Yilwekelo ya Malongeso a Mukanda Wakuzachisa ha Kukunguluka cha Mwono Wetu ni Mulimo Wetu
4-10 MARÇO
YIKUMA YILEMU YA MU LIJI LIA ZAMBI | A-ROMA 12–14
“Kusolola Zango lia Ukristu Yika Chinalumbunuka?”
(A-Roma 12:10) Ha kufwila cha mandumbu, lifwilenu ni utu umwe kuli mukwo ni mukwo; ha ulemu, eswe akaliange kuulweza kuli mukwo.
it-1 60
Kufwila
Zango lia Undumbu (Gr., phi·la·del·phiʹa, linalumbunuka, “kufwila mandumbu”) lie liatamba kupwa ha kachi ka akwa-Kristu eswe mu chikungulwila. (Ro 12:10; Hep 13:1; tala nawa 1Pe 3:8.) Kashika, mu yikungulwila mwatamba kupwa usendo upema, ukolo, ngwe uze watwama mu usoko. Chipwe ngwe mandumbu kakusolola zango liacho, nihindu kanaakolweza hanga anunge ni kulisolola chinji.—1Te 4:9, 10
Liji lia Ngregu phi·loʹstor·gos, linalumbunuka “kufwila chikolo,” kanalivuluka hali mutu yoze uli ni usendo ukolo ni mukwo. Liji liacho linakatuka ha sterʹgo, kakulitongola chinji hanga lilumbunuke zango, ngwe lize twakusolola hali asoko jetu. Postolo Paulu kakolwezele akwa-Kristu hanga apwe ni ndako yacho. (Ro 12:10) Paulu kasolwele nawa ngwenyi, ha matangwa a kusula atu te kechi kupwa ni “zango lia atu” (Gr., aʹstor·goi) nawa ngwo atu jacho kanatela kufwa.—2Ti 3:3; Ro 1:31, 32.
(A-Roma 12:17-19) Kanda nufwetesa niumwe yipi ha yipi. Lemesenu yuma yize yinapeme kumeso ja atu eswe. 18 Nyi kachi muchihasa kupwa nikulita ni tachi jenu, pwenu ni sambukila kuli atu eswe. 19 Akwetu a zango! Kanda nulikalila milonga yenwene, alioze lisekulenu ku utenu: mumu chinasonewa ngwo, Kukala mulonga chili kuli yami; yami kumungukafwetesa, chocho anambe Mwene.
w09 15/10 8 ¶3
“Pwenu ni Sambukila Kuli atu Eswe”
3 Tanga A-Roma 12:17. Paulu kalumbunwine ngwenyi, muze umwe mutu matulinga upi, kutwatambile kufwetesa upi ha upi. Kukaula chiyulo chino mu usoko chili chilemu chinji, chipi-chipi mu usoko uze atu amwe keshi kuwayila Yehova. Mukwa-Kristu yoze hambata, katamba kwehuka kufwetesa yipi ha yipi kuli yoze alimbata nenyi, nyi mamwamba hanji mamulinga upi. Kufwetesa “yipi ha yipi” kuchishi kuneha yiwape, alioze, chakwokesa milonga.
w07 1/7 24-25 ¶12-13
“Kanda Nufwetesa Niumwe Yipi ha Yipi”
12 Chiyulo chikwo chize Paulu ahanyine hakutwala ku chize twatamba kutwama ni mandumbu jetu, ni atu waze keshi kuwayila Yehova, chili ngwo: “Kanda nufwetesa niumwe yipi ha yipi.” Maliji wano kanalite ni waze Paulu ambile chitangu ngwenyi: “Ivwenu lwaji ha ungulungulu.” Kuchi mutu mahasa kwamba ngwenyi, kanevwila lwaji ungulungulu nyi kakufwetesa akwo yipi ha yipi? Kulinga chino, chinalise kupwa ni zango lize kulishi “ulembekese.” Paulu yamba nawa ngwenyi: “Lemesenu yuma yize yinapeme kumeso ja atu eswe.” (A-Roma 12:9, 17) Kuchi mutuhasa kukaula maliji wano?
13 Ha amwe mashimbu kunyima, Paulu yasonekena A-Korindu hakutwala ku yihungumiona yize apostolo te anapalika, ngwenyi: “[Yetu] tunapu chitala kuli akwa hashi, ni kuli angelo, ni kuli atu. . . . kakututuka, etu eswe twakuawahisa. Kakutuhungumiona, etu twakulihumikiza, kakutulamikiza, etu twakuliumba.” (1 A-Korindu 4:9-13) Chizechene nawa, akwa-Kristu amwenemwene musono, kakwendeleza kuli atu. Muze enyembo jetu akumona yuma yipema yize twakulinga chipwe muze akutulinga upi, chino muchihasa kwakwasa hanga atayize sango jipema jize twakwambujola.—1 Petulu 2:12.
(A-Roma 12:20, 21) Nyi mukwa kole ye mevwa zala, mwehe kulia. Nyi mevwa pwila, munwise; mumu ha kulinga chocho, mukalunjika makala a kahia ha mutwe wenyi. 21 Yipi kanda yinukumba, alioze kumbenu yipi ha kulinga yipema.
w12 15/11 29 ¶13
Likonekenenu Umwe ni Mukwo
13 Ha mashimbu amwe, hanji mumona ngwe muhasa kukwasa mutu yoze wakulingile upi hanga anyingike shimbi ja mu Mbimbiliya. Postolo Paulu kasonekene ngwenyi: “Nyi mukwa kole ye mevwa zala, mwehe kulia. Nyi mevwa pwila, munwise; mumu ha kulinga chocho, mukalunjika makala a kahia ha mutwe wenyi. Yipi kanda yinukumba, alioze kumbenu yipi ha kulinga yipema.” (Roma 12:20, 21) Nyi walihumikiza muze anakusosomba, chino muchihasa kukwasa atu hanga alitwamine kukusosomba ni kusolola yitanga yo yipema. Ha kusolola malinjiekela ni keke kuli yoze wakulinga upi, yena muhasa kumukwasa hanga anyingike umwenemwene wa mu Mbimbiliya. Chipwe kwalingiwa chuma cheswacho, kumbululo lipema mulihasa kukwasa mutu yoze wakulinga upi hanga anyonge ha yitanga ye yipema.—1Petu. 2:12; 3:16.
Kuhengwola Yikuma Yilemu ya mu Mbimbiliya
(A-Roma 12:1) Kashika, ngunaliumbu kuli yenu mandumbu, mumu ha keke ya Zambi, nutumbikile mijimba yenu mulambu wa mwono, usandu, wa kupemena chikolo kuli Zambi. Chenacho we uvumbiko wenu wakulita ni kunyonga cha mana.
Chize Mutusakula Kanawa Yiheho Yetu
5 Yuma yeswe yize twakulinga ku mwono wetu yinatale ha uwayilo wetu ni Yehova. Paulu kalumbunwine yino muze ambile ngwenyi: “Nutumbikile mijimba yenu mulambu wa mwono, usandu, wa kupemena chikolo kuli Zambi.” (A-Roma 12:1) Yesu yamba ngwenyi: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe.” (Marku 12:30) Mashimbu eswe, twakuzanga kusa tachi hanga tulingile Yehova ni mbunge yeswe. Ku mashimbu akunyima, muze A-Izalele te akuhana yitapo, Yehova te kakwita hanga ahane tushitu apema. Alioze, nyi te mahana kashitu yoze unayiji hanji mupi ngwe chitapo, Zambi te keshi kutayiza chitapo chacho. (Ulevi 22:18-20) Chizechene nawa, uwayilo wetu muuhasa kupwa upi ku meso ja Yehova. Mumu liaka?
6 Yehova kanatulweze ngwenyi: “Pwenu asandu, mumu yami nguli musandu.” (1 Petulu 1:14-16; 2 Petulu 3:11) Yehova matayiza wika uwayilo wetu nyi uli usandu, hanji walinanga. (Shimbi Yamuchiali 15:21) Uwayilo wetu kuuchi kupwa walinanga nyi twalinga hanji twanunga ni kutala yiheho yize Yehova akuvwila lwaji, ngwe yuma ya utanji, ya upupilo, hanji ya andemoniu. (A-Roma 6:12-15; 8:13) Kashika, nyi twatala yiheho yacho, Yehova matuvwila kupiha. Chino muchihasa kupihisa uwayilo wetu, ni usepa wetu ni iye.
(A-Roma 13:1) Mutu mweswe akazeye kuli waze ali ni poko ya kuyula. Mumu mukwa kuyula wakuhi niumwe shina wa kuli Zambi. Akwa kuyula aze aliko hanaaselacho kuli Zambi.
w08 15/6 31 ¶4
Sango Jilemu ja Mukanda wa A-Roma
13:1—Mujila yika waze ali ni poko ya kuyula “hanaaselacho kuli Zambi”? “Akwa kuyula aze aliko hanaaselacho kuli Zambi,” che kwamba, Zambi mwe wakwecha hanga ayo ayule, chikwo nawa ha mashimbu amwe Zambi mwe wambile kuyula cho. Yino yinasoloka ha yize Mbimbiliya yambile hakutwala kuli manguvulu anji.
Kutanga Mbimbiliya
(A-Roma 13:1-14) Mutu mweswe akazeye kuli waze ali ni poko ya kuyula. Mumu mukwa kuyula wakuhi niumwe shina wa kuli Zambi. Akwa kuyula aze aliko hanaaselacho kuli Zambi. 2 Kashika yoze malimika ni mukwa kuyula, malimika ni chiyulo cha Zambi. Waze malimika, makatambula uhiso. 3 Mumu akwa yitanga yipema keshi kupwa ni woma wa akwa kuyula, alioze akwa kulinga yipi wika. Mba unazange kupwa kushi woma kuli mukwa kuyula, nyi? Linga yipema, mba mukapwa ni uhaliso kuli iye. 4 Mumu iye kavumbi ka Zambi kuli yena ha yipema. Alioze nyi mulinga yipi, ivwa woma, mumu kambachile katana chamokomoko. Mumu iye kavumbi ka Zambi, mukwa kukala wa utenu hali yoze wakulinga yipi. 5 Kashika chanutamba kuzeya, hi mumu ha utenu wenyi wika ko, alioze mumu ha shimbi ya mbunge jenu. 6 Mumu ha chikuma chino nwakufweta lijimu nawa, mumu o akwa kulingila Zambi, kakuhondangana matangwa eswe ha chuma chino. 7 Kashika hanenu kuli eswe yize chanutamba kuhana kuli ayo; milambu kuli akwa kutela milambu; lijimu kuli akwa kutela lijimu; woma kuli waze chatamba kuavwila woma; ulemu kuli akwa kutela ulemu. 8 Kanda nukapwa ni kongo kuli niumwe, shina kulizanga umwe ni mukwo ni mukwo, mumu yoze mazanga mukwo, hanamanununa shimbi jeswe. 9 Mumu ngwo, Kanda ulinga utanji; kanda ushiha; kanda wiya; kanda ushindakenya mahuza; kanda wivwa kuzo; nyi kachi liji likwo lia shimbi liliko, linasu mu liji lino ngwo, Zanga mwenyembo we chizechene ngwe wakulizanga yena mwene. 10 Zango kulishi kulinga chipi kuli mwenyembo wenyi: kashika zango linapu che kumanununa cha shimbi. 11 Chikwo nawa, enu nunanyingika we mwaka, ola hiyaheta kulu ya kulaula mu tulo: mumu haliapwila ulamwino wetu hakamwihi uli, muze twafulielele wapwile kusuku. 12 Ufuku himuuhuwa, mwalwa kuunakundama: kashika tumbilenu yitanga ya milima, tulipakatenu yitwa yeswe ya pangu. 13 Twendenu ngwe chinalite, ngwe ha mwalwa; hi mu chimbangwinya ko, hi ni kuzengewa ko, hi ni ukoi ko, hi ni ujila ko, hi ni vunda ko, hi ni ukwa ko. 14 Alioze zalenu mwene Yesu Kristu. Kanda nusela unjililo niumwe ha musunya, mukumanununa usolo wawo.
11-17 MARÇO
YIKUMA YILEMU YA MU LIJI LIA ZAMBI | A-ROMA 15–16
“Eta Kuli Yehova Hanga Akwehe Kunyongonona, ni Ulembejeko”
(A-Roma 15:4) Mumu yuma yeswayo yasonewene kunyima, yasonewene mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.
w17 15/7 14 ¶11
“Lilenu Hamwe ni Waze Analili”
11 Sango ja yinyengo ya Yesu ha kufwa cha Lazaru jili wika jimwe ja yisoneko yinji ya utakamiso yize twakuwana mu Mbimbiliya. Yino kuyishi kutukomwesa, mumu “yuma yeswayo yasonewene kunyima, yasonewene mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.” (A-Roma 15:4) Nyi unanenganyana, ni yena muhasa kuwana utakamiso ha yisoneko yino yinasulaho:
▪ “Yehova katwama hehi ni waze amakuka mbunge, kakulamwina waze ali ni spiritu ya yakupihilila.”—Samu 34:18, 19.
▪ ‘Muze nakulipikala, yena [Yehova] wakungulembejeka ni kunguwahisa.’—Samu 94:19.
▪ “Mwene wetu Yesu Kristu iye mwene, ni Zambi Tata, yoze hanatuzange, yoze hanatwehe kulembejeka cha mutolo, ni kutalatala chipema ku vumbi, akahwimise mbunge jenu, akanutakamise.”—2 A-Tesalonika 2:16, 17.
(A-Roma 15:5) Haliapwila Zambi ya uhumikizo, ya kulembejeka, akanunyongese chimuwika umwe kuli mukwo ni mukwo, nikulita ni Kristu Yesu:
“Kunyongonona Chikaye ndo ku Songo”
5 Eta tachi kuli Yehova. Yehova kali ‘Zambi ya kulembejeka ni kunyongonwesa.’ (A-Roma 15:5) Iye wika unanyingika yipikalo yetu, kunyonga ni kupwa chetu. Kananyingika pundu yize tunafupu hanga tunyongonone. Mbimbiliya yinambe ngwo: “Kumakayukisa usona wa waze akumuvwila woma. Kumakevwa muteto wo nawa, kumakaalamwina.” (Samu 145:19) Alioze kuchi Zambi makumbulula yilemba yetu hakutwaha tachi ja kunyongonona?
(A-Roma 15:13) Zambi yoze tunamusela mbunge anuzalise ni uwahililo weswe ni sambukila yeswe ha kufuliela, hanga ku tachi ja Spiritu Musandu nukajikijile liakulu mu yilakenyo.
w14 15/6 14 ¶11
“Ukazange Mwene Zambi ye”
11 Yehova kakutwaha kutalatala chize chakutunehena ‘uwahililo ni sambukila.’ (Roma 15:13) Kutalatala chacho chakutukwasa hanga tunyongonone mu yeseko ya ufulielo wetu. Akwa-Kristu akuwayisa ni spiritu waze akushishika ndo ha kufwa, makatambula “chipangula cha mwono” mu malilu. (Uso. 2:10) Akwa-Kristu akwo waze ashishika makawahilila ni yiwape ya mwono wa mutolo mu Paraisu hano hashi. (Luka 23:43) Kuchi twakwiva ha kutalatala chino? Shina kutushi kwivwa kuwaha ni sambukila mu mbunge, ni kusolola zango kuli Zambi yetu yoze wakutwaha “yawana yeswe yingunu”?—Tia. 1:17.
Kuhengwola Yikuma Yilemu ya mu Mbimbiliya
(A-Roma 15:27) Ewa, chinaawahila; o kanapu akwa makongo kuli A-Yunda, mumu nyi akwa mavungu hanalianyina ni yuma yo ya uspiritu, chaatamba nawa kulianyina no mu yuma yatwala ku mujimba.
w89 1/12 24 ¶3
“Cheseko cha Umwenemwene wa Zango Lienu”
Kwamba pundu, mandumbu jo akwa-mavungu kota te kanazange kwakwasa. Mumu ayo kapwile ni “makongo” kuli Akwa-Kristu a mu Yerusaleme, mumu ku Yerusaleme kwe kwakatukile sango jipema mba jihete kuli akwa-mavungu. Paulu yamba ngwenyi: “O kanapu akwa makongo kuli A-Yunda, mumu nyi akwa mavungu hanalianyina ni yuma yo ya uspiritu, chaatamba nawa kulianyina no mu yuma yatwala ku mujimba.”—A-Roma 15:27.
(A-Roma 16:26) Iye mahasa kunutakamisa, nikulita ni Sango Lipema lia yami ni kwambujola cha Yesu Kristu, nikulita ni usolwelo wa chijimbikilo, chize aswekele chize ku miakulwila
it-3 320 ¶2
Kutesa Yuma Shimbu Kanda Yichilingiwa
Mesaya, hanji Kristu, te mwe mapwa munyachi alakenyene, nawa kupalikila muli iye atu eswe akwa ululi ni a ku mavungu eswe te maawahisa. (Nga 3:8, 14) Chisuho chitangu chize anatongola “munyachi” uno, chapwile muze Alama ni Eva te havulumuna kulu, nawa Abele te kanda achisemuka. (Upu 3:15) Chino chalingiwile ha miaka 4,000 kunyima, shimbu te kanda achilumbununa “usolwelo wa chijimbikilo” hakutwala ku “munyachi,” mwe Mesaya. Ha chino, chijimbikilo chino kachiswekele “chize ku miakulwila.”—Ro 16:25-27; Efw 1:8-10; 3:4-11.
Kutanga Mbimbiliya
(A-Roma 15:1-16) Yetu tuli ni tachi kuchatutambile kuliwahisa yetwene, alioze shinaho chatutamba kumbata yiteli ya waze keshi tachi jinji. 2 Mumu ni mutu wa kuli yetu, awahise mwenyembo wenyi nikumulinga yipema mukumukolesa. 3 Mumu chipwe Kristu kaliwahishile mwene; alioze ngwe chinasonewa ngwo, Luchoko wa waze akukuchoka haneza hali yami. 4 Mumu yuma yeswayo yasonewene kunyima, yasonewene mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi. 5 Haliapwila Zambi ya uhumikizo, ya kulembejeka, akanunyongese chimuwika umwe kuli mukwo ni mukwo, nikulita ni Kristu Yesu: 6 hanga ni mbunge yimuwika ni kanwa limuwika, nukachichimieke mwe Zambi kanda Tato ya Mwene wetu Yesu Kristu. 7 Kashika litambulenu umwe ni mukwo ni mukwo chizechene ngwe Kristu nawa hananutambula, ha uhenya wa Zambi. 8 Mumu ngunambe ngwami, Kristu walipwishile kavumbi ka A-Yunda mukusolola umwenemwene wa Zambi, hanga akakolese yilakenyo yize ashikile kuli tulamba, 9 hanga akwa mavungu akachichimieke Zambi ha keke yenyi; ngwe chinasonewa ngwo, Kashika mungukakuhalisa ha kachi ka akwa mavungu, mungwimbila jina lie. 10 Cheka nawa kanambe ngwenyi, Ivwenu chiseke, yenu akwa mavungu, hamwe ni atu jenyi. 11 Cheka nawa ngwo, Halisenu Mwene, yenu akwa mavungu, musangalisenu atu eswe. 12 Cheka nawa, Izaia kanambe ngwenyi, Kumukukapwa mutombo wa Yese, yoze makasoloka hanga akayule mavungu. Hali iye akwa mavungu kumakasela mbunge. 13 Zambi yoze tunamusela mbunge anuzalise ni uwahililo weswe ni sambukila yeswe ha kufuliela, hanga ku tachi ja Spiritu Musandu nukajikijile liakulu mu yilakenyo. 14 Yami mwene nawa ngunakunuka ha kutwala kuli yenu, mandumbu jami, ngwami yenwene nunazala too ni upeme weswe, a too ni yinyingi yeswe, nunahase nawa kulitoweza umwe ni mukwo ni mukwo. 15 Alioze ngunasoneka kuli yenu, kanda ngwe ni kuhamuka, hanga ngunwiwulule cheka nawa, mumu ha vumbi lize anguhele Zambi. 16 Hanga ngukapwe kavumbi ka Kristu Yesu kuli akwa mavungu, nikulinga ngwe uvumbiko wa sasendote mu sango lipema lia Zambi, hanga akwa mavungu akapwe mulambu wa kupemena chikolo, kanausela ku usandu kuli Spiritu Musandu.
18-24 MARÇO
YIKUMA YILEMU YA MU LIJI LIA ZAMBI | 1 A-KORINDU 1–3
“Shina Yena uli Mutu wa Musunya nyi wa Spiritu?”
(1 A-Korindu 2:14) Acho, mutu wa musunya keshi kutambula yuma ya Spiritu wa Zambi: mumu yinapu uhepuke kuli iye. Iye kahashile kuyinyingika, mumu kakuyinyingika ni Spiritu wika.
Kupwa Mutu Wakola ku Spiritu Yika Chinalumbunuka?
4 Kuchi akunyonga mutu wa musunya? Mutu wa musunya kakukaula yitanga ya hano hashi, ha kulihulikila ha usolo wa kuzo. Paulu kalumbunwine yitanga yacho ngwe ‘spiritu yize haliapwila yinalingi milimo yenyi muli akwa uhulia.’ (Efwe. 2:2) Yitanga yino yakupiangula atu anji kwimbulula akwo. Ayo kakulinga yuma yize akunyonga ngwe yipema kuli ayo, chakuhona kunyonga hakutwala ku ndako ja Zambi. Mutu wa musunya, kakunyonga ku yuma ya musunya nawa kanji-kanji kakunyonga ngwenyi, mbongo hanji lufuma wenyi yapwa yilemu kuhiana chuma cheswacho.
5 Mutu wa musunya kanji-kanji kakulinga yuma yize Mbimbiliya yakuvuluka ngwo “yitanga ya musunya.” (Ngala. 5:19-21) Ha mukanda utangu uze Paulu asonekenene akwa-Kristu mu Korindu, iye katongwele yuma yikwo yize akulinga atu a musunya. Ayo keshi kulivwashana ni akwo, kakuneha kulihandununa, utanganyanyi, kakutwala akwo mu chota, keshi kuvumbika wata, nawa kakusa ulemu kulia ni kunwa ku mwono wo. Mutu wa musunya muze mapwa mu cheseko cha kulinga yuma yipi, keshi kuhasa kuchehuka. (Yishi. 7:21, 22) Yundase kambile ngwenyi atu a musunya te keshi kupwa ni spiritu ya Yehova.—Yunda. 18, 19.
(1 A-Korindu 2:15, 16) Alioze mukwa uspiritu mapatula yuma yeswe, iye mwene keshi kumupatwila kuli niumwe. 16 Mumu iya hananyingika kunyonga cha Mwene hanga akamufumbe? Alioze etu kunyonga cha Kristu tuli nacho.
Kupwa Mutu Wakola ku Spiritu Yika Chinalumbunuka?
6 Kulisa ni mutu wa musunya, mutu wa spiritu kakufunga kanawa usepa wenyi ni Zambi. Kakwecha hanga spiritu ya Zambi yimusongwele ni kusa tachi hanga embulule Yehova. (Efwe. 5:1) Kakusa tachi hanga anyingike chize Yehova akunyonga ni kumona yuma ngwe chize Yehova akuyimona. Nawa Zambi kapwa mutu wamwenemwene kuli iye. Kulisa ni mutu wa musunya, mutu yoze ukwete nyonga lia spiritu kakuvumbika shimbi ja Yehova ku mwono wenyi weswe. (Samu 119:33; 143:10) Iye keshi kulinga “yitanga ya musunya” alioze kakusa tachi hanga apwe ni “mihuko ya spiritu.” (Ngala. 5:22, 23) Mba tulumbunune kanawa chize apwa mutu wa spiritu tunyongenu ha chino: Mutu yoze wakulinga kanawa mingoso kakumuvuluka ngwo mukwa-mingoso, chocho mutu yoze wakukaula yuma ya Zambi ku mwono wenyi kakumuvuluka ngwo mutu wa spiritu.
Kupwa Mutu Wakola ku Spiritu Yika Chinalumbunuka?
15 Kuchi mutuhasa kwimbulula Kristu? 1 A-Korindu 2:16 unalumbununa ngwo, twatamba kupwa ni “kunyonga cha Kristu.” A-Roma 15:5 unatulweze ngwo ‘akanunyongese chimuwika umwe kuli mukwo kulita ni Kristu Yesu.’ Mba tunyonge ngwe Kristu, twatamba kunyingika chize iye te akunyonga, akwivwa, ni yize te akulinga. Yesu te kakufunga kanawa usepa wenyi ni Zambi kuhiana chuma cheswacho. Kashika kwimbulula Yesu chakutukwasa kwimbulula Yehova. Hachino chili chilemu chinji kunyingika kanawa kunyonga cha Yesu.
Kuhengwola Yikuma Yilemu ya mu Mbimbiliya
(1 A-Korindu 1:20) Mukwa mana ulihiye? Mukwa kulongesa ulihiye? Mukwa kuhangujola wa mwakono ulihiye? Te Zambi kahepwishile mana ja mwakono, nyi?
it-3 480 ¶1
Mana
Ha mukunda wa mana jo, akwa-hashi kalitunyine chawana cha Zambi kupalikila muli Kristu ha kuchimona ngwe uhepuke. Manguvulu jo chipwe ngwe kapwile miata a mana ni kuyula kanawa, nihindu “kahachile ha [mutondo wa lamba] Mwene wa uhenya.” (1Ko 1:18; 2:7, 8) Alioze, Zambi kasolwele ngwenyi, mana a akwa-hashi kapwa a uhepuke, nawa yaakolesa sonyi hakuzachisa yuma yize ayo te akumona ngwe “uhepuke wa Zambi,” ni atu waze te ayo akumona ngwe ‘yihepuke nawa alelu’ hanga amanunune upale Wenyi. (1Ko 1:19-28) Paulu kewulwile akwa-Kristu a mu Korindu ngwenyi, ‘mana a mwakono [ni] mana ja miata ja mwakono’ te kumahwa; kashika, mana jacho te keshi kukatuka ha sango ja Zambi jize postolo yono te akwambujola. (1Ko 2:6, 13) Iye katowezele akwa-Kristu a mu Kolosu hanga akanyame ni “mana. . . . a kwonga [nawa] ni. . . . ,ndongo ja atu.”—Kol 2:8; tesa ni versu 20-23.
(1 A-Korindu 2:3-5) Napwile hamwe ni yenu ni ulelu ni woma ni kuchikima chinji. 4 Liji liami ni kwambujola chami kuyapwile ni maliji a kukunuka ni mana ja atu, alioze ni kukumika cha Spiritu ni tachi: 5 hanga ufulielo wenu kuuchi kapwa mu mana ja atu, alioze mu tachi ja Zambi.
w08 15/7 27 ¶6
Sango Jilemu ja Mukanda wa Korindu
2:3-5. Muze postolo Paulu te anambujola mu chimwe chihela cha akwa-mana ja atu ni alongeshi A-Ngregu ku Korindu, kota kalihulile nyi mahasa kukununa atu jacho. Alioze, iye kakechele hanga woma umukinde kwambujola sango jize amuhele kuli Zambi. Chizechene nawa, ni yetu twatambile kwecha hanga yuma yimwe yitukinde kwambujola sango jipema ja Wanangana wa Zambi. Mutuhasa kwita ukwaso kuli Yehova ngwe chize Paulu alingile.
Kutanga Mbimbiliya
(1 A-Korindu 1:1-17) Yami Paulu amutambikile postolo wa Yesu Kristu ku upale wa Zambi, ni ndumbu Sosetene, 2 Ku chikungulwila cha Zambi chize chili mu Korindu, kuli waze hanaasela ku usandu muli Kristu Yesu, hanaatambika asandu, hamwe ni waze eswe kweswe akutambika ha jina lia Mwene wetu Yesu Kristu, niwo kanda niwetu: 3 Vumbi kuli yenu ni sambukila ya kuli Zambi Tata ni kuli Mwene Yesu Kristu. 4 Nakusakwila kuli Zambi yami matangwa eswe, ha kutwala kuli yenu, mumu ha vumbi lia Zambi lize anuhele muli Kristu Yesu. 5 Muli iye anupichishile ni yuma yeswe, ni maliji eswe, ni yinyingi yeswe. 6 Chizechene ngwe shindakenyo ya Kristu ayikolesele muli yenu: 7 chocho kunwahonene nichimwe chawana cha vumbi; nikulawokela usolokelo wa Mwene wetu Yesu Kristu. 8 Yoze nawa kumakanukolesa ndo ku songo, hanga nukasambe ha tangwa lia Mwene wetu Yesu Kristu. 9 Zambi keshi kwalumuka, kuli iye hananutambika ku kuliendela cha Mwanenyi Yesu Kristu Mwene wetu. 10 Ngunaliumbu kuli yenu, mandumbu, mu jina lia Mwene wetu Yesu Kristu, nukahanjike chuma chimuwika. Kanda nulihandunyona, alioze nukalinunge hamuwika mu kunyonga chimuwika ni upatwilo umuwika. 11 Mumu hanangulwezecho ha kutwala kuli yenu, mandumbu jami, kuli akwa zuwo lia Choe ngwo, Kulihangujola chiliko hakachi kenu. 12 Chino chinalumbunuka ngwami, Mweswe wa kuli yenu kanambe ngwenyi, Ami nguli wa Paulu; mukwo ngwenyi, Ami nguli wa Apolu; au ngwenyi, ami nguli wa Sefwa; ni mukwo nawa ngwenyi, Ami nguli wa Kristu. 13 Kristu kalihandunwona, nyi? Ahachilile Paulu ha kulusu hali yenu, nyi? Hanji anupapachishile mu jina lia Paulu, nyi? 14 Ngunasakwila kuli Zambi mumu chapapachishile niumwe wa kuli yenu, shina Krispu ni Ngayu; 15 kuchina umwe mamba ngwenyi, Ami angupapachishile mu jina lia Paulu. 16 Napapachishile akwa zuwo lia Estefana nawa; mba chanyingikine nyi kachi napapachishile umwe mukwo nawa. 17 Mumu Kristu kangutumine mukupapachisa, alioze mukwambujola Sango Lipema: hi ni mana ja maliji ko, kuchina hanji kulusu ya Kristu munguyipwisa yamokomoko.
25-31 MARÇO
YIKUMA YILEMU YA MU LIJI LIA ZAMBI | 1 A-KORINDU 4–6
“Futunwiso Yikepe Muyifutunwisa Mwaha Weswe”
(1 A-Korindu 5:1, 2) Chinafumana hakachi ka eswe ngwo, Upangala uliko hakachi kenu, upangala umwe kuushiko chipwe hakachi ka akwa mavungu, mutu akapwe ni pwo lia tato. 2 Yenu nunalifuzu, kunwalinyengene, hanga yoze hanalingi chino, amuchize mukachi kenu.
(1 A-Korindu 5:5-8) nukakunjike umwe wapwa ngwe yono kuli Satana akenyeke musunya, hanga akalamwine spiritu ha tangwa lia Mwene Yesu. 6 Kulisamba chenu kuchawahile. Kunwanyingikine futunwiso yikepe muyifutunwisa mwaha weswe, nyi? 7 Kashika lipemesenu ku futunwiso yikulu, yituhuke, hanga nukapwe mwaha waha, chizechene ngwe yenu nuli kunushi futunwiso. Mumu mulambu wetu wa Chizomboka, iye Kristu, hanamulambula chitapo. 8 Kashika tufungenu chiwanyino, hi ni futunwiso yikulu ko chipwe ni futunwiso ya uhuka ni ungulungulu, ka, alioze ni mbolo kuyishi futunwiso, chinalumbunuka kutuwika cha mbunge ni umwenemwene.
(1 A-Korindu 5:13) Alioze waze ali haze Zambi kakuapatwila. Chizenu yono chingulungulu hakachi kenu.
it-2 116
Futunwiso
Postolo Paulu kazachishile chilayi chizechene muze atumine mandumbu mu chikungulwila cha Korindu hanga ahume umwe mutu chitanji mu chikungulwila, ha kwamba ngwenyi: “Kunwanyingikine futunwiso yikepe muyifutunwisa mwaha weswe, nyi? Kashika lipemesenu ku futunwiso yikulu, yituhuke, hanga nukapwe mwaha waha, chizechene ngwe yenu nuli kunushi futunwiso. Mumu mulambu wetu wa Chizomboka, iye Kristu, hanamulambula chitapo. Kashika tufungenu chiwanyino, hi ni futunwiso yikulu ko chipwe ni futunwiso ya uhuka ni ungulungulu, ka, alioze ni mbolo kuyishi futunwiso, chinalumbunuka kutuwika cha mbunge ni umwenemwene.” (1Ko 5:6-8) Hano Paulu te kanalumbununa chilayi cha Chiwanyino cha Mbolo Yize Kuyishi Futunwiso, chize te chakukaula chiwanyino cha Chizomboka. Chizechene ngwe futunwiso yikehe yakwokesa mwaha, hanji mbolo, chikungulwila chili ngwe mujimba, te muchipwa cha luchisa ku meso ja Yehova, nyi kahumine mutu wacho uli ni yitanga ya utanji. Ayo te katamba kuchiza “futunyiso” mu kachi ko, ngwe chize A-Izalele apwile ni kulinga, te keshi kupwa ni futunwiso ku mazuwo jo ha mashimbu a Chiwanyino.
it-3 545
Satana
Yika maliji “nukakunjike umwe wapwa ngwe yono kuli Satana akenyeke musunya” analumbunuka?
Muze te analumbunwina mandumbu a mu chikungulwila cha Korindu hakutwala ku chize atamba kulinga ni mutu yoze walingile upangala ni pwo lia tato, Postolo Paulu yasoneka ngwenyi: “Nukakunjike umwe wapwa ngwe yono kuli Satana akenyeke musunya.” (1Ko 5:5) Yino yapwile shimbi yakuhuma mutu wacho mu chikungulwila, ni kwehuka kulikata nenyi. (1Ko 5:13) Kukunjika mutu wacho kuli Satana te chinalumbunuka kumuchiza mu chikungulwila hanga aye hashi ha Satana, haze iye mwe zambi. Lunga wacho te kanapu ngwe “futunwiso yikepe” mu “mwaha weswe,” te kali ngwe “musunya,” ha kusosolola lunga wacho chipangala, ufulielo ukolo wa mandumbu a mu chikungulwila te muunongesa yitanga ya “musunya” ya mutu wacho mukachi ko. (1Ko 5:6, 7) Chizechene nawa, Paulu yakunjika Hemeneu ni Alexandre kuli Satana, mumu ayo kapihishile ufulielo wo ni mbunge yo yipema.—1Ti 1:20.
(1 A-Korindu 5:9-11) Nasonekene kuli yenu mu mukanda wami ngwami, Kanda nuliendela nichimwe ni yitanji. 10 Chambile yitanji ja akwa hashi, hanji akwa kwivwa kuzo, hanji akwa lufutu, hanji akwa kukombelela mahamba. Nyi chocho, kachi chanutamba kukatuka hano hashi. 11 Alioze haliapwila ngunasoneka kuli yenu ngwami, Kanda nuliendela ni umwe yoze anavuluka ngwo, Ndumbu, nyi mapwa chitanji, hanji mukwa kwivwa kuzo, hanji mukwa kukombelela mahamba, hanji mukwa kutukana, hanji mukwa kuzengewa, hanji mukwa lufutu; hamwe ni umwe ngwe yono kanda nulia.
lvs 241, maliji akusongo
Kusosolola
Nyi mutu malinga shili yinene, mba kasolo kulikonyeka hanga akaule usongwelo wa Yehova, kakumusosolola mu chikungulwila. Nawa nyi umwe mutu hamusosolola mu chikungulwila, twatambile kuhanjika nenyi, chipwe kutwama nenyi. (1 A-Korindu 5:11; 2 Yoano 9-11) Kusosolola mutu chakufunga jina lia Yehova ni chikungulwila. (1 A-Korindu 5:6) Kusosolola chakufumba mutu yoze walinganga shili ahase kulikonyeka hanga ahiluke kuli Yehova.—Luka 15:17.
▸Kapitulu 3, paragrafu 19
Kuhengwola Yikuma Yilemu ya mu Mbimbiliya
(1 A-Korindu 4:9) Mumu ngunashinginyeka ngwami, Yetu apostolo Zambi hanatusela ha kusula eswe, ngwe atu aahishile ku kufwa; mumu tunapu chitala kuli akwa hashi, ni kuli angelo, ni kuli atu.
w09 15/5 24 ¶16
Angelo—“Maspiritu a Kuvumbika Tuhu”
16 Akwa-Kristu waze akupwa mu cheseko, kapwa ngwe “chitala . . . kuli angelo.” (1 Kori. 4:9) Angelo kakuwahilila chinji muze akumona tunalikolweza hanga tushishike ni muze chivulumunyi akulikonyeka. (Luka 15:10) Ayo nawa kakumona yitanga yipema ya mapwo akwa-Kristu. Mbimbiliya yinambe ngwo, “pwo akapwe ni chinyingi cha kuzeyela ha mutwe wenyi, ha mukunda wa angelo.” (1 Kori. 11:3, 10) Chino chinasolola pundu ngwo, angelo kakuwahilila chinji ha kumona chize mapwo akwa-Kristu hamwe ni tuvumbi akwo a Zambi, akulingila Zambi ni kukwasa wata wenyi. Kwononoka chino, chakukwasa chinji angelo ja Zambi.
(1 A-Korindu 6:3) Kunwanyingikine ngwenu, mutukapatwila angelo? Shinaho chikolo yuma ya kutwala ku mwono uno?
it-2 674
Shimbi
Shimbi Jize Ahanyine Kuli Angelo: Angelo, kali ni ulemu unji kuhiana atu, alioze no kali mushi lia shimbi ja Zambi. (Hep 1:7, 14; Sam 104:4) Yehova kahanyine nawa shimbi kuli mukwa kole yenyi Satana ni kumukanjisa kulinga yimwe yuma. (Yom 1:12; 2:6) Mikele mungelo wa lutwe, kanyingikine ni kuvumbika chihela cha Yehova ngwe Sopi Munene, muze ambile kuli Ndiapu ngwenyi: “Mwene akwambe.” (Yu 9; tesa ni Zek 3:2.) Yehova Zambi, kasele angelo eswe mushi lia chiyulo cha Yesu Kristu. (Hep 1:6; 1Pe 3:22; Mat 13:41; 25:31; Fwp 2:9-11) Kashika Yesu atumine mungelo ngwe kanganda kuli Yoano. (Uso 1:1) Ha mukanda 1 A-Korindu 6:3, postolo Paulu kahanjikile hakutwala kuli mandumbu a Kristu a ku spiritu, waze asakwile hanga apatwile angelo, mumu no makakalakala hanga apatwile spiritu yipi hanji andemoniu.
Kutanga Mbimbiliya
(1 A-Korindu 6:1-14) Nyi umwe kali ni chuma kusopa ni mukwo, mahamuka kuchisopa kumeso ja yihenge, hi kumeso ja asandu ko, nyi? 2 Hanji kunwanyingikine asandu makapatwila akwa hashi? Mba nyi munukapatwila akwa hashi, kunwatelele kupatula yikuma yikepekepe, nyi? 3 Kunwanyingikine ngwenu, mutukapatwila angelo? Shinaho chikolo yuma ya kutwala ku mwono uno? 4 Mba nyi munupwa ni yuma ya kupatula ha ku kutwala ku mwono uno, munusela kupatula waze anapu amokono mu chikungulwila, nyi? 5 Ngunahanjika chino ngunukolese sonyi. Kumanyi, mukwa mana wakuhi hakachi kenu, nyi? Chipwe umuwika, yoze mahasa kupatula hakachi ka mandumbu jenyi, nyi? 6 Alioze ndumbu masopesa ndumbu, kwe kumeso ja waze keshi kufuliela. 7 Pundu, hinwalilelesa yenwene, ha kulitwala umwe ni mukwo kuli ngaji. Kuchi te kunwaatayijile akanwehe mulonga? Kuchi te kunwaatayijile akanulake? 8 Alioze yenwene nwakulinga yipi, nwakulaka, chipwe kuli mandumbu jenu. 9 Nyi hanji kunwanyingikine ngwenu, yihenge kechi kahinga wanangana wa Zambi? Kanda nulionga: chipwe mapangala, chipwe akwa kukombelela mahamba, chipwe yitanji, chipwe akwa luchisa, chipwe akwa utumwa, 10 chipwe eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga wanangana wa Zambi. 11 Nyi yenu chocho nwapwile: alioze hananusanyisa, alioze hananusela ku usandu, alioze hananupwisa akwa ululi mu jina lia Mwene Yesu Kristu, muli Spiritu wa Zambi yetu. 12 Yuma yeswe yinalite ni shimbi hali yami kulinga; alioze yuma yeswe kuyishi kufumbuka. Yuma yeswe yinalite ni shimbi hali yami kulinga; alioze chichi kuliecha akanguzeyese ku chuma nichimwe. 13 Kulia ha jimo, ni jimo ha kulia; alioze Zambi kumakahwisa yeswe yiali. Alioze mujimba hi ha utanji ko, alioze hali Mwene, ni Mwene ha mujimba. 14 Zambi yoze wahindwishile Mwene, kumakatuhindwisa nawa ku tachi jenyi.