Mwono Wami te Kuunanungu ni Kupihia

MASHIMBU JAMI AKUNYIMA:

Nakolele mu mbonge ya Los Angeles, California, Estados Unidos, mu yihunda kuze apwile ni kulanjisa chinji makanya asasu nawa kuze kwapwile akweze akuzanga kulilamba. Yisemi jami kapwile ni ana asambano, yami napwile mwana wamuchiali.

Mama kapwile ni kututwala ku yingeleja. chipwe chocho, muze napwile mukweze, te nakulinga yuma yipi mu usweke. Liayenga te nakwimba mu chizavu cha akwa-kwimba mu yingeleja yetu. Alioze, mukachi ka poso, napwile kushipa makanya asasu, kulinga utanji ni yuma yikwo nawa.

Napwile ni ufwatulu unji. Ha kulilamba ni akwetu napwile kuzachisa chuma cheswacho hanga ngwalambe. Yize napwile kulilongesa ku yingeleja yetu kuyakangukwashile. Napwile kwamba ngwo “Kukala mulonga chili kuli Zambi—nawa Yami nguli mungelo wenyi wakukalila mulonga!” Ha mwaka 1960 muze napwile ku shikola, kwapwile chimwe chizavu akusanyika ngwo Panteras Negras, te kaanyingika mumu lia mutapu uze akulilamba hanga akalile direitos civis. Chilweza cha chizavu Panteras Negras changutwalile ngulichinge ni alongi akwo hanga tukwase chikuma chacho. Ha mashimbu amwe, twapwile kulimika ni manguvulu hanga twalumune yuma ya mafwefwe, kashika ha mashimbu jacho kapwile ni kuyika shikola.

Alioze, kulimika ni manguvulu te cheshi kuhwisa pwila yami ya ungalwe. Kashika, yinguputuka kulinga yuma yipi mumu lia kole ni kusolola katonde. Ha mashimbu amwe, ami ni masepa jami twapwile kutala yimwe yuzulie yize yinasolola chize apwile ni kumwesa lamba atu a mu Africa ha mashimbu a undungo mu Estados Unidos. Ha kwivwa kupihia mumu lia yino, yituputuka kulamba-lamba akweze yimbali. Yituputuka nawa, kuya mu yihunda muze te atwama yimbali ni kwafupa hanga twalambe.

Ha ukweze wami, yami ni anakwetu te hanatunyingika ngwe tuli yingalwe. Twapwile ni kapinda munji ni manguvulu. Mwanakwetu kapwile mukachi ka chimwe chivazu cha akweze chize te akulinga yuma yipi, ni yami yinguputuka kupalikisa no mashimbu. Mwono wami te kuunanungu ni kupihia.

CHIZE MBIMBILIYA YALUMWINE MWONO WAMI:

Yisemi ja umwe sepa liami kapwile Yela ja Yehova. Ayo kangusanyikine hanga nguye ku kukunguluka, chocho yingutayiza. Ha tangwa litangu, namwene chize Yela ja Yehova analise ni atu akwo. Ayo eswe te kanazachisa Mbimbiliya. Chipwe akweze kapwile ni kulinga pande. Nakomokene ha kunyingika ngwo Zambi kakwete jina, Yehova, ni kwivwa chize atu te anazachisa jina liacho. (Masamu 83:18) Kwapwile atu a ku minyachi yeka ni yeka mu chikungulwila. Chipwe chocho, atu kapwile alinunga.

Ku uputukilo, te chishi kuzanga kulilongesa Mbimbiliya ni Yela ja Yehova, nazangile wika kuya ha kukunguluka. Ha ufuku umwe, muze napwile ha kukunguluka, amwe a kuli masepa jami kayile ha chimwe chiwanyino. Ha chiwanyino chacho, ayo kalambile ni kushiha umwe mukweze mumu iye kakazangile kuhana chikuto chenyi. Ha chimene, ayo yaputuka kulizata mumu lia kushiha mukweze wacho. Chikwo nawa, yaputuka kuseha muze te anaapatwila mu chota. Ayo te matwama mu zuwo lia ususu ndo ha kufwa cho. Kwamba umwenemwene, nawahililile chinji amu chakapwile hamuwika no ha ufuku wacho. Nakwachile chiyulo cha kwalumuna mwono wami ni kuputuka kulilongesa Mbimbiliya.

Amu nakolele ni kusolola katonde, nakukomoka ni chize Yela ja Yehova akutwama umwe ni mukwo. Chakutalilaho, muze umwe lunga chela cha Yehova chimbali alingile wenyi mu chifuchi cheka, kahichikile ana jenyi ni atu alaya. Chikwo nawa, umwe usoko wa atu yimabali, katambwile ku zuwo lio umwe mukweze mulaya. Chino changuhele shindakenyo ngwo, Yela ja Yehova kakukaula kanawa yize Yesu ambile ha mukanda wa Yoano 13:35: “Ku chino eswe makanyingika yenu nuli tumbaji twami, nyi munupwa ni zango umwe kuli mukwo ni mukwo.” Yami napwile ni kulivwa ngwo nguli mukachi ka usoko wamwenemwene.

Ha kulilongesa Mbimbiliya yingumona ngwami, nafupiwa kwalumuna mutapu wakunyonga chami. Yingwalumuna mana jami hi wika ko ha kupwa mukwa-sambukila. Alioze, ni kutayiza nawa ngwo, uno uli mutapu walita chize mutu atela kutwama ku mwono. (A-Roma 12:2) Hakehe-hakehe yinguputuka kukola ku ufulielo. Kangupapachishile ngwe Chela cha Yehova ha mwaka 1974 ha kakweji wa janeiro.

Chipwe muze te hangupapachisa, nafupile kusa tachi hanga ngulihumikize. Chakutalilaho, tangwa limwe a mu te tunayi ni kwambujola ku zuwo ni zuwo, umwe mutu yeya chisaji mu mashinyi jami, yinguzomboka ni kumukaula. Muze hinamukundama yecha chisaji ni kuchina. Muze hinahiluka ni kulweza akwetu chize natambwile chisaji, umwe mukulwana wa mu chikungulwila yanguhula “Stephen, yika te mulinga nyi te wakwatanga mwiji wacho?” Chihula chino chinakangukwasa hanga ngunyonge ngwami, ngunafupiwa kusa tachi mba ngupwe mukwa-sambukila.

Yinguputuka kukalakala mu mulimo wa shimbu lieswe ha Outubro mwaka 1974, napwile ni kupalikisa maola lukama ha hita kakweji ha kulongesa atu umwenemwene wa mu Mbimbiliya. Kulutwe, natambwile chiwape chakukalakala ku Chishina chinene cha Yela ja Yehova mu Brooklyn, New York. Ha mwaka 1978, yinguhiluka mu Los Angeles hanga ngufunge mama te unayiji. Ha kupalika cha miaka yaali yingulimbata ni Aarhonda. Mukwetu-pwo kangukwashile chinji ha kufunga mama ndo muze afwile. Ha kupalika cha mashimbu yami ni Aarhonda, katusanyikine hanga tulilongese ku Shikola ya Ngiliate ni kututuma mu Panamá, kuze tunakalakala ngwe mishionaliu ndo musono.

Chize haze angupapachishile, napalikile mu yimwe yeseko. Nahashile kukumba hakukatuka mukachi ka atu waze te akungusosomba ni kulihumikiza. Atu anji, kuchingako mukwetu-pwo, kapwile kunguchichimieka ha mutapu uze nakumbile kapinda wacho. Nakomokene chinji ha yize yalingiwile ku mwono wami! Chino chakalingiwile kulita ni uhashi wami wika ko ha kuzala utu waha. Nguli ni shindakenyo ngwami chino chinasolola ngwo Mbimbiliya yikwete ndundo ya kwalumuna mwono wa atu.—A-Hepreu 4:12.

KUYUKA CHIZE NAWANA:

Mbimbiliya yangukwasa kupwa ni nyonga lialita hakutwala ku mwono ni kupwa mukwa-sambukila. Musono, shimbu ngulemeke atu, nakwakwasa hanga alivwe kanawa kupalikila mu liji lia Zambi. Nalongesele Mbimbiliya mutu yoze wapwile sepa liami ku shikola ha mashimbu akunyima, ha kupalika cha mashimbu yamupapachisa. Twapwile mu zuwo limuwika nawa yitununga kupwa masepa apema. Yami ni mukwetu-pwo twakwasa atu kuhiana 80 kupwa Yela ja Yehova ha kwalongesa Mbimbiliya.

Nakusakwilila chinji Yehova ha kungwaha mwono uze uli ni ulumbunyiso, ni kuwahilila ha kupwa mu usoko wenyi wa hashi heswe uze walinunga.