Shina Hiwalilulieka Hanga Uye ha Chiwanyino Cha Yesu?

Chizomboka chakasula chize Yesu te malinga muchipwa chilemu chinji. Muze te kwasala hakehe hanga afwe, iye yalulieka Chizomboka ni tumbaji twenyi mba yaputuka chiwanyino chaha ha mwaka, Chiwanyino cha Mwene cha Ufuku. Kashika, yatuma Petulu ni Yoano hanga alulieke chipatulo muze te malingila Chiwanyino cha Mwene cha Ufuku. (Luka 22:7-13; tala chizulie ha chifukilo.) Chino chinatwiwulula ulemu wa kulilulieka ha Chiwanyino cha Kwiwuluka Kufwa cha Yesu chize muchikalingiwa ha tangwa 27 ya Março. Yikungulwila kota hiyasakula yoze malinga pande, mbolo ni vinyu ni yuma yikwo nawa. Mba yika hita mutu mahasa kulinga hanga alilulieke hakutwala ku Chiwanyino cha Kwiwuluka Kufwa cha Yesu?

Lulieka mbunge ye. Tanga, nawa pukuna ha kutanga Mbimbiliya cha Chiwanyino cha Yesu. Muhasa kuwana katalilo ha mukanda, Kuhengwola Yisoneko Tangwa ha Tangwa. Ha apêndice B12 ya Tradução do Novo Mundo hali nawa katalilo munene. (Tala nawa ha Mukanda Wakuzachisa ha Kukunguluka cha Mwono ni Mulimo Wetu wa Abril ya 2020.) Nyi munuzanga kuwana sango jikwo hakutwala ku ulemu wa ukuule hanga nulilongese mu uwayilo wa mu usoko, talenu Índice das Publicações da Torre de Vigia hanji Guia de Pesquisa para Testemunhas de Jeová.

Sanyika atu akwo hanga aye ha chiwanyino cha Yesu. Lihane chinji mu mulimo wa kusanyika atu. Nyonga hali waze muhasa kusanyika, ngwe atu aze wakufuna ni kumeneka, aze wapwile ni kulilongesa no Mbimbiliya, waze wanyingika ni asoko je. Makulwana a mu chikungulwila katamba kupwa ni shindakenyo ngwo kasanyika waze hanazeye ku ufulielo. Mba nyi musanyika mutu yoze katwamine mu ngiza yenu? Yako ha lifwo litangu ha jw.org, ha chikuma SANGO JA YETU mba mupola ha chikuma “Chiwanyino,” he muhasa kuwana ola ni chihela kuze malingila Chiwanyino cha Kwiwuluka Kufwa cha Yesu mu ngiza ya mutu wacho.

Yika mutuhasa kulinga nawa mba tulilulieke?