzuka yiwape yenyi ni kuwahilila ku mwono. Ndawichi kali umwe wa kuli akweze jacho. Muze apwile kanuke, iye kasakwile kupwa sepa lia Yehova; mba kulutwe yapwa mwanangana washishika. (1 Mia. 3:6; 9:4, 5; 14:8) Nyi muchilita, lilongese nawa ha mwono wa Ndawichi. Nyi wachilinga, chino muchikukwasa kupwa ni zango lia kununga ni kulingila Yehova ni ushishiko. Muhasa nawa kulilongesa ha chilweza cha Marku ni Timoteu. Ayo kaputukile kulingila Yehova muze te achili akweze, chocho yanunga ni kushishika kuli iye ndo ku kufwa cho. Mutapu uze wakumbata mwono we haliapwila, muusolola chize mwono we mukapwa kulutwe lia matangwa. Nyi wajikijila muli Yehova hi muli yena mwene ko, iye makukwasa kukwata yiyulo yipema. Muhasa kupwa ni uwahililo ku mwono hamwe ni yuma yinji yipema. Alioze iwuluka ngwe, Yehova kakulemesa chinji yuma yize wakumulingila. Kuzachisa mwono we hanga ulingile Yehova, chili chiyulo chipema chize muhasa kukwata; kukushi chuma chikwo chipema chinahiane chino. w23.09 13 ¶18-19

Postolo Paulu kanyingikine ngwenyi, mandumbu jenyi kali yihenge. Ngwe chilweza, mandumbu amwe mu chikungulwila cha Yerusaleme, te keshi kutayiza ngwo iye kali kambaji. (Yili. 9:26) Ha kupalika cha amwe mashimbu, mandumbu amwe kahanjikile yuma yipi hali Paulu hanga apihise lufuma wenyi. (2 Kori. 10:10) Tangwa limwe, Paulu yamona umwe mukulwana wa mu chikungulwila kanakwate chiyulo chipi chize te muchihukanyisa mandumbu akwo. (Ngala. 2:11, 12) Chikwo nawa, Marku, umwe wa kuli masepa a Paulu, yamuvwisa chinyengo. (Yili. 15:37, 38) Paulu kachi kechele yuma yino hanga yimuhandunune ni mandumbu waze amulemekene ku mbunge, alioze kakachilingile. Iye yanunga ni kumona mandumbu jenyi ni nyonga lipema ni kulihana chinji mu mulimo wa Yehova. Yika yakwashile Paulu mba anyongonone ha chikuma chino? Paulu te kakuzanga chinji mandumbu jenyi eswe. Zango lize apwile nalio hali ayo, liamukwashile ahone kulihulikila ha uhenge wo ha kulihulikila ha yitanga yo yipema. Zango liakwashile nawa Paulu kukaula yuma yize mwene asonekene ha chisoneko cha musono. w24.03 15 ¶4-5

Mu Mbimbiliya muli yilweza yinji yize yinasolola ngwo, kushimbika chili chitanga chilemu chinji. Tutalenu chilweza cha Izake. Muze ayile ni kutwama mu chifuchi cha Ngerare, enyembo yenyi A-Filistea yaputuka kumuvwila chipululu; chocho yajika mashima eswe a meya waze ngamba ja tato ashimine. Alioze, shimbu alitachike no hanga afunge mashima jenyi, Izake ni asoko jenyi yalukila ku chihela cha kusuku; koko yafula mashima akwo nawa. (Uputu. 26:12-18) Alioze A-Filistea yamba nawa ngwo, mashima waze afulile kali ni wo. Chipwe chocho, Izake nihindu yalihumikiza. (Uputu. 26:19-25) Mba kuchi Izake apwile ni kuhasa kuhwima mbunge chipwe muze akwo te akumusosomba? Pundu lume, iye katalile ha chilweza cha yisemi jenyi; chocho yalilongesa yuma yinji kuli tato Apalahama yoze te wakuneha sambukila ni kuli naye Sara, yoze wapwile ni “spiritu ya uhumikizo ni kulikehesa.”—1 Petu. 3:4-6; Uputu. 21:22-34. w23.09 15 ¶4

Mumu lia zango, Yehova yatuma Mwanenyi wa wika hano hashi, ha shimbu lize mwene te hanatese kulu. Hanyima lia kufwa, Yehova yahindwisa Yesu ni kufuna mu malilu. Haliapwila, iye kanayulu ngwe Mwanangana mu Wanangna wa Zambi. Chikuma chilemu cha mu Mbimbiliya chili ngwo, jina lia Zambi lipwe lisandu. Yino muyilingiwa muze anayi ni kumanununa upale wenyi hano hashi kupalikila mu Wanangana wenyi uze anayulu kuli Yesu. Upale wa Yehova kuuchi kuhasa kwalumuka. Yehova kanalakenya ngwenyi, yuma yeswe muyilingiwa pundu ngwe chizechene ambile. (Iza. 46:10; Hepre. 6:17, 18) Kulutwe, hashi muhakapwa paraisu; mba ana ja Alama ni Eva angunu nawa ashishika, “matwama ku miaka yeswe.” (Samu 22:26) Alioze Yehova kali ni yuma yinji yize anazange kutulingila. Upale wenyi unene uli ngwo, tuvumbi twenyi eswe mu malilu ni hashi amuwayile hamuwika ni kulinunga. Hachino, atu eswe makapwa ni kushishika ni kwononokena Yehova ngwe Chitunda wa malilu ni hashi. (Efwe. 1:8-11) Shina kuushi kukomoka ha kumona mutapu uze Yehova anamanunwinamo upale wenyi? w23.10 20 ¶7-8

Muze A-Yunda waze akatukile ku Babilonia ahetele ku Yerusaleme, ayo yaputuka kupalika mu yipikalo yize yapwile ni kusoloka mu yuma ya mafwefwe, kuhona mbongo ni ukanjiso. Chocho, amwe yichaapwila chikalu kulihulikila ha mulimo wa kutungulula tembele. Hachino, Yehova yatuma aprofeta aali hanga akwase atu jenyi kupwa nawa ni zango mu mulimo wenyi. Aprofeta jacho kapwile, Hagaia ni Zekaria. Ngwe chize mutumona, mulimo wa aprofeta wano wendele kanawa. (Haga. 1:1; Zeka. 1:1) Ha kupalika cha miaka 50, A-Yunda waze afunyine ku Yerusaleme yafupiwa nawa utakamiso. Ezera, umwe longeshi wajama ha shimbi, yakatuka mu Babilonia ni kuya ku Yerusaleme, hanga atakamise A-Yunda ase uwayilo wa Zambi ha chihela chitangu ku mwono wo. (Ezera 7:1, 6) Uprofeto wa Hagaia ni Zekaria, wakwashile chinji atu ja Zambi kununga ni kujikijila muli Yehova ha mashimbu jacho akalu. Uprofeto uno, muuhasa kutukwasa ni yetu hanga tupwe ni shindakenyo ngwetu, Yehova matukwasa chipwe ngwe mutupalika mu yipikalo yeswayo.—Yishi. 22:19. w23.11 14-15 ¶2-3

Kuchi mutuhasa kusolola zango kuli mandumbu jetu? Jila yimwe yize mutuhasa kuchilingila yili wika kwatakamisa. Keke ye muyitukwasa mba ‘tununge ni kulitakamisa umwe ni mukwo.’ (1 Tesa. 4:18) Mba kuchi mutuhasa kununga ni kulizanga chinji umwe ni mukwo? Ha kusa tachi hanga tukonekene uhenge wa akwetu chipwe ngwe muchipwa chikalu kuchilinga. Mumu liaka musono chili chilemu kulisolwela zango umwe ni mukwo? Petulu kasolwele chikuma chacho muze ambile ngwenyi: “Songo lia yuma yeswe linakundama. Kashika, . . . lizangenu chinji umwe ni mukwo.” (1 Petu. 4:7, 8) Yika twatamba kushimbwila, amu songo lia hano hashi hapi linakundama? Yesu kahanyine utowezo uno kuli tumbaji twenyi ngwenyi: “Makanuvwila kole kuli akwa-mavungu eswe mumu lia jina liami.” (Mateu 24:9) Mba tuhase kukumba kole yino yeswe, twatamba kulinunga ni mandumbu jetu. Nyi twachilinga, Satana kechi kuhasa kutuhandununa, mumu mutupwa alinunga mu zango.—Fwili. 2:1, 2. w23.11 13 ¶18-19

Umwenemwene wa mu Liji lia Zambi ukwete ndundo jinji. Muze twakulongesa atu hakutwala kuli Yehova ni chize iye apwa, twakumona chimwe chuma cha kukomwesa. Yihwahwi yize Satana akusa mu meso ja atu, yakukatuka ni kuputuka kumona kanawa yitanga ya Tata yetu wa zango. Ayo kakukomoka ha ndundo ja Yehova jize kujishi musulo. (Iza. 40:26) Kakulilongesa kujikijila muli iye, mumu lia ululi wenyi ungunu. (Shimbi 32:4) Ayo kakulilongesa yuma yinji ha mana jenyi. (Iza. 55:9; Roma 11:33) Chikwo nawa, kakuwana utakamiso muze akulilongesa ngwo, Yehova kali Zambi ya zango. (1 Yoa. 4:8) Muze o akusa tachi hanga akundame kuli Yehova, chino chakwakwasa kukolesa kutalatala cho cha kutwama ku miaka yeswe. Kashika, tuli ni chiwape chinene cha kukwasa atu hanga akundame kuli Yehova! Muze twakuchilinga, twakulipwisa “akwa-milimo-ni-akwo” a Yehova.—1 Kori. 3:5. w24.02 12 ¶15

Nyi uli longi wa Mbimbiliya hanji yisemi je kali Yela ja Yehova, shina unanyongo kukupapachisa? Chino chili chiyulo chipema chize muhasa kukwata! Alioze, shimbu kanda achikupapachisa, chili chilemu kuhana mwono we kuli Yehova. Kuchi mulihana kuli Yehova? Muchilinga ha kulemba kuli iye. Mu kulemba chacho, yena mulakenya kuwayila wika iye; nawa kulinga upale wenyi muchipwa chuma chilemu ku mwono we. Kwamba umwenemwene, mulakenya Yehova ngwenyi, mumuzanga “ni mbunge ye yeswe, ni mwono we weswe, ni kunyonga che cheswe ni tachi je jeswe.” (Marku 12:30) Kulemba chacho muchilinga ku tenga ha kuhanjika wika ni Yehova. Chikwo nawa, makupapachishila ha mbunga hanga usolole kuli atu akwo ngwe, hiwalihana kuli Yehova. Kulihana che kuli Yehova chili chilakenyo chilemu, kashika muchilita kusa tachi hanga uchimanunune ha kulinga yize iye mashimbwila hali yena.—Chilu. 5:4. w24.03 2 ¶2; 3-4 ¶5

Malo eswe kakwete yipikalo. Mbimbiliya yakusolola zwalala ngwo, waze alimbata “kumakapwa ni yipikalo ku mwono wo.” (1 Kori. 7:28) Mumu liaka? Mumu ulo wakuchinga atu aali yihenge waze akwete yitanga yalisa, akuzanga yuma yalisa, nawa akwete manyonga alisa. Waze alimbata mahasa kukatuka ku minyachi yalisa hanji kwalela mu mutapu walisa. Kashika ha kupalika cha mashimbu, akuputuka kumona yitanga hali umwe ni mukwo yize kakamwene muze te kanda achilimbata. Yimwe ya ku yitanga yacho, muyihasa kuneha yipikalo yinji mu ulo. Amwe waze alimbata, shimbu ase tachi hanga ahwise kapinda wacho hamuwika, kakulisuma mulonga ha kapinda yoze unasoloka mu ulo wo, chipwe ngwe eswe aali kali ni chihanda ku kapinda wacho. Akwo kakunyonga ngwo, mba ahwise kapinda wacho, katamba kulihandununa hanji kulilakula. Shina kulinga yuma yino, muchihwisa lume kapinda yoze ali nenyi? Ka. Yehova kakuzanga hanga waze alimbata alemese ulo wo, chipwe ngwe mukwo-pwo hanji lunga kali mukalu kutwama nenyi. w24.03 16 ¶8; 17 ¶11

Chipwe ngwe hakupapachisa, nihindu mununga ni kusa tachi hanga kutalatala che chakupwa ni mwono wa mutolo mu paraisu chikole hamwe ni zango lie hali Yehova. Nyi wachilinga, kutalatala che muchinunga ni kukola. (Hepre. 5:13–6:1) Hachino, mumona umwenemwene wa maliji ali ha A-Roma 5:2-4. Kota wapalikile mu yipikalo yinji, alioze yiununga ni kunyongonona mba yiupwa ni utayizo wa Yehova. Amu hiwanyingika ngwe Yehova kakukuzanga, haliapwila hiwapwa ni uhashi wa kununga ni kushimbwila kumanunuka cha yuma yize anatulakenya. Kutalatala che chinayi ni kukola chinji kuhiana muze waputukile kulilongesa Mbimbiliya. Haliapwila, kutalatala chino hichapwa chamwenemwene kuli yena, chili ni ulumbunwiso unene ni kusongwela mwono we. Chinakukwase kutwama kanawa ni asoko je, kukwata yiyulo yipema ni kumona chize muhasa kuzachisa kanawa mashimbu je. Postolo Paulu kahanjikile nawa ha chuma chikwo chipema hakutwala ku kutalatala chize tuli nacho muze hitwapwa ni utayizo wa Yehova. Iye kanatwehe shindakenyo ngwenyi, kutalatala chetu muchikamanunuka pundu.—Roma 15:13. w23.12 12-13 ¶16-19

Nyi tunapalika ha mashimbu akalu, mutuhasa kuputuka kunyonga ni kulinga yuma yize te kutuchi kuhasa kulinga nyi tuli kanawa. Kuchi Yehova mahasa kutukwasa muze tunapalika mu yuma ngwe yino? Iye kanalakenya kutukolesa ku manyonga ni ku spiritu. Chakutalilaho, mu kalunga-lwiji nyi muli kangonga, kanji-kanji mikanya yakutwala ulungu sali ni sali. Mba ahase kupalika kanawa mu kapinda wacho, maulungu anji kakwasa yuma kumasesa yize yakupwa mushi lia ulungu. Yuma yacho yakukwasa ulungu hanga uchine kutekenga muze unapalika mu kangonga. Yino yakukwasa atu waze alimo alivwe kanawa ni kulinga wenyi upema. Yuma yino yakukwasa ulungu hanga uhone kutekenga, yakukalakala kanawa muze ulungu unende. Chizechene nawa, ha mashimbu a yipikalo, Yehova matukolesa ku manyonga ni ku spiritu hanga tununge ni kumulingila ni ushishiko. w24.01 22 ¶7-8

Muze unevu woma, lihule ngwe: ‘Yika yize Yehova hanalingi?’ Sako mashimbu hanga unyonge ha yitangiwa. Chakutalilaho, tala kanawa chize Yehova akufunga tujila ni yitemo—chipwe ngwe yuma yino kakayilingile muchifwa chenyi, nawa kuyishi kumuwayila. Yehova kakuzanga chinji kutufunga! Kunyonga ha yino yeswe, muchokesa ujikijilo wetu muli iye. (Mateu 6:25-32) Pukuna nawa ha yize Yehova hanalingila tuvumbi twenyi. Muhasa kulilongesa ha mwono wa umwe kavumbi kenyi mu Mbimbiliya, yoze wapwile ni ufulielo ukolo. Hanji kutanga sango ja ku mwono ja Yela ja Yehova ha mashimbu jetu. Chikwo nawa, pukuna ha chize Yehova akukufunga. Yika iye alingile mba unyingike umwenemwene? (Yoa. 6:44) Kuchi akumbulwile yilemba ye? (1 Yoa. 5:14) Yuma yika yipema yize yakulingiwa ku mwono we hamukunda wa chawana cha ukuule chize Yehova atuhele?—Efwe. 1:7; Hepre. 4:14-16. w24.01 4 ¶6; 7 ¶17