Mwata Wetu wa Asasendote Yesu, Kali Mukwa-keke

1-2. (a) Mumu liaka Yehova atumine Yesu hano hashi? (b) Yika mutumona ha mutwe uno? (A-Hepreu 5:7-9)

HA MIAKA 2000 kunyima, Yehova yatuma Mwanenyi yoze azanga chinji hano hashi. Mumu liaka? Kachilingile hanga apulule atu ku shili ni kufwa ni kunongesa milimo ya Satana. (Yoa. 3:16; 1 Yoa. 3:8) Yehova nawa kanyingikine ngwenyi, mwono wa Yesu hano hashi, te muumukwasa kulilulieka hanga akapwe Mwata wa Asasendote mupema, mutu yoze unatunyingika kanawa, yoze wakwivwa yikola yetu ni kutuvwila keke. Yesu kaputukile kumanununa chiteli chino, muze amupapachishile ha mwaka 29 M.J.a

² Ha mutwe uno, mutumona chize mwono wa Yesu hano hashi wamukwashile kupwa Mwata wa Asasendote yoze unatunyingika kanawa. Mutumona nawa chize Yesu amupwishile mungunu hanga amanunune chiteli chenyi, ni chize chino muchitukwasa kukundama kuli Yehova chipwe ngwe ha yisuho yimwe mutunenganyana mumu lia tupalia jetu.—Tanga A-Hepreu 5:7-9.

MWANENYI YOZE AZANGA CHINJI YEZA HANO HASHI

3-4. Kwalumuka chika chinene chize Yesu apalikile muze apwile hano hashi?

³ Anji a kuli yetu, hitunapalika mu chimwe kwalumuka ku mwono. Ngwe chilweza, hitunahichika chihela chize te twakuzanga, asoko ni masepa jetu. Kwalumuka chino, muchihasa kupwa chikalu chinji. Alioze, kukushi mutu niumwe yoze hanapalika mu chimwe kwalumuka chinene ngwe chize Yesu apalikile. Iye kapwile mungelo mutangu nawa mulemu chinji mu malilu. Yesu te kakumona zango lia Yehova matangwa eswe, nawa te kakuwahilila ha kukalakala nenyi hamuwika. (Samu 16:11; Yishi. 8:30) Chipwe chocho, A-Fwilipu 2:7 wakwamba ngwo, Yesu kalihanyine ni ‘kwecha yuma yeswe’ ni lufuma yoze apwile nenyi mu malilu, yeza hano hashi ni kutwama ni atu yihenge.

⁴ Tuchinyongenu chize mwono wa Yesu wapwile muze asemukine hano hashi ngwe mutu. Usoko wenyi kapwile yiswale. Tunanyingika chino, mumu lia chitapo chize o ahanyine hanyima lia Yesu kusemuka. (Levi 12:8; Luka 2:24) Chikwo nawa, muze Mwanangana mupi Heronde anyingikine ngwo Yesu kasemuka, iye yazanga kumushiha. Mba alilamwine kuli Heronde, yisemi ja Yesu katambile kuchinyina mu Engitu ngwe yilambala ha amwe mashimbu. (Mateu 2:13, 15) Mwono uze Yesu apwile nawo hano hashi, walisele chinji ni uze apwile nawo mu malilu.

5. Yika Yesu amwene muze apwile hano hashi, nawa kuchi yino yamukwashile kupwa Mwata wa Asasendonte yoze watunyingika kanawa? (Tala nawa chizulie.)

⁵ Muze Yesu te anayi ni kukola, iye kamwene yuma yinji yipi muyilingiwa. Kwamba umwenemwene, Yesu kevwile yikola ha kutokesa atu waze azanga ku ufwe, hamwe ni tato Yosefwe yoze wamulelele. Muze te akwambujola, Yesu kapwile ni kulitakana ni atu waze ayiza kalepa, tupuputa, yitonji, ni yisemi waze apwile ni kumona lamba mumu lia kufwisa ana jo. Yesu te kakuvwila keke atu wano. (Mateu 9:2, 6; 15:30; 20:34; Marku 1:40, 41; Luka 7:13) Kwamba umwenemwene, muze apwile mu malilu Yesu te kakumona atu mamona lamba. Alioze muze ejile hano hashi, iye te kakumwena lamba liacho mu jila yalisa. (Iza. 53:4) Yuma yize Yesu apalikile hano hashi, yamukwashile kunyingika kanawa lamba ni yikola yize atu akwivwa. Nawa, ngwe mutu mweswawo, Yesu neye te kakuhonga, kusakalala ni kunenganyana.

YESU KAKULISA MU CHIHELA CHA ATU

6. Yika uprofeto wa Izaia unatulongesa hakutwala ku chize Yesu te masolwela atu keke? (Izaia 42:3)

⁶ Mu mulimo wa kwambujola, Yesu kapwile ni kulisa mu chihela cha waze te akwamwesa lamba kuli akwo. Ha kulinga chino, iye yamanununa umwe uprofeto. Mu Yisoneko ya Hepreu, atu pichi waze akwete ndundo, mashimbu amwe kakwatesa ni minda yize yili ni tupila a meya, ni mitondo yinene nawa yikolo. (Samu 92:12; Iza. 61:3; Jere. 31:12) Alioze, waze keshi ni yoze maakalila ni waze akwamwesa lamba, kakwatesa ni lumbungu wa kufwenya ni muya wa ndeya uze unayi ni kujima, hanji ngwetu, yuma yize kuyishi ni ulemu. (Tanga Izaia 42:3; Mateu 12:20) Mu uprofeto, Izaia yatesa yuma yino hanga ahanjike ha zango ni keke yize Yesu te masolwela atu waze te keshi kwalemesa kuli akwo.

7-8. Kuchi Yesu amanunwine uprofweto wa Izaia?

⁷ Sango asonekene Mateu, jakusolola chize Yesu amanunwine uprofeto wa Izaia uze wambile ngwo: “Lumbungu wa kufwenya kechi kamumakuna ni muya wa ndeya uze wakuneha mwishi kechi kaujima.” Yimwe ya ku yikomokeso yize Yesu alingile, yakwashile atu waze te akwamwesa lamba. Ayo kota te kakulivwa ngwe lumbungu wa kufwenya, keshi ni kutalatala nichimwe nawa kapwile ni kulivwa ngwe muya wa ndeya uze unayi ni kujima. Ngwe chilweza, chisuho chimwe Yesu yawana umwe lunga yoze wapwile ni musongo wa mbumba. Lunga wacho kakapwile ni kutalatala ngwo mamuuka ni kupwa cheka hakachi ka asoko ni masepa jenyi. (Luka 5:12, 13) Yesu nawa kanyingikine umwe lunga yoze wapwile kanaye. Kuchi te lunga yono apwile ni kulivwa muze apwile ni kumona akwo mahanjika ni kuwahilila, alioze iye keshi kuhasa kuchilinga? (Marku 7:32, 33) Hi yino wika ko.

⁸ Ha matangwa ja Yesu, A-Yunda anji kapwile ni kunyonga ngwo atu waze ayiza ni yitonji, kakumona lamba mumu lia shili yo hanji ya yisemi jo. (Yoa. 9:2) Mumu lia manyonga wano api, atu waze te akumona lamba kapwile ni kwalelesa kuli akwo. Chikwo nawa, o te kakulivwa ngwe keshi alemu. Alioze Yesu yauka atu jacho ni kusolola ngwo, kakulihulumba hali ayo. Ha kuchilinga, yamanununa uprofweto wa Izaia. Kuchi kunyingika chino chakutujikijisa?

9. Kuchi A-Hepreu 4:15, 16 unasolola ngwo Mwata wetu wa Asasendote kananyingika kanawa atu yihenge?

⁹ Tanga A-Hepreu 4:15, 16. Mutuhasa kupwa ni shindakenyo ngwetu, Yesu mashimbu eswe malisa mu chihela chetu. Yika tunambe kwamba? Mu Ngregu, liji ‘kunyingika kanawa’ linalumbunuka kwivwa chinyengo chinji ni kwivwa yikola ya akwetu. (Tesa ni A-Hepreu 10:34, haze maliji wano anaalumbununa ngwo, kuvwila keke.) Muze twakutanga mu Mbimbiliya yikomokeso ya Yesu, twakumona chize iye apwile ni kusolwela atu keke. Iye te keshi kumushinjila hanga achilinge. Alioze te kakulihulumba chinji hali atu, kashika azangile kwakwasa. Ngwe chilweza, muze awukile umwe lunga mukwa-mbumba, te mahasa kuchilinga chakuhona kumukundama, alioze iye yamukwata. Chinasoloka ngwe chino chapwile chisuho chitangu, chize umwe mutu akwachile lunga wacho, chize haze akwachikile mbumba. Tunyongenu nawa hali lunga kanaye yoze Yesu awukile. Ni zango lieswe, iye yamutwala ku chihela kuze kukushi mutu niumwe nawa kunalihola. Tunyongenu nawa yize yalingiwile muze umwe pwo yoze te wakulinga yuma yipi, alikonyekene ni kukusumuna molu ja Yesu ni masoji. Umwe Ka-Fariseu yeseka kupatwila pwo wacho. Alioze, Yesu yamukalila ni kukumika Ka-Fariseu wacho. (Mateu 8:3; Marku 7:33; Luka 7:44) Yesu kakehukile atu waze te ayiza ni waze alingile yimwe shili yinene. Kwamba pundu, iye kazangile hanga atu akundame kuli iye. Chikwo nawa, te kakwasolwela zango lize apwile nalio hali ayo. Ni yetu mutuhasa kupwa ni shindakenyo ngwetu, Yesu machinunga ni kulisa mu chihela chetu.

CHIZE TWAKWIMBULULA MWATA WETU WA ASASENDOTE MUSONO

¹⁰ Kuchi mutuhasa kukwasa atu waze afwa matwi ni tupuputa? (Tala nawa yizulie.)

¹⁰ Yetu tumbaji twa Yesu, twakusa tachi hanga tumwimbulule ha kusolwela akwetu zango, ha kulisa mu chihela cho ni kwasolwela keke. (1 Petu. 2:21; 3:8) Kwamba pundu, yetu kutuchi kuhasa kuuka atu waze afwa matwi hanji tupuputa. Alioze mutuhasa kwakwasa ku ufulielo. Ngwe chilweza, mikanda yetu yize yakulumbununa Mbimbiliya, musono yili mu malimi a tunaye kuhiana 100. Atu waze keshi kuhasa kumona kanawa, mahasa kuwana mikanda mu braille yize yili mu malimi kuhiana 60. Kuli nawa maliji a kukopa ni yinema mu malimi kuhiana 100. Yino yeswe, kakuyilinga hanga yikwase tunaye ni waze afwa matwi kupwa masepa ja Yehova ni a Mwanenyi Yesu Kristu.

11. Kuchi ululikiso wa Yehova wakwimbulula Yesu ni kusolwela atu keke? (Yilinga 2:5-7, 33) (Tala nawa yizulie.)

¹¹ Ululikiso wa Yehova wakusa tachi hanga ukwase atu a mutapu weswe. Twiulukenu ngwetu hanyima lia kumuhindwisa, Yesu kahele tumbaji twenyi spiritu yisandu hanga atu waze apwile ha chiwanyino cha Pentekoste ahase kwivwa sango jipema ‘mu malimi jo.’ (Tanga Yilinga 2:5-7, 33.) Ha kukaula usongwelo wa Yesu, ululikiso wakutuhwisa mikanda yize yakulumbununa Mbimbiliya mu malimi kuhiana 1,000. Malimi jacho, amwe kakwahanjika kuli atu akehe wika. Ngwe chilweza, amwe a ku malimi jacho kali Ameríndio waze akuhanjika wika kuli atu akehe ku América ya ku Norte ni América ya ku Sule. Chipwe chocho, mikanda yetu yili mu malimi kuhiana 160, hanga yikwase atu waze akuhanjika malimi jacho apwe ni uhashi wa kwivwa sango jipema. Mikanda yetu yiliko nawa mu malimi a Romani kuhiana 20. Chikwo nawa atu anji waze akuhanjika malimi wano, hanapu Yela ja Yehova.

12. Yika ululikiso wa Yehova wakulinga hanga ukwase atu musono?

¹² Kuchizako kwambulwila atu sango jipema, ululikiso wa Yehova wakukwasa nawa waze akupalika mu luyinda wa chisemewa. Mba chino chipwe chashi, tununu a tununu twa Yela ja Yehova kakulihana hanga akwase atu waze anapalika mu luyinda. Ululikiso nawa wakutunga yihela muze atu akulikungulwila hanga alilongese hakutwala ku zango lia Yehova ni kumuwayila.

MWATA WETU WA SASENDOTE MAHASA KUTUKWASA

13. Mu majila aka Yesu akutukwashilamo musono?

¹³ Kafunga ketu mupema Yesu, kananyingika kanawa yize umwe ni umwe wa kuli yetu anafupu ku ufulielo. (Yoa. 10:14; Efwe. 4:7) Ha yisuho yimwe, yuma ku mwono wetu muyihasa kwalumuka ni kututwala tulivwe ngwe muya wa ndeya uze unayi ni kujima, hanji nawa ngwe lumbungu yoze afwenya. Mutuhasa kuhonga mumu lia umwe musongo, mumu lia umwe kapalia twalinga, hanji mumu lia kuhona kulivwashana ni umwe ndumbu. Mba mumu lia yikola yize tunevwu, mutuhasa kumona ngwo chili chikalu kutala kulutwe ni kunyonga ha kutalatala chetu. Alioze, twiulukenu ngwetu Yesu kakumona yize yinapalika ku mwono wetu, nawa kananyingika kanawa yize yili ku mbunge yetu. Mumu lia kupwa mukwa-keke ni kulisa mu chihela chetu, iye kanazange chinji kutukwasa. Ngwe chilweza, iye mahasa kutwaha spiritu yisandu hanga yitwehe tachi jize tunafupu muze tunahongo. (Yoa. 16:7; Titu 3:6) Yesu mahasa nawa kutukwasa kupalikila mu “yawana ya atu,” hanji ngwetu makulwana a mu chikungulwila ni muli mandumbu jetu a malunga ni a mapwo, hanga atutakamise.—Efwe. 4:8.

14. Yika mutuhasa kulinga nyi ngwe mutunenganyana?

¹⁴ Nyi ndeya ye yinayi ni kujima hanji unalivwu ngwe unafwenyoka, iwuluka ngwe Yesu kali Mwata wa Asasendote, nawa nyonga ha chize yino yinakwate hali yena. Iwuluka nawa ngwe, Yehova kakatumine wika Yesu hano hashi hanga ahane mwono wenyi ngwe ukuule. Alioze hanga akwase nawa Yesu kunyingika kanawa yipikalo yize atu akupalika hano hashi mumu lia uhenge wo. Muze twakuhonga mumu lia tupalia jetu, Yesu kakupwa hamwe ni yetu hanga atukwase “ha shimbu lialita.”—Hepre. 4:15, 16.

15. Yika yakwashile ndumbu Stefano kuhiluka mu chikungulwila?

¹⁵ Yesu kakusongwela nawa waze anase tachi hanga afupe ni kukwasa waze ahichikile Yehova. (Mateu 18:12, 13) Tutalenu yize yalingiwile kuli Stefano.b Ha kupalika cha miaka 12 chize muze amuchijile mu chikungulwila, iye yaya ha chimwe kukunguluka, yamba ngwenyi: “Kuchakapwile chashi kuli yami. Alioze, nazangile kupwa cheka mu usoko wa Yehova. Makulwana a mu chikungulwila waze alikungulwile hamwe ni yami, kangukwashile kulivwa kanawa. Ha yisuho yimwe, te nakunenganyana mumu lia kuhichika Yehova, nawa te nakuzanga kulitwamina. Alioze mandumbu yangwiulula ngwo, Yehova ni Yesu kaanazange hanga ngunyongonone. Muze nafunyine cheka mu chikungulwila, mandumbu eswe yangutambula ni zango yami ni usoko wami. Ha kupalika cha mashimbu, mukwetu pwo yaputuka kulilongesa Mbimbiliya. Musono, yetu eswe twakuwayila Yehova.” Mwata wetu wa Asasendote kakuwahilila chinji muze akumona atu waze akulikonyeka matambula ukwaso ni kuhiluka mu chikungulwila.

16. Mumu liaka twakusakwilila ha kupwa ni Mwata wa Asasendote yoze unatunyingika kanawa?

¹⁶ Muze apwile hano hashi, Yesu kakwashile atu anji waze afupile ukwaso ha shimbu lialita. Musono, mutuhasa kupwa ni shindakenyo ngwetu, iye matukwasa shimbu lieswalio mutufupa ukwaso wenyi. Kwasala hakehe, mu chifuchi chaha iye makwasa atu apwe angunu ni kwapulula ku shili. Tunasakwilila chinji Yehova, Zambi wa too ni zango ni keke, ha kutwaha Mwata wa Asasendote yoze unatunyingika kanawa, Mwanenyi Yesu Kristu.