1925​—Miaka Lukama Yapalikamo

KUTALATALA CHIZE KUCHISHI KUMONEKA KUCHAKUHONGESA MBUNGE

Alongi anji a Mbimbiliya kapwile ni kushimbwila ngwo, ha 1925 hashi muhapwa Paraisu. Ndumbu Albert Schroeder yoze kulutwe wapwile mu Chizavu cha Tusongo, yalumbununa ngwenyi: “Yetu twapwile ni kunyonga ngwetu Akwa-Kristu akuwahisa makaya mu malilu akayule hamwe ni Yesu, alioze tuvumbi akwo ashishika ngwe Ndawichi, Apalahama ni akwo, te makaahindwisa akapwe mianangana mu wanangana wa Zambi hano hashi.” Muze mwaka te unayi ni kuhwa, alioze yize apwile ni kushimbwila kuyalingiwile, amwe yahonga.—Yishi. 13:12.

Chipwe ngwe Alongi a Mbimbiliya kahongele, nihindu ayo yasa tachi hanga ambujole sango jipema, mumu kanyingikine ngwo kwambujola uli mulimo ulemu uze Yela ja Yehova atamba kulinga. Ngwe chilweza, tutalenu yize ayo alingile hanga ambujole sango jipema hashi heswe.

KATUNGILE YISAJI KU YIHELA YINJI

Ha 1924, atu anji te kakwivwa sango kupalikila ku Radio WBBR. Alioze ha mwaka 1925, yatunga chisaji chaha hakamwihi ni Chicago, Illinois. Chisaji chacho kachivulukile ngwo WORD. Ralph Leffler yoze wakwashile kutunga chisaji chacho kambile ngwenyi: “Ha chingoloshi, atu anji waze te atwama kusuku, kapwile ni kwivwila sango ku chisaji chacho.” Ngwe chilweza, chipwe ngwe chisaji chapwile ha 5 000 kilometro kusuku chinji ni ku chihela chize umwe usoko te atwama, nihindu ayo yahasa kwivwa sango ku chisaji chacho. Hanyima lia kwivwa sango, usoko wacho yiusoneka umwe mukanda ni kusakwilila mandumbu ha kwaluliekela kulia cha ku ufulielo ni kwakwasa kunyingika yuma yinji hakutwala kuli Zambi ni Mbimbiliya.

Kaposhi wa Kutalila 1 Dezembro, 1925 kalumbunwine ngwo: “WORD chili chisaji chinene mu Estados Unidos chize chapwile ni kuhetesa sango ni kuyihela ya kusuku. Chisaji chacho chapwile ni 5 000 watts. Chipwe atu waze atwama ku sali lia Leste hanji Oeste ya ku Estados Unidos mahasa kwivwa chisaji chacho. Chipwe lume ku Cuba ni ku Norte ya Alaska. Atu anji waze te kanda achinyingika umwenemwene, yazanga kulilongesawo mumu kevwile sango ku chisaji chacho.”

Ha mashimbu jacho, Alongi a Mbimbiliya kazangile chinji kukalakalisa chisaji chacho hanga ambujole sango jipema mu Canada. Kashika ha mwaka 1924, yatunga chisaji chikwo avuluka ngwo CHUC mu mbonge ya Saskatoon, Saskatchewan. Chisaji chino chapwile chimwe cha ku yisaji yitangu mu Canada. Chocho ha mwaka 1925, chisaji chino yachitutulula hanga achitungile ku chimwe chihela chinene. Kashika, ululikiso wetu yatambula chisaji chino ni studio yize apwile ni kwambulwila sango ni kuchitwala ku Regent Building chimwe chihela chinene chize alanjile mu Saskatoon, hanga chipwe nichetu.

Mumu lia chisaji chino, atu anji waze te atwama mu mambonge akehe-akehe a Saskatchewan, kevwile sango ha chisuho chitangu. Ngwe chilweza, mu mbonge yize yapwile kusuku, mwapwile umwe pwo avuluka ngwo Graham, yoze wasonekene ni kwita mikanda yize yakulumbununa Mbimbiliya. Hanyima lia kupanjika chisaji, ndumbu George Naish yamba ngwenyi: “Maliji waze pwo yono asonekene, kasolwele ngwo, twatamba kumukwasa ni kawashi-washi. Chocho yitumutumina mikanda yeswe yize yakulumbununa Yisoneko.” Ha kupalika cha mashimbu akehe, pwo wacho yaputuka kwambujola sango jipema ja Wanangana, chipwe ngwe kapwile kusuku.

UMWENEMWENE UZE TWALILONGESELE

Kaposhi wa Kutalila 1 Março, 1925, kapwile ni mutwe ulemu wakwamba ngwo, “Kusemuka cha Akwa-Mavungu.” Mumu liaka kaposhi yono apwile mulemu? Mumu ha mashimbu amwe Alongi a Mbimbiliya kanyingikine ngwo, Satana kakwete umwe ululikiso muze muli andemoniu, akwa-ma-yingeleja, yizavu ya akwa-kulinga mingoso ni yizavu ya akwa-mafwefwe a hano hashi. Kashika kupalikila mu kaposhi yono, “ndungo washishika wakanyama,” yakwasa atu ja Yehova hashi heswe kunyingika ngwo, Yehova neye kali ni ululikiso uze walisa chinji ni wa Satana. (Mateu 24:45) Ndungo yalumbununa nawa ngwo, Wanangana wa Zambi waputukile kuyula ha 1914. Chocho, mumu lia ‘jita yize yalingiwile mu malilu,’ Satana ni andemoniu jenyi yaahuma ni kwanyasa hano hashi.—Uso. 12:7-9.

Kuli amwe, chapwile chikalu kutayiza ulumbunwiso uno waha. Chocho Ndungo yalianga kutoweza mandumbu kupalikila mu Kaposhi wacho ngwo: “Nyi kuli umwe yoze makakajana ha ulumbunwiso uno, katamba kulihumikiza ni kujikijila muli Yehova ha kununga ni kumuwayila ni ushishiko.”

Tom Eyre, yoze wapwile pionelu mu Grã-Bretanha kalwezele Alongi a Mbimbiliya hakutwala ku chikuma chacho ngwenyi: “Mandumbu kawahilila chinji ha ulumbunwiso uno waha wa Usolwelo 12. Muze twanyingikine ngwetu Wanangana wa Zambi hiwaputuka kuyula mu malilu, twawahililile chinji ni kuzanga kwambujola sango jino jipema kuli akwetu. Chino chatukwashile kuzanga kwambujola chinji ni kutukwasa kumona ngwetu, Yehova makatulingila yuma yipema kulutwe lia matangwa.”

KWAMBUJOLA HAKUTWALA KULI YEHOVA

Musono, Yela ja Yehova kananyingika kanawa maliji waze ali ha Izaia 43:10 anambe ngwo: ‘Enu nuli yela jami,’ che anambe Yehova, ‘kavumbi kami wa kutongola.’ Alioze muze te kanda tuchiheta ha mwaka 1925, chisoneko chino te kutushi kuchitongola chinji mu mikanda yetu. Alioze yuma yalumukine, ha mwaka wa 1925, mukanda wa Izaia 43:10 ni 12 yiusoloka ha Kaposhi wa Kutalila 11.

Kusongo lia kakweji wa Agosto, 1925, Alongi a Mbimbiliya yaya ha kukunguluka cha mambonge, chize chapwile mu Indianápolis, Indiana. Ha katalilo wa kukunguluka cha mambonge, hapwile amwe maliji waze ndumbu Rutherford Joseph asonekene akutambwisa ngeji ambile ngwo: “Tweza ha kukunguluka chino, hanga Zambi atwehe tachi ja kufuna mu munda ni kwambujola sango jipema.” Kukunguluka chacho chize chalingiwile ha matangwa nake, atu eswe waze apwileho kaakolwezele hanga anunge ni kwambujola ha uhashi weswawo mapwa nawo.

Lia poso 29 Agosto, ndumbu Rutherford kahanjikile hakutwala ku chikuma chino: “Tusololenu mu yitanga ngwetu tunazange kwambujola.” Ha pande jacho, iye yasolola mumu liaka chili chilemu kwambujola. Yashindakenya nawa ha maliji waze Yehova ambile hali atu jenyi ngwo: ‘Nuli yela jami . . . yami nguli Zambi yenu.’ Mba yaakolweza ni maliji anambe ngwo: “Mikenu mbandela helu lia minyachi.” Hi atu eswe ko waze ali hano hashi mahasa kuzundula mbandela ni kwambujola kuli atu, shina wika waze Yehova akuwahisa ni spirtu yenyi yisandu e mahasa kwambujola.—Iza. 43:12; 62:10.

Muze ndumbu Rutherford ahwishile pande jenyi, kusongo yatanga umwe mukanda uze wambile ngwo: “Sango Jize Jakutwaha Kutalatala.” Mukanda uno wasolwele ngwo, Wanangana wa Zambi we wika muuhasa kutwaha sambukila, kutuwahisa, kutwaha mwono upema ni kututusula ku shili tukapwe ni mwono wa mutolo. Hanyima, mukanda wacho yaulumbununa mu malimi anji ni kuufwambwisa ha tumafwo. Chocho yahana kuli atu tumikanda 40 a tununu.

Ha miaka yinji, Alongi a Mbimbiliya kakalumwine jina lio hanga aasanyike ngwo, Yela ja Yehova. Alioze ayo te kanaputuka kunyingika ngwo, mulimo wa kwambujola uli ulemu chinji.

KUFUNA NI KUMENEKA ATU WAZE ANAZANGE KULILONGESA

Mumu lia kwoka cha Alongi a Mbimbiliya hashi heswe, ululikiso yiukolweza mandumbu hanga ahone kulihulikila wika ha kuhana mikanda. Alioze afune ni kumeneka atu waze anazange kulilongesa Mbimbiliya. Muze te hahwisa kuhana kamukanda Sango Jize Jakutwaha Kutalatala,a mandumbu yalweza nawa akwa-kwambujola ngwo, “funenu hanga numeneke atu kuze nwahichikile kamukanda Sango Jize Jakutwaha Kutalatala.”

Kaposhi wa Janeiro, 1925 kejile ni umwe mukanda haze umwe mukwa-kwambujola wa ku Plano, Texas wambile ngwenyi: “Chakupwa chashi kwambujola ku chihela kuze twakufunyina chinji kuhiana kuze mutwambujola ha chisuho chitangu. Ha miaka kumi yapalika, twambujola mu njiza yetu yisuho yitano mu yimwe mbonge yikehe. Mashimbu wano ene, ndumbu wa pwo Hendrix ni mama, yaya ni kwambujola cheka mu mbonge yacho ni kuhana mikanda yinji kuhiana ha yisuho yikwo.”

Mu chifuchi cha Panamá, umwe pionelu yasoneka ngwenyi: “Atu anji waze anguhumine ku mazuwo jo ha chisuho chitangu, muze nafunyineko ha chisuho chamuchiali ni ha chisuho chamuchitatu, o yalumuka. Haliapwila ngunalihulikila ha kufuna ni kumeneka atu waze alitunyine kungupanjika ha chisuho chitangu. Nguli ni sango jinji jipema ha kwambulwila atu jacho.”

KALIHULIKILILE HA KUTALATALA CHA KULUTWE

Kusongo lia mwaka 1925, ndumbu Rutherford yasonekena mapionelu ni kwalweza yize alingile ha mwaka wacho ni yize atamba kulinga ha mwaka uze te muuhataho. Iye yamba ngwenyi: “Mwaka wapalika nwapwa ni chiwape cha kulembejeka atu waze te ananenganyana, mulimo uno wanukwasa kuwahilila. Mwaka mutukwata munupwa ni chiwape cha kupwa yela ja Zambi ni Wanangana wenyi ni kusolola kuli atu ngwo, nwakumuwayila mu umwenemwene. Yetu eswe hamuwika tunungenu ni kuhalisa Zambi yetu ni Mwanangana wetu.”

Ha kuhwa cha mwaka wa 1925, mandumbu yatesa kutohwesa Mbetele ya ku Brooklyn. Ha mwaka 1926, te maputuka mulimo unene chinji wa kutunga mazuwo a mu ululikiso.