Twimbululenu Kunyonga cha Yehova ni Yesu

1-2. (a) Kuzanga Yehova yika chinachingi? (b) Kuchi Yesu asolwele zango liacho?

YESU kasolwele zwalala shimbi yilemu mu Shimbi ya Mose muze ambile ngwenyi: “Zanga Yehova, Zambi ye, ni mbunge ye yeswe, ni mwono we weswe, ni kunyonga che cheswe, ni tachi je jeswe.” (Marku 12:30) Kuzanga Yehova chinatale ha mbunge yetu, chize chinachingi usolo uze tukwete, manyonga ni chize takwivwa. Chinachingi nawa kumuwayila ni mwono wetu weswe ni tachi jetu jeswe. Chikwo nawa, kuzanga Yehova, chinatale ha kunyonga chetu. Chino chinalumbunuka yuma yeswe yize twakunyonga. Kwamba umwenemwene, yetu kutuchi kuhasa kunyingika yuma yeswe yize Yehova akunyonga. Alioze, mutuhasa kunyingika kanawa kunyonga chenyi, ha kulilongesa “kunyonga cha Kristu.” Mumu Kristu kembulwile kunyonga cha Tato ni ungunu weswe.—1 Kori. 2:16 ni nota ya estudo “yetu tukwete kunyonga cha Kristu.”

² Yesu kazangile Yehova ni kunyonga chenyi cheswe. Kanyingikine yize Yehova azangile hanga iye alinge, chikwo nawa, kazangile kuyilinga chipwe ngwe te mamona lamba. Yesu te kakulihulikila ha kulinga upale wa Tato. Kashika kakechele chuma nichimwe hanga chimukwike kuulinga.

3. Kuchi Petulu anyingikine kunyonga cha Kristu, nawa yika akolwezele Akwa-Kristu akwo kulinga? (1 Petulu 4:1)

³ Petulu ni apostolo akwo, katwamine hamuwika ni Yesu ni kumona mutapu uze apwile ni kunyonga. Muze Petulu asonekene mukanda wenyi utangu, iye yakolweza Akwa-Kristu hanga embulule mutapu wa kunyonga cha Kristu.a (Tanga 1 Petulu 4:1.) Ha versu yino, Mbimbiliya jikwo jakutongola liji “lipakatenu” lize linatale ha chuma chize maswalale akulinga chinji muze analilulieka hanga aye ni kwasa jita. Kashika mutuhasa kwamba ngwetu, kunyonga ngwe Yesu chili uta uze twakulipakata hanga twase jita ni manyonga jetu a uhenge ni chifuchi chino cha Satana.—2 Kori. 10:3-5; Efwe. 6:12.

4. Yika mutuhengwola ha mutwe uno?

⁴ Ha mutwe uno, mutuhengwolaho (1) chize mutwimbulula kunyonga cha Yehova, (2) chize mutupwa akwa-kulikehesa, ni (3) chize mutupwa ni mana ha kujikijila muli Yehova kupalikila mu yilemba. Mba tuchilinge, mutulilongesa chize Yesu apwile ni kunyonga ni chize mutuhasa kumwimbulula.

TWIMBULULENU KUNYONGA CHA YEHOVA

5. Ha shimbu lika Petulu ahonene kunyonga ngwe Yehova?

⁵ Ha shimbu limwe, Petulu kakanyongene ngwe Yehova ha yuma yimwe. Yesu kalwezele apostolo jenyi ngwenyi te maya ku Yerusaleme, koko mamukwata kuli mangana a yingeleja, mamumwesa lamba ni kumushiha. (Mateu 16:21) Petulu kanyingikine ngwenyi, Yesu kapwile Mesaya yoze te malamwina atu ja Zambi. Kashika kota chapwile chikalu kuli iye kutayiza ngwo, Yehova mecha Mwanenyi hanga amone lamba. (Mateu 16:16) Hachino, Petulu yasanyika Yesu ni kumulweza ngwenyi: “Mwene, livwile kama keke! Chino kuchichi kulingiwa kuli yena.” (Mateu 16:22) Alioze Yesu kakatayijile nyonga liacho, mumu kanyingikine ngwenyi, Petulu te keshi kunyonga ngwe Yehova.

6. Kuchi Yesu embulwile kunyonga cha Yehova?

⁶ Yesu kembulwile kunyonga cha Tato ni ungunu weswe. Kashika akumbulwile Petulu ngwenyi: “Yako kunyima liami, Satana! Yena uli chitalingiso kuli yami, mumu uli ni manyonga ja atu hi a Zambi ko.” (Mateu 16:23.) Muchihasa kupwa ngwe, yuma yize Petulu apwile ni kunyonga yapwile yipema, alioze Yesu kakayitayijile. Yesu kanyingikine ngwenyi, Yehova kakazangile hanga iye anyonge wika hali mwene. Ha chisuho chacho, Petulu kalilongesele ulemu wa kunyonga ngwe Yehova. Hano hali longeso linene kuli yetu.

7. Yika yakwashile Petulu kwalumuna mutapu wa kunyonga chenyi hanga ulite ni wa Yehova? (Tala chifukilo.)

⁷ Kulutwe Petulu yasolola ngwenyi, te kanazange hanga manyonga jenyi alite ni a Yehova. Kachilingile muze kwahetele mashimbu hanga akwa-mavungu, hanji ngwetu, atu waze te hi A-Yunda ko kulinga chihanda mu usoko wa Zambi. Yehova katongwele Petulu hanga ambujole kuli Koneliu, umwe wa kuli akwa-mavungu atangu waze apwile Akwa-Kristu. A-Yunda te keshi kuliendela ni akwa-mavungu. Kashika, Petulu katambile kwalumuna mutapu wa kunyonga chenyi. Muze Yehova akwashile Petulu kunyingika upale wenyi, iye yalumuna mutapu wa kunyonga chenyi hakutwala kuli akwa-mavungu, chocho “chakuhona kuhamika,” yaya ni kumeneka Koneliu. (Yili. 10:28, 29) Kulinga chino, chamukwashile kwambujola kuli Koneliu ni akwa-zuwo lienyi, hachino eswe yaapapachisa.—Yili. 10:21-23, 34, 35, 44-48.

8. Kuchi mutuhasa kusolola ngwetu twakunyonga ngwe Yehova? (1 Petulu 3:8)

⁸ Ha kupalika cha miaka, Petulu yakolweza Akwa-Kristu hanga apwe ni “nyonga limuwika.” (Tanga 1 Petulu 3:8.) Ni yetu nawa, mutuhasa kuchilinga ha kulilongesa chize Yehova akunyonga ni kumwimbulula. Ngwe chilweza, Yesu kakolwezele tumbaji twenyi hanga ase Wanangana wa Zambi ha chihela chitangu ku mwono wo. (Mateu 6:33) Tuchinyongenu ngwetu, umwe ndumbu mu chikungulwila chenu, kanazange kupwa pionelu wa shimbu lieswe hanji kulinga mulimo ukwo wa shimbu lieswe. Muchipihia chinji nyi mutwamba yuma yize muyimukokolola, hanji muyimutwala anyonge wika hali mwene. Shimbu tuchilinge, twatamba kuhanjika yuma yipema hakutwala ku yize hanatese ku ufulielo ni kumukwasa ha yize mafupa.

TUPWENU AKWA-KULIKEHESA

9-10. Yika Yesu alingile yize yasolwele ngwo kakulikehesa?

⁹ Ha ufuku muze te kanda achifwa, Yesu yalongesa Petulu ni apostolo jenyi akwo chize mahasa kupwa akwa-kulikehesa. Chocho Yesu yeta kuli Petulu ni Yoano, hanga alulieke chizomboka cha kasula chize te malia no muze kanda achifwa. Chuma chimwe chize kota ayo aluliekele, chapwile mbashila ni tualia hanga umwe asanyise molu ja atu waze te meza ha kulia chacho. Iya te masolola kulikehesa hanga alinge mulimo uno kuushi ulemu?

¹⁰ Chakuhona kuyambashana, Yesu yasolola chilweza chinene cha kulikehesa. Yalinga mulimo uze kanji-kanji te akulinga kuli ngamba. Chino kota chakomwesene chinji apostolo. Mbimbiliya yakwamba ngwo, Yesu yazula mazalo jenyi a helu, yanda tualia, yalijichika mu zalilo, yasa meya ha mbashila, yaputuka kusanyisa molu jo. (Yoa. 13:4, 5) Yesu yasanyisa molu ja apostolo 12, hamwe ni Yundase yoze te kulutwe mamukunjika. Mulimo wacho kota wambachile amwe mashimbu, alioze Yesu yalikehesa ni kuumanununa. Hanyima yaalumbunwina ni uhumikizo weswe ngwenyi: “Shina chuma chize nalinga kuli yenu, chanulumbunuka? Yenu nwakunguvuluka ngwenu, ‘Longeshi,’ ‘Mwene,’ nwakwamba kanawa, mumu chenacho napwa. Nyi yami nguli Mwene, nawa Longeshi, nasanyisa molu jenu, ni yenu nawa nwatamba kusanyisa molu ja umwe ni mukwo.”—Yoa. 13:12-14.

11. Kuchi Petulu asolwele ngwenyi kalilongesele kupwa mukwa-kulikehesa? (1 Petulu 5:5) (Tala nawa chizulie.)

¹¹ Chilweza cha Yesu chakwashile Petulu kupwa mukwa-kulikehesa. Muze Yesu afunyine mu malilu, Petulu yalinga chimwe chikomokeso, iye yauka umwe lunga yoze wasemukine chitonji. (Yili. 1:8, 9; 3:2, 6-8) Muze atu amwene chikomokeso chacho, yamujingilika. (Yili. 3:11) Alioze, Petulu kakazangile hanga atu amunangamise ha chikuma chacho, chipwe ngwe kasemukine mu vungu lize atu te akuzanga chinji kulinangamisa. Hachino, ni kulikehesa cheswe, Petulu yahalisa Yehova ni Yesu ha kwamba ngwenyi: “Lunga yono nunamono yoze nawa nunanyingika, kenda kupalikila mu jina lia Yesu ni ha ufulielo wetu mu jina liacho.” (Yili. 3:12-16) Mu umwe mukanda wenyi, Petulu yakolweza Akwa-Kristu hanga apwe akwa-kulikehesa, hanji ngwetu alijichike kulikehesa. Liji lino, linatwiulula yize Yesu alingile muze alijichikile tualia mu zalilo ni kusanyisa molu ja apostolo jenyi.—Tanga 1 Petulu 5:5.

12. Kuchi mutuhasa kununga ni kupwa akwa-kulikehesa ngwe Petulu?

¹² Mutuhasa kwimbulula chilweza cha Petulu ha kununga ni kupwa akwa-kulikehesa. Kulikehesa chamwenemwene chinalumbunuka yuma yinji hi wika ko kupalumwisa liji muze tunahanjika ni akwetu. Mbimbiliya jimwe jakutongola liji “kulikehesa cha ku mbunge” hanga jisolole ngwo, kulikehesa chamwenemwene chakukatuka ku mbunge. Twakulingila akwetu yuma yipema mumu twakuzanga Yehova ni atu; kutushi kuyilinga hanga atuchichimieke. Twakusolola ngwetu, kulikehesa chetu chinakatuka ku mbunge, muze twakulingila Yehova ni mandumbu jetu ni uwahililo chipwe ngwe yize tunalingi akwetu keshi kuyimona.—Mateu 6:1-4.

‘TUPWENU NI MANA’

13. ‘Kupwa mukwa-mana’ yika chinalumbunuka?

¹³ ‘Kupwa mukwa-mana’ yika chinalumbunuka? (1 Petu. 4:7) Mukwa-Kristu yoze ukwete mana, kakusa tachi hanga akwate yiyulo yize yinalite ni kunyonga cha Yehova. Iye kakunyingika ngwenyi, kukushi chuma chilemu ku mwono wenyi kuhiana usepa wenyi ni Yehova. Chikwo nawa, kakwete nyonga lialita hali mwene ni kutayiza ngwo, kanyingikine yuma yeswe. Mutu yoze ukwete mana, kakujikijila muli Yehova ha kulemba kuli iye ni kumwita usongwelo.b

14. Ha shimbu lika Petulu ahonene kujikijila muli Yehova?

¹⁴ Ha ufuku muze te kanda achifwa, Yesu yatoweza tumbaji twenyi ngwenyi: “Ufuku uno, yenu eswe munutalinga mumu lia yami.” Mumu lia kulijikijila chinji, Petulu yakumbulula ngwenyi: “Chipwe ngwe akwetu eswe matalinga hali yena, yami chichi kutalinga nilimwe tangwa!” Ha ufuku uzewene, Yesu yahana chiyulo kuli amwe a kuli tumbaji twenyi ngwenyi: “Nungenu ni kulawola, nungenu ni kulemba.” (Mateu 26:31, 33, 41) Nyi Petulu kakawile chiyulo chino, kachi kapwile ni hamu lia kutayiza ngwo, kapwile kambaji ka Yesu. Alioze yalikala Mwene wenyi, chocho chino yichimunehena yikola yinji ku mbunge.—Mateu 26:69-75.

15. Yika yakwashile Yesu kusolola mana ha ufuku muze te kanda achifwa?

¹⁵ Yesu kapwile ni kujikijila muli Yehova ni mbunge yenyi yeswe. Chipwe ngwe kapwile mungunu, nihindu ha ufuku uzewene muze te kanda achifwa, iye yalemba chinji kuli Tato. Chino chamuhele hamu lia kulinga yize Yehova azangile hanga alinge. (Mateu 26:39, 42, 44; Yoa. 18:4, 5) Petulu kamwene muze Yesu alembele chinji ha mashimbu jacho akalu, chino chakwachile chinji ku mwono wenyi.

16. Kuchi tunanyingika ngwetu, Petulu kasolwele ngwenyi kali mukwa-mana? (1 Petulu 4:7)

¹⁶ Ha kupalika cha mashimbu, Petulu yaputuka kujikijila chinji muli Yehova ni kumwita ukwaso kupalikila mu yilemba. Muze Yesu ahindukile ku ufwe, iye yahana shindakenyo kuli Petulu ni apostolo jenyi akwo ngwenyi, te matambula spiritu yisandu hanga yaakwase kwambujola sango jipema. Alioze Yesu yaalweza ngwenyi, te katamba kushimbwila mu Yerusaleme ndo haze matambwila spiritu yacho. (Luka 24:49; Yili. 1:4, 5) Yika Petulu apwile ni kulinga muze te anashimbwila? Petulu ni mandumbu akwo, ‘yanunga ni kulemba ni mbunge yimuwika.’ (Yili. 1:13, 14) Kulutwe, ha mukanda wenyi utangu, Petulu yakolweza Akwa-Kristu hanga apwe akwa-mana ni kununga kwita usongwelo wa Yehova kupalikila mu yilemba. (Tanga 1 Petulu 4:7.) Petulu yapwa ndumbu wajama ku ufulielo, mukwa-mana nawa yakwasa chinji chikungulwila.—Ngala. 2:9.

17. Yika twatamba kununga ni kulinga chipwe ngwe tuli ni utotombo weswawo? (Tala nawa chizulie.)

¹⁷ Mba tupwe akwa-mana, twatamba kununga ni kulemba kuli Yehova chipwe ngwe tukwete utotombo weswawo. Nyi tunambe kukwata yimwe yiyulo yilemu, twatamba kulemba kuli Yehova ha kwita usongwelo wenyi ni kufuliela ngwo, iye kananyingika yize yatupemena.

18. Kuchi mutuhasa kwimbulula kanawa Yehova?

¹⁸ Chokuwaha kunyingika ngwo, Yehova katutangile ni uhashi wa kwimbulula yitanga yenyi. (Uputu. 1:26) Umwenemwene uli ngwo, kutuchi kuhasa kumwimbulula ni ungunu weswe. (Iza. 55:9) Alioze, chizechene ngwe Petulu, tunazange mashimbu eswe kunyonga ngwe Yehova ha kupwa akwa-kulikehesa ni kusolola mana.