Yihula ya Waze Akutanga Mikanda Yetu

Kwasala hakehe, nyonga lika Yehova masa mu mambunge ja manguvulu?

Mukanda wa Usolwelo 17:16, 17 wakwamba hakutwala ku luyinda munene ngwo: “Kumi lia mbinga jize wamwene ni ngongo kumakavwila kole chikoi. Ayo kumakamupwisa wa hululu ni kumuhichika uselesele, kumaakalia musunya wenyi ni kumwocha ha kahia. Mumu Zambi hanase mu mambunge jo nyonga lia kulinga upale wenyi. O eswe kali ni nyonga limuwika, hanji ngwetu, kuhana wanangana wo kuli ngongo.” Mikanda yetu yapwile ni kwamba ngwo, “nyonga” lize Yehova makasa mu mambunge ja manguvulu, lili nyonga lia kunongesa uwayilo wa mahuza.

Alioze twapwa ni chimwe kwalumuka ha ulumbunwiso uno. “Nyonga” lize Zambi makasa mu mambunge ja manguvulu, lili lia “kuhana wanangana wo kuli ngongo.” Mba tunyingike kanawa chize uprofeto uno muukamanunuka, tukumbululenu yimwe yihula.

Uprofeto uno hali aya unahanjikila? “Chikoi” yoze akuvuluka nawa ngwo “Babilonia Yinene,” kanalumbunuka “uwayilo wa mahuza wa hashi heswe.” “Ngongo muchila” kanalumbunuka Kulinunga cha Mavungu. (Nações Unidas) Kasolokele ha mwaka 1919 ni nyonga lia kuneha sambukila hashi heswe, nawa kunyima te kakumuvuluka ngwo Liga das Nações. (Uso. 17:3-5) “Kumi lia mbinga” jinalumbunuka manguvulu eswe waze akukwasa ngongo.

Usepa uka chikoi ni ngongo muchila akwete? Pwo te “kanatwama” helu lia ngongo muchila. Chino chinalumbunuka ngwo, iye kakukwasa ngongo ni kweseka kumusongwela.

Yika muyikalingiwa kuli chikoi? Ngongo ni kumi lia mbinga “kumakavwila kole chikoi,” makamutambula upite wenyi weswe ni kusolola kuli atu yitanga yenyi yipi. Ayo nawa makamanununa upatwilo wa Yehova ha kunongesa chikoi liakulu. (Uso. 17:1; 18:8) Chino, muchikasa songo ha uwayilo weswe wa mahuza. Alioze shimbu yino kanda yichilingiwa, Yehova makatwala manguvulu kulinga chimwe chuma chize kanda chichilingiwa kama.

Yika Yehova makatwala manguvulu hanga alinge? Iye kumakasa mu mambunge jo “nyonga” lia kumanununa upale wenyi. Hanji ngwetu, makatwala manguvulu hanga ahane “dundo jo ni chiyulo cho kuli ngongo [muchila]” hanji ngwetu, Kulinunga cha Mavungu. (Nações Unidas) (Uso. 17:13) Yika chino chinalumbunuka? Shina manguvulu makakwata ene chiyulo cha kuhana ndundo ni chiyulo cho kuli ngongo? Ka. Uprofeto wakwamba ngwo, Zambi mwene makaatwala kulinga upale wenyi. (Yishi. 21:1; tesa nawa ni Izaia 44:28.) Shina kwalumuka chino muchilingiwa hakehe-hakehe? Ka. Muchikalingiwa ha shimbu limuwika. Muze chino muchilingiwa, ngongo makakalakalisa ndundo jize amuhele, hanga amanunune upatwilo wa Yehova ha kunongesa liakulu uwayilo weswe wa mahuza.

Kashika, yika mutuhasa kushimbwila? Kutwatambile kushimbwila ngwetu, mutumona sango ja chize manguvulu hakehe-hakehe maputuka kukwasa Kulinunga cha Mavungu. (Nações Unidas) Chuma twatamba kushimbwila chili ngwo: Susumuku, Yehova matwala manguvulu hanga ahane ndundo jo kuli ngongo. Muze yino muyikalingiwa, mutukanyingika ngwetu kwasala hakehe luyinda munene aputuke. Alioze muze yuma yino kanda yichilingiwa, “tulawolenu ni kununga ni kunyonga kanawa,” mumu kwasala hakehe yuma muyalumuka susumuku.—1 Tesa. 5:6